الكلاكلة، الجغرافيا المتكاملة، حكاوي سانتوس المستهبل...

08:31 PM September, 05 2018

سودانيز اون لاين
اندرو كوات-الولايات المتحدة- ولاية ايوا
مكتبتى
رابط مختصر

الكلاكلة،
الجغرافيا المتكاملة،
حكاوي سانتوس المستهبل...

في ربيع العمر، كنا شلة متجانسة تجمعها التناقضات، يعني كل زول شايت في اتجاه مختلف، لكن لحكمة ما، غالبآ بتنتهي المسارات في نفس المكان. الهموم كانت في غاية البساطة، قروش مواصلات، اتجاه واحد، الرجعة طبعا علي الخالق 😂😂، و وجبة (فتّة) جماعية في نهاية اليوم، و لو سرحت بنفسك كتير، طموحك ما بيتجاوز ملابس الكريسماس و قشرة راس السنة.
المهم، في الفترة داك، الشلة كانت مهمومة بتلميع افراد المجموعة و تحسين فرص الحنك مع الجماعة، فاهمني 😉😉، و للامانة و التاريخ، الشلة كانت موفقة جدآ في تذليل الصعاب و تقديم استراتيجية متقدمة جدآ لان المراجع كانت متوفرة، ناس روايات زهور، مجلة هو و هي، و ما تيسر من كلام ناس عنترة و قيس و شوية من حلقات حلمنتيش، المهم، الصورة اتضحتْ، صاح؟ 😊😊😊
عمومآ، الشلة كانت متجدعة للآخر الي ان ظهر اول تحدي حقيقي. التحدي ده كان واحد شاب اكبر مننا يمكن بتمانية سنوات، و كان بيتخلف عن الشلة في حاجة محورية جدآ شكلت نقطة تحول كبير في توازن القوي، من الآخر كده، الزول ده كان شغال في محل حلويات، تحديدا، في التقاطع بتاع شارع اللفة الرئيسي المتجه للدخينات و جبل أولياء و الشارع الماشي تجاه الكلاكلة صنقعت 😕😕😕.
التداعيات طبعا، انو الزول ده كان بيلبس آخر جنصصة، ما عارف بنطلون جينز كونز Conz, ليفايز Levi's، اديداس الكان زمان سموها شوس Shoes، ايام اللخمة 😂😂😂، لينو اباري، اي حاجة ممكن تتخيلها في الزمن داك، كانت متوفرة عند الزول ده، كويس.
يعني، من الآخر كده، بالنسبة للشلة، كان كارثة حقيقية 😂😂😂، لانو سانتوس ده كان زول بتاع استعراض لحد بعيد، يعني لما يكون قاشر تمام، حتي في الكنيسة ما بيقعد تحت، حتي ولو المقاعد فاضية، شايف كيف 👌👌👌 يعني لزوم ناس فلانة يعرفنْ انو مسجل حضور...
المهم، عشان نتداري الموقف، الشلة رفعتْ شعارات الذود عن العرض و الارض، و عملنا استراتيجية جديدة، و اتفقنا نصاحب سانتوس، و ندخله في شلتنا، و نقدمه للناس كصديق، عشان نقطع عليه الدرب، كمرحلة اولي، شايف كيف 😂😂😂😂، بعد داك نرفع مستوي الحكي عشان نغيب بيه الوعي المادي لناس (ليلي)، بالنسبة للمسطحين و عايزين يعرفوا، ليلي ده أٌٌسْتٌخْدِمْ مجازآ😊😊، المهم، الاستراتيجية خلقت توازن مؤقت في القوي و قدرنا نكتف سانتوس لفترة. لكن الزول ده طلع شفت و مفتح، و قام اتجاوز اللبس والشياكة و مشي طوالي للاسلحة المفروض تكون محظورة اصلآ في مثل هذه الصراعات، تعرفوا الزول عمل شنو؟ عايزين تعرفوا الزول ده عوقنا بالضربة القاضية كيف؟
سانتوس ادخل الحلويات لحلقة الصراع، و بحكم انو كان شغال في فرن باسطة، الزول ده بقي يوزع بلح شام، بسبوسة، و مش عارف حلويات شامية، باسطة ده خليه ساكت، و عشان يتاكد من انو دفن الشلة، انت عارف الزول عمل شنو؟ كان بيوزع بالكيلو، تصدق؟
من هناك، الحلف انهار، و بقية القوي المهزومة تبعثرتْ بحثآ عن مرتع آمن من سطوة الباسطة و الحلويات الشامية 😂😂😂😂...
مش قلت ليكم الكلاكلة جغرافيا مجنونة 😕😕
علي فكرة، لو في زول عارف سانتوس ده وين، قول ليه اندرو عازمك باسطة 😈😈😈

اندرو سلام ..

Quote: و بحكم انو كان شغال في فرن باسطة، الزول ده بقي يوزع بلح شام، بسبوسة، و مش عارف حلويات شامية، باسطة ده خليه ساكت

سانتوس بيكون هسي مؤتر وطني عن جدارة ...

متاابعين يا مان كب الحنك

الاخ الحبيب اندو كوات .. لك تحياتى و معزتى ..

الحكى بتاعك ده .. زى البساطة باللبن و العسل .. واصل و لا تحرمنا منه ..

اخوك الطيب

باسطة وبساطة 😊

الكلاكلة،
الجغرافيا المتكاملة...
حكايات بنطلون الخيمة ..
و مَنْ (القشرة) مَا قَتّلْ 😊😊

في الزمن داك، قصدي الزمن الغابر، الكلاكلة امتازت بتصنيفات غريبة في الوسط بتاعنا. كان في مجموعة المدارس، و ديل كانوا مهمومين بالدراسة و إبراز عضلاتهم (الفكرية) كمدخل للجنس المسمي جزافآ باللطيف 😂😂😂، المجموعة التانية كانوا ناس شياكة و (جنصصة)، وده طبعا كان كفيل بانه يجيب ليهم (الحمام). المجموعة التالتة كانوا ناس كورة قدم، ديل طبعا حتي لما تكونوا قاعدين في محل عزاء، بيصروا ليك يتكلموا عن هدف ماردونا في المكسيك 😂😂😂، المجموعة الرابعة ديل ناس العضلات، و ديل طبعا لازم يخلقوا مشكلة من مافي في الحفلات عشان يكونوا حديث اليوم التالي...
اها، في ظل التناقضات ديل، الطريقة الوحيدة للسلامة الشخصية انك تكون دبلوماسي جيد و تبني علاقات قوية خارج مجموعتك، خاصة مع ناس العضلات، شايف كيف 😉😉😉
واحد من اظرف الناس، كان من مجموعة الشياكة و الاناقة المفرطة، لكن كان بيحب يلف مع مجموعتنا، و ده طبعا كان بيعود ليه بامتيازات كبيرة، اولها انو كان بيتفوق علينا في الشياكة، و علي كده هو بيخطف انتباه الناس (التانية) طوالي، حريف مش 😊😊😊
علي فكرة الشياكة ذاتها كانت فن ابتكار اللاممكن، مثلآ الزمن داك، الجينز كان غالي شديد، يعني اتنين منهن ممكن يكملوا ليك مشروع عرس عديل كده ههههههه، فعشان كده الناس المفتحة ابتكرت فكرة بنطلون الخيمة، اي والله الخيمة الواحده دي كانت بتتخيط بنطلون و عمرها الافتراضي كان اطول من (الموت تخلي) زاتو 😂😂😂، للناس المستغربة من الكلام ده، بنطلون الخيمة طلع في نفس الوقت لما الناس كانت بتضرب بنطلون الجينز بالاورنيش،
الله واحد،
و لو ما مصدقني، اسأل قريبك من الكلاكلة 😉😉
المهم، في واحد من امسيات الخميس الكاربة، كان في حفلة في ابو آدم، مربع واحد، يعني حفيلة صغيرة بتاع نجاح، اتطقطقت سريآ عشان نتفادي مجموعة العضلات، و ناس الجنصصة المفرطة، طبعا من مبدأ الحفاظ علي حظوظ التنافس الشريف😂😂😂، لكن للاسف واحد من ناس الاناقة نقش الفيلم و اتلصق ورانا و ما قدرنا نزحلقه فاشترطنا عليه ما يكلم بقية مجموعته.
المهم، علي الساعة سبعة الزول جانا قاشر ببنطلون خيمة مخيط دبل (كمر) و لابس عليه قاشين (يعني حزامين للحناكيش)، و شاكي بقميص كاروهات، و جزمة دوغلاس، الفيها حديد في المقدمة، يعني من الآخر، الزول بوظها لينا قبال ما نصل الحفلة 😕😕😕،
المهم وصلنا الحفلة و قعدونا في راوند محترم فيها طليعة محترمه من الناس الحلوين، لكن صاحبنا بتاع بنطلون الخيمة، مع اصراره علي الوقوف الغير مبرر و قطع الميدان ذهابا و إيابآ، خطف الأضواء و قرب يبوظ المخطط الاستراتيجي للحفلة 😕😕
الا انو ربنا، نصير الغلابة و المستضعفين، جاب لينا حلاوة مطرة تقيلة علي الساعة واحدة، يعني مباشرة بعدما الجلاكين اتخارجوا و بوظ الحفلة 👌👌👌
المهم، رحلة العودة للحلة كانت ظريفة جدآ لانو القشرة بقت مشكلة لصاحبنا.
اول حاجة الخيمة اخذت كفايتها من الموية و فاضت انهارآ 😂😂😂، تاني حاجة جزمة الدوغلاس شال ليها طن بتاع طين، و فوق ده كلو بوليس المرور سجل حضور و احنا يادوب لسع في صحراء بتاع ابو آدم، شايف المآسي كيف 😂😂😂،
احنا طبعا كنا لابسين بناطلين (طوكيو) بتاع الغلابة و قادرين نجري، لكن صاحبنا طبعا ما قدر يجري عشره امتار 😂😂😂 فاضطر يدخل في المجري جنب الردمية بتاع الكلاكلة الشرق 😂😂😂
احنا وصلنا البيت و نمنا و تاني يوم سمعنا انو صاحبنا اضطر يخلو طرفه من الخيمة و الدوغلاس و خلاهم في الخور عشان يقدر يزوغ من ناس المرور 😂😂😂😂
ربك قدير رحيم كثير العذاب👌👌👌
الكلاكلة، ليكِ وحشة والله

اعاتب نفسي اني ضيعت 4 يوم تقريبا
و انا لم امتع نفسي بهذا الجمال...
كوات الجميل.. نقاءك يعطي بعد جمالي لهذا السرد الرائع..
والف شكر ان جعلتنا ندلف لايام شبابكم..
و بالتالي لبعض من المفاهيم و الرؤي الشبابية
جميل انت يا كوات...
و زدت كلاكلتنا جمالا ع جمال
.... لا تتوقف و استرسل فالشوق مع كلمة يزداد
مودتي و تقديري

للِذِكْريّاتِ قٌصّورٌ لا تَعْرِفٌ الضّجَر


في ليّلةِ
رَقّصَ البٌؤسُ عَلي أنْغَامِ المٌوتِ
مَمشٌوقٌ الوَتّر؛
أسَجٌو هُنَا مُسْتَجْدِّيآ
امَلآ يَتّيِمآ
مِنْ غيّاهِبِ الغيّبِ مٌوْسٌومٌ القَدّر؛
اسَهُدْ وَحِيّدآ،
مُشْدٌوهَآ،
سَجِّينآ للِقَمّر؛
فاخالكِ تَرَكِضّينَّ للٌقيّتي،
و يَعانِّقٌ رٌوحِي بَسْمَةِ
ضَلّتْ الطَرِيقَ بَيّنَ شُعّيباتِ العَدْم.
مَازِلتٌ ازْكِرٌ لٌطْفِكِ
و النِيلُ يُداعِّبُ خَصّركِ،
كَمٌراهَقِ مَشْغُوفِ
يَسْتَرِقُ القٌبَلْ؛
فتَهزِمينَّ شَبّابِه بِحِيّائكِ ؛
فيَنْسَابٌ خَلْفُكِ هَادِئآ،
هَرّمَآ؛ تَسْبُقه العِبّرْ؛
وَ تَعٌودِينَّ، أنْتِ،
حبيبتي،
في كَامِلِ أبْهَكِ و بَهَائكِ،
حسناء،
مَمْجٌوجَة السِّحْر،
و أعَودُ انا للغِلاَلِ طَائعآ
فالشٌوق سَجانٌ،
و للزِكْريّاتِ قٌصّورِ
لا تَعْرِفٌ الضَجّرْ


🌹🌹
الكلاكلة، من وحي ليالي جوبا

اندرو .ك. داو

وللذكريات قصور لا تعرف الضجر .. الله عليك!

Thank you!

هَزِائِمٌ بِطَعّمِ الإنْتِصّار

أحَبِسٌ أنْفَاسّي،
و أتَوّاري، إنْهِزّامَآ،
خَلْفِ رَايّاتِ التَصَّوفِ و الوِقَّار
فكيّفَ بيَّ أنْ أكونْ؟
والحَدّائِق لمْ تَعٌدْ تِلكَّ المَدّائنٌ الثّائِرة
و كيفَ بيَّ أنْ أكونَّ؟
ودٌوْنّكَ اليَراعٌ؛
وقَدْ إغْتّالَ الضَمِّيرَ؛
ثٌمَ إخْتّارَ التَمَيُّعَ و التَمْدٌّدَ في القٌصٌّورِ الآمِنّة
و كيفَ بيَّ أنْ اكونّ؟َ
و هَاهٌوَّ َالرٌوحٌ يَنْسَّابٌ
هَارِبّآ مِنْ الجَسّد،
ثُمَّ يَرْتَّادٌ الحَضِيضَ و المَلاَهِي الآجِنَّة؛
أحَبِسٌ أنْفَاسِي،
و أتّوارَي خجلا،
خَلفِ جٌدْرَانِ التَزّهٌد و الإنْدِثّار،
و كيفَ لآ؟
فالسْتٌم المَنّاهِلَ، و نَحنُ المِيّاهٌ الآسِنّة؟
أحْبِسٌ أنفَاسّي؛
ثُم أرْتَحِلٌ هَانِئآ، فللضَمِّيِر
بَرِيقُ مَعّركةِ؛
هَزّائِمٌها، بِطَعّمِ الإنْتِصّار

السجُون الاخْتِيارِيَة ..

١
وشَمْسُ المَغاربْ تَتْوارَي خْلفِ سَكِينة الليل؛
تَجلس بِهدوءِ عَلى ناصَية الحْياة،
تتأمل في ضَجِيجِ الأشْياء بَحْثآ عَنْ مفْتاحِ للِتَفاصٍيلِ الغَامِضة،
تَشْرِد بِبالِها لٍبُرْهَةِ،
ثم تَتْوشحُ بضوء القْمَر الذي يَخْتَرق عَتْمَةِ غرفْتِها؛
تَعَانِقُ كَلِماتِه بِقوة،
لِتَعِيدُ إنْتَاجَ جغْرَافْيا الموَاقِيتْ فِي قَوَالِبِ الوِجْدَان،
ولتُطْلِق لأنوثتها الحَبِيسَة العنان..

٢
يَا ليْتَ العَوَالِم تَخْتَفي مِنْ حَوْلِنَا،
بِكلِ أحْزانِهَا،
بِكُلِ خِداعهَا؛
ولا تَبْقَى مِنْهَا إلا حروف كَلِمَاتكِ،
لِتِتبْعثَر طَلِيقة الفوضَى،
عَصية علي الكِتْمَانِ؛
لاخُطَ بِهَا عنوَانَآ لِخَرَائطي المترَهلة،
ولأُرَتِبَ بِهَا تَفَاصِيلَ ذاتي المتناثِر…

٣
أهْرَبُ مَنْ رَتابَةِ الحَياةِ،
لأعَصِف بَذَاتي فِي رِمَالِ وِجْدَانَية متْحَرِكَة؛
وأتَحررِ مَنْ التَقيدِ،
لِكي أجِد نَفْسِي جَاثيآ لِمِحْرَاب تَشَابَه عَليهِ الآلِهة؛
أخَوض مَعارِكْ الحَياةَ الآنْية،
لاتحسس طَعمَ النَصرِ فِي دَهالِيْزِ الهَزائمِ القاصِية؛
واهفُ نَحَو (أطْلالَ) الغَد،
لأحَولَ ذكْرِياتِ اليومِ إلي وَاحَةِ مِنْ السجونِ الاخْتِيارِية..

انت يا كوات كنت وين الزمن دا كووووولو يازول ياجميل؟؟؟؟

معقولة من سنة ستة مانشوفك ولا نسمع بك .

صباح جميل بطعم الباسطة في اللفة
بس ياحبيبنا المحل ده كان عندو حليب مقنن ابن ستين كب القزازة فاضية ولا ملانة مابتعرفا
قتا ليا زولك رمى الخيمة رمية اللمبي لي كلاكلتنا

Thanks buddy!

الكلاكلة..
الجغرافيا المتكاملة..
من الحب ما ذلَّ و هان..

عدنا بعد غيبة، لحكاوي الكلاكلة، البقعة المتكاملة بروعتها و ذكرياتها العصية علي النسيان...
المهم، الكلاكلة طبعا كانت مرتع لكل الوان الطيف، الطيبان، الخيبان، الشيشان، و الجدعان، الجدعان ده طبعا بلغة اهلنا، ابناء النيل، في قاهرة المعز..
في ظل التنوع ده، كانت بتتخلق حكاوي و قصص رائعة كروعة الكلاكلة..
المهم، يوميها، قصدي يوم الحدث، انا و ود عمي الملقب بالمجسم، وواحد تاني كده متحسس من قصص الطفولة ديل 😂 مشينا نعمل كمين للحبيبة، ده طبعا بعدما باءت كل البعثات الدبلوماسية في تقريب اوجه النظر بيننا و بين (الجٌلك) بتاع الحبيبة؛ الزول ده ما احترامنا ليه لكن عمل تصعيد غير مبرر و قام طوالي بخلق منطقة مقفولة و محظورة برا و جوا شمل الوكر (البيت) و دكان الفور و ذريبة الفحم، يعني ذي حركات no fly zone بتاع الامريكان ديلاك شايف كيف 😣😣..
المهم، احنا ما خلينا اي حيلة، شفع الحلة المجرمين، حولونا لقضية استثمار، يعني اشترينا ليهم حلويات دكان زكريا (شَتْ) و الشفوت (المفتحين) يقوموا يرفعوا سقف المطالب لربع كيلو بتاع باسطة 😂😂 و احنا الزمن داك طبعا كنا خلاص عملنا فض شراكة مع سانتوس بتاع فرن الباسطة لانو اتجاوز حدود التفويض حقه هههههه.، يعني ما كان في طريقة لانو ربع الكيلو قروشها الزمن داك كان ممكن يجيب ليك متر و ربع قطعة بنطلون من سوق قانص، هناك في العشش..
المهم، في اليوم الخامس، قمنا فكرنا في خطة جهنمية، و قلنا طالما البيت ده زاتو مصنع كرستال، كرستال بلح للمسطحين دي العرقي الواحد ده، قلنا نخش مع الزبائن بالامسيات و نعمل فيها رايحين و نخش اتجاه المطبخ بهناك، عسي و لعل يعني نطلع بشوفة عين ساي، شايف التعاسة كيف 😏😏..
المهم، مع الساعة ٧؛ الواطة خلاص مغربت، لبسنا الزي الرسمي للزبائن، الزمن داك كان جلابية و عراقي، هسي طبعا اتغير لعضوية المؤتمر الوطني 😂😂 روح رياضية يا اخوات نسيبة 😊😊
المهم، جاءت ساعة الحسم، لملمنا باقي القلب المبعثر بين حب الحبيبة و الخوف من سطوة الجٌلك و عملنا منها عضلة محترمة و خشينا مع زحمة الزبائن 😊😊
اها، دخلنا، و طوالي استلمونا لجنة الاستقبال ووجهونا لناحية الاستعلامات ل كانت عبارة عن راكوبة محترمة كده..
الخطة طبعا كان انو نعمل انتشار سريع، هوووي ما دعم سريع بتاع حميدتي، نعمل انتشار سريع ذي بتاع ناس الديش ديلاك_ الديش ده كان اسم الجيش ايام الصاقعة كانوا بسموها طرنقاع_ و نعمل وهمة نخش بيها المنطقة الواقع تحت الحظر الجوي/بري/و مائي بتاع الجلك..
لكن لسؤ حظنا طوالي بتاع الاستعلامات استلمتنا و نادت مديرة المبيعات و ده كانت بداية الورطة...
اول حاجة ما كان معانا قروش اصلا عشان علي الاقل نتظاهر باننا زبائن جد جد 😂😂
تاني حاجة و الاكعب من كده انو صاحبة الشأن/مديرة المبيعات طلعت قريبتنا 😱😱
طوالي نادتني باسم امي، يا (كوات ابوك) عايز شنو هنا، و لابس كده ليه، و من متين بقيت تسكر؟
ياخي جنس مهزلة 😁😁 لا قادرين نقول بنشرب و لا قادرين ننكر و نحكي السبب الحقيقي من دخولنا 😣😣
ياخي اللحظة داك اتمنيت القيامة تقوم عشان بس نطلع من الورطة داك، اقلاها ربنا عارف حقيقة الفيلم 😂😂😂
المهم، ما حاقول ليكم طلعنا منها كيف ههههه ده حتكون ونسة يوم تاني...

ود الكلاكلة...

ياسلام يا كوات هذا الحُب يكفي ...
حُرمتم وحُرِمنا ...
أنا ما بفسر وإنت ما تقصر ...
طبعاً يا كوات دائماً أهل الأم بكون احب ليهم مناداتك باسم أُمك وأهل الأب هم من ينادوك باسم ابوك ...
لذا ود أمو دائماً الذي يتربي عند الخيلان....
واصل ما قصدت غلا مداعبتك ...
:
:
:
:
:
مع التحيات لله الزاكيات

Thank you Mr. Hussein
it is my pleasure..
Kuot

واصل يا رعاك الله من هذا الحكي الجميل
بجي يوم ترجع الكلاكلة معززا مكرما وسيد بلد

فوق