أصالة نصري بالثوب السوداني

وصلتني هذه الصور عبر البريد الاكتروني
وهي قصاصة من جريدة أخبار اليوم
اعجبني فيها كثيرا ارتداء أصالة للزي السوداني عند غنائها في ذالك الاحتفال
ويا ريتها كانت قدرت تغني في الحفلة العامة كانت فرحة باقي الناس برؤيتها تكمل
على الاقل تحسسهم انهم لسة جزء من العالم
وفي ناس دايرين يتعرفوا عليهم


ملاحظة
قبل ما زول يعلق, حاولت حذف صورة العروسين بس ما عرفت
اذافي حد ممكن يعدل الصورة ويرسلها لي تاني اكون شاكرة
تحياتي
زولة123

الصور جميلة
لاكن بس الاسطورة وينها ما لقيتها؟


زولة123

يازولة وين صورة الفيل؟

الموضوع دا يكون احلى لو تم نقاشه في غرفة البورد في البالتوك يازولة123؟

معنى إحضار غناية من سوريا او مصر عدم إحترام للفنان السوداني وعدم إعتراف به بطريقة غير رسمية ... وين الجماعة البدافعوا عن الفنانين والفن السوداني... ولا رايكم شنو؟؟؟

صدقوني اول مرة أسمع باسم اصالة دي... ما قلت ليكم انا في حكاية الفن دي خلف الله وزيادة كمان... عشان الناس ماتزعل مني

المي البارد بقد الدلو

يازوله يارائعة
صور رائعة للفنانه الرائعة اصالة
ماقصرتي رضيتي لينا شمارنا بالصورة دي

انا عازماكم انت وكل اهل البورد التذاكر بتاعت الطيارة
علي ،بس تذاكر حفلتها العندنا هنا للمهرجان تكون علي
البيجيني ويلبي الدعوة
شكرا على الصور يالذيذة

قالو جابوها ب 65000 دولار

انشاء الله حالي وحالك بس ما تكوني متزوجة
لوووووول
دمتي

مساء الخير يا6
اولا عقبالك وشئ جميل ورائع والمفرض اى واحد عنده إعمل الشئ السمح لاولاده ويفرح بيهم وانا فى رأى لو جابو أصالة والله اى فنان او فنانة مش الناس عندها فلوس بلاش حقد إجتماعى وعقبال كل الشباب
الأمدرمانية

كانتونا
معقول ما سمعت بأصالة
ليه كدة بس؟
قلتا لي انتا مغترب وين؟
تقدر تقول لي قدم لينا شنو الانغلاق على الفن السوداني
خده من باب الدعاية الاجتماعية والسياسية للبلد
أصالة دي حترجع سوريا والخليج تقول ليهم لقيت السودان نضيف ومتحضر وأهلة ناس راقين وعندهم ذوق موسيقي
حتغير فكرة كم زول عن بلدناو ولو عملوا معاها لقاء في محطة فضائية مثلا مش ختصل أسرع من البتحاول تحققه حكومات في سنواتو دا اذا كانت اساساحكوماتنا بتعمل على نحسين صورة البلد في الخارج

hozy
يا عسل عقبالك وعقبالنا
راحت علينا الدعوة أظن المهرجان بكون خلص حسي
انا عندي زولة واااحدة بس كنتا دايرة أحضرها وما مهم بعدها لو ما حضرت حفلات 10 سنين
ما تذكريني بس

الامدرمانية الحبيبة
مش كدة عليك الله؟ انشاء الله زمن ناس حمودي تجيبي لينا موسيقار الاجيال راغب علامة والفنانة القديرة ديانا حداد والوجه الجديد أسامة هاني شاكر لوول
الاخير ده ألفته من عندي
في مثل مصري بيقول
اللي عنده قرش, ابنه يزمر
وما اجملها من مزامير في ليلة العمر مع أصالة نصري

تحياتي
زولة123

سلام يا زوله123

قلبك طيب والله.. إنت ما قريتي الصحفي المصري المشى السودان ورجع القاهرة وكتب كل الهوتيلات في الخرطوم تعادل لكوندات الدرجة التالتة في العتبة... وقال كل شوارع الخرطوم ترابية وما فيها زلط وما فيها مجاري... وكلام كتير كان ذلك في جريدة الوفد في ديسمبر 2002

وكمان واحد صحفي انجليزي كتب في جريدة التايمس اللندنية قائلا:
Camden Town is as dirty as Khartoum city.

وكامدن تاون أحد أحياء لندن الما نضيفة
انا في لندن يازولة لكن ما بشوف المحطات التي تعرض الأجساد النسائية كما سماها استاذي ود الريح قاصدا محطات لبنان وما شابهها

بس لسع ما جبتي لينا صورة الفيل.

ألمي البارد بقد الدلو

ايسرهن مهرا اكثرهن بركه ـ لم تكن البركه مبنيه على استخراج
الزكاه والا لقال النبى من استخرج زكاته بارك الله له فى زواجه
ان الزكاه تبارك فى المال لكنها لاعلاقة لها بالزواج لان البركه مبنيه على التيسير وكم شاهدنا اناس يستخرجون زكاتهمم الا انهن
بالغوا فى زواج ابنائهم والنتيجه ان الطلاق والخلاف يبدا بعد الشهور الاولى ونحن كسودانيين نحب البوبار فلان جاب لعرسو اصاله وهذا ماعناه صاحب العرس ولا ندرى هل هذا سيسعد العروس بعد ان ينفض الناس عنها ام ذلك سيكون وبالا عليها ومن سن سنة سيئه فعليه وزرها ووزر
من عمل بها الى يوم القيامه

zola123


البوبار و جيبة أصالة و ركوب الفيل

ترى هل يبارك الله في زواج مثل هذا
أتساءل أحيانا
أكثرهن بركة أقلهن صداقا

لكن ترى لم يغالون في البذخ
و هل البذخ و المغالاة من المظاهر التي يجب أن نفتخر حينما نتحدث عنها

لا أعرف
ربما نحن في زمن يقيم فيه الناس بما ينفقون من أموال
و ما يملكون
لكن ترى هل كان طعم الفرح هنا أعظم ام ماذا

اتـــركوني و شـأنـي

انني أتـمـحـن في جمال الجـيـكـس اللي حاضـرين العـرس


looooooool@Modic

مــــــــودك

بالمناسبة هنالك تعاون فني بين الفنانةاصالة والموسيقار بشير عباس لا اعرف الي اين انتهي هل اجد اجابة عليه؟ انا شاهدت صور اللقاء الذي جمع بينهما ولكنى لم اعرف النتيجة بعد.اما عن الفن فهو تواصل بين الشعوب وليس إنكار لدور الفن الوطني او تقليلا من مكانته

ياجماعة كدة من البداية سؤال

حكاية الفيل دى صح

ولو صح الفيل جابوا ولااجروا من وين
ديل سؤالين مش كدة

انا جني وجن الشمار الما مغربل كويس اها يا زوله 123 اها العريس ود ناس منو؟؟؟ والعروس بت ناس منو؟؟؟؟
يعني لازم تدينا خليفه عشان وكتين انجعص هنا وسط النسوان في المدينه الالمانيه الجميله دي اقول ليهن ما شفتن بت فلانةالفلانيه العريسها فلان الفلتكاني جابو ليها في هدايا العرس فيل وفنانه من بلاد بره
بالمناسبه انا لاحظت انه الناس العايشه بالبلاد العربيه تعربوا يعني بقوا عرب عينك عينك رجاله وحمرة عين وكذلك الناس المشوا البلاد الغربيه بقوا غربيين قوه عين وايديه الا انا وكانتونا دا يا ربي يكون من شنو ؟؟
صدقوني يا بناتي لي 17 سنه من دون انقطاع خارج السودان شرقت وغربت طلعت شمال ونزلت جنوب كان ما ختيت شريط الكاشف ولا ابو عركي البخيت ولا عثمان حسين الغناء في راسي ما بدخل.
يا ربي يكون السبب شنو؟؟؟؟

salam
3la fkra ya zola 123 al9oor gatni ana zati balemail
ya Modic
ma ttm7n brak ana zati m3ak laken am tgool li gx nar
loooooooooooooooool

مهيد

أنا بتمحن كويس .. لكن علي الله جكسويتي ما تدخل تلاقيني كاتب الكلام ده
الغيرة بتضرب

loooooooooool @ Myself

مـــــــودك

bas mahntoni zee mama doma walhi,
wein? wa keif? wa leih? wa shi alkalm da wa la klalam greid
wa tagool lee poverty fee alsudan!!!!!!!!!
hasi una ugool le khateibi awza alsit yani wa ubelhaleim,
looooooooooool

ان المبذرين كانوا اخوان الشياطين

حاجة دوما

السر في الدهب المجمر المابعرف الصدأ

عروس حدانا هنا وصلت جديدة لنج يادوب فكوها من كرتونتا
في أول يوم لوصولها اتصلت عشان أبارك ليها وللعريس
ردت علي وقالت .. فلان خرج في مشوار .. ان داير تبغاهو اتصل بعد ساعة
كدي يابت أمي ان داير اللماها على تغباهو شنو

سودانية

الزول كان بطلع حق الله من ماله
مافي تبذير مهما عمل
والمسألة نسبية
وإلا كل ملياردير يضرب ام رقيقة ويركب عجلة ويقعد يبحلق في قريشاتو

تحياتي

لووووووووووووووووووووووووووول يا سنجاوي ولدي عاد اخير البشاتن دي ولا الزول يموت علي دينو؟؟؟

دوما: انتي والكاشف اخوكي ديل دقة قديمة زي ما قال سنجاوي لا بتتغير لا بتصدي ودا دليل على عدم مسايرة تيارات الحداثة والأصالة والأفيال !!ا

الغريب بشوف مرات بالصدفة في التلفزيون شباب من الزنوج الأمريكان، قالوا فنانين، لابسين حاجات غريبة كده، هدوم ما قدرهم بناطلين زي الشوالات منفخة كده وجارة في الواطا وناصلة من الحزام، اها لمن استغربت واحد جايي من السودان قال لي انت قديم وما شفت حاجة، ديل هسي في السودان موضة وكل الشباب لابسنها
الأغرب انو هنا في اوروبا ما شايف زول لابسها غير الشماشة الأغلبهم من الزنوج البشوفهم في محطات المترو، طبعا شماشة دي ما صاح لأنو هنا شمس مافي بالذات اليومين ديل

ياربي يكونوا الأوروبيين ديل برضو متخلفين وما مواكبين الحضارة والحداثة والأصالة ولا شنو؟؟ كلهم لابسين عادي وبسمعوا الغنا العادي، غنا الله والرسول دا زي ما بقولوا اهل زوجتي !!ا

الشئ الغريب التاني هو تعامل السودانيين مستجدين النعمة مع ثروتهم، كأن الواحد عنده عقدة وداير يثبت للناس انو قادر والقادر بسوي. عارفة الملياردير هاينكن صاحب مصانع البيرة المشهور، ثروته حوالي عشرين مليار دولار لكن سمعته وهو يقول انه لم يشتر في حياته دون موسم التخفيضات !!ا سألته المذيعة ولكنك رجل غني وأصلا بتشتري مثلا ملابس غالية جدا، قال ليها أيوة انا بشتري البدلة الواحدة بأكثر من عشرة ألف لكن في موسم التخفيضات بتبقى بي سبعة او خمسة الف ليه اشتريها بالسعر الأغلى ما دام ح يرخصوها ؟؟ وهذا هو دوما ديدن الناس العرفين عزهم

اما حكاية ابركهن دي خليها، هم ما كايسين البركة الربانية ديل عايزين الناس تقول

وقد قيل
ثم يؤمر به ف ...ه

نهى الحبيبة
شمار العرس ده انتي الكان مفروض تجيبيه بحكم اجازتك في السودان

عارفة يا نهى مافي زول بيقدر يحدد اذا كانت البركة حتحل ولا لأ, او اذا كانوا الناس ديل مبسوطين ولا العكس الآن
أجمل من اننا نطالب الغني انه يكبت مظاهر غناه ويضيق على نفسه وده في نظر الناس بيقولوا عنه بخل لوول
الاجمل اننا نحفز الفقير على التطور والنجاح والتقدم, عرفتي قصدي؟
الغنى ما عيب زي الفقر ما عيب, وممكن جدا تكون غني بعرق جبينك وبما يرضي الله
اها بعد ده كله لو صرفت قروشك واستمتعت بالنعمة الغلط وين
ما معناته معجبة بعمايل الاغنياء بس ما كلهم عن بذخ وتبذير

موديك ومهيد
ما بسألكم الجكس ده شفتوا بمايكروسكوب؟
لو دايرين صورة مكبرة عندي, بس هي واااااااحدة البيجنبة ديك, وسمينة شوية
انتوا الاولااد غايتو ذوقكم بتعرفوا برااكم

الطاهر
اييد رايك تمامآ

دوما
انا زاتي التفاصيل ما عندي بس في بوست تاني فيها السيرة الذاتية للعروس ووالدها صاحب كلية كمبيوتر مان أعتقد
بس ما عارفة العريس الحليوة ده مافي زول جاب لينا خبرو لحد حسي ليه لوول
اسمعي ابو عركي وعثمان, ولو ما عندك مزاج لي أصالة بروضو ما مشكلة يا حبيبة, دي بيسموها فجوة بين الاجيال لوول

سودانية
في زي ده وفي معاه فقر, دي حكمة السودان

سنجاوي

الزول كان بطلع حق الله من ماله
مافي تبذير مهما عمل
والمسألة نسبية
وإلا كل ملياردير يضرب ام رقيقة ويركب عجلة ويقعد يبحلق في قريشاتو...........ء

كلامك حككككككممممم


الصاوي
تصدق انا زاتي موضتهم دي ما داخلة راسي مع اني من جيل مقارب
الزول يلبس البيعجبوا ويعمل البيعجبوا ما دام عارف نفسه بيعمل في شنو
تصدق لو عندي قروش باجيب فيروز عرسي رأيك شنو؟
ببقى منبذرة.
هي بالمناسبة بتاخد كام ؟؟

تحياتي
زولة123

السلام ,!!2
كون أنه هي تجي المغنية سوف يكون طريقة أو بداية لزيارة الفنانين العرب الى السودان

zola123

الغنى ليس عيبا كما أن الفقر ليس عيبا لكن هل المبذرين كانوا إخوان الشياطين و مقتنعة أنا أن ليس من الغنى أن نبذر أموالنا فيما لا طائل منه سوى أن يرى الجميع أننا قد أنفقنا من المال الملايين من الدولارات في ليلة واحدة

هل ننسى الفقراء لا
مال الله الذي استخلفنا فيه هل لننفقه على المباهج
لست من دعاة ألا نحتفل
و لكن في حدود المعقول

بربك لن أقول أنها ربما ليست سعيدة الآن و لكن قيل أنها ذرفت الدموع لأن المدعويين أنصرفوا عنها بأصالة و عندما بدأت أصالة في الغناء نسوا أنها موجودة


لك التحية

لا، فيروز معليش، ممكن، شفتي مشكلة الأجيال؟!ا

على فكرة مافي زول عنده اعتراض على اي فنان لأن كل زول بمزاجه ودا يوم فرحك من حقك تجيبي الفنان البتحبيه

الإعتراض كان على المظاهر والحركات بتاعت شوفونا

وبعد بكا الحفلة ح تشوفي البكا بعدين

وربنا يستر

في إحدى الدول الغربية ، التي تنتشر فيها نوادي العراة .. قدم أعضاء "نادي العراة" دعوة رقيقة لوزير في الحكومة لزيارتهم في النادي ..فوافق الوزير .. وفي اليوم المحدد للزيارة ومن باب المجاملة لأعضاء النادى قرر الوزير أن يذهب "عارياً" حتى يتساوى مع بقية الحاضرين فلا يتميز عليهم بشكله وهم عراة من حوله .. ونزل الوزير من سيارته ودخل الى النادي وهو عار تماما كما خلقته امه ..لكنه وجد مفاجأة كبيرة في إنتظاره .. فقد حضر جميع أعضاء النادي بأجمل ملابسهم من باب المجاملة للوزير..!!

صديقنا عمر محمد الحسن (الكاهن) ذهب الى الحفل "الخاص" الذي أحيته الفنانة السورية "أصالة نصري" في النادي السوري بالخرطوم على شرف زواج كريمة د. أبوبكر مصطفى رئيس كلية
كمبيوترمان .. وجاء بملاحظة طريفة تشبه هذه القصة .. فقد حضرت الفنانة السورية الى الحفل وصعدت الى خشبة المسرح وهي تلبس "الثوب" السوداني من باب المجاملة للسودان ونسائه .. لكن الفنانة السورية فوجئت في الحفل أنها وحدها التي كانت تلبس الثوب !!

وربما نظرن اليها الكثيرات بدهشة وظنوا أنه زى" تلبسه نساء الشام.!! فقد نسيت أمسيات الخرطوم الثوب وأيامه ..!!

و "الثوب" المفترى عليه .. والذي أصبح كملابس قدماء الفراعنة لا يُلبس إلا احتفاء بذكراه العطرة.. كان ضحية "الفهم" .. ففي غمرة الحماس "فهم" البعض أن أي "زى" آخر غيره سيكون في قائمة الحجاب الشرعي .. وأن "الثوب" السوداني ما هو إلا درجة من التبرج .. واخترع البعض لباساً شابه في بعض تفاصيله ملابس النساء في دول أخرى .. والبعض الآخر اخترع "الطرحة" على أنها ساتر للرأس لا يهم بعد ذلك أين يقع بقية الجسم .. والبعض اختار زي النساء في الخليج ..كله حجاب وكله شرعي.. إلا "الثوب السوداني".. وجلب البعض ملابس تغطي من الرأس الى الكعب لكنها تغطية "تلميع" Highlighting .. تكشف بذكاء أكثر مما تخبيء.

الذي أقنع الضمير الاجتماعي بان الثوب "عورة" لم يخلع الحشمة من نساء السودان فحسب ..بل خلع الارتباط الوجداني بأصالة المظهر والمخبر .. هدم خط الدفاع الاول الذي كانت تتخندق فيه الهوية السودانية بكل ملامحها الشخصية الجذابة والنادرة في مجتمعات العالم الأخرى .. أخرج بنات السودان من أثوابهن فتُهُن في دروب الموضة يحاكين كل ما يظهر في الفضائيات التي يسرت عليهن البدائل .

وعموما فإن فاعل الخير الذي "أقنع" الفنانة السورية "أصالة" بلبس "الثوب السوداني" قدم لله وللوطن خدمة لا تنسى .. فأفضل وسيلة لاحياء الثوب السوداني و إعادة لفه مرة أخرى حوله أجساد فتياتنا ونسائنا أن يرينه في صالة العرض الخارجية..طالما ان كل ماهو وافد محتفى به .. ان يرين كيف هو جمال في حشمة .. ووقار في جاذبية .. وليت فاعل خير آخر يقنع فنانات عربيات أخريات ليلبسن الثوب ولو مرة امام الكاميرات حتى يرد الينا بضاعتنا ولو من باب الموضة "المستوردة"..!!




جميع حقوق الطبع والنشر محفوظة لموقع صحيفة الراي العام

ورورووووك
تحياتى كلام والله زى الذهب
بنات الزمن ده بقن بناطلين وما ادراك
ما البناطلين والثوب السودانى اصبح
لامهاتنا فقد اكل عليه الدهر وشرب
وكويس انو اصاله لبستو احتمال زاتو لبس
الثوب ده اكون مدفوع حقو ولا عجب اذا
دخل احدهم غدا سوق سعد قشره ووجد
موضه جديده اسمها ثوب اصاله ولك تحياتى

نها انا بختلف معاك جدا فزى ما قالو الاخوة اعلاه قروشى بعدما تكون مزكية ونضيفة استمتع بها بالطريقة البتعجبنى لكن ما قلتى لى كيف لقيتى السودان والاهل
زولة 124 كيفك اولا اكل ما يعجبك والبس ما يعجب الناس
وبالمناسبة حبيبتى برضو بتحب فيروز عشان كدا تعال نعمل
العرس فى يوم واحد وكفى الله المؤمنين شر القتال والله
رايك شنو

WAD ELGAALI#4


احترم وجهة نظرك و إن اختلفت معك فيها
لا داعي للتبذير و صدقني الفرح نعمة من نعم الله لا نستطيع أن ننكر فضله فيها
و لكن سيدي افرح في حدود ما تعبر به عن فرحك و شكرك لنعمة الله

و ربما هي عبرت بطريقتها و طريقة أهلها عن فرحها بهذا اليوم الذي هو حلم أي فتاة


شكرا لك على سؤالك عن حال و أهلي إنهم بخير و نعمة من الله و يقرئونك السلام

البس ما يعجب الناس
دي كيف بس ح تجي يا ود الجعلي؟
ممكن تقول لي كل ما يقدم اليك اذاكنت مدعو لتناول عشاء او غيره كي لا تدخل مستضيفك في حرج او في بلد اخر ولم تجد ملاح ام رقيقه والكسره . لكن والله بالجد جد بلبس ما يعجبني ,لو طبقنا كلامك دا معناه لو الناس قالوا بتعجبهم البلوزات المشحتفه والتي تظهر جزء من البطن او الحجاب تفتكر ح البسها او ح اتحجب والله من غير خوف او وجل لا والف لا يا هو توبي السوداني دا لانه عاجبني متله متل سماع الموسيقي والاغاني والفنان المفضل مسألة ذوق واختيار اولا واخيرا.
ولا ما كدي يا الاجيال الجديده؟؟؟؟

العندو الحنة يحنن ضنب حصانو

العزبزة جدا دوما تحياتى لك وتقديرى انت لانك انسانة اصيلة وراقية تلبسى ما يعجبك وزى ما بقولو مستور العرض لانظر الناس لما يلبس وانت يا سيدتى مستورة
عرض مهما لبست فسيزيدك رونقا واصالة لكن الكلام دا
موجه للناس الشتر زى كدة لازم نلبس ما يعجب الناس
لك تحياتى ومودتى

وبعيدا عن الحفلة والثوب
اعجبني كثيرا الجولة التي قامت بها الفنانة أصالة لبعض المرضى
واليكم صور نشرتها صحيفة قوون
وجاييكم تاني

شكراً د. زولة على تعرية المستور
Theleopard cannot change its spots
أي بمعنى : هل يستطيع الحبشي أن يغيّر بشرته
والنمر أن يغير رقطه
وهنا إستوقفتيني يا زولة بقولك : ان العروس زرفت
الدموع عندما إنشغل الشباب مع أصالة
نعم أصالة غير
ولكن هل تدرون الثمن الذي دفعنه الفتيات السعوديات
عندما إنفتح الشباب السعودي تجاه الشام ولبنان
وأصالة التي غنّت أمس بالثوب السوداني ستغني غداً بغيره
ومن حولها الراقصات العاريات
نحن بسبب الفضائيات اللبنانية بيوتنا شابة نار
وبعد شوية منا من يعتقد بأن زوجته لازم أن تكون زي
ريم أو شاهيناز أو ليندا أو نشوى
والمسكينة سوف تجتهد : بالفير اند أو الفيز لايت

نعم نحن صادقين في كل ما نشوفه لأنه كل ما تخانق اثنين
يفتحوا ( ال بي سي ) شيئ يوسع الصدر يحسسك بأن الناس
حلوة ولو سبحت في بركة نكد. وما عندي شيئ أقوله غير
كل واحد يلقى حظه وآه يا قلبي ويا بناتنا وأخواتنا انتبهوا

وهناك مجموعة أسئلة
ما هو المراد تحيقيه من كل الهيلمانة دي؟
هل هي سنة تتواكب مع العولمة يجب إتباعها؟
هل ستضيف هكذا حفلة شيئ للفن السوداني أم تنتقص منه؟
؟
؟
؟
؟

ايمو
انت قصدك دكتورة نهى مش انا

زولة123

للعلم
العروس ابنة أبوبكر مصطفى مالك ومدير كلية كمبيوتر مان & والعريس هو ابن احدي رجالات حكومة الانقاذ الحاكمة اللواء بابكر على التوم ودقى يامزيكا وشعبنا متشرد ويموت من الجوع