كل زول يخنق التحتو ,,,,,

03:17 AM December, 11 2018

سودانيز اون لاين
سامى عتبانى- Camp hill , Pa 17011
مكتبتى
رابط مختصر

_^_________^_ . ضابط برتبة ملازم ثاني يدخل البنك بأنفة وعلو ضُباطي .. ويقدم شيك مسحوب على حساب الخدمة الوطنية .. والمبلغ ٣٠٠٠ جنيه .. وموظفة البنك تطلب منه باحترام ان يمر نهاية اليوم اذا توفر كاش يتم الصرف فورا لكامل ال٣ الف واذا لم يتوفر سيتم صرف ١٥٠٠ ج ويودع الباقي في حسابه .. انتفض الضابط العظيم وصرخ باعلى صوته شارحا لمشكلته التي تتلخص : * انا عربيتي بايظة وفي المنطقة الصناعية. * وهسه جاي بركشة * ما فاضي عشان انتظر لغاية نهاية اليوم . وفي تلك اللحظة كان هنالك استاذ في المعاش يجلس في الانتظار لنهاية اليوم ليصرف معاشه والتزم الانتظار لكنه في البدء طلب ان يجلس داخل البنك لانه ليس لديه مكان يذهب اليه . انفعل الضابط العظيم وصرخ في وجه الموظفة التي كررت كلامها بلطف وجلست لتواصل عملها فماكان من ضابطنا العظيم الا أن مزق الشيك الى سبعمائة قطعة صغيرة. ثم بكامل قوته قذف به في وجه موظفة البنك فأصاب رجولته وجبروته في مقتل ... عربيتك بايظة يا جنابو ؟؟ انت ما عارف انو السبب في ازمة الكاش دي سببها سياسات الدولة التي يرأسها جنابو المشير والذي نعمل الان الى كسر عنق الدستور عشان تاني يركب ٥ سنين ؟؟؟ عمر البشير ده لما نظام الصادق المهدي ما عجبو قام قلبو .. انت بدل تقلب شيك صغير زي ده في وش موظفة مسكينة زي دي ... ما تمشي تقلب ال....... نقطة سطر جديد : __^^_____^^__ يا ناس الخدمة الوطنية مكتب النيل الازرق الدمازين الشيك ابو ٣٠٠٠جنيه شايلو ياتو ملازم . ... الناس البزعلوا وبكوركو في ناس الهايسات والحافلات والبشاكلوا بتاع الخدار والجزار .. والكل يوم بضربوا ناس البنوك وديلك القاعدين يدقوا الاطباء في المستشفيات ... الناس ديل ما الفيل ... ولا هم ضل الفيل و الفيل انتو عارفنو كويس ... الفيل لا يخافكم ولا يهابكم لانه اصلا عارفكم وفتنكم في بعض ... والماعارف الفيل احسن يركب الفيل امكن السطلة تعدلو .. قف : ماهي عقوبة من يمزق شيك حق جهة اعتبارية لمؤسسة ارتبط اسمها بالوطن . التحية لموظفي البنوك وهم لسه عايشين وما لاقين حل لاصحاب الحق .. الجميل في القصة انو نص حق الضابط الذي رفضه اصبح دعم للاستاذ معاش ليتمكن من صرف ثلاثة ارباع ما يحتاجه بدلا عن النص . __________________ *(شاهد عيان لم يتمكن من الصرف)


منقول من صفحة الشقيق
عصام عمر إبراهيم
عصام قيسان