تحديد سقف لتحويل الرصيد

07:00 AM November, 22 2018

سودانيز اون لاين
عبدالحفيظ ابوسن-no where
مكتبتى
رابط مختصر

صحف اليوم
“المركزي” يحدد”50″ جنيهًا أعلى سقف لتحويل الرصيد بالموبايل
السوداني
المركزي يحدد”50″ جنيهاً في الشهر كسقف أعلى لتحويل الرصيد
الجريدة

ان صح هذا القول يكون كلام عجيب فعلا
بعض خدمات الهاتف رسومها تفوق ال 50 ج بكثير جدا جدا
ودة برضو غير يضيق علي المواطن ما بحل مشكلة السيولة
برضو المواطن بشوف طريقة غير البنك يحول قروشو
لانو ماممكن ارسل لولدي الطالب الجامعي مصاريفو الاسبوعية مثلا بالبنك . لانو ممكن يضيع زمنو في تحصيلها لامن يجي الاسبوع الجاي وتلخمو من قرايتو
تحويل الرصيد ما مربوط بي زمن عمل ولا اجازة زاتو
غير الطلاب في ناس برسلو مصاريف لاسرهم امكن يومية كمان
السلطة لا تألوا جهدا في تنغيص حياة المواطن

خمسين جنيه دي مما يعدون؟؟؟
اقل من واحد دولار

الناس تشتغل مساكيل بس يعني؟

يا ود الشيخ هو انت قايل للرصيد دة للكلام 😆😆😆
الكلام بقا بي قروش عديل كدة

يا ود أب سن، تعرف بعد دا
الكيزان ما فاضل ليهم الا يحددوا
عشرة جلدات لكل مواطن سوداني
ومافي زول ح يقول بغم
أبونا مارتن لوثر كينج قال
مافي زول يقدر يركبك
الا اذا انحنيت
علشان كده الكيزان حاقرين بالشعب السوداني

كان ممكن يطوروا خدمات تحويل الرصيد دي بدل تكون رصيد كان ممكن تكون قروش ويربطوها بالحساب البنكي وبدل ما تحول من تلفونك رصيد كان ممكن تسحب من حسابك البنكي في التلفون وتدفع منها الفواتير وترسل قروش وتدفع في المطعم والصيدليه واي معامله بدل السيوله وبي كده بكون وفروا علي نفسهم وقللوا من مخاطر حمل السيوله ووفروا العمله الورقيه...

Quote: اقل من واحد دولار

يا ود الشيخ يعني أقل من 47 رغيفة ؟
أعرف أسر أولادهم بيحولو ليهم مصاريفهم الشهرية من الخارج
و لأنهم بره الخرطوم يتم تحويلها لهم رصيد، وده ما بياخد عشرة دقايق
يعني تاني مصاريفهم حا تصلهم بعد كم ديل يا حفيظ ؟

منتهي الحقارة ..

يا النزير الناس حنى ظهورهم الحوجة . ذات الحوجة نتيجة قهر وسياسة السلطة
يا هجو ديل وقفو شراء الرصيد كخدمة من بعض البنوك
صحي يا كمال والتحويل مرات يومي يعني الود يبطل قرايتو ويبارى البنوك بدون فايدة ؟
ممكن احول رصيد 50 ج لكن ما ممكن امشي البنك واحول 50 ج كل يوم
حقارة جد يا محمد وبعد دة معاها منابيذ

النذير حجازى...


يا ود أب سن، تعرف بعد دا
الكيزان ما فاضل ليهم الا يحددوا
عشرة جلدات لكل مواطن سوداني
....

فى موقف البصات البتسافر خارج مدينة الابيض...
تلقى و احد شايل صوت عنج...
يضرب فى الناس يمين شمال..
أنت اقعد كويس..
و انت ما تقيف هنا..
و انتى زحى من محلك دا..و هكذا..

المافى شنو عند الانقاذ؟!

المشكلة انك حتحيل عدد كبير جدا من العاملين في المهنة دي اي تحويل الرصيد وهم عدد مقدر حتحيلهم كلهم الى الشارع هم واسرهم

انطبقت فينا مقولة

زمان نميري دخلنا في ... الوزة
هسه الكيزان شالوا الوزة ودخلوها في ...

يا ستي نور خلي موقف البصات .. اي مكان يستلزم صف لخدمة تقدمها السلطة احتمال كبير تلقي كم عسكري شايلين سيطان ينظمو الصف حتي لو كان طلمبة بنزين
دي كارثة تانية يا محمد
لمان حددو السقف بي ألف ناس الرصيد عملو ليهم كم شريحة . دي تتملي يشوفو التانية . يعني ممكن استقبل عشرة الف في موبايلي
لكن شكلهم لو قدرت افهم حتي الاستقبال بقا محدد
عاين المثابرة
خلو الجهاز القضائي يفارق الدستور ويتبع اوامر البنك المركزي وهسة حكمو وزارة الاتصالات
بكرة ما معروف

ود أبوسن
ما تظلموا الانقاذ
دي واحدة من عبقريات الانقاذ في مكافحة غسيل الأموال

صحي يا حسن ومش كدة وا بس حتي كمان بقو يحددو ليك كيف تناهض الانقاذ

السيد محافظ البنك المركزي،
المحترم
نحن كبار السن من مواطني "ام دحيليب" و "كرا برا" و"مهيلي"و "قلقات التيس" و"اللالوباية الزرقا"
سمعنا أنكم خد خررتم من منازلكم بكفوري والمنشية بالتعاون مع شركة الاتصالات الجنبكو ديك إنكو توقفوا تحويلا الرصيد، نحنو هنا نؤيد الحكومة، ونحمي اهلنا من التمرد، ونذهب لسوق أم دورور مرتين في الأسبوع حيث نستقبل مصاريفنا من أولادنا الذين يشتغلون عمال يومية بالمدن. استلام المصاريف يكون تحويل رصيد. السوق نصف اسبوعي ونخشى توقف المصروف. نرجو التكرم بفتح فروع وتوكيلات البنوك لاستلام مصاريفنا في كل من المناطق المذكورة اضافة إلى "كرا برا" "إريو" "هبوب" "الثانية" "الثواني" "فريق بلا لبن".
ودمتم
مرسله
عمران ود تُكُر - عامل يومية في سنار
بالنيابة عن والده (تُكُر أولُو) من سكان "اللالوباية الزرقا"
ملحوظة: رسلوا لينا موظفين رُجال ما ترسلوا العوين، البلد مرات بيكون فيها دُواس.

تشكر محمد للرسالة البليغة

رسالة عمران الكتبها محمد ابراهيم رسالة اوسكار ٥ نجوم تفضح حال هذا النظام العجيب،،ذو القرارات العجيبة والغريبة . هل بتعرف يا ود ابو سن ان الحكومة قررت منع الناس من بيع املاكها او سياراتها ،،،ففي الاسبوع الماضي اتصلت اميرة بت السيد بوكالة عقارات لتبيع قطعة ارض تمتلكها في المعمورة في الخرطوم ولكن صاحب الوكالة قال ليها البيع ممنوع بامر الحكومة...فاستغربنا لهذا القرار المجحف..فاذا اراد شخص فقير في بيع منزله لحوجته للمال للعلاج الحكومة تقول ليه ممنوع وامشي موت بهدوء في بيتك الداير تبيعه...
قال عندنا قوات مسلحة تحمي مصالح الشعب قال،،،،دي قوات مصلحة وبتاكل فول مصلح وبس وما فيها وطني واحد...يتقدم الصفوف ويقلب الحكومة دي ويرميها في مزبلة التاريخ ويسلم السلطة للشعب ويحاكم هؤلاء اللصوص والحرامية الذين يسرقون اموال الشعب ويبنوا بها القصور المنيفة ...قرات مرة في صحيفة سودانية ان احد الصحفيين وجد امام مسجد في حلتهم بيشحد في الشارع ...بالله دي حالة دي !!!!الحكومة دي ما بتخجل !!!؟؟

Quote: “المركزي” يحدد”50″ جنيهًا أعلى سقف لتحويل الرصيد بالموبايل

المركزي علاقتو بالموضوع ده شنو؟
دي مسألة تخص شركات الإتصالات ... وبالكتير هيئة الإتصالات.

قالوا برضو ما عندك حق تسجل أكتر من 5 شرائح في إسمك.

المركزي يبطل خرخرة .... نحن عندنا معاهو قضية واضحة.
قروشنا الأودعناها (على سبيل الأمانة) عند البنوك ... ليه ما بيدونا ياها؟
يبطل (المركزي) شربكة في مواضيع الجهات التانية ويحل لينا موضوعنا معاهو.

يا امتثال مافي زول بقلبها بسلمها .. بكنكش فيها
ويا ابوالريش اظن برضو ماعندك حق ترفع قضية في بنك لعدم تسليمك قروش . سلطة قضائية متدخلة في تعطيل حقوق الناس اذا صح الكلام دة
حكاية التسجيل دي فشنك ساي يا ابوالريش
الاتصالات دي شغالة علي كيفها

سلام عبدالحفيظ والمتداخلين هذا نذر يسير من عبقريات اٍقتصاد الصدمة !!!هو حقيقة يطبق فيه بند تلو آخر -
الصدمة هي صدمة المواطن في مأكله وأمنه - مما يتيح للحكومة المهيمنة أن تمرر كل قراراتها
** السؤال :- لماذا كانت هناك أزمة سيولة !!!! وأين اٍختفت النقود !!!هذه نتيجة تراكمية لسياسات الفساد والاٍفساد
- التي جعلت الحكومة المهيمنة تطبع عملاتنقدية بلا وازع ليغتني الحزب وأعضاءه --
فصارت الكتلة النقدية أكبر من قيمة السلع والخدمات - وعندما شعرت بالمأزق - بدأت سياسات تجفيف السيولة عبر الكثير من السياساتالفاشلة ---
وحتما (المواطن) ليس جزء من سياسات الحكومة في المرحلة الراهنة -
فالمهم الآن (عدم اٍشهار اٍفلاس الدولة) - وفي سبيل ذلك جاءت الصدمة - وهي نظرية تعني بالدارجي
(( اٍيجاد أوضاع طارئة وعدم اٍستقرار وتخويف المواطن - لتمرير أي سياسات أخري ))
أشبه بقانون الطواريء والأحكام العرفية ....
** عبد الحفيظ - المبكي ليس فقط هو حالة الاٍنكسار والمسغبة التي نعسشها الآن --
المبكي لحد النحيب هو عندما ينشأ جيل (جديد) في ظل الاٍنكسار !!!!** أسأل الله أن يقتص لنا عاجلا غير آجل

اطمئنك عمار
الجيل دة لا ينكسر بل اشد ضرواة واوسع فهما ووعيا
الكلام فينا نحن الخايفين عليهم

سلامات ابسن وزواره الأكارم ..هاك دي وصلتني من الواتس ..

Quote: كتب صديقيوهو ماشي للريف الشمالي كرريالسلام عليكم يا جماعة / قبل حوالي ساعتين و أنا ماشي في شارع الوادي قبضوني ناس المرور ( الحركة ) و كان في حملة كبيرة جدا جدا ،،، المهم وقفوني و حرروا لي 3 مخالفات بجملة 600 جنية يعني كلو مخالفة بي 200 ،،، طوالي فتحت درج العربية و أديت الضابط شيك ب المبلغ ( 600 جنية ) حسب توجيهات الدولة أنو كل التعامل يكون الكتروني ،، وحسب أزمة السيولة هذه الأيام ،، قام الضابط قال لي يا زول شيكك دا ما بشيلوا أنا داير ( كاااااش ) خليت العربية جنبهم مشيت البنك ب المواصلات أصرف ليهم ال ( 600 ) جنية ناس البنك قالوا لي مافي ( كاااااش ) ،،،، بقت عربتي عند ناس ( المرور ) و قروشي عند ناس ( البنك ) و الاتنين حقاتي ملك ،،، لا ناس المرور دايرين يدوني عربتي لا ناس البنك دايرين يدوني قروشي ،،،، السؤال الكايس اجابتو،،،، الحكومة تمسك أموالنا في البنوك بحجة عدم السيولة و في نفس الوقت تطالبنا بحقها في المخالفات كاااااش ؟؟؟؟،،،،، أرجو أفادتي عن الحل حتي أستطيع أخذ سيارتي و أتوكل ولكم الشكر .

واحد مطموس قال ليهو:
اتوكل على الله واشتغل (رآسة ) أتو فاهمني.

الأخ ود أب سن لك التحية

Quote: ودة برضو غير يضيق علي المواطن ما بحل مشكلة السيولة

لماذا مجاراتهم في وصف الأزمة بأنها أزمة سيولة ؟!!!!
وهي في الحقيقة أزمة ضمير
وأزمة سلوك وأخلاق
أنها عبارة عن تجاوز للإنفاق الحكومي على جسم السلطة المترهل
بما يفوق دخل الدولة وعائدات الدولة فيتم تكملة الناقص من الحاجة
للمال من أموال الشعب الخاصة ومدخراتهم البنكية بتحجيم حركة أموالهم
بعد أن كانت تؤخذ عن طريق طباعة عملة جديدة دون غطاء
وإتقاص قيمة العملة الذي يرتد سلبا على مال الشعب الخاص
كنوع من السرقة غير المباشرة التي تغفل المعارضة عن التحدث فيها
وعدم اعتبارها من الفساد وهي أس وأساس الفساد ورأسه وجسده
المشكلة ليست في وجود فساد وعديمي ضمير ومقسدين فقط
المشكلة كذلك في عدم وجود معارضة حصيفة.
وأنا لا أعنيك أنت يا أخي اللبيب الحصيف ود أب سن
بكلامي هذا فقط استقل الفرصة التي اتحتها أنت مشكورا.

الكيزان شافوا السودنيين متقبلين لمسألة السيطرة
والتحكم في أموالهم في البنوك ولم يحتج أحد ولم يتنرفز أي واحد
وساكتييييييين ولا تسمع لهم حس كأن شي لم يحدث!!!
وهذا أمر يستحيل يقبله شعب في الدنيا غير الشعب السوداني المسالم
المسكين....وهذا ما شجعهم على الاستمرار في سياسات النهب
وكمان محاولة لهف الأموال التي كانت تتحرك عبر الموبايلات.
أمة رضيت بحكم اللئيم فلتصبر على الجحيم الدنيوي.

امة رضيت بحكم اللئيم فلتصبر على الجحيم الدنيوي..
.....
تعليق اوسكار ٥ نجوم يا منتصر...ان امة تقبل مثل هذا الذل والهوان يسهل الهوان عليها...
با رب متى بنفجر الغضب المكتوم....وتشرق شمس الحرية ..متى!!!

فاهمنك يا ملك
في البلد دي الماعندو ضهر بنجلد في بطنو
ويا منتصر علي ذمة الرواة والواتس في مصادرة عنوة للسيولة وتوريدها في البنك بأسم صاحبها . تفتيش عديل كدة
يا امتثال الناس مهجومة والدنيا ماسكاها من يدها البتوجعها . الناس في هم اطفالها وعجزهم عن توفير حد ادني للحياة لهم بمشقة وعنت

بعد خمسة ايام من نشر الخبر في الصحف الرسمية
بنك السودان: لم نصدر قرارًا بتحديد سقف لتحويل الرصيد
/ جريدة الصيحة

Quote: بنك السودان: لم نصدر قرارًا بتحديد سقف لتحويل الرصيد

بلعوا كلامهم؟

خيييير

تاني واحد يجي يقول لي الأسافير غير مؤثرة

مرحب ابوالريش
بلاشك القرار كارثي للمواطن ولتجار الرصيد . وينغص حياة الملايين
خيرا فعل بنك السودان بإلغائه

فى حديث لى مع واحد من ناس سوق تحويل الرصيد ذكر لىشائعه قويه حول تطبيق تحديد قف تحويل الرصيد ب50 فى اليوم ابتداء من اول العام الجديد.
هل بث الاشاعه ونفيها جس نبض حتى موعد اصدار القرار ؟؟؟؟
؟؟؟؟؟؟؟؟