Post: #1
Title: شعـر ... آمــال وآلآم
Author: singawi
Date: 09-29-2002, 06:05 PM
Parent: #0
سلام وكلام وشوق وملام
وكان حاولت أشرح ليك
كيف عايشين وكيف الحال
ما يغريك قلنا وقال
واسمعي من وليد ممكون
ولكن للتقيل شيال
حابس دمعة المحزون
وعازف للفرح موال
دحين يالغالية أسمعي لي
زمان ياشـطـة قبل سنين
كنت وليد طموح ورزين
وود الموية كان إسمي
لأني معانق الأسفـار
يوم في سنجة يوم سنار
وتالت يوم حدا الخرطوم
وفي الخرطوم
عند مقبولة بايت يوم
ويوم في الثورة يوم في العمدة قول يومين
وسط ناساً عزاز وحنان
يشاركوك في الفرح والزين
ويعزوك في الترح والشين
كنت سعيد
وهم الدنيا جادعو بعيـد
ماني الزاهد الدرويش
إلا كمان
ماني النرجسي المخدوع
وكل الدنيا في عينو
كرش مليـان
وبايب ينفث الدخـان
يقول نفسي وغيري إن شاء الله بالطوفان
* * * *
وفي ذات يوم
صحيت كالعادة من النوم
واتوضيت قبل شوفة الشمس صليت
سحبت السبحة واستغفرت رب البيت
بعد تسبيحي في برش الصلاة اتمديت
سرحـت بعـيـد ...
وشلت السبحة أحسب بيها عمري الفات
وكم كان فيهو من ضحكات
وقدر الفيهو من دمعات
وجات حبوبة شايلة الشـاي
وقبل الشاي سقتني حنـان
حبيبي الدنيا شن فيها .. مالك ..؟ وحد الرحمـن
تعال ود أمي أمسـح ليـك
دميعاتاً حسـت في الجـوف
عمـرك كـم
ومتلك شن بجيبلو الهـم
ودقنك كان بقت للسرة ياك ولـدي
لسة بتحبى في نظري
ولسة بخاف وبرجى الرجعة
كان شاققت نص الليل
ولسة بخاف عليك الوجعة
كان عانقت موج النيـل
وكان بمناي
أشيلك ياحبيـب جــواي
محل ما أمشي تمشي معاي
يا حبوبة كيفن ما بشيل الهـم
وليدك دق في العشرين
وحال الدنيا كل يومين
يوري فنـون تزيـد الغـم
كيفـن ما بشيـل الهـم
وشايف داك ود العـم
سافـر غـاب ودافر جـاب
وفي سـري
أقـول ياوالدة لو تدري
وليدك عـاشـق القمـرة
وتايـه كيف يجيب مهره
وكيفن يمـه يبني البيـت
بيتاً شرط يكون طابقيـن
يشيلكم إنتو والقمـرة
وشان يقضي الوليـد غرضو
لازم تصبرو وترضو
وتسمحو لي أسافر ألحق الشبـان
بعد سنتين أجيكم فنجـري وغنيـان
وابني البيت
يشيلكم إنتو والضيـفـان
ولما يخش علي الليل
أفرش في سطوح البيت
وأكرف من نسايم النيل
واغني أضاحك القمرة
واقول ليها
عشانك إنت كم قاسيت
وكم عانيت عشان يالسمحة بيك اتلم
هناك القمرة تتبسـم
تقول لي إت شقيت ولقيت
أشكر ربك الرحمن
وعيش الحاضر الزاهر
وفكر في جمال بكره
وقلب فتش القاموس
ما اظن تلقى معنى الهم
دحين يا أهلنا خاطركم
صحيح الغربة ما بتندار
وقالوا الغربة فيها ودار
وحال الغربة حالاً حـار
حار ما حـار
وليدكم للتقيل شيـال
مدردح ما بقيف محتـار
وكان وصل التعب للروح
وشم الدم عقب صبار
ودعتكم الله يالغالين
وما تنسونا من دعوة قليب شفقـان
كان عصروهو كل الفيهو
خوف الله ورجى الرحمن
ودعتكم الله يالحبان
* * * *
ركبت الباص وقلت خلاص
بديت سكة فراق الهم
ولما الباص بدا المشـوار
وفات السوق وصل لفة طريق سنار
هناك مسكت قلبي الطار
وقلتلو وحد الرحمن
أركز ماك قليب عصفـور
اتقـل جمـد الإحسـاس
وصب الدمعة جـوة الجـوف
وما تفضحني وسط النـاس
وابكـي وقول
فراقك سنجـة كان قدري
وهمي الشايلو من صغري
سـنـجـة هــواي
وسنجة غــنــاي
وسنجة مــنــاي
وريـدي الشلتو في التــاتــاي
رضعت هواك في الحبيان وسف الطين
وفي لوعة حنين القمري
يفري حشاهو جمر البين
وفي صـوت السعيـة الراجعة لي جنياتها
شايلة الشوق وريـداً في القـليـب مخـزون
وفي روعة نسايم الليل
وصوت ناياً بعيييييييد وحزين
رضعت هواك مع الجنيات
وكت عز الجهل والطيش
نخش الغابة فرحانين
وعشمانين عشانا يكون صدر عصفور
سلاحنـا خطيـر
نبلة وجيـب ملان برشـام
وشبكة وجيب مستف عيـش
ويادوب ما نصبنا الشبكة جانا الطير
تجيك الغيمة تتوشح سواد الخير
ودون إنـذار
فجأة القبلي يشلع شـح
وصوت الرعدة يرزع روو
وصوت الصاقعة يصقع كـوو
وهاك يامطـرة تسمـع جـووو
نتنطط وتتنطط قـرود الغابة في الأشجار
وتبدأ صغارها في الكوراك
وتسمع واك
وتسمع جـاك
وننسـى الطيـر
نعـود للحلة فرحانين
ونتقسم هناك قسمين
جماعة شمال .. جماعة يمين
وتبدأ هناك حرب الطين
وتـسـمـع طـخّ ..
وتـسـمـع لــخّ ..
وتـسـمـع أخّ ..
تحـاول تجـري تسمـع بـخّ .
* * * *
ودع سنجـة ماك الكاره الغضبان
وماك الهارب المفضوح
ومن عين الرجال خجـلان
وما خليت وراك مظلوم
وما خليت وراك زعـلان
ودع سنجة ودع فيها نون قاف نون
ناس النصري وأولاد قوتة
واحفاد فارس السودان
نجـومي للكفر جزار
وراية فخرو في شيكان
حليل أهلـك
مساحـين دمـوعـك
يوم تزغـرد فـرحـة الشمتـان
وشيالين عديلتك
يـوم تـقـيـف ويبشر الشبان
وبكايين جـنـازتـك
يـوم تـمـوت تـتـوسـد العيـدان
ودعـتـك الله يا بلـدي
وداع ولـداً محـب ولهـان
حابـس دمعـة المفجـوع
وسالـك سكـة الضهـبـان
وخـوفي الغربـة بكـرة تطـول
وأعيـد قـصـة فـلان وفـلان
وافـارق طلعـة الغاليـين
وتبقـى الرجعـة بعـد سنيـن
ده كان مـدّ الإلـه عـمـري
وما جـاب الغــراب خـبـري
وبكـى الوالــدة والحـبـان
وفي غيــر سنجـة كان قـبري
|
Post: #2
Title: Re: شعـر ... آمــال وآلآم
Author: moody
Date: 09-29-2002, 06:20 PM
Parent: #1
ربنا ان شاء الله يرجع البعيد لاهلوا
والله قصيده جميله ومعبره جدا وتحس بيها نابعه من جووووووووووووووووووووووه
|
Post: #3
Title: Re: شعـر ... آمــال وآلآم
Author: bayan
Date: 09-29-2002, 06:21 PM
Parent: #1
مدد يا ولد سنجا الحبيب
قصيدتك عملية شرح تفصيلى
لكل احلامنا و آمالنا
بأختلاف بقاع السودان
يا سلام يا ملك
|
Post: #4
Title: Re: شعـر ... آمــال وآلآم
Author: الجعلي
Date: 09-29-2002, 11:54 PM
Parent: #1
الرائع سنجاوي
ربنا يرد الغربة يا عزيز
سالم وغانم انشاء الله
وتسلم لينا يا مبدع
ولك كل تقدير
الجعلي
|
Post: #5
Title: Re: شعـر ... آمــال وآلآم
Author: منعم
Date: 09-30-2002, 03:31 AM
Parent: #1
سنجاوى
قصيدة رائعة روعة كاتبها
لكنها فتحت علينا ابواب الجراحات القديمة
جراحات الغربة والعشم فى تحقيق الحلم
الذى نخشى ان يتحول الى سراب
جراحات البعد عن من نحبهم ويحبوننا
جراحات من يحس انة نبتة تم اقتلاعها من جزورها
وغرسها عنوة فى تربة غير تربتها
فلتهناء اخى يا من لم تترك خلفك زعلان او مظلوم
يا من تركت خلفك من تحبهم ويحبونك
واتمنى من الله ان يعينك على تحقيق كل احلامك
ودعـتـك الله يا بلـدي
وداع ولـداً محـب ولهـان
حابـس دمعـة المفجـوع
وسالـك سكـة الضهـبـان
|
Post: #6
Title: Re: شعـر ... آمــال وآلآم
Author: قرشـــو
Date: 09-30-2002, 10:32 AM
الحبيب سنجاوى
ما اروع تصويرك للمشاعر التى اجتاحت كل منا وكانت سببا فى تلك الغربة اللعينة القاسية والتى جعلتنا نلعق جراحنا ونجتر احزاننا فى احلى لحظات حياتنا..
حرى بسنجة ان تخلد فى كلماتك الرائعات اخى فهى مدينة قليل فى حقها كل ما يقال واهلها افاضل كرام ورغم التباين فى المشاعر فقد عادت بى الى ايام من شهر العسل قضيتها هنالك كانت اجمل ايام العمر حيث حفاوة اهل سنجة وكرمهم الذى لا يحد وذلك النيل الخالد الذى تحلو زيارته قبيل الغروب والحدائق الوارقة..
اخى
لك تحياتى
ولكن اين شطة ؟؟
|
Post: #7
Title: Re: شعـر ... آمــال وآلآم
Author: singawi
Date: 09-30-2002, 03:52 PM
Parent: #1
موودي
احساسك بأنها صادرة من جووووووووووة أشبعني حتى الترف
شكراً عزيزي
أختي بيـأن
حقق الله آمالك وأحلامك
وجمعك بأحبابك
آمييييين
شكراً
|
Post: #8
Title: Re: شعـر ... آمــال وآلآم
Author: bamseka
Date: 09-30-2002, 04:38 PM
Parent: #7
اخى / العزيز / سنجة
وكم وكم اتاكأت على حروفك السمهريه فى روعتها ورسم معانى الكلمة الوصفيه انت تمتلك باع من حيث اللغة لك التحايا والتقدير ياعظيم
|
Post: #9
Title: Re: شعـر ... آمــال وآلآم
Author: singawi
Date: 10-01-2002, 11:22 AM
Parent: #1
العزيز الجعلي
آمييييين .. وأنت كذلك
تقبل الله دعواتك
شاكر حروفك
العزيز منعم
كلماتك ومعانيك هي مدار هذه القصيد التي لم تكتمل بعد
فهي رحلة آمال لم تتضح حدودها بعد في القصيدة
وآلام لم تنته
تحياتي
|
Post: #10
Title: Re: شعـر ... آمــال وآلآم
Author: falcon
Date: 10-01-2002, 11:33 AM
Parent: #1
يا اخونا الليلة ما لكم علينا؟؟
ظبية عاملة قصيدة في الغربة و سنجاوي قام دبلها
عيني بدت ترف
الله يستر و يكذب الشينة
|
Post: #11
Title: Re: شعـر ... آمــال وآلآم
Author: singawi
Date: 10-01-2002, 03:06 PM
Parent: #1
عمدتنا قرشو
تشرفت سنجة بزيارتك ونحمد الله ان ارتبطت بعسلك يا عسل
والدعوة لك لاسترجاع ذكرياتك هناك في ضيافة أخيك سنجاوي
حدد الزمان فالمكان من عندنا
شطة دي كحلتها كيييييف يا شطة انت
تحياتي
|
Post: #12
Title: Re: شعـر ... آمــال وآلآم
Author: THE RAIN
Date: 10-01-2002, 04:26 PM
Parent: #1
سنجاوى
صور جميلة جدا والله يا سنجاوى، تعرف اصعب انواع النظم فى الشعر هو قصيدة الصور أو الحكاية، القصيدة دى رواية عديل كده وفيها ابعاد الرواية كلها
تحية وشكر معاها يا حبيبنا سنجاوى على الآلام والآمال وما بينها
|
Post: #13
Title: Re: شعـر ... آمــال وآلآم
Author: 3bdo
Date: 10-01-2002, 04:38 PM
Parent: #12
سلامات سنجاوي
ابداع ابداع ابداااااااااااااع
يا رائع انت
تعرف ... ناس سنجة حقو يختو قصيدتك دي في مدخل المدينة ويحفظوها صم كلهم ... وكمان مفروض محافظ سنجة يدخلها المقرر المدرسي لانه فيها حب بصدق ما عادي ... انا كنت قايل الكلام الحلو ده بيقدروا علي اخوانا الشوايقة بس ... لكن فتهم بي غادي يا اخوي
|
Post: #14
Title: Re: شعـر ... آمــال وآلآم
Author: singawi
Date: 10-01-2002, 09:39 PM
Parent: #1
بامسيكا
لك الود
كتر خيرك حبيبنا ..
أغنيتني بحروفك الندية
شكراً عزيزي
فالكون
قلت لي عينك بدت ترف
دي العمرة فتحت يا خوي
حتشوف أحبابك
تحياتي
|
Post: #15
Title: Re: شعـر ... آمــال وآلآم
Author: singawi
Date: 10-02-2002, 10:03 PM
Parent: #1
المطـر
بي زيارتك بيتنا نور
قصيدتي القصة كما تقول قصيدة عاصية
أخلص لها وتتمرد علي
أحلم بتلخيص تجربتي في الغربة عبر حروفها
أحلم بتدوين المتغيرات التي حدثت خلال سنوات شتاتي في مهوى القلب
أحلم برسم احساسي بفقد أصولي بسنة الحياة
وفراق فروعي بضرورة البقاء
أحلم بكل ذلك شعراً وليس نظماً
فيعاندني الشعر ولا أرضى بالنظم والله غالب
|
Post: #16
Title: Re: شعـر ... آمــال وآلآم
Author: noha_g
Date: 10-03-2002, 00:15 AM
Parent: #1
singawi
و الله حقيقة قصيدة رائعة
لامست أوتارا حساسة فينا
لك الحية على التصويلا الحي و أنت تناجي فينا غربتنا التي اقترفناها
لك التحية
|
Post: #17
Title: Re: شعـر ... آمــال وآلآم
Author: singawi
Date: 10-03-2002, 09:38 PM
Parent: #1
أخي عبده
بدون ادعاء .. كلماتك ملأتني زهواً
أشعرتني بالرضا عن أحرفي
فلك الشكر
أما الشوايقة فهم ملوك شعر الحنين إلى الديار وأهلها
وكل فتاة بأبيها معجبة
|
Post: #18
Title: Re: شعـر ... آمــال وآلآم
Author: bint algazeira
Date: 10-03-2002, 11:12 PM
Parent: #17
اخي سنجاوي
شعر جميل ومعبر ويدل علي انه يخرج من الاعماق
لك هذه الابيات التي تتحدث عن الغربه
والتي تحدث فيها الشاعر بطريقه جميله ايضا
ياغربة يابكاية ياغشاشة يامستهبلة
تغرينا بي درهم قروش ووراه قنطار بهدله
جيناك نقعد بس سنة وحاجاتنا ناقصة نكمله
نبني البيوت في العاصمة ونفرش اثاثها نجملة
وكرولا حارة نرسلها اصله النقل صار مشكله
ونكمل الدين بمهل والسمحة جاهزه نحصلة
غير القروش اللبي الاهل عبر الشهور حنرسلة
والباقي يدخل في البنوك ونشوف دياره ونشغلة
ناس فكرت تجني العلم وتبدا الدراسة تواصله
أحلام كثيرة وشيقة وآمال كبيرة مدنكلة
لكن حساباتنا الغلط في كل عام بنرحله
مرت سنين من العمر بنعزها وبنفصلة
لكن ماقلت لي ياسنجاوي بتعرف ناس هشام وهيثم وهاشم عبد الله بشير
لك التحيه اخي سنجاوي مره اخري
|
Post: #20
Title: Re: شعـر ... آمــال وآلآم
Author: singawi
Date: 10-12-2002, 11:26 PM
Parent: #18
يت الجزيرة
آسف يا أميرة
آسف اتأخرت عليك
مشكورة على القصيدة المعبرة عن الغربة ودوامتها
قصيدة معبرة فعلاً
أظن أن شاعرها رفيق غربة في العاصمة السعودية
أما أبناء عبد الله بشير هشام وأخوانه
إذا لم أعرفهم أكون سنجاوي كيييييييييف
بلغيهم تحياتي
|
Post: #21
Title: Re: شعـر ... آمــال وآلآم
Author: singawi
Date: 10-29-2002, 04:03 PM
Parent: #20
سبحان من يحي العظام وهي رميم
|
Post: #19
Title: Re: شعـر ... آمــال وآلآم
Author: singawi
Date: 10-04-2002, 09:39 AM
Parent: #1
العزيزة نهى
تعبيرك عن الغربة التي اقترفناها
من باب براي سويتها في نفسي
وكلمة اقترفناها دي براها قصيدة
فهل كانت غربتنا خياراً
وهل فراق احبابنا وترابنا اختياراً
انه الخيار صفر .. بين دا حار ودا ما بنكوي بيهو
رد الله غربتنا أجمعين .. سالمين غانمين
تحياتــي
|
Post: #22
Title: Re: شعـر ... آمــال وآلآم
Author: singawi
Date: 01-25-2003, 09:17 PM
Parent: #19
أحبابنا أهل الهوى
خطر ببالي أن أحفظ كل المواضيع التي شاركت بها في منتداكم العامر في سي دي ولا أعرف طريقة أحفظ بها كل مشاركاتكم فيها إلا برفع الموضوع للصحفة الأولى ومن ثم فتحه وحفظه .. لذا أرجو عدم الانزعاج من رفع كل مواضيعي القديمة وسأفعل ذلك على فترات
تحياتي
|
Post: #23
Title: Re: شعـر ... آمــال وآلآم
Author: singawi
Date: 04-26-2003, 08:21 PM
Parent: #22
عفريتة
|
Post: #24
Title: Re: شعـر ... آمــال وآلآم
Author: omdurmani
Date: 04-26-2003, 08:33 PM
Parent: #1
روعة ياسنجاوى......روعة
دا كلام سمح خلاص
|
Post: #25
Title: Re: شعـر ... آمــال وآلآم
Author: singawi
Date: 04-27-2003, 02:07 PM
Parent: #1
تسلم يا ود أم در
كلك ذووووق
تحياتي
|
Post: #26
Title: Re: شعـر ... آمــال وآلآم
Author: Ahlalawad
Date: 04-27-2003, 02:18 PM
Parent: #1
شاعرنا السنجاوي
تهانينا
لا تنسى مساهماتك القيمة في خيمة الحردلو
|
Post: #27
Title: Re: شعـر ... آمــال وآلآم
Author: abuguta
Date: 04-28-2003, 00:23 AM
Parent: #26
فاما فى الوسط فذلكم قسطى
خصر نحيل صعب المنال
اذكر سنجة وتلكم رصيرص
وذاك الخزان فى راس القنال
وكان ابوقوتة درة ياقوتة
فى عنق حسناء تسعد البال
اخوى سنجاوى
قصيدك جميلة زى جمال سنجة لما تشرق عليها الشمس .
والله ذكرتنى كنت مشيت مع واحد زميلى من ناس كركوج ووصلنا سنجة الصباح قاطعين البنطون من الشرق وبانت كانها عروس جالسة فى الكوشة
اسلوبك حلو وحنين ويحرك مشاعر كل واحد ترك وطنه وبتذكر اهله .
الله يرد غربة الجميع
ابوقوتة
|
Post: #28
Title: Re: شعـر ... آمــال وآلآم
Author: الشاعر
Date: 04-28-2003, 07:12 AM
Parent: #27
الأخ سنجاوي
لك التحية
هذه القصيدة بحق جميلة جداً جداً ، ونتمنى أن نقرأ لك المزيد
|
Post: #31
Title: Re: شعـر ... آمــال وآلآم
Author: singawi
Date: 05-22-2003, 09:09 AM
Parent: #28
الأخ الشاعر
شديد أسفي على التأخير
الف شكر أيها الشاعر
اسمك جميل
يوحي بدواخلك الذواقة
أهدي لك بعض مشاعري أدناه
وشـوشـة
تحياتي
|
Post: #29
Title: Re: شعـر ... آمــال وآلآم
Author: abdelgafar.saeed
Date: 04-28-2003, 01:12 PM
Parent: #1
سنجاوى
شعر جميل ومعبر
ومليان بينكهة الحياة فى السودان
زدنا من اشعارك
|
Post: #30
Title: Re: شعـر ... آمــال وآلآم
Author: singawi
Date: 04-28-2003, 09:09 PM
Parent: #1
الحبيب أهل العوض
غالي والطلب رخيص
نتقابل في الخيمة بإذن المولى
أبو قوتة
اللـــــــه
ذكرك لرحلة البنطون عيشني في جو تاني والله ، وتشبيهك لمنظر سنجة من الزاوية ديك بعروس جالسة في الكوشة شرقني عديل كدا .. ما أجمله من منظر .. وانت في البنطون تحتك الموية العذبة الصااااافية .. وأمامك الخضرة المتمثلة في جناين سنجة وأشجار الزونيا تعانق أشجار المنقة وقد اختلطت خضرتها الرويانة مع صفرة المنقة وتجيك ريحة المنقة ممتزجة بريحة الحشائش مخلوطة بريحة الدعاش مموسقة بخرير المياه مهفهفة بهمسات النسيم الخالي من الكربون .. قدر ما تكرف منه صدرك مايتملي
لا إله إلا الله .. يازول أتاري أنا محروم خلاص .. الله يجيبك يالنوم الليلة دي
تحياتي
|
Post: #32
Title: Re: شعـر ... آمــال وآلآم
Author: HOPELESS
Date: 05-22-2003, 09:23 AM
Parent: #30
singawi العزيز
لك التحيه والود
يارائع
بدون مجامله
انت مجموعه شعراء مغربين عن ديارهم عزموا علي ان يكتبوا هذا الحرف الجميل
لك الشكر لتعبيرك عنا في جراحات غربتنا
ومزيدا من الابداع
|
Post: #33
Title: Re: شعـر ... آمــال وآلآم
Author: بدرالدين شنا
Date: 05-22-2003, 11:16 AM
Parent: #1
بسم الله الرحمن الرحيم
الغالي/ سنجاوي
سلام وإحترام وغبطة
ده كان مـدّ الإلـه عـمـري
وما جـاب الغــراب خـبـري
وبكـى الوالــدة والحـبـان
وفي غيــر سنجـة كان قـبري
بري يا يمة إتحوينا النبي
|
Post: #34
Title: Re: شعـر ... آمــال وآلآم
Author: singawi
Date: 05-23-2003, 00:30 AM
Parent: #1
abdelgafar.saeed
أهلاً وسهلاً
يعجبك السمح والزين
مشكور أخي الكريم
تحياتي
|
Post: #35
Title: Re: شعـر ... آمــال وآلآم
Author: Husam Hilali
Date: 05-23-2003, 10:55 AM
Parent: #1
كل هذا الدر أخفيته عنا يا سنجاوي !!!!!!
لكم تخنقني كلمات العتاب في حنجرتي ...ولي رغبة في تنفيس شوقي لك حين ألقاك قريباً .. والعتاب كذلك
كيف تخفي وهج الشمس كله بسحابة ؟
ها هي تنقشع ..ولكن بعد انتهاء الصيف ...
|
Post: #38
Title: Re: شعـر ... آمــال وآلآم
Author: singawi
Date: 05-28-2003, 10:19 AM
Parent: #35
الحبيب حسام
الوهج كله عندكم وبانتظاركم
تعرف ياحسام أنا ضيعت سنين طويلة قبل أن أبدأ في نشر ما عندي
لاعتقادي بأنه لم ينضج بعد وأن السنين كفيلة بتسبيكه وتهذيبه
فضاع جزء مقدر من عصير المشاعر بين الصفحات المجهولة المكان
وبين أيدي الأصدقاء والأحباب
نصيحتي لك ولأترابك .. جود التوثيق والمراجعة ثم أنشر ما لديك
أضعف الإيمان سيقويك النقد ويبين مواضع الضعف قبل الجمال
تحياتي لك وللأسرة الكريمة
|
Post: #36
Title: Re: شعـر ... آمــال وآلآم
Author: singawi
Date: 05-24-2003, 05:13 AM
Parent: #1
العزيز هوب لس
كل ثانية وانت طيب
والثانية الجاية كلك .. كلك .. كلك آمل
شكرررراً جزييييلاً
تحياتي
|
Post: #37
Title: Re: شعـر ... آمــال وآلآم
Author: singawi
Date: 05-25-2003, 05:24 AM
Parent: #1
العزيز بدر الدين شنا
حلاااااااااتك
حروفي رويانة بيك
شكراً على الإطلالة
واتحوينا بالنبي من الحالة الكربة
وسوء الصحبة
وميتة الغربة
تحياتي
|
Post: #39
Title: Re: شعـر ... آمــال وآلآم
Author: Elsadiq
Date: 05-29-2003, 10:31 PM
Parent: #37
تشكر ياسنجاوي وانت معهود علي الكلام الجميل , ولك تحياتي الخالصة
|
Post: #40
Title: Re: شعـر ... آمــال وآلآم
Author: alfatih
Date: 05-29-2003, 10:59 PM
Parent: #1
سنجاوي
السلام من اعماق الاعماق....او من جوة الجوة
تسلم سنجة ويسلموا ناسا الحنان....قضيت فيها
جميل الايام ....الخوالي.....ولي فيها اصدقاء كثر
منها صلاح شلبي
و الله فتحت لينا جراح ....الله يدملها
قصيدة اعتبرها من اروع ما كتب عن الغربة...وعن سنجة الرايعة
مزيدا من الابداع
ابو القدح بعرف محل بعضي اخو
|
Post: #41
Title: Re: شعـر ... آمــال وآلآم
Author: hala guta
Date: 05-30-2003, 06:26 PM
Parent: #1
سنجاوى يا ابن عمى
قصيدتك صادقة حد الفجيعة
الى اين تمضى بنا دروب الغربة
وهل تنتهى هذه المتاهة
|
Post: #42
Title: Re: شعـر ... آمــال وآلآم
Author: singawi
Date: 06-01-2003, 05:28 PM
Parent: #41
الحبيب الصادق
الف مرحب بحامل المسك
نتطلع للجديد في موقعك المموسق
تحياتي لك ولرفيقة الدرب المختفية
|
Post: #43
Title: Re: شعـر ... آمــال وآلآم
Author: singawi
Date: 06-02-2003, 05:30 AM
Parent: #1
العزيز الفاتح
صديق صديقك .. صديقك
أهلاً بصديق أولاد سنجة
مشكور على الأحرف الندية
توقيعك حكمة والله
لك ودي
|
Post: #44
Title: Re: شعـر ... آمــال وآلآم
Author: singawi
Date: 06-03-2003, 05:45 AM
Parent: #1
هـالـة عزيزتي
أهلين بنت عمي
شريكة فرحتي وهمي
الغربة وسُعار البحث عن غدٍ أفضل
تبدأ الأماني والتطلعات منطقية ومشروعة
نودع التراب والعصب بقلب دام ودمعٍ غزير وخاطرٍ كسير
ثم تتوالى السنون ويتلاشى تأثير حليب أبقارنا الشاربة من عرق التراب بفعل الحليب المجفف من المشاعر المعالج كيميائياً عديم الطعم والرائحة
فنعتاد الغربة ثم ندمنها ثم لا نحس بها إلا عند موت حبيب فيصحى إنسان الأصالة فينا ونشعر بفداحة الجريرة وأننا أصبحنا كالمنبت لا أرضاً قطع ولا ظهراً أبقى
واشوقاً علي بلدي
شوق زولاً ولوف بكااااااي
تحياتي
|
Post: #45
Title: Re: شعـر ... آمــال وآلآم
Author: nasiradin
Date: 06-03-2003, 08:17 AM
Parent: #1
والله يا سنجاوى قصيدتك زى هوا الجناين يعنى بى لغة الرندوك يا سردفه كلام ولا فى الاحلام. يرد غربتك ويعليك ما يدليك بس
حابـس دمعـة المفجـوع
وسالـك سكـة الضهـبـان
وخـوفي الغربـة بكـرة تطـول
وأعيـد قـصـة فـلان وفـلان
اوع تبقى عليك قصة نزار قبانى لمن قال
مضى عامان يا امى
على الولد الذى ابحر برحلته الخرافية
ويا حبيب بالمناسبه انا بلبس مقاس 43
|
Post: #46
Title: Re: شعـر ... آمــال وآلآم
Author: singawi
Date: 06-05-2003, 06:29 PM
Parent: #45
nasiradin
حبابك ألف بلا بلف
مشكور على الإطراء
رد الله غربتنا أجمعين سالمين غانمين
بس يا صاحبي حكاية المقاس دي دقت في العراضة
ما نقشتها يعني .. حاول أديني باص أرضي مدردق بشييييش
تحياتي
|
Post: #47
Title: Re: شعـر ... آمــال وآلآم
Author: ودبري
Date: 06-05-2003, 06:41 PM
Parent: #1
الرائع سنجاوي: لله درك يا اخي والله حقيقة قصيده مليانة تب
الله يديك العافية وما تحرمنا من زي ده
ودمتم
|
Post: #48
Title: Re: شعـر ... آمــال وآلآم
Author: singawi
Date: 06-09-2003, 05:27 AM
Parent: #47
العزيز ود بري
الله يعافيك ويبارك فيك
ما زلت في انتظار مددك في بوست الصلاة على الحبيب
مشكووووور
لك ودي
|
|