Post: #1
Title: قصيده جديده
Author: Dr.Elsarrag
Date: 03-16-2003, 01:20 PM
بسم الله الرحمن الرحيم
اعزائي السلام عليكم ورحمة الله تعالى وبركاته اقدم لكم هذه القصيده عن شاب يسال عن مصيره العاطفي مع ست الودع اثناء مروره بها ويا لهول مصيره
ترى هل توفق في غرامه وحبه ام ماذا حدث له ؟ سنعرف ذلك في مدلول هذه القصيده وهي بعنوان :
حكاية مع ست الودع
شالت وختت ختت وشالت
رمت ودعاته وضحكت وقالت :
بشوف يا ولدي حياتك فيها
بنيه صبيه مفتون بيها
يزيدا جمال الدلال في تيها
سحر عينيها يغازل قلبك
وبسمة فاها بتخلب لبّك
وانت تشيل وتدي في حبك
بشوف محياها شبيهو البدرـ
وصوت كروان يضاهي القمري
اوّصف كيف احترت في امري
بقول يا والده :
لو انّي الدنيا وهبتها ليها
واشيلا واختّها بين ايديها
برضي بشوفه شويه عليها
وشالت وختّت وختّت وشالت
رمت ودعاته وبعدين قالت :
بدور يا ولدي اصارحك مّره
واقول ليك مره حقيقة مرّه
بشوف في قريب اتقدم ليها
وانت غريب ما تمشي عليها
رغم سعادتك بين ايديها
دحين يا ولدي اتيقّن واصبر
دوس على قلبك بس لو تقدر
تعيش وحداني لاخر العمر
رغم الوحده عذاب وماّسي
وليل الوحده دايما قاسي
بس يا ولدي لو اقدر اواسي
بكلمه حنينه تجبر خاطرك
او حتى اجاملك او مره اخاطرك
لكن يا ولدي الحب مقسوم
عذابه شديد وليله هموم
وياها الفرقه مصير محتوم
وياها الفرقه مصير محتوم
وشالت وختت وختت وشالت
رمت ودعاته وسكتت فتره
وبعدين قالت : اه يا حسره
بقول يا والده: كفاي حسرات
ريقي نشف خاتقه العبرات
سفري بعيد زادي الاّهات
واملي بنيتو وقايلو عباب
اتاري انهدّ وحاضنو ضباب
واخر عمري حصادي سراب ؟
واخر عمري حصادي سراب
|
Post: #2
Title: Re: قصيده جديده
Author: Elmosley
Date: 03-16-2003, 02:39 PM
Parent: #1
قصيده جميله وسيناريو جميل
|
Post: #3
Title: Re: قصيده جديده
Author: Dr.Elsarrag
Date: 03-16-2003, 09:03 PM
Parent: #1
نشكرك يا رائع على مشاعرك الرائعه
|
Post: #4
Title: Re: قصيده جديده
Author: WAD ELGAALI#4
Date: 03-16-2003, 09:08 PM
Parent: #3
والله يادكتور قمه وابداع
|
Post: #5
Title: Re: قصيده جديده
Author: ودرملية
Date: 03-17-2003, 01:17 AM
Parent: #4
سلامات
شكرا د.السراج
ولو تعلم ان هذه القصيدة ارجعتني قرابة العشر سنوات ان لم تخني الذاكرة
فهي تجربة عركتها وعركتني ولكني للاسف لم ادون شيئا منها
شكرا للقصيدة
وشكرا كثيفا لك
|
Post: #6
Title: Re: قصيده جديده
Author: Dr.Elsarrag
Date: 03-17-2003, 10:16 PM
Parent: #1
الاخ ود رمليه
اشكرك على مشاعرك النبيله وتعليقك الطيب عليها
وان شاء الله تكون اتعافيت وما نكون قلبنا عليك المواجع
خليك فى متابعه مستمره معانا وعندنا الكثير لسع حنقدمه
تحياتنا العطره
|
Post: #7
Title: Re: قصيده جديده
Author: Dr.Elsarrag
Date: 03-17-2003, 10:21 PM
Parent: #1
الاخ الغالى ود الغالى
اشكرك على مشاعرك الطيبه وبتشجيعكم المستمر يستمر الابداع
ونصل الى افاق الروعه وارضاء اذواق الكثيرين ما امكن وانت على راسهم
لك التحايا والود
|
|