شاكوش مشاكوس

فى الزمن الزين
زمن الطيبين
زمن الزينين
أسياد الكشف الربانى
الشافو الجايى قبل ما يبين
مولانا الزين
زين العابدين
نسل الطاهر
سبط الحسنين
القلبو علينا رفيق وحنين
بالأمة رؤوف وعليها أمين
سوالو وفاق
يحقنبو دموم
يقفلبو كلوم
يفرجبو هموم
يكشفبو غموم
يقشعبو غيوم
يطفيبو حريق عمر خمسين
ولعو "جون بول" لمن قلنا:
"يا غريب بلدك"
"لملم عددك"
"أمشى لى بلدك"
"وسوق معاك ولدك"
ومرق "جون بول" مخذول وحزين
ضربو بديقة "سيد الزينين"
أبو مولانا
طرشق حلمن
وضيع ملكن
و"تاج النيلين"

واتلملمو شذاذ الآفاق
أهل الهوسين
ناس هوس الدين
المدعيين ...
الما بيستاهلو أسماء الطاهرين
شيخ حسن وحسين

شاكوش مشاكوس
وشيخ الحارة
وناس شيخ السوق
وعلى ويس
وعوير امو القام يتنبر
شلناها رجالة
ومابترجع ... إلا رجالة
واملص عريان !!!
للجاك متحزم ومتلزم
ما تبقى جبان
والزارعنا ....
اليجى يقلعنا
ياسيد البيعة إمام الدين
ماك عارف مين ؟؟؟
ما تقرا "الواقعة" عشان تعرف
مين البزرع !!!
ومين البقلع !!!
والعجبو الحال
واتفشر وقال
قاعدين قاعدين
لا يوم الدين
لو عارف دينو قدر قطمير
ما اتمنى يعيش لا يوم الدين
وُغدر وأمين
وصلاح الدين
النطو علينا فى نص الليل
بى سيخ وكلاش
وسونكى وسكين
الباعو الدين
فى بلد الدين ... بى نص ملين
وبقية الشلة المجهولين
وجميع كضاب
وجميع نهاب
وجميع نصاب
وكل مستهتر
وكل ناسى حساب
القاهر رب الأرباب
أسألوا "دعبل" من وين جونا
المامعروفين ... مامسميين
والجاز الولع فينا سنين
حرقن بنزين

ولماهن سيد هوس السلطة
عاشق السلطة
طالب التفويض
قابض التعويض
سيد "المانديت"
الخرب البيت ... الكان عامر
شتتو شتتيت
داير يبقى كمندان أورطة
ولو يعدم يبقى نفر شرطة
مالا الشرطة ؟؟؟
ما بكان هيبة وسطوة وسلطة
داير زيطو لازم يطلع
ولو بى " .... "

واتآمروا قالوا دا ماهو وفاق
دا كسر رقبة وترقوة وسـاق
دا صك استسلام... صك استرقاق
دى خيانة عديل
دى عمالة عديل
دا لأحكام "التنزيل" تعطيل
ولشرع الله الواضح تبديل
مع إنو وفاق مولانا دا خاتى الميل
وبحسد حاسدين
ومُكر ماكرين
أهل الهوسين
ناس هوس السلطة وهوس الدين
وجهل جهال
ولعب أطفال
وملاهى عيال
ما عرفو نضال
ما جاهدو طردو المستعمر
جابو استقلال
كسرو مقداف السودان
وخلو المركب أبعد ما يكون ...
من شاطى أمان

وقام " شيخ الدين" قلب السلطة
وعمل سنما ... سنما أوانطة
قال داير دولتو منضبطة
تراقب الله
وتحكم بى ما أنزل الله
تعادى فى الله
توالى فى الله
وما تخشى ولاتخاف إلا الله
وكضبا كاضب ...
ما خانت إلا شريعة الله
وما استهزت إلا بأهل الله
وما خافت إلا عدو الله

وبعد ما كتل صبيان السودان
وبعد ما رمل نسوان السودان
وبعد ما يتم أطفال السودان
وبعد ما ودر مال السودان
وسوابو "سلام الشجعان"
فى كوبر وكوكو وأم درمان
جات أمريكا وجابت شاكوش
ونادت "أخواننا" فى "مشاكوس"
وقعدو حليقة
ودخل جنرال معاه وريقة
ولع فى جماعتنا حريقة
ونهر نهرة
وقهر قهرة
وجدع الورقة بكل صفاقة
وقال ليهم أمضو بلا لياقة
وبصمو "الأخوان"
بى عشرة ُغلاد وُتخان وُمكان
على صك تقسيم السودان
ورجعو وفى رقابن طوق خذلان
والضربة الفنية القاضية
ونزول الفاس
فى نص الراس ...
فى أمريكا
وبعدين حتدق المزيكة
تعلن للدنيا المربوكة
نجاح "الأخوان" ...
بدخول أخطر مستعمر للسودان
وحيكونو سدنتو وحجابو
و"نعم" الأعوان

قسطاس المولى وعدلو عجب
الناس القالو لمولانا
دى عمالة كبيرة
دى خيانة
خانو أمانة
لاهن قدرا
لاهن أهلا
ولبسو الذلة معاها مهانة

ومن حقنا نسأل "خنزير الأخوان"
الصور فى "حلمنتيشو"
مولانا يعاقر بنت الحان
شن شربو فى مشاكوس "الأخوان"
عصير منقة ؟؟؟
ولا "كبنقة" ؟؟؟
ولا قهوة على كيس كوكايين ؟؟؟
ولا شاهى على شوية هروين ؟؟؟
ومنو الساقى ...
الخلاهم ينسو ثوابت الدين ؟؟؟
لازم أشباه الحور العين
لكن هل كانن محتجبات ؟؟؟
أم كانن كاسيات وما لابسات ؟؟؟
يا ناس يا عديمين الإيمان
يا عديمين حيا ... ما الحيا إيمان
11 شوال 1423
15 ديسمبر 2002

سوالو وفاق
يحقنبو دموم
يقفلبو كلوم
يفرجبو هموم
يكشفبو غموم
يقشعبو غيوم
يطفيبو حريق عمر خمسين
ولعو "جون بول" لمن قلنا:
"يا غريب بلدك"
"لملم عددك"
"أمشى لى بلدك"
"وسوق معاك ولدك"
منتهى الجمال ياجالوط مكسب للمنتدى
بس ادينا فرصة نرحب بيك
شايفك جاى متلب
لكن احلى تليبة

شكرا يا كولا للترحيب بى فى بيت بكرى العامر و كل سنة و انت طيب

<BGSOUND src="http://www.bayanit.com/upload/protected/til3at_algamra.wma" style="color:black;background-color:white">

جاروط والله مشرف ومنور بس عندى ليك سؤال بعد كل عام وانتا بخير انتا يا تو فيهم الشايلنو ولا الشايل معليش اصلى تقلتا فى الشربووووووووووووووووتههههههههههههههههههههههههههه يكة