دى كلها ردود؟..والعندو أنواع رد تانى يضيفا هنا...

لاحظت من ما مشيت وجيت...حركات...وعدم ردود..ونفور وصد وحوائط صد مش لبوستاتى...للبوستات البرد عليها...لووول ..أنا ماعارف الحركات دى معناهاشنو ولى شنو؟..
مافارقة معاى غايتو....لأنى اتلفت جاى وجاى ..عاينت فى المرايا لقيتنى أنا أنا...قست طولى لقيتو فى محلو ..وقفت على الميزان..لقيت وزنى هو هو ...يعنى لا زدت لانقصت...وده معناها الناس لا تملك انقاص حجم زول أو زيادته..مهما فعلت...
ومحاسن الأخلاق والكتابة لاتقاس بمن لووول على قول الغنوة أقيس محاسنك بمن...لكن المفروض نناقشو فى البورد بصراحة هو شكل الردود
ردود مجاملة
ردود على الجكس ودى عندها أهلها المتخصصين
ردود زعل
ردود مديدة حرقتنى
ردود من أجل الاستعراض بالمعلومة
ردود تابعة لما سبفها من ردود
ردود لتحوير وتحويل مجرى الموضوع
ردود لى فوقUP
ردود متحفظة
ردود محايدة
ردود تضيف الى البوست وهذه سيدة الردود
ردود مبطنة لا يعرف سرها سوى صاحب البوست ومن قام بالرد

دى كلها ردود؟..والعندو أنواع رد تانى يضيفا هنا

تحياتى
ودعزة

فضلا لاتقرأ هذا البوست أثناء قيادة سيارتك..أو ...بعد النوم
أو أثناء اطفاء أو اشعال شمعة..لمبة..ابتسامة..أو أثناء تناولك..لنصائحك اليومية من حبيبتك خطيبتك زوجتك...أو أثناء سماع نشرات الأخبار..أو قبيل تقرير المفتشين الدوليين الذين يبحثون عن أسلحة الشمار الكامل داخلك....
الموضوع وما فيهو اعادة تشغيل لمحطة كهرباء حيوية البورد ...وتحريكه ولو قليلا

ردود حسب الحاله النفسه للشخص
ردود زي كلام الليل المدهون بي مويه قشطه
وردود ترد الروح

ردود متل موية الزمن المدفوقة فى نهر
أها فى زول يقدر يفرز موية الرد من موية النهر القبيل؟ لووول


شكرا عزيزى خواض
وردك نسمة سرت فى صباح جميل...فر خيمتو بين نهرين أبيض وأزرق
تحياتى
ودعزة

ردود حسب ما قسمه الله من الفهم

ردود شلليه

ردود لعدم الموضوع

عزيزى مالك
أولا مرحب بيك بعد الغياب الطويل
وكلامك فى محلو...

لكن فى ردود حلوة برضو لووول
ردود..تحمل مثل الحسانية فى شنو
ردود تحمل زير البصيرة بت حمد
ردود تحمل روقان بال جحا وعمو
ردود اياك أعنى فاسمعى..يا ..

تحياتى
ودعزة

وما نسي
ردود ياناس انا موجود

ود عزه المبدع
لا تزال كما عهدي بك الإطلالة المبدعة والمدهشة في هذا البورد .وادام الله فيك هذه الحيوية. في نوع تاني من الردود وهي ردود خالف تذكر. وردود نحن وحدنا الذين نسير في طريق الصواب. وايضا نحن وحدنا المفوضون من الله
وردود ما انزل الله بها من سلطان وخليها مستورة .تحياتي يارائع
نسيت حاجه ردود خلي الموجه دي تعدي وهي تتمثل في دخول البوست دون الرد عليه .وردود موضوع لا يستحق الرد ومن الاساس الواحد ما بيدخل البوست المعني

ظهيرتكم
بنكهة القرنفل

ردود زول عوير
ردود زول اهبل
ردود زول شامي زول
ردود زول موجوع بالحيل
ردود زول كاتلو شمار
ردود زول موش مركز
ردود زول كهربتو زايدة
ردود زول بحرو زايد
ردود زول شارب قهوة
ردود زول مبسوط
ردود زول ما عندو رد
وبـــس

العزيز

ودعازة


ردود زي ردي ده

لفيت البورد كلو كايس لي موضوع اخت فيهو كلمتين

ما لقيت

ابدا اكتب واقرب اشوت اقوم امسح كلامي تاني

اقول ياخي يمكن يتعقد والا حاجة

في ناس بصراحة الواحد بيتحفظ في الرد الصريح عليهم

لانهم بيكونو لسه ما فهموك

وفي ناس تلتخ ليهم ساكت

ـــــــــــــــــــــــــــــــــــــــ

في ردود بتحيي البوست وان كان ميتا فطيسة

مثل ردود الملا عمر

واهل العوض

وقرشو

بصراحة شديدة الناس ديل دخلتم بتدي البوست بعد جديد وطاقة

وبسوو من الفسيخ شربات عديييل كدة

ـــــــــــــــــــــــــــــــــــــــــــــــ

وبالعكس من ذلك في ردود بتكتل البوست وان كان حيا ينطط

وهذا دائما يحدث في المواضيع الجادة

التي يحب البعض التخريم عن موضوعها الاصلي

والدخول مع هناي وهناية في وييييينك

ليك مدة ما ظاهر

وتعال لينا بيغادي

وهكذا دواليك
ـــــــــــــــــــــــــــــــــــــــــــــــــ

برضو في ردود بتقفل الموضوع ولا تعطي مساحة لاستمرار النقاش

فالدخول باحكام مطلقة لا ياتيها الباطل من قدام والا ورا

يقفل النقاش في البوست

ويتوفى الى رحمة الصفحات التالية

مصحوبة بلعنة القراء


وتسلم

أعزائى
خواض
الطاهر
شرير والبرتقالة
قرجة

شكرا ليكم على الردود...
نردها ليكم فى بوست خير



الهدف طبعا المتفقين على كلنا اننا نحيى الردود..ونخليها لو ما بتزيد حاجة للموضوع على الأقل ماتحولوا لى حاجة تانية....

والردود تتواصل
رد عشان خاطر عيون الرد
رد مفصل فرى سايز ويركب على كل بوست
رد شايل نفس الراد القايم
رد حنين ورقيق من شدة رقتو تلبس الشاشة نضارة وده طبعا مطلوب ويخلى الزول يملا البورد بوستات أيوة بوستات بوجود حرف التاء الأولانى فى
محلو طبعا

رد يكرهك اليوم العرفت فى حاجة اسمها كومبيوتر ونت...وتقول ياليتنى كنت..ما بعرف حاجة فى الشغلة دى
رد يوديك ويجيبك...يجرك فى الشوك ويغطسك فى موية ملح

رد يقيم عليك الحد
رد يرد ليك ابتسامة كانت ضايعة وما ينتظر منك جزاء ولا شكورا ولا عشرة فى المية الحق الشرعى
رد يشككك فى نفسك وياربى أنا كتبت شنو؟
رد يعلمك ويزيدك معلومات
رد يألمك ويزيدك احباطات
رد يسقيك بكفوفو موية النيل
رد يسندك ويشيل خطوات مشاويرك
رد يعلمك الحب لما يصفى
رد يرسم مرايات تعاين ليك ...ورد يكسر مراية خاطرك القدامية
وكلها ردود



تحياتى
ودعزة

ردود زي دب النمل
وردود زي درب الدبيب

كيفك ايهاب..درب النمل ودرب الدبيب فى
لووول

وفى ردود زى درب الفيل ذاتو


تحياتى
ودعزة

ود عزة .. سلام
قد نلتقى وفى قلوبنا كل الحب
وقد لا نلتقى وبرضو كل الحب

يا سلاااام , لما ( كنت ) عضوة فى منتديات سودانيز
وقبل ما ادى اسم ام در ( لبتى ) تشارك بيه
كان مشارك معاى فى نفس الفترة ود بلد باسم ود عزة
الله يطراه بالخير
والصدفة الحلوة ( بتى ) بتقول مشاركة معاها بت غدى
وعيال سولارا وود بوش الكبير واخر بنات بامسيكا ......
واحفاد بناديها

يا ( بت ) اسألى ( ود ) ود عزة قولى ليه ابوك حاله كيف
ورجعتوا من غربتكم ولا لسة
وكمان اسألى لى الود البتضاحك ب ( يكة ) الزول ذاتو
يبقى ليه شنو

شفت با ود عزة الدنيا دى ممكن تكون ضيقة كيف

طولك ياهو طولك ووزنك ياهو وزنك
وما فى زول عايز من زول حاجة
بس عندى طلب , قول لى كلمة طيبة واذكرنى بالخير والا فلا

ارضاء الجميع صعب , وان يحبك الكل مستحيل
ابقى كما انت , مشارك نشط فعال
اكتفى بمن احبوك وبادلهم الحب والثقة
واحمل رد من يرد عليك محمل الخير واجتهد ان تجد
الخير بين السطور والاحرف او حتى النقاط
فان لم تجد , فاحسن لمن اساء , تفز انت

وشوف رد الخواض
انو فى ردود ترد الروح
ودى والله بالدنيا

ود عزة

ردود نابتة
زي مطر الخلا والهبوب الكابتة
تضرب من عصير فوق التميرة الحاتة
شتت السعيف في دار ام قفيفة الشامتة

جيدا جيت
ياود عزة يوما جيت

ردود زي الزمن
وردود غالية تمن
وردود في الشوف عمن

سلام يا ودعزّة يا رائع
وردود ما منها نكهة زى الرد بتاع سأعود ويقوم يكب الزوغه,
وردود مما منها سمنة, زى طالبين حاجة وكتب حاجة تانية
وردود بتاعة طلبه, والطبه غلبه
وردود بتاعة عمالقة ومحترفين زيك يا ودعزة
لك منى كل الودّ
أنور

وفى النهايه .. لا شوفتا تبل الشوق .. ولا ردا يطمن
ود عزه اخوى .. اريتك تبقى طيب .. انا البي كلو هين
سلامات يازول يارائع

اريتك
انت طيب
البى كلو
هين
لا شوفتا تبل الشوق
لا ردا يطمن

أعزائى
أم در
المسافر
حسن الجزولى
أنور كنغ
الموصلى
شرنوبى

انتو طبعا من الجماعة الردادين
الودودين...ويا أم در ..الموضوع ومافيهو...رمى حجر فى بركة ساكنة ...وماكان قصدى شكوى على المستوى الشخصى من عدم الردود لكن كمدخل للموضوع كتبت كده بس واتمنى عشرتنا فى البورد تدوم لى جنا الجنا...
..والرد البطمن ياحسن وشرنوبى..ياريت يجينا
وياموصلى وانور والمسافر..تقديرى ليكم ..ومساحات الرد جواكم يانعة..

تحياتى
ودعزة

اخي ود عزة والله كلامك صح في تصنيف الردود
غايتو أن شايف مرات كلها ردود مجاملات خاصة بوستات الجكس حنس جرسة بس الواحد دار يحشر اسمو
تجي نعمل تصنيف

ردود بكرية
ردود رئاسية
ردود إدارية
ردود ديمقراطية
ردود حربية
ردود غنية
ردود غبية
ردود وغطايتها
ردود بى ضبانتها
ردود مفحمة
ردود مفجعة
ردود ضرب نار
ردود كالحجار
ردود موحشة
ردود موجعة
ردود بالكلام
ردود أى كلام
ردود سد بيوت
وردود سد أضان
ردود دلع
ردود البنات
ردود السرور
ردود المريود
ردود ماشة تش
ردود حلمنتش
ردود ساخنة
ردود ساخرة
ردود ردود
ردود نص كم
ردود الف طن
ردود عسل
ردود شمار
ردود مشقلبة
ردود مضبلنة
ردود والسلام


ما تقول كده من الأول يا ود عزة مش عارف أخوك أخصائى ردود

الردود خشم بيوت يا ودعزة ياظريف
بالنسبة لى الرد يعنى ان الموضوع المثار جذب الاهتمام واستحق الرد لاسباب مختلفة
رد رغبة فى الاضافة واثراء الحوار والمعرفة
ردود فيها شى من التواصل الانسانى لمن نحمل لهم الحب والمودة يعنى لو كتب محمد عبد الحميد ولا تراث ولا الجندرية ولا تماضر او اسامة الخواض وابومهيار احب ان اتحاور معهم
ردود لكتابات موضوعية وجميلة مثل مساهمات شرنوبى ود عزة عطبراوى نصار
ردود بانحيازات ثقافية لابناء الثقافات غير العربية وانا انتمى لها لشرنوبى وكوفى ودينق ودقنة اخيرا ردود لجماعة الضد انصار الحكومة وليد الكوز ومحور الشر الكيزانى

عزيزى الباقر
فعلا الردود خشم بيوت...وبيوت خشوم..وكلنا فى بوستات الجكس شرق


عزيزى يازول
جبت الردود كلها مرة واحدة لووول ما خليت رد لى زول ياريسنا يازول
بس فى نوع رد واحد نسيتو...زى نسية الحبيب سنتمنتال لنفسو فى كومبيوترك...عرفتو شنو الرد؟...ردود زميلتنا زهجانة الله يطراها بالخير ويردها لينا...لأنه ردودا ورغم سخريتا اللاذعة بتكون ذات موضوعية وعمق..وفى الصميم


عزيزى محمد سيدأحمد

فعلا ما هدفنا اليه هو احياء روح الرد...وتصنيفك للردود عميق الدلالة..
لكن قولى ردك على الغائب الحاضر الجميل أبو مهيار وحسين خوجلى كيف؟

تحياتى
ودعزة

ردود زول عدائي
ردود زول روحو كارة
ردود زول بفتش للمشاكل
ردود زول شامي ليهو واحد بس بجاملو
ردود زول فقد كلمة يا مبدع

عزيزى روبنسون


و..
رد اقتباس
رد من الراس
رد من الكراس
ردعشان الناس
رد وناس
رد خناس
رد وسواس
رد مقياس
رد التباس
رد كواس
رد عواس
رد حناس
رد احساس
رد ابو الكباس
رد فول ابو العباس
رد لحمة راس
رد جراس
رد ترباس
ورد ترباس ده نقيف عندو شوية...طبعا معروف لما ترباس مشى لندن وجا سالوهو ..انطباعاتك شنو عن رحلة لندن؟
صلح عمتو الكبيرة ديك وقال: الشفع ...آآآآى الشفع...الشافع تلقى ما قام من وش الواطة يتكلمليك انجليزى زى الطلقة

و.
رد نعاس
رد أعراس
رد أخماس ×أسداس
رد لحاس
رد قراص
رد حراس
رد ...يا..ناس
سمح...متباهى زى ستو
و رد بى ساس
رد قناص
رد ملاس


تحياتى
ودعزة

يب لو فى مرة طلقوها بعدين ردوها ، الرد دة بكون تبع شنو؟؟؟؟

مردودة فى مسماها؟؟؟
وردود الافعال دى مالها ما بتجيبوا سيرتها

ومحمد سيد احمد كتر خيرك وجوابى ما رديت عليهو ليه؟؟؟؟

وودعزة انت الردة ليك شنو؟؟ما كنت كوييييس

عزيزتى تماضر
تقصدى الردة...أم رضوة واللا الردة الردة؟؟
رد الرسالة ...رد الخاطر..رد الباب..ردة الذرة..ردة الروح..رد الشيك ..الطاير..رد الفعل البساوى الفعل فى الاتجاه والقوة...ورد طرف النخرة...ورد المساخة..
ورد الطرف..
و...
ردادة ردادة...
ما احلى صوت الرد

ورب رد رد للرد ردوده ...ورب رد لف ودار فى رد الرد


تحياتى
ودعزة

ود عزة تحيات بقدر ألقك وحضورك المتجدد

مناسبة أعلق على حركة سير البورد من جانبي فقط ما علي بي زول تاني

أولاً أسمح لي أن أشيد بهؤلاء وإن كنت أحياناً لا أرد عليهم ولا حتى أعلق على بوستاتهم لكن يكون الصمت أبلغ فيكون البوست مدهش لدرجة الصمت والإعجاب من بعيد لبعيد مثلاً لا حصراً

ود عزة /هيرو/شيبا/تماضر/عزة/الموصلي/أبكر آدم إسماعيل/ الجندرية/دقنة/منوت/بكري/حمزة سليمان/بشرى الفاضل/الشرغوف/بن بن/مارد/مودك/الخواض/شرنوبي/جعفر عبد الله/عادل عبد العاطي

ديل لو كتب واحد منهم بوست بفتحو وبقراوهو لأنو أكيد بيكون في موضوع موضوع يعني مش ذي ما داك قال رد شوفوني أنا هنا أحياناً كثيرة لا أرد إما لأني لا أملك رد أو لأني أجهل من جهلول في الموضوع فأستفيد وأواصل الحوامة في البورد

تفتكر لو كل الناس اتعاملو في البورد بالروح دي كان حتكون في مشاكل ومشاحنات غير مبررة؟؟؟؟؟؟؟؟؟؟؟؟؟

أضف إلى ردود
رد كيدي
ردي دفاع عن منابر حرة وشخصيات يجمع عليه القاصي والداني من مثل ما يحدث في البوستات الخاصة بمصطفى سيد أحمد

رد بلا رائحة أو طعم
رد الباب معاك
رد سواطة ساي
رد متفائل

والأخيرة دي مدفوع حسابها شيلها ساي وأمشي

دمت مع أصدق تحياتي وودي
نادر

يا ودعزة ردك ورد الحبيب ابو مهيار تصنف فى باب وردت عليه مدفعيتنا ودا فى موضوع حسين خوجلىوالله رد افحمنى واسكتنى دهورا
يا تماضر جواباتى البوديها تقول لا بتمشى لاحاجة
ردودد والله دا البنقدر عليهو
ردودد اياك اعنى او الاندايركت مسج يعنى رد بى اللفة كدى يصل للشخص المعنى ويفهمو
ردود معاكم معاكم او الرد البياض نوع كلام صاح وبتفق معاك

عزيزى نادر
تحليلك فى محلو...وفى ردود قيام وردود جلوس
وصفا وانتباه....والرد الحفيان البقطع مشوار الشوك هو الرد


عزيزى محمد سيدأحمد
ردود اللفة فى...وردود شيل القفة فى...
مرات يكون فى بوست مهم ..وموضوع ساخن...يدخليك واحد زى اليفج فى الناس ويفتش لى زول فى سوق فى دار رياضة فى سينما ...ويروح كاتب: وين انت بفتش ليك من الصباح...أها كده غير مجرى البوست والبجى يرد بعدو كلو..حيكتب تفتش لى ليه...داير منو شنو..وتفتش لى من الصباح ليه..وليه مافتشت لى بالليل وكميات من خفة الدم ...


تحياتى
ودعزة

نطبق رد فوق هنا

ودعزة صباحاتك حليب طازج
نسينا أهم رد

رد قلبــــــــــــــــــــي

تسلم نادر


وكمان فى..
رد الرد

رد السكات
الرد الايحائى والايمائى


تحياتى
ودعزة