Post: #1
Title: المغتربين تعالوا هنا ..الليلة الدق
Author: Adam Youssif
Date: 09-04-2018, 02:02 PM
02:02 PM September, 04 2018 سودانيز اون لاين
Adam Youssif-Jeddah, Saudi Arabia
مكتبتى
رابط مختصر منقول للأمانة أخونا ✍ ميسر جمال الأنصاري
=====================
العزوبية حارة وحارة وحارة ولازم نعرس باييييي طريقة وووو..
طيب اصبر حبة ..
لالا ما بقدر وموية زمزم مباركة..
والبلح قام بينا والجداد طار بينا ..والحنيذ دا ماعندكم..
وتقوووم يالمغترب تقنعنا وتقنع أهل الزوجة ..
وتتزوج وتقعد مع زوجتك أيام أو شهور وبعدها ترجع الغربة ..وتسكت سكتة الشيطان الأخرس..
معليش يعني الكلمة حارة..
لكن وين العزوبية ؟
ووين الفتن الكنت بتشكي منها ؟
ووين زمزم..؟
والجداد والبلح؟
ليه سكت..؟
ولا عشان ما يقولوا ليك غلطان ؟
ياخ غلطااااااااااااااااان ومسؤول عن غيرك كمان..
زمان كنت مسؤول عن نفسك ..
لكن هسي مسؤول عن بت الناس دي ياخ..
زوجتك الصغيرة ..الماشربت (الجبنة ) الا في بيتك..
والجبنة رمّاية ..وانت ما عايز يحكو ليك طبعا..
لانك عارف..
وعارف إنو الهجران دا بمثابة عقوبة للمرأة..
يعني لو نشزت بأدبوها بالهجر ..والجلد..
يعني الحكاية دي زي الجلد بالسوط..
ويووومي المسكينة تعاني العقوبة الجسدية والعاطفية ..دا غير النكد النكد النكد الاجتماعي والكلام الفارغ البتسمعو..وراجلك جاي شهر كم ؟
والفتن الفتن الفتن الفتن الفتن الفتن الفتن ياخ..
فالكلام كتير والملخص :
١.يالمغترب اتق الله..وشد حيلك..ياتسوق زوجتك..او تجي تندرش في بلدك ورزقك رزقك ياموحد..ولا ما موحد؟
ولو هي ممكن تشتغل وتساعدك سوقها تشتغل معاك ياخ.. لما ربنا يفتحها عليك..لكن بارم شنبك ساي في الفاضي ومانعها من الشغل على اي اساس طيب؟
٢.يا زوجة ..اصبري واحتسبي الاجر..وخليك صريحة في المطالبة بحقك..وارضي بالقليل ..
٣.أهل الزوجة مبروك عليكم عذاب البنية عشان ابيتو بيها لود خالها الخريج عشان سايق ركشة واخواتو كتار..ودا جزاء النظرة المادية..دا اذا كان في مادة أصلا....دا نموذج فقط.
قالوا ليكم دينه وخلقه..الفيزا الدخلها شنو هنا ؟؟؟
٤.أهل الزوج..انجضوا وقعدوا ولدكم في علبو ..ووروهو المسؤولية يعني شنو..
٥.البنات الما اتزوجو لسة ..كيف تمام ؟
٦.المغتربين السناقل .. السمبرية لو ما بنت ليها (عش) ما (بتبيض)..يعني مسؤولية..وماااااااا إلا سراميك..
..
..معليش لكن موجوع..
وبعرف واحدة زوجها اتزوجها وقعد معاها اسبوع واحد وهسي ليهو سنتين ما رجع..
وواحد قعد شهر العسل..وبعد انتهى العسل اداها حق الزيت والبصل..وسنة ما رجع..
نسخة للجماعة الكبار برضو..شايفكم لابدين..
البنوت كبرن ياحاج وعندهن فيس وواتس وزملاء في الجامعة وفي حتة اسمها شارع النيل وفي معسكرات وخرشة وحبوب اثارة ..وانت زمااان خليت البلد و شاكلت حبوبتهن عشان كانت دايرة (تطهرن) ..فشنو خليك قدر مسؤوليتك..يعني بس ما تكون رجالتك مع الداية والحاجة..
وزوجتك كبرت لكن اصبحت (خالة) لاصحاب ولدك ..والخالة مصلح أسأل منو الشباب بفهموك ياحاج فقوش..
معليش بس بطني كانت طامة والليمون كمل..
وشفعك كبرو ولو شحدتهم ليمونة مككن يسبو لي الدين عشان كدة ما كلمتهتم..وقلت أحسن (استفرغ) ولا يسب الدين...
تحياتي لكل مغترب أولادو قدامو..هنا أو هناك..
تحياتي لكل من ترك الغربة لأجل أولاده..
تحياتي للصابرات وحافظات الأمانة ..الحساب قدام وعند الله ما بضيع حق..ودي اسمها الحقوق الزوجية..
تحياتي لكل حامل أمانة..
واعفو لي .. ودا زي ما بقولوا أسمع
كلام_الببكيك
منقول للأمانة =✍ميسر جمال الأنصاري
|
Post: #2
Title: Re: المغتربين تعالوا هنا ..الليلة الدق
Author: معاوية الزبير
Date: 09-04-2018, 04:24 PM
Parent: #1
سلام يا ادم
الكلام ده بنسمع فيهو من السبعينات و أهو الناس قاعدة تعرس و تنبسط
|
Post: #3
Title: Re: المغتربين تعالوا هنا ..الليلة الدق
Author: Adam Youssif
Date: 09-05-2018, 08:30 AM
Parent: #2
معاوية الزبير
سلاااام
Quote: الكلام ده بنسمع فيهو من السبعينات و أهو الناس قاعدة تعرس و تنبسط
|
المغتربين زاااااتم بعد دة خلاص راجعين
|
|