لم يصر الاستاذ أحمد البلال الطيب علي تقديم الفشل الكلوي؟؟

السلام عليكم بعد طول غياب فرضته علي ظروف عدم دخول العولمه والانترنت في حلتنا القابعه في محافظة البطانه شرق النيل الازرق ...لاادري ربما مازال الاتصال سهلا بين اهلها لذلك لن يضطروا لاستخدام الانترنت او ربما لان فواتير التلفون والكهرباء والماء قصمت ظهورهم لن يفكروا في زيادة الفواتير فاتورة خامسه او سادسة
الموضوع الذي اردت ان اكتبه هو مااحسست به بعد مشاهدتي لبرنامج في الواجهة والذي يصر مقدمه الاستاذ أحمد البلال الطيب ان يعيد نفس الموضوع للمرة الثالثه وهو موضوع الفشل الكلوي وزراعة الكلي في السودان...لماذا يقحم الرجل نفسه في هذا المجال وهناك برنامج متخصص في الطب الوقائي ويقدمه طبيب متخصص في مجال التثقيف الصحي
لقد اعاد وكرر نفس المواقف والمشاهد مع الطبيب الانسان الدكتور كمال ابوسن والذي لا يحتاج الي كل هذا الكم من الثناء من مقدم البرنامج حتي يعرف المشاهد من هو فهو معروف لدي الجميع بماقدمه وسيقدمه ان شاء الله
لقد احسست وكانني استمع الي (حكامه) كما يسمونها اهلنا في غرب السودان وهي امرأة متخصصه في مدح الناس والثناء عليهم بطريقة الغناء والشعر
ثم انه يصر ايضا ان ياتي بالمرضي وهم في الدقائق الاخيره لدخولهم غرفة العمليات ويقف امامهم ويذكرهم بانهم مصابون بمرض عضال ويكرر هذه الكلمه امام كل مريض مما يؤثر سلبا علي الحاله النفسيه للمريض وهو متوجه لغرفة العمليات
طريقة تقديمه للموضوع تعطي المشاهد احساس بان هناك مرض معدي وخطير ومنتشر بين الناس مماجعل معظم الناس في السودان يعتقدون انهم مصابون به ..وقد لاحظت ذلك خلال اجازتي هذه حيث اشتكي لي معظم من قابلتهم من رجال ونساء من انهم يعانون من الم بالكلي و عندهم اعتقاد جازم بان كل من اصابته ملاريا فسوف تسبب له فشل كلوي

لم لا ترجع للسياسه يااستاذ أحمد البلال وتترك الخبز لخبازه حتي لو ياكل نصفه
ام انها توصية حزبيه من وزير الصحة د.احمد بلال لك يااستاذ بتبني هذا الموضوع

بت الجزيرة أولاً حمد لله على السلامة
واشتقنا ليك والله

التانية

مالك مذكراني الحماني النوم، والله كان قلتا ليك أنا ما نمتا من أمبارح بالمغسة، ما حتصدقيني، أصابني الأرق بسبب هذا المدعو أحمد البلال الطيب، والذي من المفترض أن يصبح إسمه أقشر الجفاف الماشاف الطيب بي عينو اليمين.


ليه يا ربي كدا، وليه البلد ديك اتملت بالمهرجين والجواكر والجوكية والتجار، وليه وليه وليه، كتيرات الليهات، والله يدي العافية، لكن ما ظني نشوف عافية مع العينة الشفتها أمبارح في تلفزيون السودان، وتصدقي أنا زاتي بديت أشك إنو عندي أعراض كلى والسبب ما ملاريا، أظنه ود البلال الطيب.

ود شاموق الله يسلمك يارب
انا والله المغصه برضو حمتني النوم
اها قمت من النوم علي الكيبورد
بركه اللقيت لي مشارك
الله يبعد عنا شر الفشل الكلوي
وشر عباده

انا الماغسني

قال إحنا ما قاعد نلمع

والله كان دكتور كمال أب سن محتاج تلميعك كان ما يستاهل الدال الأولى في دكتور، ويا بت البطانة هاكي القالو ود حسوب في أب علي جد الدكتور القال المهرج عاوز يلمعو

هسع شفتو فوق ضهر الحصان بتلتت
ولصفي الدم ... علي دقنو المليحة اتشتت
جبل الموسم الفوقو القبايل ختت
أكان ما حضر ... قوم ناس خميس ما انسكت

.

بت النيل الازرق وود شاموق
ما بلقى عندكم شوال ليمون؟ ما تسالوني ليه؟ بس سريع الحالة مستفحلة

ازيك يا بت الجزيرة اختنا زمان كدى خلينا من احمد البلال انت سمعتى بيهو والله جابو ليك شنو التغا دا انشاء الله الاداك بالكوريك يدينا بالملعقة

ياودشاموق
المشكله انه عارف انه الراجل مامحتاج تلميع
لكن هو بيعمل في شنو ماعارفين


العطبراوي ياخوي
معليش كان السيره جابت ليك ...
لكن وحاتك شوال الليمون مابيحلك برضو


ود الجعلي#4
حبابك عشرة
انا برضو التغيت
اريتني اعرف اتغا عشان اتغا عليك ياالتغيان
لكم تحياتي

والله يا العطبرواي الزول دا بكاني بي دموعي من المغص الجاني

شوال ليمون ياعطبراوى ولا القرحة البدت تلتهب يادوب عرفت المرض العميري , ياخى لمن قريت الخبر قربت اتقيا
الله يدينا السلامة مانموت بالمغصه فى جنة الدنيا امريكا
ياخى ده كلام شنو والله الامريكان الطلبة المعاى لمن سالونى البرنامج بتاع التلفزيون عندكم كيف قلت والله البرنامج العادى ذي الكاميرا الخفية والضيف متورط
قالوا دى المتوقعنوا من دولة ديكتاتورية

يا أخ زمراوي الحكاية بسيطة جداً ما هى دكتاتورية ولا شيئ
الموضوع أن الفشل معشعش بدواخلنا منذ القدم
و محتاجين مليون كمال أبو سن لإستأصاله من مجتمعنا
و بدل من دراسة أسباب الفشل ناتي بحالات
و كأن الأستاذ أحمد بلا الطيب مكتشف ترياق الفهم العالمي و المحلي
و ربنا يحفظنا و إياكم و جميع المشاهدين ... عفوا المشاركين

الاخت بت الجزيره
سلام
اللهم لا اعتراض فى حكمك يا رب
.....
فى وقت باكر من الزمان قررت عقد الجلاد
استقطاع %5 من دخلها لهذا المرض ولى المرضى
فى وحده مستشفى الخرطوم
وكان د. محمد المهدى نصر الشاب الرائع
المهموم بهذا المرض الى حد كبير جدا
كانت مبادرته هو تسليط الضو على هذا الخطر القادم
ولم يجد غير عقد الجلاد لى هذا المشروع حيث اننا قدمنا حفلات عده
فى السودان وخارج السودان
فكانت مبادرتنا سابقه
واذا ودتى الكثير ساحكى لك ولكم
لكنه محزن

بنت الجزيره حمدا لله على سلامة العوده نعلم ان الموزايين فى السودان قد اصبحت معكوسه
فالكوز اصبح يمكن ان يحل محل الطبيب ومحل السياسى فالمؤهل اصبح فقط هو الموالاه لك ودى