Post: #1 Title: لسان الحال : أن نكون أو لا نكون Author: ابو جهينة Date: 11-23-2018, 06:27 PM
البلد .. رغم العبوس ال بادي في محياهُ و ال (بَتابِتْ) ال نازلة يوماتي و عكْرة فضاواتو و سماهُ مع كلُّ دة .. و كل داك صورْتو كاسياها الوسامة .. لوحة مالياها الوجاهة ( موناليزا سمرا و قيافة مرة باسمة .. و مرة غاشِيها الحُزُن .. سِيرَتَا في الآفاق تحوم ... تاريخاً يمْلا صفحات المُتُن ) .... ياها ذاتا الوجوه أل من زمان و نفس النوايا الطيبة ..بلا ظنون نحن و إنتو .. كنا و لا زلنا ... و حنكون للأبد .. أصل الدنيا .. و جوهر كُون نبْذُر الآمال للخلِق .. و نحن أحوج ما نكون ( و لسان الحال .. أن نكون أو ما نكون) منو ال من جدودنا فارق ترابو و سلك... درباً للسفر مجنون ؟
يانا نحن مجبورين فاردين جناحاتنا صوب الغربة طابقين جراحاتنا سنين و دنين نعاود السفرة بعد السفرة لا فتر عصا الترحال .. لا العزيمة تلين و نرجع نحن يانا و إنتو ياكم تلاقونا و نلاقيكم : (حبابك .. يا حشاى ) ( و حليلك يا روحي و حبيب قساى .. ) ( يا بعد جوع روحي الطويل .. دخري و عشاى )
نفس السؤال الما بارح خيالاتنا و خيالاتكم يا ألف مرحب و يا حبابكم حالكم و أحوالكم ..؟ وليداتكم ..؟ بنياتكم ؟ فلانة عساها .. و فلان داك عساهُ
لا تكِلّوا من كتر السؤال .. لا نحن من الرد نَمِلْ
نفس الإمتحان و نفس الدرِس و إنتو ياكم .. لابسين من زمان ذات اللبس في خريفكم و في شتاكم هن لافحات نفس التياب هم شايلين نفس العِصي هن متوشحات توب القدر الما بِتْعَصي هم فاردين شراع الصبُر .. شاقين بحر الصعاب
نحن يانا و إنتو ياكم جبلا ما بهزو ريح تاريخاً كِتَاُبو .. ما بيلزمو التوضيح لساناً تصاريفو عجَب ... رَطِن أعاجمو فصيح و نحن يانا و إنتو ياكم واقف محلو زمن .. قادوس حياتنا و تِرِس حياتكم لا بِقَدم لا بِأخّر .. زى ساعات الميادين العتيقة و زى عُنُق الحقيقة ..لا بِتْلَوي لا بِنْكَسِر سِيرْ يا بلد .. ما تقيف محلك سِرْ
و إنتو ياكم مضمونين تمام .. ضمان موية الدميرة معجونين شديد بالطمي.. فال حنة و ضريرة أعلام ترفرف فوق كل القمم مزاحمين كل الأمم مواثيق عهود و بصمات ذمم
و إنتو ياكم بي صيامكم و خم رمادكم بي سجودكم .. و بي قيامكم معفّرة بي أديم الأرض جِباهْكم سديدة في قلب الهدف رمية سهامكم و كل البلاوي الجات مسامحانا و مسامحاكم في المال و الولد ..و في هامات مقامكم
و عشان كدة أركز يا بلد .. حنكون للأبد .. أصل الدنيا .. و جوهر كُون نبْذُر الآمال للخلِق .. و نحن أحوج ما نكون
Post: #2 Title: Re: لسان الحال : أن نكون أو لا نكون Author: ابو جهينة Date: 11-23-2018, 06:33 PM Parent: #1
كتبت هذي الكلمات ، وأنا على متن باخرة تشق عباب البحر متجهة إلى سواكن وأنا أرمق هذي الوجوه السمراء التي تحمل بدواخلها آمالا وآلاما
Post: #3 Title: Re: لسان الحال : أن نكون أو لا نكون Author: ابو جهينة Date: 11-23-2018, 06:47 PM Parent: #2