+++ ما عارف أقول شنو .. !!! .. +++

01:53 AM December, 27 2018

سودانيز اون لاين
Sudany Agouz-
مكتبتى
رابط مختصر

أقول شنو .. أسوى شنو .. !!!
يا جماعة .. الواحد يعمل شنو .. الواحد يقول شنو ..
مع ناس طرشانه .. ناس عامله .. طرشانه ..
البلد برّه .. حرقانه .. وهم قاعدين جوّه .. فاكرين ..
مدسين من ناس برّه .. فاكرين جماعتم البنيشو برصاصم
الطاير .. يكتلوا بيهو العُزّل .. حيقدروا يوقفو الشعب الهادر ..
ولا يخوفو فى الشعب الثائر ..
يا حكومه .. أفهمى .. يعنى نعمل شنو ..
عشان ما تفهمى .. خلاص .. حقك راح ..
وأنا ..
أنا ما عارف أقوليك شنو .. يا خساره .. يا خساره ..

يعنى الواحد يكورك .. ولا يجيب ليهو كوريك ...
يخمخم جواهو .. القليب المكتول كمد ..
القليب المصرور جواهو سودانا .. حق زمان ... ..
آآى ..سودان حق زمان .. لساتو .. مصرور جوه القليب المكتول كمد ..
أآى أقول كمان .. بحبو .. بحبو .. وبحب ناسو حقين زمان ..
لكنو لساتو صابر .. وممكون .. ومكتول كمد .. ..قليباً .. محروق
ناس كتار ما بصدقو .. بيقولوا .. دا مجنون .. يا ناس وينُم ناس حَمد ..
مره تانية أنا صاحب القليب .. القليب المكتول كمد .. ياهو ..
أنا الزول زاتو اللى كان ساكن فى بحرى فى حلة حمد ..
و كمان .. ياهو الزول زاتو اللى كان ساكن فى الختمية .. كرش الفيل ..
يا حليل الفيل حق زمان .. أيام جنينة الحيوانات .. حسى دى لا فيل ولا كرش الفيل ..

لما اتذكر وأحكى .. وأحكى لأولادنا عن سودانا حق زمان .. كان كيفنو نقول شنو بس ....
وكيف كانت القعدات .. كيف كانت الشيات .. والمنقد والكانون ..
وكيف كان الفانوس .. وقراية الفانوس ..
والعلم اللى كان فى الدقنوس .. !! .. وكتاب المطالعة والمحفوظات ...
مع غنمى ترعى .. وسط المرعى ..
ونحن إذا جاء المطر ..
نجرى ونلعب بالزهر .. ..
وكريت مالا .. أبت الرجوع الى البيت ..
وبيت الجاك .. وما أدراك .. بالبيت الذى بناهو الجاك ..
يانا نحنا ناس البروش .. القرينا فوق البروش .. واتعلمنا .. وكتبنا الحروف فوق الأرض ..
وفى حصة الأعمال .. كنا نعمل بالطين .. ونلعب بالطين .. ولمن نرجع البيت .. نرش الحوش ..
وتتلم أجمل لمة .. لمة ضيوف الحوش المرشوش ..
وبيغادى .. ناس المزارع .. البسموها البلاد .. وناس هناك .. قاعدين يحاحو فى الطير ..
وناس الحفير .. مع الحمير .. لساتم بيقولو فى الدوباى .. حق زمان .. ..

آآى ..أنا لما أتذكر .. كيف كنت أقعد أتحكر .. فوق البمبر ..
حارس الشاى .. لمان يغلى فوق كانون الجمر .. أنفخ فيهو .. ولا أجيب ليهو هبابة ..
أخلي ليك الجمر يبقى لونو أحمر .. واللبن المقنن .. يا ولد خلى بالك من اللبن ..
أوع يفور .. يدفق .. عارف لو دفق .. بجى اقطع راسك ..
بالمناسبة أقطع راسك دى من عندى أنا .. لأنو أبوى الله يرحمو ما كان يطلع ليهو كلمة بطالة ..
بس لما نغلط .. كان يقولى .. يا غبى .. سمح يا ابوى .. آى الشاى باللبن المقنن .. نشربو .. ونقعد نتفنن ..
أصبر يا أبوى .. داير أكتب قصيده .. مع شراب الشاى أبو لبن مقنن ..
أكتب ليك قصيدة عن بت سمحة قاعدة تتحنن .. تتجهز لعرس بكره ..
والفنانين .. والدلوكة والرقيص .. رقصة الحمامة .. أبشر يا عريس .. والزغاريد ..
وقطع الرحط .. والشباب اللى بِعرض .. والجرتق .. والدلكة .. والخُمْرَة .. وحفرة الدخان ..
والحِنة .. والعروس المُكبرته .. ونحنا يانا نحنا .. نحنا فى وادى وناس البندر فى وادى آخر .. ..
وناس البندر قالوا عايشين فى المدينة .. عندهم كهربه .. لاكين .. ديمة قاطعة ..
عليكم الله شيلو كهربتكم دى .. ما دايرنا . .
وجيبوا لينا رتاينا .. وفوانيسنا .. وكوانينا ..
دايرين ناسنا حقين زمان .. بطيبتم .. وبونساتم .. يا حليلم ..
يا اخوانا ..
دايرين ناسنا حقين زمان ..
دايرين سودانا حق زمان ..
..
وناسنا حقين زمان ..
مره تانية .. ومرة تالتة .. يا حليل سودانا .. بلاد النوبة .. وحضارة النوبة ..
و دارفور .. و يا حليل كردفان و جبال النوبة .. لاكين انتو يا ناس الحكومة ..
ما بظنكم بتحبو سودانا .. لأنو لو كنتو بتحبوهو .. ما كنتو كتلتوهو الكتله دى ..
أرجوكم .. أرجوكم .. قوموا خلوهو .. خلوهو للناس البتحبو .. كفاكم .. خراب 30 سنة ..
كفاكم .. مسحتو كل حاجة سمحه فيهو .. طفشتو الناس .. الناس اللى كانت بتحب الناس ..
بدلتوهم بناس تانين .. ناس غريبين عن سودانا حق زمان .. ما عارف أقول شنو .. شتتو الناس
السمحه .. شتتو السودان الواحد .. الجنوب جدعتوهو جدعه .. كأنو ما كان تبعكم .. وين ناس الغرب ..
ناس كردفان وناس دارفور .. طيارات رايحه .. وطيارات جاية .. تضرب فيهو .. والأطفال يموتو ..
وانتو مبسوطين .. قاعدين فوق الكراسى .. ما بهمكم .. زول يموت من الجوع ولا يموت من العطش ..

أنا ما عارف أقول شنو .. ولا أقول شنو .. وينو السلام .. وينو السودان حق زمان .. متين يرجع السودان ..
يرجع زى ما كان زمان .. دايرين سلام .. دايرين وئآم .. نوقف بيهو نزيف الدم .. وخلونا نتلم .. مرة تانية ..
من فضلك يا حكومة .. من فضلك يا حكومة .. دايرين سلام .. يعم السودان كله .. كفاكم قعاد فى الكراسى ..
كفاكم التلاتين سنة .. عليكم الله قوموا فكوا الغِرا الملصقينو فى الكراسى .. خليتو الواحد بالحيل مرضان ...
وياها الثورة شغاله .. ونارا مولعه برا .. قوموا تاوقو من ورا الشبابيك .. يومكم خلاص قرب بالحيل ..
ونهايتكم .. بالحيل قربت ..

آخ .. آخ .. آخ .. وبعدين .. التاريخ يحكى عنكم .. وعن عمايلكم السودا .. أقول شنو .. ونقول شنو ..
كفاكم .. كفاكم .. كفاكم .. مره تانية وتالته .. الثورة .. الثورة .. شغال برّه .. أعملوا حسابكم ..
يومكم قرب بالحيل ..

الثورة .. الثورة .. عاشت الثورة ..

العجوز .. حق زمان ..
ارنست ارجانوس جبران ..
27 ديسمبر 2018
+++

يا اخوانا المحبين ..

ما تقولو معانا شنو ..

نرفع أيادينا الى السماء طالبين من الله عز وجل ..
أن يقشع هذا الظلام الدامس .. ليأتى بنوره المجيد
فى هذه الأيام المباركة .. حتى ينال السودان الحبيب
استقلاله المجيد من أيادى هذه الفئة التى لا ترحم ..
ولا تترك رحمة الله تنزل ..

نقول بصوت واحد .. يا رب .. يارب .. يارب ..

أخوكم وعمكم العجوز ..
ارنست
+++