يوميات مواطن سوداني

09:13 AM December, 05 2018

سودانيز اون لاين
عبدالحفيظ ابوسن-no where
مكتبتى
رابط مختصر

مواطن سوداني
ملحوظة
مواطن سوداني وداخل السودان 😆😆
عشان نكون دقيقين وكدة

استيقظ متأخر من النوم
الباعوضة كانت مساهرة بيهو مع سخانة في الجو . الكهرباء قطعت قرابة منتصف الليل
عانى صعوبة في تلمس طريقة للوصول للهاتف ليستعمله كمصباح يدوي 😆
تعالت اصوات اطفاله من السخانة والظلام وقطعة الكهربا
كانت زوجته ساخطة وتلعن في الظروف ووصل لعنها للبلد زاتو
بالله دي بلد دي ؟
يوماتي نحن في العذاب دة ؟
تعاون وزوجته في حمل الاطفال لخارج الغرفة .
فرشو الحوش
وكان من سؤ حظه انو ناموسيتو مقدده في اكثر من مكان
فلم يستطع النوم إلا قرابة الغجر
وصوت مولد جارهم ساهم مع الباعوضة في تعكير مزاجه
هسة جارنا دة لو ركب ليهم انبوبة غاز تلاجات فاضية فاضية وربطها مع العادم مش كان قلل الصوت دة وخلانا مع الباعوضة بس ؟

ندم ليلا من ترك شراب الخمر
زمان الواحد يجي السرير مخدر . ما عندو شغلة بي باعوضة ولا كهربا
المطرة زاتا لو جات ما هماهو
وكأن ندمه جعله يصحو متأخرا وكأنه كان مخدرا
متورم العيون
متعكر المزاج

كيفك يا ود أبوسن
معاناة جد قلوبنا معكم أخي ربك يكون في عون الجميع
مع كل الود

تحياتي زهير
حبابك يا صاحب
الهدف ليس استدرار العطف واستجداء التعاضد
بل
نقل صورة طبق الاصل لحياة الانسان السوداني في ظل السلطة الحالية
تفاصيل يومة الرتيب المتكرر
محاولة لفهم ما يستطيعه من عمل تجاه الواقع وفقا لظروفه الشخصية والحياتية
المواطن العادي الغير مسيس ولا مؤدلج
ورفع الحرج عنه في اتهامه بالتقاعس عن نجدة الوطن

والله يا عبد الحفيظ كان قلت ليك وضع الزملاء في الغربة هنا و الناس هناك حالهم كيف والله تبكي عديل القصة بقيت بالجد صعبة تعرف ترسل قروش ما بتحل قضية الان قروش وأدوية
والله العظيم انت كان عارف الناس هنا بتعاني بشكل مختلف وبقت المشكلة ما موضوع ترسل كم المسالة في الاستمرارية لوضعك اللي بمكانك من أنك تسد حاجة لو بسيطة
بس قاعدين والله الواحد بقي محتار ذاتو يعمل شنو
بس الامل ما مات لسه بنحاول وأنشالله الشدة تنجلي
وعارف القصة ما عواطف ولا محاولة تجيش مشاعر

يا شيخ العرب
أسمعوا وصية ود دوليب في منظموته الشهيرة:
أن هاجروا الى مصر بالكلية

والله صحي

حبابك عبدالله
لا والله لم اسمع بها ولكن اظنك تقصد ود دوليب شيخ الطريقة التجانية
وانا اهديك ابيات امل دنقل

كان قلبي الذي نَسجتْه الجروحْ

كان قَلبي الذي لَعنتْه الشُروحْ

يرقدُ - الآن - فوقَ بقايا المدينه

وردةً من عَطنْ

هادئاً..

بعد أن قالَ "لا" للسفينهْ

.. وأحب الوطن!

مرحب زهير الحمل واحد
بس هناك اخف
كتر خير المواطن البرة
برسل الدوا
وحق السماية
وبشارك طابق في الافراح والاتراح
وبرسل يبنو الحمام الرمتو المطرة
وبرسلو هدوم العيد
وبعينو علي نوائب الدهر
تعاسة حياة بعضهم في الخارج جعلت الحياة ممكنة لمن هم في الداخل
يتآكلهم الوجع والحنين ورؤية ظلم السلطة

هاك دي كان ما جاتك ..

Quote: كتب د احمد الطيب (( الله لا كسبك يا زكية)) //////////////////////// اكتب إليكم القصة من مدينة ريفية صغيرة حتي آخر يوم غادرتها كانت هذه المدينة تنير طرقات المدن السودانية و طرقاتها مظلمة (( يعني عريانة و تغطي في جيرانها )) ... مدينة قمة الجمال والروعة ...موية وخضرة وجه حسن....وناس طيبين و نصهم كان تابع الحكومة و النص التاني تابع الحركات المسلحة... __ المستشفي كان سئ شديد وكنا تلاتة أطباء فقط واحد مدير (( سعد عثمان )) والتاني نائب المدير (( العبد لله )) والتآلت ده هو د محمد باب الرحمة كان (( رئيس مجلس الإدارة.)). __ انا و محمد ده كان جابونا إعادة للخدمة العسكرية بعد اضرابنا مع بقية الأطباء في الابيض.... __ بعد الإضراب وزارة الدفاع قالت نحن عساكر و اضرابنا يعني تمرد عسكري ويفترض نختار واحد من اتنين اعادة الإلزامية او السجن الحربي ... وزارة الصحة نكرتنا حطب ...و قالت نحن ما تابعين ليها ....(( يا جماعة عسكري لا عنده كاكي ولا بووت ولا بوريء ولا قاش او كارني ساي ما شايله ))... نفذنا واجرك علي الله (( مجبورة خادم الفكي علي الصلاة )).... __ يا أخ السودان ده التقول فيهو جنية بتكلم الناس ...الوكت داك ما كان في تلفونات ولا موبايلات.... لكن تاني يوم بعدما وصلنا قلنا نشوف البلد ال ح نقعد فيها سنة دي ... طبعا اي بلد لو داير تعرفها بي سرعة ابدا بالسوق... __ اول دكان لاقانا كان مغلق ...سلمنا علي صاحبو وحلف الا نشرب شاي ...واول كلام قالوا لينا (( انتو موش الدكاترة الجايبنهم من الابيض عشان يآدبوهم في عندنا ))... __ انا غايتو ما عرفت اشرب الشاي وللا اكشحو...لكن بلعتها وسكت... __ بعد أسبوعين صاحب المغلق ده بقي صاحبنا و فردتنا واكتشفنا انه خريج school of mathematics وانه من امدرمان . __ العيادة كانت فيها وطاويط و انا اصلا ما ناقص كان عندي اذمة عشان كده عيادتي كانت في الشجرة ...عندي كرسي وتربيزة و صبارة شاي عيادة علي الهواء ذي برنامج إسراء زين العابدين... __ اي زول عنده وجع اضان وجع عيون وجع رأس و جع رقبة ...ملاريا نزلة بجيني في الشجرة.هنا .. اي زول عنده وجع اي حاجة تانية يدخل العيادة و يجي يكشف عليه المدير العام او رئيس مجلس الادارة او كلاهما.... __ اها انا قاعد في عيادتي الشجرية دي جاني مواطن شايل ليه حقنة مكسورة .... _ سلم علي و سألته من اسمه و شكوتو... __ قال لي عندي طمام ليهو اسبوع . __ قلت ليه ياخي نحن بطنا طامه من سنة 89 ذي ما بقول خليل الضرير... __ وبعدين ؟ _ بعدين جيتك يا دكتور تقرأ لي الحقنة دي .. __ شلت الحقنة وقريتها و قلت ليهو ...الحقنة دي (( سنتيسينون )).. __ قال لي يعني شنو؟ __ قلت ليهو الحقنة دي بتاعة طلِق صناعي ....يعني بنديها المرأة الحامل عشان تسرع ليها الولادة. __ سامع ليك زولي يكورك (( الله لا كسبك يا زكية )) و بعدها وقع بُرررر دلووووب في الارض و دخل في صدمة.... وقعدنا نطاقش... جيبوا الدرب يا جماعة و جيبوا الهايدروكورتيزون و لحقونا النقالة....و ين الأكسجين وصاحبنا يشخر ما صاحي ... __ ناديت الباش ممرض يا شيخنا ما في اي أدوية منقذة للحياة في مستشفاكم ده... __ قال لي والله بعد الدرب دي ما عندنا ليهو أدوية منقذة للحياة الا نكشحوا بي جردل مويه من التلاجة و نكفتوا ليك... __ و جري جاب جردل الموية بي تلجو و كشح نصو فيني ونصو في المريض... __ المريض فتح عيونو و عاين لينا و تاني قعد يكورك (( اللعن ابوك يا زكية...الله لا غزًه فيكي بركة. )) و تاني دخل في غيبوبة... __ يا جماعة جيبوا اكسجين جيبوا اندوتركيال تيوب... __ الباش ممرض قال لي كدي ابعد شوية يا دكتور خليني اصحي ليك... بالله الزول ده راح قاشط ليك المريض ده كف لما سمعت صجججججج اضاني زاتها صنًت... __ يا زول ده شنو الزول ده ح تعمل ليهو نزيف داخلي بالصورة دي زول في غيبوبة تديهو كف ... _يا جماعة انا الجابني من الابيض شنو .. ملعووووون ابو الإلزامية لأبو الإضراباااااات للأبو الطب زاتووو.. __ الباش ممرض تاني قشط ليك الراجل كف....و نادهو بي اسمه المريض طوالي رد.... __ قوم علي حيلك كلم الدكتور __ زولك صنقر في نص السرير وتاني قعد يصرخ(( ملعون ابوك يا زكية )) ... __ قلت ليهو يا زول زكية دي ما تخاف عليها بعدما اخدت الحقنة دي ساعة ساعتين بتلدي....و تشيل شافعك تسلم عليهو. __ قال لي زكية دي يا دكتور ما زوجتي زكية دي ممرضة جارتنا وانا قلت ليها عندي طمام... فتحت شنطتها و راحت كابساني الحقنة دي وقالت لي دي حقنة فنرقان و ح تشيل ليك الطمام ...و انا شلت الحقنة وجيت اتأكد منها... اتاريها ادتني طلق صناعي .. (( اللعن ابو اليوم السكنا جنبك يا زكية )).... __ عليك الله يا دكتور حسب توقعاتك ممكن يحصل لي شنو؟ __ قلت ليهو علي القسم ما عارف وما في دكتور في الدنيا دي عارف ح يحصل ليك شنو لكن بعد ترجع بيتكم امشي أسأل زكية.((( الله لا كسبها))))...والله يا زول انت اول راجل ياخد طلق صناعي في العالم و احتمال تكون آخر زول... __ زولك تاني نام لينا في النقالة و الباش ممرض تاني داير يقشطو كف .... قلت ليهو يا حاج (( الباش ممرض )) المريض ده اوعك تهبشو تاني ...والله لو هبشتو تاني احولك من هنا مستشفي الكرمك يا قيسان... __ الباش ممرض قال لي مريضك ده انا خليتو ليك بعد كده لكن زكية دي ح اقشطها ليك كفين تلاتة قبل ما أسلم عليها. __ وعمك الباش ممرض ماشي يفتش لي زكية رفعت ليهو يدي وقلت ليهو عليك الله ما تنسي زكية دي بعد ما تكفتها اديها اتنين حقنة ((سنتسينون)) و قوليها د احمد قال ليك اوعي يشوفك في المستشفي ده قبل ما يكمل فترة الإلزامية. ساعتين تلاتة صاحبنا بقي كويس و الباش ممرض ركب عجلتو و راح يفتش زكية يديها كفين تلاتة وقال لي وين حقنتينك بتاعة السنتيسينون الح نركبهم لي زكية ؟ قلت ليهو يا اخي اتفكفك السنتيسينون من هنا و رايح ح يكون مطبول في درجي ده .. __ صاحبنا بقي كويس و انا بملأ في كرت خروجه من المستشفي جاني في الشجرة و براااحة في اضااااني قال لي كده خلاص يا دكتور تاني مافي مضاعفات او حاجة تحصل لي ؟ __ قلت ليه غايتو كان تاني وجعك حرًة خلي المدام تنادي ليك الداية.... وما تنسانا من فطور السماية.. وسلم علي زكية... (( الله لا كسبك يا زكية )) ///////// نقطة سطر جديد لنج: انا كتبت البوست ده ليه ! __ عشان في ناس كتار ما عارفين خطورة الأدوية و بمشوا لأي صيدلية او مخزن دواء يشيلوا الدواء الفيهو النصيب... لازم نعرف انه الدواء ده سم toxin وإدارة الدواء في اي حتة في العالم اسمها (((إدارة السموم والصيدلة ))) toxins and pharmaceutical administration....و بالقانون والأخلاق الطبية لازم يكتبوا سموم قبل صيدلة.... __ البندول القاعد في الكنتينات ده سِم .... الزول البغني في اغنية (( دي زولتي و حبة بندولتي)) لازم يعرف انه البندول يعني سم و سم هاااري كمان.. والناس البترقص وتشجشب جوة الحفلة لازم تفهم كده.... __ حبتين بندول مرة واحدة ح تشيل ليك الصداع عشرة حبات ح تشيل آخر نفس و تجينا في المشرحة....والما مصدق كلامي ده خليهو يجرب بي نفسو... _ انا كتبت القصة دي لانه هناك نقص كبير في الأدوية المنقذة للحياة و شهر شهرين ما عندنا ليكم الا علاج اخونا الباش ممرض (( جردل التلج و التكفت )) ..وهي البلد دي ضراها شنو غير التلج و تكسير التلج.... __ كتبت البوست ده عشان الناس الاكلت قروش الدواء لازم تعرف انها أكلت أرواح ناس وليس فلوس ناس ...لازم القضاء يعرف انه البشيل اموال الشعب عشان يستورد دواء و يمشي يتاجر بيها في دبي وفي الدهب وفي السيارات وفي الصفقات المربحة هو شال أرواح ناس كان ممكن يكونوا علي قيد الحياة لو اتوفرت الأدوية المطلوبة وقتها... __ كتبت البوست ده لانه لما تكون في ندرة في الدواء ح يظهر الدواء في السوق الأسود والزول الفقران ذينا كده ح يكون يومو أسود و حظه اسود لو احتاج الدواء... __ كتبت البوست ده لاني عارف المسؤولين لو وفروا الدواء في المستوصفات خمسة نجوم و اتوفر لي ناس كافوري والرياض و الطائف تاني ما قصروا.... و يقصروا ليه ما هم اصلا بخافوا من ناس كافوري بس و تاني من الله زاتو ما بخافوا... __ اخوانا المواطنين عليكم الله قدر الدواء العندكم ده اصرفوهوا صاح و استعملوا صاح عشان ما تجونا في غيبوبة ...الباش ممرض قااااعد.. و كلنا بندعوا ربنا (( يبالي الفلس بالعافية ))... و دمتم سالمين //////////// د احمد الطيب ابراهيم استشاري جراحة الكلي والمسالك

Quote: انا كتبت القصة دي لانه هناك نقص كبير في الأدوية المنقذة للحياة و شهر شهرين ما عندنا ليكم الا علاج اخونا الباش ممرض (( جردل التلج و التكفت )) وهي البلد دي ضراها شنو غير التلج و تكسير التلج............

وانت طالع بطنك طامة ما تنسى تملا بكان النقط دي..
التحية لك ولزوارك.

تحياتي يا ملك
مقابلة الدكتور العمومي 200/150 ج والاخصائي وانت طالع لي فوق
فحص الملاريا في كوستي 30 ج في الخرتوم اكتر
حقن الملاريا الاصلية
240 ج آي مع تحرير السوق في حقن ارخص والرخيس بي رخستو بضوقك مغستو . والصيدلي بقا بياع دوا زيو وزيو كنتين الحلة 😆😆 بهمو يربح ويبيع ليك
اها
بقينا نكبر اللفة من مقابلة الدكتور
... هسة تمشي ليهو يقول ليك احفص الملاريا . تفحص يقول ليك عندك ملاريا ويكتب ليك حقن
ولو ما ظهرت برضو بديك الحقن . يعني الحقن ما فايتاك يعني بكون عندك شنو ؟ ام التيمان 😆
اها اختصرنا الدكتور ووفرنا حقو وطوالي تمشي تفحص . وتجيب علاجك وحق الدكتور تشتري يا برتكان ولا نص كيلو ضان شية ولا ام فت فت
بقينا دكاترة برانا
لو ماشي زاتو بتلقا واحد يكسلك منو
دكتور شنو ؟ امشي افحص بس
الفحص زاتو جليناهو شنو ليك 😆
.. انت عارف الظاهر عندي ملاريا . من يجيني صداع وابلع بندول وما يروح معناتو ملاريا
... ملاريتي بتجيني بي اسهال
.... وجع ضهر وكسير جسم
اها بقينا تبع الصيدلية
ودي زاتا اختصرناها
... بلعت 24 حبة ما نفعت . رجعت الدكتور كتب لي حقن . اخدت 8 حقن وبرضو شاعر بيها . مشيت ليهو قال لي الا كينين بالدرب
جبت عرديب وقرض وكركدي وبليتهم والله هسة زي الحصان
اها
قاطعنا ليك شارع الدكاترة
تجيب كوريتك وتبل وتقرطع
والله لقيت ناس بالين حاجات ما تعرفها زاتو
تشرب بس
ام غليغلة ولا شيح و لا حلبة ولا ولا
ف شنو
سياسة الفقر

قبل ان يستقيظ
وهو في تلك الحالة بين اليقظة و النوم تراءت له واجباته الملحة والآنية
عليه ان يقف في صفين اليوم . صف الرغيف ثم صف الغاز
وحمد الله انه لا يمتلك سيارة 😆😆
ثم تذكر فجأة ليقف في الصف عليه اولا ان يقف في صف البنك فتكدر

اندهش جدا بعد ان استيقظ زمنا طويلا انه لم يتذكر ان يذهب للعمل !
فكرة ان يذهب للمكتب الحكومي لم تدر بخلده ابدا
شغل شنو هو زاتو ؟
نشتغل ليهم قدر قروشهم بس
قروشهم البقطعوها لينا زي المرارة في البنك
ماهيتك لامن يجي الشهر الجاي ما تكون مسكتها كلها
الله كريم
الدين في الكتوف والاصل معروف