Post: #1
Title: انتبهوا ايها السادة ......بيناتنــــا بخيـــــــل
Author: dreams
Date: 12-29-2002, 12:27 PM
تضاري النسمة ضل البسمة
من وهج الشمس والليل
تخت البسمة ضل العتمة
في روح الزمن والخوف
تتاوق بسمة من فوق وجعة
تاخد من حنينها البوح
تعاين نمة في جوف أنة
تطلع من عدم باللوم
تقيف الصرخة في نص الأمل
تقول
تعالوا نشر على حبال الفال
هموم الليلة والباكر
نفرتق شفرة الأحزان
نشوف احزانا من وين جات
نلون شرفة الأفراح
بلون البكرة والجاي
عشمنا يكون كلامن صاح
من كلمات المريود ...وعندو من العينة دى كتير لكن ما برضى يمرقها لينا
ايدكم معاى نهرشه ونخليهو يخلى جردل الجير شوية ويطلع لينا العندو
|
Post: #2
Title: Re: انتبهوا ايها السادة ......بيناتنــــا بخيـــــــل
Author: Tumadir
Date: 12-29-2002, 12:59 PM
Parent: #1
المريود حقنا دة يا دريمز بكتب كدة؟؟؟
المريود دة كلام سلس وجميل
وانا طوالى بتعذب بى فكرة انى ما رديت على كلماتك النديانة فى بوست بنت الازيز
جات كدة ما من قصد وبعد ما فى البورد بقت فى البروفايل
التحية يا مريود
والتحية يا احلام يا جالبة الدرر من غور البحار
اكتب يامريود
كلماتك بردا وسلاما
|
Post: #3
Title: Re: انتبهوا ايها السادة ......بيناتنــــا بخيـــــــل
Author: المريود
Date: 12-29-2002, 03:48 PM
Parent: #2
دريمز المشكلة ما بخل لكن عليك الله اسع دا إبداع دا
دي خرمجة ساكت حروف مرقت وكت غفلة إحساسي
وخلوني في جردل جيري دا احسن ليكم باكر أملاكم خرمجة واقوم اصدق حكاية اني مبدع دي
وتندمو علي اليوم القلتو فيهو مبدع
==
طعم البورد
طماضر بت شخ الدين الفال السمح
قلت طماضر بحسها أقوى واعمق وسودانية وفيها نكهة حبوباتي وعماتي وخالاتي
وشكرا على الإطراء والكلام السلس يفوتكم يقبل وين
تعرفي انا في نصكم زي الزول الجاي من الخلا وخش ميدان كورة فيهو ناس نضاف وظراف ومرتبين ولابسين ست في ست ومطقمين طقم طقم
اها انا بي عراقيني دا دحين بخيل في اللمة دي
بعدين ماتبقي حساسة كونك رديتي والحاجات دي بتحصل عادي ولا تهتمي
take it easy
وحلوة جدا حكاية بعد ما في البورد بقت في البروفايل
يسلم بوستك وبروفايلك
وماتشيلي هم
|
Post: #4
Title: Re: انتبهوا ايها السادة ......بيناتنــــا بخيـــــــل
Author: حنين
Date: 12-29-2002, 03:54 PM
Parent: #1
ا مريود؟؟
كا دا كلامك وبتقول عليهو خرمجات اروح انا وين؟؟؟
يعني حردتني البورد عديل
نا عامله فيها عيني قويه لكن بعد دا اشوف لي حته ادسها فيها واللا شنو؟؟؟
يا زول اكتب واكتب واكتب ولا يهمك كل زول جواهو حاجات جميله ومميزهوممكن يديها
قال خلا قال
ياخ ما تعقدنا
|
Post: #5
Title: Re: انتبهوا ايها السادة ......بيناتنــــا بخيـــــــل
Author: المريود
Date: 12-29-2002, 04:27 PM
Parent: #4
حنين هدي من روعك
دي خرمجة وحاة امي خرمجة كليمات ملصقات وماعارف دريمز مرقتن كيفن
وحياتك انا زي ماقلت لي طماضر الزول ابعراقي الفي ميدان الكورة
والله كان جنس كلامي دا بحردك البورد النسكت ساي تقوم تشيل فيني بوهية المبدع
ومحل ما اتكل في البورد دا اجلبط ليكم الحيط وتقولو الزول الاشتر دا شنو
ولا تندسي ولا تندسي
خليك هنا دا والله ياهو محلكم كلكم قبيلة المبدعين
وتعالي هنا كلامك دا قاعدة تكتبيهو وين كدي وريني يمكن أضاير أنا حتي
ولا شنو
|
Post: #6
Title: Re: انتبهوا ايها السادة ......بيناتنــــا بخيـــــــل
Author: Elmosley
Date: 12-29-2002, 04:38 PM
Parent: #1
والله فعلا بخيل جدا امانه ما اتلومت معانا يامريود
|
Post: #7
Title: Re: انتبهوا ايها السادة ......بيناتنــــا بخيـــــــل
Author: wadazza
Date: 12-29-2002, 05:55 PM
Parent: #6
2003
جابت شاعر فى قامة المريود...ومن زمان أنا شايف فيهو حتى فى كلامو العادى نبرة شعر...والنموذج الفوق ده يعكس رؤيا متقدمة جدا فى كتابة القصيدة..هنالك تحليق ورمز واضافة وتكثيف ..وخط درامى يتصاعد بمدى المسكون من حزن والمأهول من فرح..هنالك نزاع شفيف بين طرفى مسألة أن تكون أنت وأن يكون الوطن أنت...وفى كلا الحالتين تنسرب الغربة من بين أصابع القصيدة لتضىء ..وتبقى جمرة للكتابة
لا تبخل علينا يامريود...وتحية لك دريمز على هذا الاكتشاف لقارة بوردنا المريود
تحياتى
ودعزة
|
Post: #8
Title: Re: انتبهوا ايها السادة ......بيناتنــــا بخيـــــــل
Author: dreams
Date: 12-29-2002, 10:12 PM
Parent: #7
المريود ود ابوى
بعد ده انا طلعت منها
عارفاهم ما ح سيبوك الا لما ياخدوا كل العندك
وانا ح اقعد واسمع
شد حيلك
تسلم
|
Post: #9
Title: Re: انتبهوا ايها السادة ......بيناتنــــا بخيـــــــل
Author: faisal44
Date: 12-30-2002, 07:32 AM
Parent: #8
العزيزة دريمز
تسلمى يا اختى وتسلم اناملك حقيقه ابداع يا المريود وين كل الكلام دة دافنو انت رغم الشجن والحزن الفى كلماتك لكن كلمات فى غايه الروعه حقيقه انت بخيل على قوول دريمز نتمنى ان تنتفيض كدة وتورينا حاجات من بيت الكلاوى بالله... ولكم كل التحايا دريمز مريود
|
Post: #10
Title: Re: انتبهوا ايها السادة ......بيناتنــــا بخيـــــــل
Author: المريود
Date: 12-30-2002, 12:51 PM
Parent: #7
سلامات ليكم
استاذنا العتيق الموصلي
قلب البورد وسيد البورد ودعزة
بت ابوي وكفي
فيصل الحنين
ليكم جملة كدا حزمة أسف للرد المتاخر علها تشفع لي عندكم
تعرفو يمكن أكون في عيونكم شاعر وانا على إحترام النظرة دي لو رضيت ولا ابيت
ولا اخفي عليكم عندي كلام كتير جنس دا بس ما كنت متخيل يمكن يقولو عليهو شعر
من الثانوي وانا بكتب واحزم وارمي في الدفاتر كنت بقول الخرمجة دي ليها يوم تمرق فيهو
دردقت عجلات الزمن لي ورا كم سنة إتمنيتكم هناك كنت ممكن أطلع حاجة من الحاجات البتكتبو فيها دي
لكن بكل أسف الدور دا بقى صعب علي تمثيلوا لانو الأدوات غير الادوات والسناريو غير السناريو
وعود الملكة الشعرية يبس تب مابخدر لو رويناهو بموية البحار السبعة
أقعدو عافية
برجع تاني اصلي مشغول شوية
|
Post: #11
Title: Re: انتبهوا ايها السادة ......بيناتنــــا بخيـــــــل
Author: bamseka
Date: 12-30-2002, 05:50 PM
Parent: #10
سلام دريمز
سلام يا حنين يا مريود
بس انا عايز اعرف ليه دافنين الكلمات والروائع
يا ود يا مريود صحصح واتحفنا من بيت الكلاوى
تحياتى
|
|