الأستاذ ابكر آدم اسماعيل

بغرت من الأخت دوما وحضور الأستاذ كبر
قلت لنجرب حظنامع صديق الحرف الاستاذ ابكر

وإليه أقول
طال الجفاف فهل من بعض غوث
!!!!!

(ما اكون جطت القواعد بس)

هلم يا استاذنا،،، الخرمة لحرفك المميز كسرت الراس

أختنا بت قضيم فيك الخير والبركة وأذيعك سراً أنني إتصلت بالأخ الدكتور أبكر مستفسراً عن سبب بعاده وغيابه عن المنبر فكان رده رغم الزحام والمشغولية أنه معنا يسمع ويرى وأحسب أن ظروف بعاده إلى زوال وسوف يعود. وفي إنتظارك يا دكتور.

الحمد لله
الله يطمنكم
يا بت قضيم ويا ملا عمر
والله امس كنت افكر أكتب وأسأل عن الدكتور
الواحد يبغر منكم ويتمنى له من يتفقد حضوره وغيابه
أدامكما الله للدكتور
وأدام الدكتور لكما
وهنيئا لنا ولكم بهذه المعزة الحميمة

لوووووووووووول يا بت قضيم اها عشان تبغري زياده جيبي اضانك جاي وشوش وششش بعد شهور قليله والله قلت اخليها مفاجاة لكين اجبرتيني . التحيه لدكتور ادم ابكر وبما انه علي مقربه من كبر اتمني زيارته ايضا اصلوا انا بزور من غير ميعاد والمعرفه تحصل بعد نتلاقي

شكراً اخي الملا عمر
والحمد لله ان الدكتور بخير
حقيقي الواحد افتقده
المرة الجاية سلم لينا عليه

ويا اهل العوض اديها صنة يومين
والله اسأل عنك سؤال الضهبان
قلت شنو؟؟؟

دوما العزيزة
ازيعك سراً انا برضو؟؟؟
انا ببغركم زيادة بعد ده
ويا اما تسوقيني معاك ،،، يا اما تجونا انتوا بي جاي،،، واظن جيتكم اسهل،،،
وتسلمي وسلم كل الناس الحلوين
عليك الله بالجد تعالي لينا ياخي

بت قضيم يا ضنين الوعد خلاص بنسوقك معانا بس تكتري من جياتك

الأخوات والإخوة الأعزاء
بت قضيم
الملا عمر
أهل العوض
دوما
سلام وسأل عنكم الخير
زمان، في أيام الجامعة، كنا ننقطع عن الكتابة على جدران الكافتير (البورد بتاع زمان) في أيام الحصار الأكاديمي، ولكن في هذه الأيام تطورت الحصارات كما تطور البوردات
ولكن الواقع أيضا أنني من المقلين في الكتابة
على كل حال ربنا يقدرنا




أبكر آدم إسماعيل

أخي الدكتور أبكر
الحمد لله الذي شرفنا بطلتك وإن كانت على إستحياء ، والشكر لك أخي على ما خصصتني به من رسالتين كريمتين دون سائر خلق الله رداً على رسائلي لشخصك الكريم. وأعتب عليك أخي أبكر رغم عدم هوسي بكرة القدم شأن الكثير من خلق الله أن بخست فوز منتخبنا الوطني على جمهورية بنين بإعتبار أنها لا إنجازات لها في شأن كرة القدم أو التيوة حتى على الصعيدين الإقليمي والدولي وأنهى إلى سمعكم سيدي أن نزال منتخبنا الوطني القادم سوف يكون ضد جمهورية بنات وسوف ننتصر أو نتعادل وذلك أضعف الإيمان.
لماذا تم تغيير مسمى منتخبنا السوداني من المنتخب أو الفريق القومي إلى المنتخب الوطني؟ هلا أفادنا كمال حامد مخرج ومعد ومذيع ومقدم وصاحب برنامج عالم الرياضه في التلفزيون السوداني والذي يمتد زمنه لمدة تتجاوز المائة وعشرون دقيقة متواصلة كأطول برنامج تلفزيوني ممل جداً عن الفرق بين القومية والوطنية؟
أعلم أنا علم اليقين بأن الوطنية سينما والوطنية خدمة وهي كذلك مساهمة للمغتربين في الأرض فما هي القومية بخلاف كونها عاصمة أو هيئة للتلفزيون والمسرح.
أشكر دوما التي سنت هذه السنة الحميدة وأخرجت لنا محمد النور كبر من خبائه وأشكر بت قضيم التي تبعتها بإحسان وأخرجت أبكر آدم إسماعيل من غياهب الجب في مانشستر سيتي.

بت قضـيم
كتر خيرك على السؤال سبقتينا بثواني الثواني الضيعت حظ اسامة سرور في "الضفة الأخرى" رائعة الدكتور الاخيرة
و حتما سنلتقي يا العزيزة دوما..بس كتري الكبابي وشاي اللبن ..و لو معاها زلابية تكون تمت الخياطة بالحرير
ولكم كل الود
ابكر وين انت يا اخي، واللـه انا مزور زرة كيكو في جغب حجر الصبي..
ودمت
كبر

مزور زرة كيكو في جغب حجر الصبي
خطيروالله يا استاذ
دي جبتها من وين؟؟؟

تحياتي للجميع

ونخص استاذنا ابكر
الذي نقول له
تسلم يا امير يا كريم
شكراً للطلة الحلوة
ودام فضلك

وتسلم اخي الملا على حضورك الكريم

وتاني يا دوما بقول
ما بتجينا؟؟؟

بت قضيم حبابك
يعني شكلك عارفة المفردات دي كويس..طبعا سمعوني فيها الكتير ..اقلها انها رطانة..ولا كلام الطير في سوبا ولا الباقير ولا عد حسين..
جبتها من وين؟ اصلي انا زول محلي خالص..
اقول ليك حاجة..ما فيها حاجة لو سألتي ممكن اشرح ليك معانيه..ولو عارف كلمي جارتك
ودمت
كبر

أهلين بالأستاذ كبر
نورت البوست

عن المصطلحات فأنا شبهت على
زنقة الكلب في الطابونة
والحقيقة أنا للآن ما عارفة الزنق الكلب في الطابونة شنو

لكن زرة كيكو في حجر الصبي
الحقيقة ما فاهماها خالص
شفتني حنكش كيف؟؟؟

وتسلم مقدما على الشرح

بت قضيم تخيلي انو الكلب طلع ما اتزرا في طابونه بل قالو في حله فلاته حسب روايه احد اعضاء البورد في بوست سابق
ولا يبدو انو دا كلب تاني
ولا هو زاتوو بس اتزرا اكتر من مره
حكايتو شنو ما عرفناها
حيرتونا في امره
تحياتي

والله يا ايهاب الكلب اتزنق في طابونة
في حلة فلاتة دي اسرائيليات لا عليك بها

بالجد ما عارف اصل المثل ده؟؟
اظن الأستاذ كبر يفيدنا

بت قضـيم..حبابك
كان عندي احساسي انو القصة ما واقعة ليك..ولا اكون ياربي انا نجرت المثل ده براي؟..المهم ليك المفردات ومعانيها..
الزرة انتي عارفاها
الكيكو..كائن جبلي اشبه بالسخل..العنبلوق ..ال
(kid)
..وبالمناسبة
Kids..
يعني سخلان..صغار الماعز

ويستغل لحمه في علاج كتير من الامراض خصوصا اليرقان الاسود..واول ماتدخل قرضة (لقمة)من لحم الكيكو في فم المريض..يمرق اليرقان رافع بيرك..واخاف ان يدخل هذا الكائن المدهش في قائمة الحيوانات القابلة للانقراض..والله يجيبك يا بريجيت باردو بحلتنا
الجغب..مفردة كردفانية خالص..وتعني الشعبة الجبلية..ودي طبعاشغل جغرافية وكده يعني..
حجر..وتعني الجبل..وغالبية اهالي كردفان لا تقول الجبال بل الحجار..
الصــبي..اخر جبل من جبال النوبة ناحية الشمال..وهو قريب جدا من قرية لابدة مسقط رأس الدكتور..ومن مشاهير جبل الصبي مكي علي بلايل..
انشاء اللـه تكون القصة وقعة ليك..
اما قولك زرة كلب في طابونة ..الطابونة عندنا هي الفرن..لكن الصورة الشايعة للمثل تقول زرة كلب في سير طاحونة..وهناك نوع من الطواحين..موديل قديم خالص..يعمل بسير طوله خمس امتار وعلى هيئة جنزير العجلة..والظاهر الكلب اول مرة دخل هناك كان خرمان وكايس لسفة دقيق..ما هو كل الكائنات بتسف لكن يوم وحيد ماشفنا لينا واحد اتزر واصبح مضرب مثل..
اما رواية اخونا ايهاب..زرة كلب في حلة فلاتة..فهي تعود لعادة شايعة وسط اهلنا الفلاتة في كونهم بتاتا لا يربون الكلاب والكدايس..وليك ان تتخيلي حال هذا الكلب حينما يمر بواحد من تلك الحلال..
وافتكر كده تكون القصة وقعت ليك..وبسهولة ممكن تكتشفي كيف انو مثلي مضروب ساكت ..لانو بكل بساطة الجغب هو وطن الكيكو..وبالتالي مافي منطق يخليهو اتزر..وغايتو اتحملي مسئوليتك لو حبيتي تسخدمي هذا المثل..وحاولي ما تقوليهو قدام ناس جنوب كردفان..لو لمتك بيهم ظروف مثلا..لأنهم ح يضحكوا عليك ويبرلموك برلمة السنين..وعاد باقي ليك انا ح ارضي بانو بت قضيم تتبرلم بسبب مثلي المنجور..افو فوق جتتي واللـه..
ودمت
كبر

اصبح الجيل الجديد يقول
تتدقس
بدل تتبرلم
(خليك مع الزمن)
يا قول المرحوم

استاذي الفاضل كبر
تحياتي
واشكرك كثيرا لشرح المثل،،، أهل العوض غايتو جغبزوا،،، وانا حبيت اطلع فاهمة فأثنيت على شرحه الطلع خارم بارم قاطعوا من راسو
يعنى اثنتانا انفضحنا
المهم
الكلمة التي لم افهمها هي الجغب،،، أما الكيكو فتخيلت انه حاجة ذي الضب،،، ما شافع العنبلوق،،، والعنبلوق دي زاتها في بعض الروايات دايرة ليها شرح

ما رأيك تفتح لنا بوست (دي ذي تفتح لينا دكان) نذكر فيه كل مصطلحاتنا وكلماتنا الخاصة بنا؟؟؟
تكون ما قصرت لأن جيل كبير الحقيقة يفتقد لسماع هذه الكلمات وبالتالي لا يفهمها،، وانا اظن اننا يجب أن نحتفظ بها إن شاء الله كان في متحف فهي تميزنا عن غيرنا من الشعوب وتعطينا إحساس بالخصوصية والإلفة
انا غايتو بتكيف جداً لما اتكلم قدام شعوب أخرى مع سوداني آخر ويكونوا ما فاهمين رطانتنا دي شنو

كما ادعوك بزيارة بوست الأخ اهل العوض (هين-من معلقات البطانة) وكان فهمت فوقه شي تبقى اتقطعت

وتسلم