استراحة مع ود النضيف

01:31 PM November, 15 2018

سودانيز اون لاين
ادريس خليفة علم الهدي-الرياض - المملكة العربية السعودية
مكتبتى
رابط مختصر

أصلو الرغيف بقَى مافي شي
دايرلك اربعة في الفطور
و دايرلك اربعة في العشي
ناساً عديل مابتختشي
زادو الضرايب و كلُّ شي
و المويه وقفت ألْفاً احمر ، ضمّه بطّلت المشي
و الكهربا انْ جات العصر،، مابترجا اذّان العشي
******
المطره لو نزلت نقط
شارع الزلط مابيتمشي
و بعوضه ما شايلاهو هم
في بيتنا ضامناهو العَشي

******
شارع الزلط ، فار و انزلط
المطرة لو نزلت نقط
كان بالطرف ،
أو بالوسط
يا زغتَ ، يا زاغ الشبط
و السوق يزيد يوم ما هبط
كان جيبنا مقدود و انشرط
مستشفى مليان بالقطط
و الشارع اتملا باليفط
دي القصّه تعليم مختلط
ولاّ الحكايه قطع رحط؟

الشاعر احمد محمد النضيف

الشاعر احمد محمد صالح النضيف اطال الله عمره والبسه ثوب الصحه والعافيه
ينحدر من قرية ابورنات مركز مروى عمل بالسكه الحديد بمدينة كوستى حتى
عصفت به رياح الانقاذ الهوجاء
تغنى له الكثيرين من من الطنابره المرحوم عثمان اليمنى والراحل عبود تبورى
والفنان عبد الرحمن الكرو

إن بعضَ الناس همها أن تجوط
وهي لا تعرفْ مكاناً للهبوط
وهي لا تشعرْ بهذا الأخطبوط
المدارس كلّها ،،
فاقدة الحنوط
و الفصول الآيله كلّها للسقوط
و برغمِ أحوال المعايش و الضغوط
هناك إنساناً بيعملْ غير شروط
أو تدرون بهذا أعني من؟؟
إنه الاستاذ في هذا الزمن !
***
إنه يعملُ من أجلِ الوطن
إنه يعملْ و يبحث عن سكن
إنه الشخص الوحيد المؤتمن
إنه يعمل بي ثمن الثمن !
جيبو فارغ حتى من حقّ اللبن
إنه مجهودو لن يذهب سُدىً
أو تدرون بهذا أعني من؟؟
إنه الأستاذ في هذا الزمن
***
إن بعض الناسِ همّهم القِرِشْ
و عماره ، و كريسيدا و فرِش
و جناين و طوابق فوقا دِش
و عبايه ،، و عصايه،، و كرش
تلقى ساعة الفارغة دايما يتنفش

و لما تنظر للمدارس تندهش
تلقى بعض الطلبة قاعدين فوق برش
و الفصول في كلِّ يومٍ تنكمش
تلقى واحد كلّ يوم ياكل تبش
وهو في الطرقات يمشي و يندرش
أو تدرون بهذا أعني من؟؟
إنه الأستاذ في هذا الزمن
***
إن بعض الناس همها أن تلِمْ
من حلالٍ أو حرامٍ لا يهم
المهم في عرفها الشيك يتختم
إن شاالله طاير ولاّ طالع في النجم
وهي ابداً لا تقيّم للعلم
و هي لا تدري بمأساة المعلم
وهو يفطرْ فول بشكلٍ منتظم
إن وجد فعشاهو بي نفس الفلم
قد يحلّي بباسطة ، لكن في الحلم
أو تدرون بهذا أعني من؟؟
إنه الاستاذ في هذا الزمن
***
إنّ بعضَ الناسِ همّهمْ البنوكْ
وهي لا تعرفْ قواعد للسلوك
تلقى موبايل يرن من غير سلوك
في المقابر و الجوامع يشغلوك
في المآتم تقطع الجرّة و تلوك
إن دعوت لمجلس الآباءِ أبداً لا يجوك
ما القِصيّر إنت كيفن يسمعوك
هناك إنساناً بيجمع في دقيقٍ فوق شوك
يومَ ريحٍ هابّة من جيهة الملوك
أو تدرون بهذا أعني من؟؟
إنه الأستاذ في هذا الزمن
***
إن بعض الناسِ همّهم القروش
و العبايات و العصايات و الكروش
تلقَى متصدّر مواضيعاً فشوش
و المدارس جملةً ما فيها حوش
وهي مرتع للبهايم و الدحوش
هناك إنساناً بياكل يومي بوش
وهو في الطرقات يمشي و يدوش
أو تدرون بهذا أعني من؟؟
إنه الأستاذ في هذا الزمن
***
إنّ بعض الناس همهم الوعود
وهي بي حقْ الله أبداً لا تجود
وهي قايله الدنيا داراً للخلود
همها الأسعار تكون دايماً صعود
و ما يهمّو ان شاالله تتحرق الحدود
ان سجن في شيكة ضامن للعمود
التقول دي بقية جات من قومِ هود
و تلقى واحد جيبو مليان بالقدود
قصّة ما محتاجه مني انا لي شهود
أو تدرون بهذا أعني من
إنه الأستاذ في هذا الزمن
***
____________________

سلام ادريس الرجل الظريف
اب دما خفيف
دايما حريف
ولسانك عفيف
بس شن جاب
الرغيف
مع ود النضيف
له منى اجمل التحايا
مع عتاب خفيف
لماذا لم يكتب شعر
لطيف
فى الجنس اللطيف
دايما مدخل الناس
جو الصريف
مع ذكريات اكل
عليها الدهر وشرب
من زمن ناس
على عبداللطيف
المهم ما علينا
نرحب بادريس
وشاعره ودالنضيف
بس الدنيا ما بتدى
حريف
لكن سمح الصبر
الكل سند ترسو
منتظر الخريف

تحياتى
لك يا غالى
صديق مهدى على