ارفعوا ايديكم عن تاريخ امدرمان ،يا قساة القلوب، جامع الخليفة في مهب الريح

كما ضاعت حدائق الحيوان بالخرطوم يضيع الآن أهم صرح أثري حضاري ويمثل أحد تراث السودان العظيم وامدرمان العريقة ...
سلطات ولاية الخرطوم وزمرتها تشرع في إقامة مجمع تجاري في ساحة مسجد ميدان الخليفة بامدرمان بعد أن طوقته من الخارج وأقامة على سوره المحال التجارية وقسمتها لمن تشاء
إن هذا المسجد بوصفه يقع في منطقة ذات بعد أثري تارخي حيث يضم** بيت الخليفة** ودارا للحربية **ودار الرياضةالشهيرة التى كانت تضم منزل السيد البشرى ومنزل الأمير يعقوب ومنزل شيخ الدين (السجن)
يعلم تماما أساتذة التاريخ أن هذا المسجد الذي شيد عام 1887 والذي كان أحد رموز دولة المهدية ،ذلك التارخ العظيم الذي درسه كل أبناء السودان ،تتقول عليه الآن أيادي لها مصالح خفية ، بل وضعت مخططها الهندسي في إبتلاعه كما أبتلعت الكثير من المواقع... وآفة التغير لديهم طالت الكثير من المواقع التاريخية .
إن مصلحة الآثار هي الجهة الوحيدة التى لها حق التصرف في هذا الموقع إن أبقت السلطات لها رأيا أو مشوره أو إختصاص
هل تعلمون أن السلطات البرطانية نفسها أبقت على هذه المعالم لإحترامها لقدسيتهاوأثرها التاريخي بل عدلت عن أفكار وآراء كتشنر آنذاك في تحويلها إلى ميادين ومدارس ومحال تجارية...إن بريطانيا رغم عدائها لدولة المهدية لكنها لم تفعل ما تفعله الآن السلطات بالآثار التاريخية ....
إن تغير تصميم مسجد امدرمان العتيق كان له الأثر السلبي لدى أهل ومواطنى أمدرمان.
.. المساجد العتيقة في تركيا موجودة الآن منذ العهد العثمانى يرتادها الزوار والسواح من كل أنحاء العالم كمسجد السلطان أحمد.ومسجد آى سراى .ومسجد طوب قابي بإسطنبول لم يطلها أى تغير إننا من هنا كمواطنين لمدينة أمدرمان العريقة العاصمة التاريخية الآولى وكفنانين تشكيلين وصحفيين نهيب بكل من تنفس ذفرات من شذى عبيرها الفواح وتمشى على ضفاف نيلهاالعظيم بود درو أو كبر مقيما للصلاة أو ترنح بشجى ضربات نوباتها ذكرا لله في ليالي المولد بذلك الفناء المعروف لدى أهل أمدرمان قاطبة(مبدان الخليفة)..لذا نهيب بكل من يقرأ هذا البـــوســــــت
أن يضيف رأيا أو كلمات بحق هذا المعلم التاريخي الذي يستنجد بكم ...وااااااااااااأمدرماه.
------------------
رعى الله أياما بها قد تقادمت ...
وآثارها في القلب غير قدام
محمد مختار جعفر
فنان تشكيلي..

أرفعوا أيديكم عن جامع الخليفه .

أخي الحبيب محمد مختار
سيأتي من يقول لك هنا:" خليفة شنو و جامع شنو؟ في داهية".فلا تصدم!
التحية لك و أنت تطلق صوت ضميرك عالياً
فشعب لا يحترم تاريخه يستحق ما يلاقي
محبتي و شكري

العزيزة والحبيبة......... lana mahdi التحية والتجلة..
نعم.. نعم.. أعلم تماما بأن المداهنين وخاوى النفوس والضمائر
من يقول ذلك بل أتوقع أبعد من ذلك لأن تربيتا الوطنيةلأجيالنا
إختلت كما يختل مركز العصب فى جسد الأمم .. ويا لعجبى من أمة
تتنكر أو تسعى لمحو إرثها وتاريخها والله إنها لطامة كبرى وكارثة
أيما كارثة اللهم إ نا قد بلغنا فاشهد... اللهم إنا قد بلغنا
فأشهد.............................................. تحياتى

محمد مختار جعفر

الآخ العزيز محمد مختار جعفر
التحيات الطيبات
الجماعة ديل ما كفاهم السوق العربي والسوق الأفرنجي وسوق سعد قشرة ومسرح مدينة الدلنج وسوق الفرشاية جايين علي فسحة جامع الخليفة!!؟
ياخي الحيتان ذاتا ما عندها نهم قدر دة!
هو إحنا ناقصين دكاكين!!؟ بعدين ياخي الدكاكين دي ممكن تتعمل في أي حتة تانية!
آرجو آن تقوم منظمات المجتمع المدني بحملة وطنية ضد هذه الممارسات وإيقاف هؤلاء الناس عند حدودهم.
وأرجو آن يكون ذلك بداية لاهتمام الناس في السودان بالآثار التاريخية والعمل على حمايتها في أي مكان - دي قيمتها آكبر من مليون دكان لو يعلمون.
وبعدين ما نتكل القصة علي ناس حزب الأمة، دة موضوع بخص آي زول
ممكن الناس تعمل مظاهرات احتجاجية
ممكن الناس تعمل ندوات حول الموضوع لخلق رأي عام مضاد لسياسات الحكومة وحث الناس علي عدم توريط أنفسهم بشراء هذه الدكاكين
يمكن عمل وثيقة تعاهد على أن تكون إزالة هذه الدكاكين ضمن أولويات الأحزاب السياسية في برامجها الإنتخابية (يعني عشان آي زول بشتري ليهو دكان هناك يعرف من هسي إنو القصة دي ما دايمة لأنها عمل غير مشروع)
يمكن الإتصال بالجهات المعنية بالأثار التاريخية مثل منظمة اليونيسكو لتقوم بحث الحكومة السودانية على التوقف عن مثل هذا النوع من الآعمال
يمكن، من باب الإيجابية، تقديم اقتراحات للحكومة بإنشاء ما تريد من دكاكين في مناطق أخري - فلا تخلو البلاد من مهندسين ومخططين مدنيين على قدر من المسئولية والوطنية.
-------------

كفايــــــــــــــــــــــــــــــة
سأكون شاكرا لمن لديه الإمكانية إنو يمشي يلزق "كفاية" بتاعتي دي في المحلة البعملوا فيها دكاكينهم دي عشان يساعدني في التعبير عن احتجاجي


أبكر آدم إسماعيل

أرفعوا أيديكم عن تاريخنا أيها اللصوص .

لا تحرموا الأجيال القادمة أن تعيش بلا تاريخ .

العزيز \ أبكر آدم إسماعيل....
العزيزة\آمنة مختار.... لكما التحية والتجلة...
--------------------------------------
صح لسانك ياإبن آدم إسماعيل والله الذى لا اله غيره مافى شىء
ضيع الوطن غير أهله فى سلبيتهم وعدم إكتراثهم بقضايهم المصيرية.
والله حكومات العسكر أكسبت الكثيرين من هذا الشعب أللا مبالاه وعدم
الإهتمام، سبحانك ربى ،ما ذا دهى الناس .
إن ما قدمته من إقتراحات أخ أبكر ، لهى جديرة بأن يؤخذ بها، وأنا أضم صوتى
لك ولآمنه مختار برفع شعار (كفــــــــاية) فى كل محل تاريخى يهم
الأمة، ويا رواد الممبر أسمعوا وأعوا تماما لما تفضل به الأخ الأستاذ
أبكر من إقتراحات ، وأنه قد برأ ذمته تجاه الوطن فى يوم من الأيام وإنا نشهد بذلك
وسنظل نرددها كإعلاميين .....والله من وراء القصد ولكما محبتى ....

محمد مختار جعفر...

الأخ العزيز lمحمد مختار جعفر
تحياتي الطيبات
فعلا زي ما قلت الناس بقوا بفكروا بسلبية وبتصرفوا بلا مبالاة
لكن أثبتت التجارب إنو جهد المقل أحيانا ممكن يغير حاجات كتيرة
ياخي خلينا نعمل جهد المقل دة ولما نفشل "لا يكلف الله نفسا إلا وسعها"
لكن السكوت على الظلم عار
بعدين دة موضوع واضح، يعني الخلافات السياسية بتاعة حزب منو ضد منو دي ما عندها معني هنا
وإنتصارنا في الصغير دة بخلينا ننتصر في الكبير
ياخي أي زول ممكن يعمل حاجة
أي زول ممكن يكتب ليهو في ورقة بيضا "كفاية" ويمشي يلصقها في السور بتاع المهزلة داك، بكدة بكون عمل حاجة
وبعد ستين ورقة زي دي، العالم ببدأ يتغير رغم أنف الناس الزي الجبهجية البمارسوا الممارسات المضرة دي
العالم دة بقي عنده آليات أخرى ما نقعد نهزم نفسنا بنفسنا
إلي الأمام يا شباب
أي زول ماشي يحضر ليهو ندوة في البشير الريح آو ماشي يجكس يقوم يلزق ليهو ورقة يقول "أنا ضد الكلام دة"
وصدقوني صوت الحق في النهاية حينتصر بس خلونا من "سيبك" دي. إحنا ممكن نعمل حاجات كتيرة


أبكر آدم إسماعيل

اين جماهير حزب الأمة؟؟؟!!!

اين الأنصار؟؟؟!!!!!!

العزيزة ... آمنـــه مختــــار...
سلام كبير مربع
الأنصار موجودين وبكثرة، تلك الكثرة التى تخيف الأعداء..
وتاريخهم معروف ووفائهم موثوق ولكن القضية هى قضية شعب ووطن
وإرث تاريخى محفوظ تشهد به دور الوثائق العالمية ومتاحفها
مهما حاول أصحاب النفوس الضعيفة طمس معلم من معالمها..
والله من وراء القصد........ لك التحية

محمد مختار ...