أهديها وردة زمن حدائق الأمكنة المستحيلة...

أهديها وردة زمن حدائق الأمكنة المستحيلة...


09-13-2002, 08:03 AM


  » http://sudaneseonline.com/cgi-bin/sdb/2bb.cgi?seq=msg&board=5&msg=1031900585&rn=12


Post: #1
Title: أهديها وردة زمن حدائق الأمكنة المستحيلة...
Author: wadazza
Date: 09-13-2002, 08:03 AM
Parent: #0

<BGSOUND src="http://downloads.kabaros.com/downloads/music/gameela_music.wma" style="color:black;background-color:white">
تتلون كلماتك...فراشات لاتحوم حول زهرة....تلوذ بالتوقع تحتمى بتلك المعانى..فعندما تتشظى مفرداتك..وتفرد أشرعتها..لاتنطوى على سر.. على موت الوميض...لك التوهج شاهدا فانت معنية بزمن تلتحف أنجمه خيوط الملاذ..لذا ارتجيك ..مستصحباقدرتى على الاندياح باكرا وعلى مرمى همسة من أوديةالارتواء...انى أشهدك ..ممتطية ركب البرق والوعد وما بينهما انتظار سحائب..لا تننتظر من البحار أبخرتها ولا من تلك الزرقة أن تسكن ملامح البحار القديم...كم فى وجهه نقرأ صفحات لاتستوطنها كتائب الجمود..لشفتيك صفة الانطباق على مواقع الأسماء..
ولعينيك جرأة اللحن عندما يعتلى بوح الكمنجات...تأوهات المدن التى لا تصحو على وقع أقدام الفجر..أو عراك الشفق وسحنة الدجى...قبلك لم تجرؤ خطواتى هكذا أن تنتصف دوائر العتبات أن..تحتشد خلف صمتى..وتترك آثارها جلية على كثبان الأسف..قوافل مرت من هنا ..قطارات...فالمسافات القصية تسكن مدارات الحلم..لذا يأخذ العناق شكل وردة...فهل أهديتك عناقى؟..بعض الورود لا تفصح عن رسائلها ان لم تقرأها الدواخل..بعض الرؤى حلم وبعض العناق تفسير لهكذا أحلام...استفيقى ...فقد مر المساء من هنا متكوما داخل كابينة قيادته00باذلا جهدة فى فك الشفرة..واستنطاق نجمة الأسرى ..أسرى تلك المسافات التى ينشرها الأفق بين أبعد نقطتين متوازيتين...
وعرفت لماذا هى النجوم خماسية وسداسية الأشكال...الألوان هنا لها رائحة وطعم...والوردة تبذل عناقها دعة للوقت ململة للأمكنة المستحيلة
تحياتى
ود عزة

Post: #2
Title: Re: أهديها وردة زمن حدائق الأمكنة المستحيلة...
Author: wadazza
Date: 09-13-2002, 09:42 AM
Parent: #1

لها ارادة قواطع التلال الجبلية ..وقوة الأعشاب البرية على النمو..لها ابتسامة برق متسع الحدقات..وصوتها عابر مستحيل للقارة الثامنة

Post: #3
Title: Re: أهديها وردة زمن حدائق الأمكنة المستحيلة...
Author: khider
Date: 09-13-2002, 10:10 AM
Parent: #2



الانثي
احساس دافئ ينتابنا في البدايات
( انظر الصورة المرفقة )
اذا اردنا لة الاستمرار يجب ان نغيب (بتشديد الغين ) العقل
ود عزة اخوي ... كما غني ابوداؤود
هل انت معي ؟؟؟؟؟


Post: #4
Title: Re: أهديها وردة زمن حدائق الأمكنة المستحيلة...
Author: wadazza
Date: 09-13-2002, 10:17 AM
Parent: #3

خدر قصدك مطر الأنثى يهطل فى غياب الرعد أقصد العقل..
لكن نسوى شنو؟ الفنان داك قال...عقلى انشغل بى هواك والحكمة عينى...أها ياخدر الدخل العين هنا شنو؟
وزى ماقال وردى:
وردة صبية تلمع فوق صديرى النيل
أحيك
لاقدر مكتوب ولا دمعا ملا المنديل

واتضامن معاى ياخدر نوجه اهانات شخصية لابن الملوح

وياغصن الرياض المايل..
برضو رواها ابوداوود..لكن الترمذى ما معاهو
تحياتى
ودعزة

Post: #5
Title: Re: أهديها وردة زمن حدائق الأمكنة المستحيلة...
Author: khider
Date: 09-13-2002, 10:31 AM
Parent: #4


العين زي ما فالو هي سبب الاذي ... و من مبكيات الافدار ان يهطل هذا المطر الزعاف في وجود العقل المتامر الذي يغض الطرف ساعتئذ تواطئا
و هانذا ابداء
اول الاهانات الشخصية جدا للمدعو ابن الملولح
انت لا تعلم ايها الملولح كم ارقنا بسبب ضعفك من
دموع و شجون
انت اتفة من الزمن الذي اضعتة انا شخصيا في الاستماع و السهر مع عشاق كم تغنو .. اضاعوني و اي فتي اضاعو
انت اتفة من كل العشاق الذين ضحوا في سبيل معشوقات لا يعلمن ابعد من
يداعب في المراية خيالو ما عارف البموتو حيالو
انت اتفة من كل الاخطاء الاملائية التي تمتلي بها كل خطابات المحبيين
انت يا بن الملولح
اتفة من الفريق الفومي السوداني


Post: #6
Title: Re: أهديها وردة زمن حدائق الأمكنة المستحيلة...
Author: wadazza
Date: 09-13-2002, 11:10 AM
Parent: #5

أها يا خدر الاهانات تتواصل نحو ابن الملولح

انت ليه تقولى ليلى مريضة فى العراق..ياملولح.يعنى قام عليك جن بوش العراق عندو اسلحة دمار وانت كمان ..تقول ليلى بالعراق مريضة؟
ثم ثانيا كيف تتمنى انك تكون طبيب مداوى..وانت ماقريت كلية الطب؟
يااخوى ليلى بتاعتك الهاوسنا بيها دى..أدتك الصخروش فى نص راسك طبعا زمنكم مافى شاكوش فى كان فى مدقات حجر... وبعد أدتك صخروشورا صخروش وبقت تتهرب من مسنجراتك ومكالماتك وفاكساتك..وتقول ..والله الأيام دى أنا فى العراق عيااانة’..؟؟
وانت يا اهبل صدقتها ..وبقيت حايم بين القبايل تغنى يقولون ليلى بالعراق مريضة فياليتنى كنت الطبيب المداويا...
انت ياملولح فتحت درب الشواكيش ..والتاريخ سجل ليك النقطة دى
تحياتى
ودعزة

Post: #7
Title: Re: أهديها وردة زمن حدائق الأمكنة المستحيلة...
Author: khider
Date: 09-13-2002, 11:21 AM
Parent: #6


(و سمعنا تحت تحت انو عمك العامرية (ابو ليلي
زرا ليك ابن الملولح و هو يراود ليلي عن نفسها
ولمن ســالوا
قال امي مرسلاني


Post: #8
Title: Re: أهديها وردة زمن حدائق الأمكنة المستحيلة...
Author: wadazza
Date: 09-13-2002, 11:34 AM
Parent: #7

خدر
العامرية القبيلة هبت عن بكرة جدها ، لو عندها ابو كنا قلنا بكرة أبيها...الحصل ياخدر ليلى العامرية كانت فى الهودج...وشايلة النوت بوك...قام قيس رسليها رمز القبلة...فى الأول ماعرفتا شنو ...مشت سألت أبوها..ابوها شاف الرمز
وفكر ملياً: قاليها والله ما وقعت لى ...لكن الشايفا قدامى ده شلاليف عديل...ليلى قالت لأبوها: طيب ليه رسل الشلاليف..يكون عايز حليب نياق مثلا...
فجأة ابوها اتنفض ...الموضوع وقع لى يادوب: ده قليل أدب ده...حليب شنو ونياق شنو ده عايز شلاليفك دى ذاتا...ناولينى السيف وجهزى لى الناقة بس...


تحياتى
ودعزة

Post: #9
Title: Re: أهديها وردة زمن حدائق الأمكنة المستحيلة...
Author: BAKASH
Date: 09-13-2002, 03:18 PM
Parent: #8

والله ضحكتنا يا ود عزه الله يديك العافيه بشلاليف ليلى وحبيبها

Post: #10
Title: Re: أهديها وردة زمن حدائق الأمكنة المستحيلة...
Author: wadazza
Date: 09-13-2002, 03:53 PM
Parent: #9

بكاش
انها اهانات شخصية لابن الملوح مخترع الشاكوش الأول..
تسلم
ودعزة

Post: #11
Title: Re: أهديها وردة زمن حدائق الأمكنة المستحيلة...
Author: khider
Date: 09-13-2002, 04:52 PM
Parent: #10



ابن الملولح دة يا ود عزة ما سبب الشاكوش
مياصتو و دلعو لي بت عمك (العامرية) هو الجاب ليهو الشواكيش


Post: #12
Title: Re: أهديها وردة زمن حدائق الأمكنة المستحيلة...
Author: khider
Date: 09-13-2002, 05:03 PM
Parent: #11



اها قام عمك العامرية زعل من حكاية الشلاليف دي شديد و ركب ناقتو و كربك كربك ( مؤثر صوت جري الجمل) و لحق ليك ابن الملولح لقاهو واقف جنب دكان البرقاوي غانج لي ليلي ود الملولح اول ما شاف عمك العامرية قام ركع علي كرعينو و انشد
بكل تداوينا فلم يشف ما بنا
علي ان قرب الدار خير من البعد
علي ان قرب الدار ليس بنافع
اذا كان من تهواة ليس بذي عهد
عمك العامرية لمن سمع الشعر .. قام ابتسم ,, عجبتو ليك بذي عهد و لف لجام الناقة و رجع و هنا التفت ابن الملولح للفرد بتاعنو و قال
عمك دقس


Post: #13
Title: Re: أهديها وردة زمن حدائق الأمكنة المستحيلة...
Author: wadazza
Date: 09-13-2002, 05:11 PM
Parent: #11

روى أحدهم أنه جلس إلى المجنون في غفلةٍ من غفلاته وعرف منه سبب الواقعة، وهو أن قيساً كان يسهر مع ليلى في خبائها، وبعد أن فرغا خرج متوجهاً إلى قومه في الجهة الأخرى من الوادي، وما أن دخل خيمته حتى رأى ما أذهله، فقد كانت ليلى جالسةً على بساطه قال (فخرجت عائداً مثل المجنون إلى خباء ليلى واقتحمته مثل الإعصار لكي أتيقن مما رأيت هناك ويا أعجب ما رأيت فقد كانت ليلى هنا في خبائها لم تزل تصلح من شأنها بعد خلوتنا وقفلت بلا إبطاءٍ عائداً إلى خيمتي وإذا ليلى هناك أيضاً وعدت راجعاً إلى خباء ليلى فإذا هي هنا وعدت إلى خيمتي فإذا ليلى هناك ولم أزل على هذا الحال من هنا إلى هناك أكثر من تسع مراتٍ وليلى في المكانين حتى أوشكت أن أختبل بين مصدقٍ مارأيت وبين مكذبٍ ما تمنيت واحترت ما أحسب هذا الذي أراه فما وجدت نفسي إلا وأنا أستغرق في حالٍ لم أصادفه من قبل فقد تفجرت الأجراس من أشداقي كعين ماءٍ مكسورة الختم تواً ووعيت بعد حينٍ على صوتٍ آدمي يسأل : (لماذا تضحك؟) وعرفت ساعتها أنها الحال التي انتابتني ولم ينقلها الرواة عني في مجمل أخبارهم ولا أخفيك فقد كان وقوعي في الضحك أجمل شيئٍ أحببته بعد عشقي لليلى قيل، فلما سمع رواة أخبار المجنون خبر الضحك أنكروه، وحجتهم في ذلك أن صورة قيسٍ في الأخبار جميعها واحدة لا تتغير وليس لها أن تتغير، فالعشق الذي أصاب قيساً لا يتيح لمثله أن يعرف الإبتسام، فكيف له أن يضحك ويقهقه ويمجن هكذا وأوشك هؤلاء أن يعتبروا تلك الحادثة دساً في سيرة المجنون وخدشاً لصورته الرزينة الكئيبة التي عرفه بها الناس وأجمع الرواة المقلدون ومعهم المقلدون على أن القول بوقوع قيسٍ في الضحك ضرب من الخفة والتخليط، وإذا كان أبوأنمارٍ هذا قد زعم الواقعة، فإن نزوله البيمارستان يفسر لنا ما يهرف به أما نحن فقد وجدنا في روايات هذه الكوكبة شيئاً نثق فيه دون تلبثٍ، برغم غلبة الشك فيه حد الكذب، تيمنًا بما قال قيس ذات شعرٍ (إذ بعض المحبين يكذب) ففي هذه الكوكبة من النص أكثر مما فيها من الخبر


خدر...اقرا فوق بالله الزويل ده ما ساهل ...زول خلط وتجكيس
وعاملى فيها مجنون كمان000والله ده أشد منى ومنك..

تحياتى
ودعزة

Post: #14
Title: Re: أهديها وردة زمن حدائق الأمكنة المستحيلة...
Author: wadazza
Date: 09-13-2002, 05:17 PM
Parent: #13

خدر..
لاحظت فوق..
Quote: تصلح من شأنها بعد الخلوة

مش قلت ليك الملولح ده قاليها بعرسك وتانى قاليها ما بعرسك
غشاها يالعمدة خدر
تحياتى
ودعزة

Post: #15
Title: Re: أهديها وردة زمن حدائق الأمكنة المستحيلة...
Author: khider
Date: 09-29-2002, 01:17 PM
Parent: #14



انا اشكك في كل ما سبق
من حقها ان تصلح من شانها لكن من حقنا علي ابن الملولح هذا ان كان قد قضي وطرة منها ..ان يخبرنا
ان يوقف سيل العـاشقين
ان يرحمنا من سماع تاوهات المحرومين
ان تصبح كلمة عذري ذات مدلول واحد في المعجم
عذري ,,, اي اعتذاري


تخيل معي ماذا لو اعترف قيس بكل شي
تخيل معي ماذا لو عقدت ليلي مؤتمرا صحفيا بفندق هـيلتون بجدة
و قالت كل شي

كل شي


Post: #16
Title: Re: أهديها وردة زمن حدائق الأمكنة المستحيلة...
Author: khider
Date: 06-26-2003, 03:26 PM
Parent: #15



علي مراسلينا بجدة تغطية المؤتمر الصحفي لقيس بن الملولح المقام عصر اليوم بشيرتون جدة في تمام السادسة


Post: #17
Title: Re: أهديها وردة زمن حدائق الأمكنة المستحيلة...
Author: الجندرية
Date: 06-26-2003, 09:26 PM
Parent: #1

شكيتكم
البوست دا من زمان كان وين ؟
بعدين ياخدر انت لسه ساكي اخبار ابن الملوح
والله احرش عليك بارعة

Post: #18
Title: Re: أهديها وردة زمن حدائق الأمكنة المستحيلة...
Author: khider
Date: 06-26-2003, 10:05 PM
Parent: #17



يا جندورة عليك الله بارعة نايمة .. لعن الله من ايقظها
بعدين الموضوع دة قديم
الشمار كاتلني عاوز اسمع اعترافات ود الملولح دة .. لكن ناس جدة نايمين ولا المؤتمر لسع ما انتهي ياربي ؟؟


Post: #19
Title: Re: أهديها وردة زمن حدائق الأمكنة المستحيلة...
Author: بارعة
Date: 06-26-2003, 10:29 PM
Parent: #18

القال ليييك منو انو انا نايمة....؟؟؟؟؟؟؟





Post: #20
Title: Re: أهديها وردة زمن حدائق الأمكنة المستحيلة...
Author: khider
Date: 06-27-2003, 01:05 AM
Parent: #19



اها يا الجندرية .. اتفضلي


Post: #21
Title: Re: أهديها وردة زمن حدائق الأمكنة المستحيلة...
Author: الجندرية
Date: 06-27-2003, 03:12 PM
Parent: #1

اتفضل شنو ؟
انا دايرة اقعد جنب الحيطة اسمع الظيطة