Post: #1
Title: 1995 عاد لمتين؟؟ لوحة مسرحية تأليف تماضر شيخ الدين
Author: Tumadir
Date: 06-18-2002, 11:24 AM
Parent: #0
مهداة الى الشقيق هشام شيخ الدين ...يا زول... وهو يقرأ هذا العمل لاول مرة بسبب الفرقة والذى املتهاعلينا ظروف الوطن الجريح وجميع اعضاء المنتدى
والملهم الاكبرالشعب السودانى فى نضالوالخرافى ضد القهر والكبت والظلم
اسمى عواطف ...
ساكنة الثورة...
عندى تلاتة وبمشى المكتب
ابلتق فيهم قدر الفى
استر الحال
واغطى العورة
مرة طماطم ومرة قميص
مرة بطاطس ومرة رغيف
قدر ما نسدها هى بتتقدة
غايتو رضينا بنمشى المكتب
قالو اتلفلفوا اتلفلفنا
بى توب بملاية اتكلفتنا
قالوا انطموا انطمينا
البص بى عشرة
البص بى عشرة
الفحمة الواحدة بقت بى خمسة
وفى الدكان الفول بالدستة
العيش مافى
سكر مافى
الزيت مافى
بنزين مافى
تراب وعجاجة وحتى المطرة السنة دى مافى
وغايتو رضينا بنمشى المكتب
؟وشن المكتب
ورق مردوم وفارو قصادو
رئيسك كوز
ونايبو حرامى
غفيرنا جنوبى زى السوط بشوش وبسلم
سيد المطعم سمين ومدوعل ومشلخ سلم
امين المخزن تاجر يبيع قى السوق الشعبى وشنبو مبرم
مراسلة شيوعى ومابتكلم
وصنة شديدة
شعب مأطر ودوره مقسم صنة شديدة حكاية تهمم
وبرضو رضينا بنمشى المكتب
لما تمغرب
بنفتح تلفزيون امدرمان اقصد تلفزيون الثورة
يجوك ناس كدة لابسين اخضر
زعلانين منك
يهرجوا فيك ويضربوا الرورى
ورورورورورك
الله اكبر بحمدالله فتحنا جوبا بحمدالله دخلنا الكرمك
سودان باميرى طمبرة ماهية مافى سودان ياميرى
لابجيبوا سيرة الاستعباد
لابجيبو سيرة الاستبداد
لاقالوا يوم فلان كتلوه
يتموا اولادو وسحلوه
(محاكية)
والانتاج والعلاج
عينك للبشتنة والعولاق وشابكننا انتاج وعلاج
خالتى خديجة كجك تتغطى وتقنت ليه وتديو ضهرا
-كضب السواد
والكهربا تقطع
وتسمع جاااااااااااااااك فى جوف الحارة
-هى مالكم نعل ماطيبة؟
-الشافعة سهاد وقعت من فوق قصت ضهرا
-ضربتا كهربا؟
-هى بسم الله الكهربا قاطعة تكوس فى الشمعة
ماشة تكابس للكبريتة
الكرسى رماهاا الطين زلقا
مامعروف كان كسرت ايدا واظنها ماتت
-هى قولن بسم الله هى ماتشوفن تكسى حسن
-حسن ياتو؟ حسن ودباشا؟
دة التكسيو واقف يومين عدمان القطرة؟
ماشايفاو قاااعد فى الضللة يفاقق ساى فى الكورة وفى الأسعار وكلام النشرة؟
-هى ترى قامت
-انخلعت ساى
ماديرين لمة
-الليد طيبة بجيبوا بصير
وهم طبعا عارقين الخيبة الجاية
قروش التكس والبنج المافى واشعة اكس
وقايمة مافى
-انخلعن ساى
وبالحال دة ماشين ساااااااى
وبرضو رضينا بنمشى المكتب
يوم فى المكتب وزى العادة ولما تسخن وتبقى جهنم
بنمشى نقنب تحت الشجرة
فى كنيبة كدى وكرسى مكسر وحجر وبلاطة
بنقعد نتونس
جنب ست الشاى
نتكلم يعنى عن حالتنا وحال الدنيا
كنت انا ومحمد وسلوى وابراهيم ومعاناالسيد
السيد دة ما بنعرفو كويس بجى لى سلوى
سلوى مليسة واظنو هو كيسا
ابراهيم دة اغبش وساخر
محمد طيب وزى متحمس
ويعنى كلام اتجدع
-لى شهرين ماضقت اللحمة
-نحن سنة بناكل قراصة
-نحن سخينة
-ونحن على الدكوة ترسينا
-وعاد لمتين؟
دى انا القلت عاد لمتين
وقامت كبرت عاد لمتين
محمد فام يتنفض كلو
صحى لمتين؟ الجوع كافر الشعب جبان
لازم نتحرك
ابراهيم حاول يثنيه ومحمد يزيد لازم نتحرك
اما السيد ماقال حاجة لكن واضح ما كان راضى
وسلوى معاهو تتمحرك وتضحك
غايتو كلامنا اتدهده مات
جاتنا تلاتة مشينا نكابس للثورات
الثورة نص الثورة ظلط عاد الثورات ماكترت
ركبت البص فى شمس الضهر البتعرفوها
الحر البغلى العرق الجارى
ناس تتآكل من آلاما وصمتها قاتل عندها كتمة
غايتو ازدحمت بنات افكارى
جانى كلامو محمد تانى وجضة فاطنة وناس حلتنا
غفيرنا جنوبى وزى السوط بشوش وبسلم
وكرش الزول الماسك المخزن
وصلت البيت شفعى يتخاتفو فى اللقمة
الجيران يتشاحدوا فى الكسرة
اللمات خنقاهن عبرة
الماسورة العادمة القطرة
خليناك يا رش السهلة
وخليناك يا زمن المهلة
من المغرب نقفل بابنا خلينا زيارت اصحابنا
غايتو رضينا مشينا ننوم
ونحمدو رب القدرة علينا بعد البينا بنمشى ننوم
جونا اتنين الساعة اتنين
رجال الليل رجال الغفلة
دفرو الباب وكسرو الطبلة
-حتمشى معانا
-هى ماشين وين؟
-حتمشى معانا
-واولادى الراقدين نايمين
_حتمشى معانا
_واخوانى الما شغالين
_حتمشى معانا
-وناس امى البيتم من طين
حتمشى معانا حتمشى معانا يجابدوا يناتلو حتمشى معان... حتمشى معانا
لقيت روحى جوة الزنزانة
والله يجيركم من الصمت الفى الزنزانة ومن الوحشة الفى الزنزانة
شهرين لازول بسأل لاعارفة الحال دة آخرو متين
وبعد شهرين بدا التحقيق
جونى اتنين ساقونى لمكتب ضابط
معاه اتنين ساقونى لمكتب تانى
فتحوا الدفتر وزى الاسد الضابط ينتر
-عندى معلومات هنا انك بتحرضى ناس المكتب
-انا؟
-بتعرفى ابراهيم ومحمد؟
-آى ديل بالضبط زملاى فى المكتب
-فى يوم اغبر تحت الشجرة مش انتى القلتى عاد لمتين؟
-آى قلت..... بس
-خلاص دى التهمة الجاهزة .... دا التحريض الضد الدولة
-عارفة انتى عملتى شنو؟ وعارفة جرحتى شعور منو؟
-انا جرحت شعور؟ شعور منو؟
-سيد وسلوى
_نعم؟
-لأنو سيد دة موظف فى ال.... اقصد سلوى موظفة فىال...
ومامهم تعرفى
عشان نتأكد دايرين نعرف اسمك عنوانك وضعك؟
-اسمى عواطف ساكنة الثورة عندى تلاتة....و.....
-تلاتة؟ ابوهم وين؟
-عندى تلاتة ابوهم ميت وبرضو جرحت شعور ناس سيد؟
ابوهم ميت عذبو سجان بربرى زيك
مات والناس صبحانة تعيد
وبرضو جرحت شعور ناس سيد؟
شفت بريق حدقات اطفالو؟
هى البتهدد عرش السيد
هى البتأسس لى يوم بكرة
وللمستقبل تبنى تشيد
شفت الوعى الدافر وجايى
شفت النبت القايم وجيد
دة البجهجه ناس السيد
وليكم يوم يا ناس السيد
ليكم يوم ياناس السيد.
اتقدمت للسودانيين فى اكتر من عشرة ولايات امريكية واتسجلت للتلفزيون العربى فى امريكا.
ان شا الله تعجبكم بس.
_
-
|
Post: #2
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: BitAlhana
Date: 06-18-2002, 11:58 AM
Parent: #1
حلوة حلات ستها يابت عمي
والله بديت اقراها على عجل لقيت روحي لازم اتمها لي النهاية
واقع حقيقي ومعاش كل يوم ...
بس الله يدي الصبر
|
Post: #3
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: Tumadir
Date: 06-18-2002, 12:11 PM
Parent: #2
اريتو رايك راى الهنا يا بتنا
شكرن جزيلن
|
Post: #5
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: GamarBoBa
Date: 06-18-2002, 12:23 PM
Parent: #3
اللمات خنقاهن عبرة
الماسورة العادمة القطرة
خليناك يا رش السهلة
وخليناك يا زمن المهلة
استاذة تماضر...
لك التحية.
كتابة جميلة ومفردات سودانية معبرة ودافئة كحضن الوطن ..
لك التحية ومزيدا من الابداع.
|
Post: #4
Title: ابداع
Author: kofi
Date: 06-18-2002, 12:15 PM
Parent: #1
واللة ابداع
وتصوير امين ولغة مباشرة ان شاءاللة ناس معانا هنا يخجلوا
|
Post: #6
Title: وربنا يكضب الشينة
Author: almaskoon
Date: 06-18-2002, 02:24 PM
Parent: #1
كلام برااااحه ولغه لزيزه اجبرتنى اقراها تانى وتانى. والمشكله جرح الاحاسيس دا زاتو قلة و الناس دىارواحم كدايس واتمكنو وربنا يكضب الشينة
|
Post: #7
Title: Re: وربنا يكضب الشينة
Author: nadus2000
Date: 06-18-2002, 02:45 PM
Parent: #6
تسلمي أيتها المبدعة
|
Post: #8
Title: Re: وربنا يكضب الشينة
Author: waleed500
Date: 06-18-2002, 02:45 PM
Parent: #6
تحياتى تماضر
عواطف دى زوجها وين؟؟؟؟؟؟؟
شايفها داخله السوق برها وبتربى فى اولادها لحالها
العيش مافى
سكر مافى
الزيت مافى
بنزين مافى
الكلام ده يا قديم خالص يا ما فى زمن الانقاذ؟؟؟؟؟؟؟؟؟
|
Post: #9
Title: to waleeeeeeed
Author: almaskoon
Date: 06-18-2002, 02:58 PM
Parent: #1
يا الوليد- ("ابوهم وين؟
-عندى تلاتة ابوهم ميت وبرضو جرحت شعور ناس سيد؟
ابوهم ميت عذبو سجان بربرى زيك
(مات والناس صبحانة تعيد"
انت بتقرا سطر و تفط سطر ولا شنو يا السيد
|
Post: #10
Title: Re: to waleeeeeeed
Author: Tumadir
Date: 06-18-2002, 11:07 PM
Parent: #9
ماتخاف انا اخويا مقلاع الحجج بالمناسبة دى يا هشام ليه فتحت لى؟
|
Post: #11
Title: Re: to waleeeeeeed
Author: Abu Suzan
Date: 06-18-2002, 11:34 PM
Parent: #10
I like the way you write and the funny way you tackle serious issues. I found myself reading this post time after time until the onion I put on the pan burnt.
Thanx sis
|
Post: #13
Title: Re: to waleeeeeeed
Author: Tumadir
Date: 06-18-2002, 11:44 PM
Parent: #11
وبتطبخ برضو؟
امال ليه بقولو عليك كدة؟
بهظر معاك ساكت
لكن شكرن الله ما ضراك
|
Post: #15
Title: Re: to waleeeeeeed
Author: Abu Suzan
Date: 06-19-2002, 00:05 AM
Parent: #13
oh my....what do they say? and who are they?
|
Post: #12
Title: ؟
Author: BousH
Date: 06-18-2002, 11:43 PM
Parent: #10
الاخت تماضر
لكي التحية
ابـــــداع
الله يديكي العافية
اخوي وليد حقو تطلع من البرج العاجي بتاعك ده
ولكم التحية
|
Post: #14
Title: Re: ؟
Author: waleed500
Date: 06-18-2002, 11:50 PM
Parent: #12
بوش الفول وليس الرئيس
اى برج يا عزيزى هو سوال للاستاذه تماضر ليس للاخ المستكين او لك
ومن حقها ان تجيب او لاتجيب لان الاجابه موجوده ومعروفه لى
|
Post: #16
Title: Re: ؟
Author: BousH
Date: 06-19-2002, 00:11 AM
Parent: #14
اهليييييين وليد انت صاحي
تحية ود وسلامي لكل اهل البلد
بوش الفول ده فيهو شطة لووووووول
الكلام ده يا قديم خالص يا ما فى زمن الانقاذ؟؟؟؟؟؟؟؟؟
الفوق ده كلامك صاح؟؟ ولا انا غلطان
انقاذ ليهو 13 سنة عايز أعرف منو القديم؟ يعني تقصد في معناة اكتر من كده قبل 13 سنة واحنا ما عارفين ولا كيف
كل اصناف العذاب للشعب السوداني في زمن الانقاذ!؟ هذه حقيقة تاريخة
ولو تغالط التاريخ ده شئ تاني
وبقصد بالبرج العاجي يا عزيزي انت عايش في وادي وعامة الشعب في واد آخر وده ح يختك في خانة مسئولي النظام (مخصصات، عربات، بدلات، منح،ربما اشياء أخري ) ولو ما كده انقل لنا المعناة الحقيقية في الشارع وليس حياة الفلل والقصور
ولك التحية
|
Post: #17
Title: Re: ؟
Author: Yaho_Zato
Date: 06-19-2002, 00:26 AM
Parent: #16
nice piece ......lazeeza 3adeel kida
|
Post: #18
Title: سلام عليك يا تماضر
Author: shak
Date: 06-19-2002, 00:41 AM
Parent: #1
صاح خلاص خلينا رش السهلة
احيلك يا تماضر لقصيدة محجوب شريف
ست البنات لى حدهن انت ستهن لى حدهن
شاك
|
Post: #19
Title: Re: سلام عليك يا تماضر
Author: Tumadir
Date: 06-19-2002, 02:17 AM
Parent: #18
حتى هن ما هينات
شوكرن
و قصى كمان
|
Post: #20
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: gessan
Date: 06-19-2002, 09:26 AM
Parent: #1
الاستاذة تماضر ..
سلامين يا زولة عليك وعلي المعاك جت ..
وأنا بقرأ في العمل ده ..
البيوجع حقيقة هو إنو تماضر مبعدة
من التفاصيل دي التي تعرفها جيداً :
ناس عواطف وبتاع المطعم "المدوعل"
والزول المشلخ سلم ..والعجاجة ..ولتيق الحاجات..
السخينة..والقراصة ..وأها عييييك..
هذا العالم الذي تراه تماضر بعين مختلفة وتلفت
نظرنا ليهو عبر المسرح ..ابو الفنون..
في حوار يوصلنا للمحك الحقيقي وأصل "القصة"..
الشغل ده نجيض وسمح عديييل ..
"سماحة المساسقة مابين المعهد والحيشان التلاتة"..
ويلا فتشي لينا تاني حاجات زي دي ..
شوفي دفاترك..ناغمي جاراتك وأندهي رفاقتك
وفي البورد السمح ده شدو مسرحكم ..
كيف ؟؟ دي بتعرفوها إنتو ..
وشتات السفر "القبيح ده" الناس تقاويهو
وتقالع دروب للتواصل ..
غصباً عن مشاغل الدنيا "أم رمادة" دي ..
والله مو ياهو؟؟؟؟
تقعدوا عافية
وبنتلاقى إن الله أدي العافية..
|
Post: #21
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: bunbun
Date: 06-19-2002, 09:35 AM
Parent: #20
التقدير لمبدعة سودانية انحازت لهموم شعبها، رغم معاناتها الشخصية وظروف الهجرة
|
Post: #22
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: sama7
Date: 06-19-2002, 09:57 AM
Parent: #21
المبدعة تماضر
مافى صدق و نقل للواقع احسن من كدا
الله يديك العافية
|
Post: #23
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: Tumadir
Date: 06-19-2002, 10:56 AM
Parent: #22
انا ما عايشة قى السودان
لكن هو عايش فينى
|
Post: #24
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: Elmosley
Date: 06-19-2002, 12:04 PM
عزيزتي تماضر ياريت لو شافوك وانتي بتأديهالأصبح الاندهاش في ارتقاء أشد الي الأعلي يديك ألعافيه
|
Post: #25
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: Tumadir
Date: 06-19-2002, 12:19 PM
Parent: #24
شكرن يا استاذ على الاطراء
لكن فى فيديو كلب اسماعيل محمد الحسن زميل وصديق ومخرج تلفزيونى شهير حيساعد فى عملية التحميل
(كلب اسماعيل دى تركيبة غريبة جدن)
|
Post: #26
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: Elmosley
Date: 06-19-2002, 09:35 PM
Parent: #25
طيب يا تماضر ماتجيبي لينا المبدع اسماعيل أهو يعطر معاك البورد ولا ايه
|
Post: #27
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: Tumadir
Date: 06-19-2002, 10:55 PM
Parent: #26
والله فكرة برضو
برجع ليكم بالخبر اليقين بعد حين
|
Post: #28
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: يازولyazoalيازول
Date: 06-20-2002, 07:10 AM
Parent: #27
تماضر الحبيبة
أولا شكرا على الإهداء يا بت يا نيل
وثانيا التأخير على الرد كان لظروف السفر وقد عدت أمس فقط للديار السعودية ورأيت البوست على عجل وما تمكنت من الرد الا الآن
تماضر
عانى الناس الأمرين وما برحوا وقد كان دور المسرح الرائد فى نقل هموم الناس ومعاناتهم على هذه الخشبة السحرية فهو ثورة فى حد ذاته وهو فوهة البندقية موجهة نحو الجزار والجبار وكل الظلم ويكون القهر مهددا تلكم الأصوات النقية ويأتى النصر على حين غرة ويشرق الصباح ذات يوم عندما يغفو الظالم وتظهر الحقائق ولا ينسى التاريخ أو يجف مداده ما بقى المسرح وأمثال تماضر شيخ الدين وأندادها
تسلمى يا بنية
|
Post: #29
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: Halema2
Date: 06-20-2002, 06:42 PM
Parent: #1
العزيزة الفنانة تماضر..
عمل جميل و سهل الهضم..
والصنة لمتين ياأختي الصنة شديدة ،، و كتيرة علينا..
وفي انتظار دق الطبول التي تحي أهل البيت الصاني
و التحيةلعواطف ولك ولي ولك امرأة سودانية
تحياتي
حليمة2
|
Post: #30
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: هوارى
Date: 06-20-2002, 07:46 PM
Parent: #29
الاستاذة الرائعة تماضر
تحياتى
العمل حقيقة رائع ، والاداء سهل وغير ممتنع بل ممتع ، فجاتنى القصيدة فقراءتها بعمق ، وسوف اوافيك بقراءة شاملة ونقد بناء لها على صفحات الصحف السودانية قريبا ، ولن انسى نسخة البورد ، لك التحايا ، ومزيدا من المعناة لمزيد من الابداع
40
|
Post: #31
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: Tumadir
Date: 06-20-2002, 11:20 PM
Parent: #30
I know that you are good at critical writing, so I can't wait to read what you write about my work. My thanks to everybody who liked it.
|
Post: #32
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: Wad Aljaili
Date: 06-20-2002, 11:34 PM
Parent: #31
|
Post: #33
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: بكرى ابوبكر
Date: 06-22-2002, 07:00 AM
Parent: #32
انشاء الله تعجبك الصورة يا استاذة
|
Post: #34
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: azza
Date: 01-26-2003, 03:49 PM
Parent: #1
قريت هنا و في سايت تاني
و مليون مرة بعيدا لما قربتا احفظها
انت روعة يا عواطف او تماضر
|
Post: #35
Title: Re: 1995 عاد لمتين؟؟ لوحة مسرحية تأليف تماضر شيخ الدين
Author: عشة بت فاطنة
Date: 01-26-2003, 11:43 PM
Parent: #1
وعاد لمتين نشوف كلب اسماعيل
سرعة ما تشوقونا
|
|