الموضوع قديم اتنشر هنا فى المنبر فى شهر مايو 2013م
اتذكرته اليوم وانا بسمع المطرب السمح غبد القادر سالم فى قناة سودانية 24 ذكر انه فى زيارة فنية لإسبانيا، اصر اهل الاندلس بغد ما استمتعو ب مردوم البقارة، اصرو على انه المردوم امتداد ل الفلامنكو الاندلسى، وانهم فتشو و بحثو و وجدو انه ربما يكون مشى مع الاقوام الهاجرت جنوبا بعد نهاية الحكم العربى فى الاندلس، و ربما يكون صحيح اذا اخدنا فى الاعتبار امكانية تلاقح الثقافات او التاثير والتاثر، او ربما يكون ابداع فنى سودانى اصيل كله وارد، وده مجال و مبحث غنى و ثر و جميل للباحثين و المختصين والمهتمين
فى الموضوع المذكور والمعنى، كانت الرؤية مجرد احساس جمالى ومقارنة بين ابداعين انسانيين جميلين، لغاية ما حرك كلام عبد القادر سالم مياه الاحساس مره تانية
سلام الغرة يا اهل الديار البره بيضا الرملة منشره وداك الصيد فى بطن الوادى انزره
دى مقدمة رمية كردفانية للمطرب الجميل
حامدين بقادى
************************************
دائما، وليه ما عارف، بتخيل لى إنه الشى الوحيد البخلى الملائكة والجن،اللتنين مع بعض، بخليهم يبطلو شغلهم ويقعدو يتفرجو ويستمتعو ويصفقو كمان بحصل لما يكون فى مردوم شغال وصفين من الشباب والشابات برقصو، والعجب كمان كان الدنيا بقت خريف، الواطا فارشه ليهم سباتات خدرا ونديانه مضفورة بى قش وشوقاره ونجيله، والسحاب واقف بعيد فوق ليهم طربان
والحالة التانية برضو لما شلة اندلسيين يكونو قاعدين تحت ضوء قمر صبى وتريان، والبنات لابسات الفساتين الزى الورود ديك، واحد أحمر وواحد اصفر وواحد ازرق، ويكون فى واحد شكله غجرى غجرى بصدح ويغنى، ويدقو فى الصفيحة البكون قاعد فوق ليها العازف ديك، والصفقة تصحى الطير النام من بدرى، بصحى زهجان فى الأول، لكين تانى بنسى النوم ويقعد يلولح فى روسيهو ويتمايل من الطرب الغريبة بعض من غناهم لامن تسمعه يتوارى ليك زى الزول القاعد يدوبى فى ضل فى سوق تمبول فى البطانة، ولامن تسأل ليك واحد من اهالى الأندلسيه عن الايقاع والرقيص والغناء ده، بقول ليك انه اصلا جاهم من باقى الحاجات الفاتوها ليهم الرومان من ايام يوليوس قيصر لامن كان قائد الرومان فى الجنوب الاسبانى، وبعد داك دخلت فيه شويه بهارات عربية وامازيغية نتيجة قعاد الجماعة ديل سبعة ولا تمانية قرون عددا، وفى الآخر مرقو ساى، اباطن والنجم، دى الحاجة التانية
التالتة كمان دبكة الشوام كان فى لبنان ولا سوريا ولا فى فلسطين حاجة فيها سحر ما عادى ابدا والله، والغريبة برضها بتتعمل تقريبا بى نفس الطريقة مع اختلاف بسيط فى الحركات صفين من الشباب من الجنسين واغنيات شجية جدا وايقاع جميل، وغالبا تكون شى أصيل من ثقافة وتراث وحياة المنطقة كلها، بما فيها الأثر التركمانى والكردى وبقية الشعوب والإثنيات القاعدة فى المنطقة، ويمكن كمان تكون الجذور ابعد من كده كتير لى ورا وتصل لأقوام وشعوب السريانيين والفينيقيين والكنعانيين
وعندى احساس انه العوالم التلاتة الساحرة دى، وعلى الرغم من بعد كل واحد فيها عن التانى، جغرافيا أو مكانيا، إنه فى رابط بينها
يمكن الفلامنكو فى اسبانيا وفى الاندلس تحديدا يكون نتاج تحوير لى ايقاع واداء حركى راقص أو كيورغرافى جاهم من ايام جية العرب هناك او من الرومان زى ما هم بقولو، خصوصا انه جزء كبير جدا من العرب المشو مع ناس طارق وموسى كانو من الشام اصلا بعدها بكون الفن ده تطور واخد اشكال وابعاد جديدة لكين بنفس الروح الأصيلة
لكين شنو البلم المردوم مع الفلامنكو والدبكة؟
يمكن يكون توارد وجدان، على وزن توارد خواطر وليه ما يكون فيهو مكون اصيل برضه وتأثير قوى من الفلامنكو، بحكم انه معظم العرب الهاجرو للسودان جو من شمال وشمال غرب افريقيا ومعظمهم لو ما كانو كلهم، كانو من المجموعات الرجعت افريقيا بعد سقوط الأندلس زى المجموعات العربية الجات واستقرت مثلا فى وسط السودان وفى سهول وبوادى ووديان كردفان
لازم يكون فى رابط انا متأكد حتى لو كان فى الحد الأدنى، وهو الرابط الوجدانى الجمالى الإنسانى الخلاهم كلهم يكونو ناس جميلين ومبدعين وسمحين
Post: #3 Title: Re: المردوم، الفلامنكو و الدبكه Author: هاشم الحسن Date: 09-22-2018, 04:04 PM Parent: #2
شكرا يا مطر على الرحلة الفنية الطروب.. وشكرا على المعنى الفات والجاي.. هاك ديل (فى الحد الأدنى، وهو الرابط الوجدانى الجمالى الإنسانى) مردوم... <