اسمى عواطف... وساكنة الثورة

منقول من الغابة والصحراء

الاهداء للظلاميين
فى هذه الساحة
بدون تصرف

اسمى عواطف ...
ساكنة الثورة...
عندى تلاتة وبمشى المكتب

ابلتق فيهم قدر الفى

استر الحال
واغطى العورة


مرة طماطم ومرة قميص
مرة بطاطس ومرة رغيف

قدر ما نسدها هى بتتقدة


غايتو رضينا بنمشى المكتب

قالو اتلفلفوا اتلفلفنا
بى توب بملاية اتكلفتنا
قالوا انطموا انطمينا
البص بى عشرة
البص بى عشرة
الفحمة الواحدة بقت بى خمسة
وفى الدكان الفول بالدستة
العيش مافى
سكر مافى
الزيت مافى
بنزين مافى
تراب وعجاجة وحتى المطرة السنة دى مافى
وغايتو رضينا بنمشى المكتب

؟وشن المكتب
ورق مردوم وفارو قصادو
رئيسك كوز
ونايبو حرامى
غفيرنا جنوبى زى السوط بشوش وبسلم
سيد المطعم سمين ومدوعل ومشلخ سلم
امين المخزن تاجر يبيع قى السوق الشعبى وشنبو مبرم
مراسلة شيوعى ومابتكلم
وصنة شديدة
شعب مأطر ودوره مقسم صنة شديدة حكاية تهمم
وبرضو رضينا بنمشى المكتب

لما تمغرب
بنفتح تلفزيون امدرمان اقصد تلفزيون الثورة
يجوك ناس كدة لابسين اخضر
زعلانين منك
يهرجوا فيك ويضربوا الرورى
ورورورورورك
الله اكبر بحمدالله فتحنا جوبا بحمدالله دخلنا الكرمك
سودان باميرى طمبرة ماهية مافى سودان ياميرى

لابجيبوا سيرة الاستعباد
لابجيبو سيرة الاستبداد
لاقالوا يوم فلان كتلوه
يتموا اولادو وسحلوه
(محاكية)
والانتاج والعلاج
عينك للبشتنة والعولاق وشابكننا انتاج وعلاج
خالتى خديجة كجك تتغطى وتقنت ليه وتديو ضهرا
-كضب السواد


والكهربا تقطع
وتسمع جاااااااااااااااك فى جوف الحارة
-هى مالكم نعل ماطيبة؟
-الشافعة سهاد وقعت من فوق قصت ضهرا
-ضربتا كهربا؟
-هى بسم الله الكهربا قاطعة تكوس فى الشمعة
ماشة تكابس للكبريتة
الكرسى رماهاا الطين زلقا
مامعروف كان كسرت ايدا واظنها ماتت
-هى قولن بسم الله هى ماتشوفن تكسى حسن
-حسن ياتو؟ حسن ودباشا؟
دة التكسيو واقف يومين عدمان القطرة؟
ماشايفاو قاااعد فى الضللة يفاقق ساى فى الكورة وفى الأسعار وكلام النشرة؟
-هى ترى قامت
-انخلعت ساى
ماديرين لمة
-الليد طيبة بجيبوا بصير

وهم طبعا عارقين الخيبة الجاية
قروش التكس والبنج المافى واشعة اكس
وقايمة مافى
-انخلعن ساى
وبالحال دة ماشين ساااااااى
وبرضو رضينا بنمشى المكتب

يوم فى المكتب وزى العادة ولما تسخن وتبقى جهنم
بنمشى نقنب تحت الشجرة
فى كنيبة كدى وكرسى مكسر وحجر وبلاطة
بنقعد نتونس
جنب ست الشاى
نتكلم يعنى عن حالتنا وحال الدنيا
كنت انا ومحمد وسلوى وابراهيم ومعاناالسيد
السيد دة ما بنعرفو كويس بجى لى سلوى
سلوى مليسة واظنو هو كيسا
ابراهيم دة اغبش وساخر
محمد طيب وزى متحمس

ويعنى كلام اتجدع
-لى شهرين ماضقت اللحمة
-نحن سنة بناكل قراصة
-نحن سخينة
-ونحن على الدكوة ترسينا
-وعاد لمتين؟
دى انا القلت عاد لمتين
وقامت كبرت عاد لمتين
محمد فام يتنفض كلو
صحى لمتين؟ الجوع كافر الشعب جبان
لازم نتحرك
ابراهيم حاول يثنيه ومحمد يزيد لازم نتحرك
اما السيد ماقال حاجة لكن واضح ما كان راضى
وسلوى معاهو تتمحرك وتضحك
غايتو كلامنا اتدهده مات
جاتنا تلاتة مشينا نكابس للثورات
الثورة نص الثورة ظلط عاد الثورات ماكترت
ركبت البص فى شمس الضهر البتعرفوها
الحر البغلى العرق الجارى
ناس تتآكل من آلاما وصمتها قاتل عندها كتمة
غايتو ازدحمت بنات افكارى
جانى كلامو محمد تانى وجضة فاطنة وناس حلتنا
غفيرنا جنوبى وزى السوط بشوش وبسلم
وكرش الزول الماسك المخزن

وصلت البيت شفعى يتخاتفو فى اللقمة
الجيران يتشاحدوا فى الكسرة
اللمات خنقاهن عبرة
الماسورة العادمة القطرة
خليناك يا رش السهلة
وخليناك يا زمن المهلة
من المغرب نقفل بابنا خلينا زيارت اصحابنا
غايتو رضينا مشينا ننوم
ونحمدو رب القدرة علينا بعد البينا بنمشى ننوم

جونا اتنين الساعة اتنين
رجال الليل رجال الغفلة
دفرو الباب وكسرو الطبلة
-حتمشى معانا
-هى ماشين وين؟
-حتمشى معانا
-واولادى الراقدين نايمين
_حتمشى معانا
_واخوانى الما شغالين
_حتمشى معانا
-وناس امى البيتم من طين
حتمشى معانا حتمشى معانا يجابدوا يناتلو حتمشى معان... حتمشى معانا
لقيت روحى جوة الزنزانة
والله يجيركم من الصمت الفى الزنزانة ومن الوحشة الفى الزنزانة

شهرين لازول بسأل لاعارفة الحال دة آخرو متين

وبعد شهرين بدا التحقيق
جونى اتنين ساقونى لمكتب ضابط
معاه اتنين ساقونى لمكتب تانى
فتحوا الدفتر وزى الاسد الضابط ينتر
-عندى معلومات هنا انك بتحرضى ناس المكتب
-انا؟
-بتعرفى ابراهيم ومحمد؟
-آى ديل بالضبط زملاى فى المكتب
-فى يوم اغبر تحت الشجرة مش انتى القلتى عاد لمتين؟
-آى قلت..... بس
-خلاص دى التهمة الجاهزة .... دا التحريض الضد الدولة
-عارفة انتى عملتى شنو؟ وعارفة جرحتى شعور منو؟
-انا جرحت شعور؟ شعور منو؟
-سيد وسلوى
_نعم؟
-لأنو سيد دة موظف فى ال.... اقصد سلوى موظفة فىال...
ومامهم تعرفى
عشان نتأكد دايرين نعرف اسمك عنوانك وضعك؟

-اسمى عواطف ساكنة الثورة عندى تلاتة....و.....

-تلاتة؟ ابوهم وين؟
-عندى تلاتة ابوهم ميت وبرضو جرحت شعور ناس سيد؟
ابوهم ميت عذبو سجان بربرى زيك
مات والناس صبحانة تعيد
وبرضو جرحت شعور ناس سيد؟
شفت بريق حدقات اطفالو؟
هى البتهدد عرش السيد
هى البتأسس لى يوم بكرة
وللمستقبل تبنى تشيد
شفت الوعى الدافر وجايى
شفت النبت القايم وجيد
دة البجهجه ناس السيد
وليكم يوم يا ناس السيد
ليكم يوم ياناس السيد.

لكن مشكلتنا فى هذا البورد

يا عواطف
تتلفحى وبس
وتغطى العورة

لانك من صوتك عورة
وحتى اثار دربك
عورة


واسمك عورة


والشيخ اب دقن بعاين من تحت العين بفتش وسط
محفتك
عورة
دقوها
اقيم الحد على ماريا الجاية
ما لابسة قناع الدين
وما متحشمة

وكلنا عورة

مسكينة عواطف
ادعوك
الى هذا البورد
عشان يقيمو عليك الحد لانو ملايتك المتلفحه بيها كان فيه خرم بظهر بعض من الممنوع جسمك

واستغفر لله

بتبداء كده وبعدين بتجر
ما تقروا ده
ما تكتبوا كده
ما تسمعوا ده
ما تتكلموا مع ده
ما تلبسوا ده
ما تفكروا كده


ما تمشوا هناك
وما حتي يغيب الوعي
وتروح فيها عواطف بعواطفها

ويا ابايزيد
ونروح ورها كلنا

شنو يا شرنوبى مالك داير تشاكل بى قصيدتى الناس

انا فترااااانة من المشاكل دى

تماضر
ما تخافى
بنشاكل ليك


بس اتفرجى

لى اسبوع الراس زى مروحة التربيزة

كو كاع كراع

وشرار يطير من هنا
وتسمع جاك فى جوف الحلة
وناس تتظلط فى حنكها
وحجر طاير
والرايش يتطاير فى عيوننا
والفرجة زاتها بقت صعبة

تدخل يدك فى الشوال تمرق بى جرحة
مرات سلاخية مرات تنزف
وغايتو
انا بقول برضو لى خير
فى الاخر البورد حيكون معترك نضيف وحيطلع منه سودان جديد
فيه تقبل وقبول للراى والراى الاخر بدون تشنج
لازم كل زول يتعلم انه هو ما عايش براهو فى الدنيا دى وانه اخلاقو ومثلو ما مثاليه ولا صالحة لكل الناس التانيين وانو الاختلاف ما مفروض يكون مصدر من مصادر الكراهية والتنافر بل مفروض يكون سبب من اسباب تطوير العلاقات الانسانية والدفع بمقومات الوجود الانسانى لى قدام بدل الحروب والحرابات

الله يولى من يصلح

تعرفي يا تماضر
ايام الديمقراطية الاخيرة بعض الناس افتكروا ان المسالة
جلسات استماع وحفلات وونسة وعواطف ما لقت واحد يتكلم
الكل كان صامت لكن الوضع الحالي عاوز ناس تصمد عشان يكون في سودان جديد عشان مانطلع في الشارع تاني ونقول
الثقافة عاوزة نظافة