صحي بتريد (اللطام) يا سيدي الإمام؟.

03:15 PM December, 07 2018

سودانيز اون لاين
سفيان بشير نابرى-الولايات المتحدة الامريكية
مكتبتى
رابط مختصر

صحي ( بتريد اللطام ) يا سيدي الأمام ؟؟
أسوأ تشويه لتراثنا ونضالنا الوطني أن نغني اغنية ود حبوبة في وداع في لندن ( بتريد اللطام
وفي الصقرية ديك كم شبعن صقار ) لعائد ضمن هبوط نااااعم .
احسن وصف لهذا الوداع وبهذه الأغنية التي ترقص فيها حسناوات بالرقبة ويوزعن ( شبالهن) في حضرة الإمام هو ( حزموني ولزموني كان اقدر اشاكل ) .
انت يا سيدي الفنان شاورت الأمام في الأغنية دي قبل تغنيها وقال ليك انا زول لطام وبهز البلد من اليمن للشام ولا بتحرجو في الزول ده ساي ؟؟
الأمام زي ما النكتة قالت ( راقدلو في رأي ) ما بقوم ليكم .
أنا رأي الأغنية دي والشبالات ال بتتطاقش دي ادخروها لينا ليوم كريهة وسداد ثغر .
وما تجيبوا سيرة الشهداء من ود حبوبة لا عند علي عبد اللطيف والماظ واكتوبر مروراً باحفاد ود حبوبة في سبتمبر عشان الشهيد قالوا بسمع ويقومو يرفعو رأسهم يلقو الجوطة والحماس لي سيرة عاملنها لي أمام راجع مهادن في عودة ( تهبطون نواعم ) وتحرجونا مع الشهداء ومع جدودنا وجدوده ال قطعو راس غردون .
الأمام لن يعود ( ملاطما ) وقد سبقته المنصورة والحشود تنتظرها في بوابة الجماهير شاهرين هتافهم وخرجت عبر صالة كبار الزوار تقلها عربات القصر .
ياريت لو الأمام قدر يقوم يبشر في أغنية الوداع وبتريد اللطام كان أقل شي قلنا أتذكر ود حبوبة ولا كان شال شبال السمحات ديل كان قلنا شبال السمحة ده اقل شيء بشد حيله الاسبوعين الأوائل .
مافي داعي للاحراج والحوريج ده الامام ما زول لطام
الأمام راقدلو في رأي
الأمام وناس نداء الخيبات عبر شيخهم امبيكي خلوهم اقرعوا الواقفين وغنوا ليهم
غنو لشباب السودان عامة ولشباب الانصار واغنيتكم دي وشبالاتكم ما بتقع واطة
والجنيات ال غابت جابت
وانتو الجيب شن قايلنو ؟؟
عذرا ود حبوبة
* يمكنكم مشاهدة الفديو من الرابط في الأسفل.
منقوووول.
عمر كبير
https://www.facebook.com/alnair.alfadul/videos/10213973216426290/https://www.facebook.com/alnair.alfadul/videos/10213973216426290/

يا سفيان اللطام عندنا شيتا تاني.
مرة جاء واحد من جماعتناللحكيم في نقطة الغيار
قال ليهو :" عندي زكام ولطام"
الحكيم قال لو : الزكام عرفناه اللطام دا شنو؟
عمنا رد عليه: " اللطام دا نخرتي دي بس قربتك ديك الراخي لها الوكاي"
الواكي هو الحبل البيربطو بيهو خشم القربة بتاعت الموية

سفيان ي جميل.

اي واحد عاوز هبوط غير ناعم يخش الغابة طوالي.

برغم كل مساوئه وعوراته هو اخر رئيس وزراء منتخب
سواء انتخبته النخبة او غيرها .