مظاهرة امام بورد سودانيز اون لاين

دعوني أتجرد من قيود المكان...
دعوني اهرب من حصار الزمن....
أريد أن أعيش اللحظة معكم...
و عبقكم يزكم انفاسى...
حضوركم يحيلني إلى نقطة...
بالغة الضآلة...
في كون شاسع...
أختصره فيكم...
إبداعكم غمرني ، حتى لم يبق مكان للذاكرة ، فلم .. لم تريدون أن تفقدوني الذاكرة.
ادمنتكم حد الجنون ،تمثلت فيكم قول ابن الوفا (رضي الله عنه ) رغم اختلاف غرضينا:
انتم فروضي ونفلي انتم حديثي وشغلي .
يا قبلتي في صلاتي إذا وقفت اصلي.
جمالكم نصب عيني إليه وجهت كلي.
وسِرُكُمْ في ضميري والقلب طور التجلي.
توسدت معكم كل الأرصفة ، الحلوة والمرة ، وجلسنا جميعا متقاربين كأننا شخص واحد .. دخلتم إلى قلبي، وتسللت أنا إلى أعماقكم ... كم كنا رائعين حينها ، ولحظات التواصل تسرق الزمن منا ، .. كم كنتم رائعين، في الشعور ، والوعي ، واللغة، وكل شيء ... مارست معكم لعبة الحلم رغم انف الموت المزروع في عيون الأماني.
لا ادعي أني ولدت في عبقر، أو أن أمي وحمت بشيء ذو قيمة فنية أثناء حملها بي، ولم تزرني كديسة الشعر إلا في المنام ، كما أن صوتي غير جميل ،( وبقلب سلم ، وبفرق زمن كمان) ، ولكن تسكن داخلي روح شبقة للجمال، تتحسس الإبداع ، تصاب بالدهشة ، تأتيها الرعشة أمامه ، تشتم عبيره ، تذوب في تفاصيله ، وترقص على إيقاعه.
بقدر ما تتسع المساحات وتتحمل الحروف ، وتقدر الكلمات ... وكيفما أدركت المعاني الدواخل معبرة إن استطاعت ،، وبوسع هذا الكون وسيره وأحداثه( وما أضيقه حينها ) تخرج جحافل مظاهرتي هذه إليكم ... لا تحدها حدود .. وتحرك الوجدان نحوكم في كل لحظه ... عبثا أحاول إطفاء تأججها بكثير من الانشغال ومياه الصبر ونداوة الإيمان..( لكن هو الله ربي ولا أشرك بربي أحدا ) صدق الله العظيم .. فإذا كان منه المبتدأ فإليه المنتهى ، ولا فرار من العودة إليه مرة أخرى ، سأسير بمظاهرتي هذه حتى باب البورد ، وسأعتصم أمامه ، عاصباً رأسي بعصابة مكتوب عليها (يا نبقى بورداب يا نموت على الاعتاب)، ورافعا رايتي التي كتبت عليها:
أتلك حروفٌ أم بروقٌ سواهرُ *** وتلك معانيٌّ بينها أم جواهرُ
فلو أنني من (بوردٍ) غير هذا *** أبيتُ حياتي أو تقومُ الأواصرُ
فإما أن ادخل ، وإما أن أموت على أعتاب البورد.
فهل وصلكم هتافي ، وهل من مجيب ؟؟؟؟
دمتم فخرا لي .
ابن البورد الذي يتلصص السقيا من فارغ الأكواب حتى الآن/ كحلوش ،، أو طلال الشيخ
دمشق . سوريا

خــــــــــــلاص
دة حيجيب لينا البوليس

وحـــــــــيفركشها لينا

بكرى دخلو..


لى يومين ما جيت قاطعة بى جاى

وصلتى كدة طقشتنى المظاهرة فى خشم باب البورد

خليه يخش يا بكرى قبل ما يفضحنا

اهــــــــــــــلا....

اتفضل

دعوه للمقارنه
واللبيب بالاشاره يفهمو



عن نفسي ارحب بك
وادخل لي جوه ومافي داعي للكواريك
براحه براحه
تمام

مرحب بيك يا طلال بيننا يلا خلاص ابدا اعمل لينا رابطة للبورداب فى سوريا اصلو واحد من البورداب رشح سوريا لقيام المهرجان لرخصها و دخولها بدون فيزا

. شكلك كدا ماقاعد في الواطة .الله يدينا خيرك هههه.النشوف دورك ههههه...فرصة سعيدة.

ولو ، نحن الاسعد برضو يا

ر


و


ع


ة

والله يا الخواض كلامك صاح
ناس متواضعة بتحب الناس وعايزة تدخل معاها بأي تمن، بالحب والتواضع والشعر والكلمة الطيبة الجميلة
وناس يحنسوا فيها أن ترضى وتتنازل وتتذكر انها أيضا من طين زي الباقين، وتتذكر حق الناس عليها وتتذكر الشعارات، وتجي تقعد مع الناس تاخد وتدي، لكن سبحان الله القلم ما بزيل بلم


وناس بكري الفي النهاية تعبانين مع الإتنين لكن بكل رضا شايلين وصابرين

والله بالإجماع الزول دا يدخل، واذا قيل لكم تفسحوا في المجالس فافسحوا يفسح الله لكم، ولو ما في محل أدوه بكاني

وعاش الود والتراحم بين الناس وعاش السودان والسودانيين

(لكن من اين اتى هؤلاء)؟ا

الزعيم بكرى

الاخ طلال كلماته بل مقطوعته الادبية الرائعة تشفع له للدخول بل وتعطيه المفتاح الذهبى فهو بحق حامل يراع رائع ليتنا نضمه الينا لنسعد بحلو كلماته لا سيما وكما اسلفت انه العضو الاول من سوريا فهو سيكون ذو رؤى مختلفة وافكار مختلفة فعن نفسى ارحب به وارجوه ان يكون عضوا فاعلا بيننا وفينا ومعنا..

هلا استجبتم لطلبه
بس يقرأ قوانين المنتدى اولا..

هذا لا شك أجمل وأحلى طلب انضمام

فافسحوا له الطريق وأدخلوه اليكم بسلام آمن وبلا مظاهرات

يا جماعة الزول ده رائع .. الرسالة دي وصلتني بي صفة شخصية قبل
فترة بسيطة في ايميلي .. و رديت عليهو .. و رد علي رد أدبي جميل جدا ..
أول شيئ أنا سعيد جدا انو انضم لينا .. و أرجو انو يتحفنا بالكثير و الجميل خاصة و أن البورد في حاجة الي دماء شابة ..
مرحبا بك طلال الشيخ
و تسلم يا بكري علي الديموقراطية اللي بتدير بيها المنتدي و علي الاستثناءات الجميلة
لكم كل ودي
محمد

هذا قطار الحرية

سلام يا ود الشيخ

كلامك دافي
والأبيات الرائعة هي في الحقيقة لسلطان العاشقين ابن الفارض
أنتم فروضي ونفلي

وكان ينشدها الراحل المقيم أبو داود


أنتم فروضي ونفلي أنتم حديثي وشغلي
يا قبلتي في صلاتي ّإذا وقفت أصلي
جمالكم نصب عيني إليه وجهت كلي
وسركم في ضميري والقلب طور التجلي
آنست في الحي نارا ليلا فبشرت أهلي
قلت امكثوا فلعلي أجد هداي لعلي
دنوت منها فكانت نار المكلم قبلي
نوديت منها كفاحا ردوا ليالي وصلي
حتى إذا ما تدانى الميقات في جمع شملي
صارت جبالي دكا من هيبة المتجلي
ولاح سر خفي يدريه من كان مثلي
وصرت موسى زماني مذ صار بعضي كلي

فالموت فيه حياتي وفي حياتي قتلي

أنا الفقير المعنى رقوا لحالي وذلي


"لكنا هو الله ربي ولا أشرك بربي أحدا"
أردت فقط أن أكتب الآية الكريمة صحيحة حتى تقوم بالتصحيح في هذه القطعة الرائعة يا ود الشيخ.
ولك سلامي

وحبابك عشرة

ومن يجرؤ على اعتراض مشارك شفيف لطيف من الدخول إلى واحة المعرفة .. مرحباً بك أخى .. وتأكد أن الدفء والحميمية هنا يرفرفان على المكان ويحرسانه.. وحبابك عشرة

الاعزاء : بكري ، تماضر ، الخواض ، بكري تاني ،الصاوي ،قرشو،يازول يازول، موديك ،ياسر الشريف ،مارد:
تحية ملؤها اللهفة،،
يا جماعة انا فرحان ، وخجلان ، ومندهش ، وشعوري عجيب جدا جدا ،، اصف لكم شعوري ،، لكن لا .لن اصف لكم شعوري، لاني اكره الوصف. منذ ايم دراستي الابتدائية، وانا اكره الوصف. يعطينا المعلم فرض انشاء، طالبا منا أن نصف. " صف يوما ممطرا". وكنت لااعرف، لانني اكره تشبيه شيء بشيء اخر. فالشيء يوصف بنفسه، وحين نقارنه ننساه. فوجه الفتاة يشبه الفتاة ولا يشبه القمر. البياض والاستدارة وكل شيء. حين نقول أن وجه الفتاة يشبه القمر ننسى الفتاة. الوصف هو كي ننسى. وانا لا احب أن انسى. المطر يشبه المطر، الا يكفي هذا، يكفي أن تمطر حتى نشم رائحة الخريف.
لا اعرف أن اصف، رغم اني حفظت الكثير من الشعر الجاهلي. لا اروع من امريء القيس. ملك وشاعر وعاشق وسكير وفاسق ونصف نبيّ. يا عيني على هذا الشعر الرائع " ترائبها مصقولة كالسجنجل"، يصف صدر المرأة مصقولا كالمرآة. أسمع الشعر واقول الله واحبه . ولكن عيبه الوصف. كيف يعني يكون صدر المرأة مرآة؟ عيب، الا يعني هذا انه لا يراها بل يرى نفسه؟ وانه لا يضاجعها بل يضاجع نفسه؟ وهذا يقودنا الى افتراض مرعب عن اجدادنا الشعراء.. بالطبع لم يكن امرؤ القيس (....)ً ولا المتنبي ، ولكن الحق على الوصف.
ومع ذلك، احب الشعر الجاهلي، واحب المتنبي ، احب النغم الذي يدور الكلمات داخل ايقاعاتها وقوافيها. اعشق الايقاع وتناغم الاشياء ورنين الكلمات. وحين انشد هذا الشعر، تأخذني النشوة التي لا يعادلها سوى نشوة الاستماع الى الموسيقى . وهذا نسميه الطرب. نحن شعب الطرب. والطرب ضد الوصف ، فكيف اصف لكم وانا لا اعرف ؟ كل ما اعرفه ، انني احس بكم تخترقوني ، وتعششون داخلي منذ امد ، سابقا كنت اتلصص ، لكن الان لا ، سأمارس كل ما كنت افعله بخيالي هنا ، سأدخل ،حامشي اشيل الفاتحة مع مع ناس البكيات ، ومن ثم سأزور عمود البورد ، واستدين سيجارو وقزازة كولا من ود الجيلي ،وشريكته بت القبايل ، ثم اجلس في طرف الضل ، اشرب ، واعب من سجارتي ، وااسترق الشمار، استمع الى ايقاع الدلوكة المنبعث من غرفة البنات ، ابتسم ، انه رقيص العروس ، اقمنه من اجل سماح ،من على البعد يظهر عمو قرشو ويازول يازول ، وهما يتجادلان حول السيك التي حصلت في قيم الوست امبارح بالليل ، يلمحني عمو قرشو ، تسقط سجارتي بحركة غريزية ، لا ادري ما السبب ، اهو شعور الابوة تجاههة ، لا ادري ، اتوجه بعدها الى بيت تاس خالتو الجندرية ، سافطر هناك ،واخليها تبراني في موضوع الجندر ده ، لانو ما واقع لي كويس ، وسأتناول الغداء عند ناس خالتو تماضر ، واقعد اخلي محمد وسيرين يقروني انجليزي ، اصلو انجليزيتي مخستكه ، انجليزي علب بعيد عنكم ، سيجنال تو ، وميد ان تشاينا ،واكسباير ديت ، وانا حاقريهم عربي ، ، نقوم نجوط مع بعض ، تقوم خالتو تماضر تنهرنا ، يا اولاد ما تكوركو ، نقوم نحنسها ، لعبينا مسرح مسرح ، تبتسم ، ثم تشرع في تلقيننا ابجديات المسرح ، واول قاعدة ما تدو تضهركم للجمهور ابدا،اغادر هذا البيت الدافيء وانا ادعوا الله انا يحرس اهله ، امشي بعداك الف في البورت واضرع ، ما خلاص بقيت عضو ، حارد على ده ، واشاغل دي ، وانحني امام هذا ،واستمع الى تلك ، وحاقوم امشي اخلط بت قضيم ، ابراها ليكم جنس بري ، لمن تقتنع انو هي لسة ما شافت احباط !!، اجلس بعدها وقد اصبت بتلك الحالة التي تصيبني كلما جلست امام البورد ، مع اختلاف انني هذه المرة في الداخل ولست في الخارج ، افرح من تاني ، واقول
صفقته جريت فرحان
ما تغطيني ، انا انا عرقان
من الوهج الفيني
فاجأني النهار

يا هلا بيك
بس مظاهرات جوه ما دايرين
نتناقش براحة

عازة
لك الود كله
اشكرك على الترحيب ، واتمنى ان اكون هادئا ، وخفيف على قلوبكم
تسلمي يا غالية

اهلين يا كحلوش

استاذنا الرائع الموصلي
والله مشتاق اسمع صوتك !!
تسلم يا غالي

العزيز كحلوش

حقا سيدى قلمك رائع وجرىء ارجو ان يثرى المنتدى وهانت الان بيننا ونحن فرحين بوجودك هنا ومداخلتك اعلاه تنبىء انك قلم لا يستهان به ..

بس لى سؤال واحد
ما معنى كحلوش هذا ؟؟

مع تحياتى

عمو قرشو
سيدي دي كتيرة علي
والعين ما بتعلى على الحاجب،
اما كحلوش فهو مستمد من اللهجة المغربية،،اصلو معانا هنا زملاء لينا مغاربة ، ، ، ومعناه اسمر البشرة ، فانا بالنسبة لهم اسمرا ، اذا لم اكن ذنجيا ، المهم هم اطلقوا علي الاسم وقامو شبابنا ناس الاتحاد ( السودانيين ) سيرو اللقب علي .
شكرا لللاطراء يا غالي

;كحلوش مرحب بيك حبابك
وبالبورد السعيد الينا جابك
اهنيك على هذه الذهنية التي تجمع الاشتات في رونق
واحد وعلى هذه السخرية الجميلة فعلا تستحق تكون بجوة
احييك بكري على الديمقراطية وترحيبك بضيوفك

عشة بت فاطنة
ما انا الا فراشة جاءت تحترق بنوركم
دمت لي ايتها الملهمة

كحلوش
السلام والمحبه لك وانت بكل هذا الاحساس
لى جوه

كمية الابداع حمزة سليمان
من احساسكم بينا ، بنحس
اشكرك بقدر ما تتحمل دواخلك.
دمت لي يا رائع.

لكن دخلتك ما عينة
وانتظر ساكت جنس بري هو

خالتوووووووووو

ازيك

مشتاقين

وانا راجيهو البري ده،هو انا لاقي

دمتي للابداع ولنا جميعا

يا الذ خالة

المظاهرات دي ما بتجيب الهوا يا جنا
مرحبا يا مان شرفتا كتير

البوس / ودالجيلي سابقا:

شرف الله مقدارك يا مان. وما دام الحكومة ماسكنها ناس بكري ، نهي طارة .

اها السجارة والحاجة الباردة سجلهم علي،، وافتح لي صفحة بي اسمي في كراس الجر ، بس ما تشوفها بت القبايل . والله انتو حا تتعبو معاي تعب.
شكرا ليك يا غالي
دمت لي .

تشرفنا والله
حباب الغالى ابن الغاليين
ابقى لجوه
البورد نور بقدومك

كحلوش يا مرحبا
مظاهرتك الرائعة هذه
ستغرى البعض
لينتهج ذات النهج
فقد سجلت لك براءة الاختراع
لك الود
ومرحبا بك اضافة ثرة لهذه الكوكبة النيرة
ومزيد من الابداع
يا رائع

كحلوش ياابو اللطافة والله
دخلتك حلوة وسمحة ومظاهرة
فيها أسلوب راقى للمظاهرات
والله اريت كل المظاهرات حلوة كدا
لكن الخيزران والسيخ والبمبان
ماوقفت سوقهم
زاهلا بيك ياكحلوش فى دار بكرى الحلوة دى

بدرى

ـــــــــــــــــــــــ
أنا بلدى بلد الخير والطيبة

اهااااا هو دا سر الاسم؟؟ طب ماتقول كدا من الاول وانا اشيل واودى واجيب وطبعا صدقتا الكلام القلتو لى لوووول عموما اهلا وسهلا بس طفى لينا الحريقه الولعتهادى

ههههههههههه ياعسولة
وعربية الوزير الاتقلبت دى برضو
ماتنسيها

ــــــــــــــــــــــ
أنا بلدى بلد الخير والطيبة

ابن عمتك يا غالي

البورد منور بي ناسو السمحين

سلمت يا ملك.

الرائع منعم:

خلاص انا اي زول حايتظاهر تاني من دون اذني حاقاضيهو.
شكرا للترحيب ايها الرائع.

الفرده بدري:
وين مشتاقين كميات.
شكرا يا غالي

العسل عسووولة
شوفتك ولا القمر.
اها رايك شنو بعد ده ، لسه مصره اني اغيرو.
سلمتي لي يا غاليه.

قمر شنو عليك الله ؟؟؟ ماخليت البكش لسه لووول عموما تسلم يازوق اماالاسم فخلاص حفظناهو بس ماتغيرو بعدالتعب والمجهود دا كلو

ههههههههه يكه
والله كحلوش ده جنني في الراكوبة زول فرده وكده ودخل البورد من اوسع ابوابو يازول ظاهر زي ماداير بس ما تحرق لساتك وتكسر القزاز ههههه يكه

الف مرحب بيك كحلوش وربنا يديم التواصل طالما انت زول بتاع مظاهرات خلي اساسي يصرف ليك لبس خمسة ههههههه يكه بس بعدين لمن الجماعة بتاعين القرين كولر يجو ما تجري وتقول ده انسحاب تكتيكي ههههههه يكه

زاتوووووووو

الاخ كحلوش سلامات
الف مرحب بيك وسط الاحبة بالبورد
نتمنى لك اقامة دائمة ومريحة
وتحياتي مجددا

زاتووووووو يا فردة
الشوق كميات،، ويا مان نحن كما ضامنين انو ناس الجرين كولر ما بحصلونه بنطلع لينا مظاهرة قدر دي ، لوووول يكه
تسلم يا غالي

الرائع عطبراوي

تحياتي واحتراماتي

تسلم يا ملك