Post: #1
Title: نفس الراجل للمرأة متل الموية للخضار
Author: إسحاق بله الأمين
Date: 09-03-2018, 02:21 PM
02:21 PM September, 03 2018 سودانيز اون لاين
إسحاق بله الأمين-KSA
مكتبتى
رابط مختصر ليه نحنا السودانيين ما عندنا "رومانسية' في التعامل مع زوجاتنا وجافين في في أسلوب تربية أبنائنا وبناتنا؟
حكى لي صاحبي "الضمن"، وهو زول حكاي:
قالي لي : عندي صاحبي مغترب طول ما نزل إجازة وما شاف أولاده. عدم نزوله دا مزعل أمه زعل شديد. قامت أمه رسلت ليهو وقالت ليهو : كان ما جيت شفت وليداتك، لاني أمك وما بعرفك ، وما عافية و لاراضية عليك.
كانت رسالة قوية وحاسمة. صاحبنا طوالي لملم عفشه وربط شنطه وحجز تذكرته على أقرب رحلة ،ورسل لأمه قال ليها: الإسبوع الجايي كان الله هون وبقيت حي أنا معاكم. أمه فرحت فرح شديد، وطوالي مشت كلمت زوجة ولدها. الزوجة ما صدقت وطوالي شرعت في التجهيزات ، وأم زوجها جابت ليها شوال طلح . صاحبنا وصل في الموعد المحدد، وقصد يتأخر في الخرطوم عشان داير يصل لأولاده بالليل، وما داير واحد اشوفه . أمه كانت منتظراه على أحر من الجمر في بيته. أها صاحبنا وصل البيت وطوالي جرى ناحية أمه وقلدها وقعد يبكي ،وسلم عليها في رأسها، وقبل يدها، و"دنقر" يقبل قدمها. بعد داك قام سلم على وليداته وحضنهم وضماهم على صدره وقبلهم ودموعه جارية. أها بعد داك، اتجه نحو زوجته حبيبته وسلم علىها ومد ليها يده ببرود . أمه زعلت وقالت ليهو: ده سلام شنو ده ياولدي؟، سلم على "مرتك" زي الناس. قام مد ليها يدو تاني بس المرة دي بحرارة. أمه قالت ليهو: سلم علي مرتك زي ما سلمت علي انا أمك. تردد صاحبنا، أمه نهرته وقالت ليهو: قلت ليك سلم على مرتك زي ما سلمت علي. قام صاحبنا يسلم عليها ومد ليها يده تاني بس بشوق، امه صرخت فيهو وقالت ليهو: أقلد مرتك زي ما قلدتني ، صاحبنا خجل خجل شديد، أمه مشت عليه وقالت ليهو : أقلد مرتك، قام قلدها، قامت قالت ليهو: ضمها عليك على صدرك، صاحبنا وجم وقعد يرجف ، قام ضماها على صدره، أمه اتبسطت وقالت ليهو: "أديها قدوم" ، صاحبنا قعد يرجف وعرق عرق شديد، أمه نهرته ومشت عليه وقالت بنفس حار "أديها قدوم"، صاحبنا ما كضب، ونفذ كلام أمه وقام قبل زوجته زوجته. أمه اتبسطت وقالت ليهو: كدي هسي عاين يا ولدي لخدود مرتك، شوفن كيفن وردن وفرهدن، انت قايل شنو يا ولدي، نفس(بفتح النون والفاء) الراجل للمره (المرأة) متل الموية "للخدار" ( الخضار)، ما شفت "الخدار" لامن يرشوه بالموية كيفن "بخدر'' ويفرهد. قامت أمه ودعتهم وقالت: فتكم بعافية النخليكم ترتاحوا وباكر بجيكم صادة.
|
Post: #2
Title: Re: نفس الراجل للمرأة متل الموية للخضار
Author: Abdullah Idrees
Date: 09-03-2018, 02:49 PM
Parent: #1
كلام جميل
فعلا قصة البرود مع الزوجة دي ما عندها معنى وفيها سوء معاملة نوعا ما ..
|
Post: #3
Title: Re: نفس الراجل للمرأة متل الموية للخضار
Author: إسحاق بله الأمين
Date: 09-03-2018, 03:18 PM
Parent: #2
زوجاتنا يقمن بدور عظيم ،خاصة زوجات المغتربين، اللائي يقمن بدور الأب والأم. وبعد كله ، تحت ظالمنهن، طبعا ما كلنا، لكن كثير منا، وجافين أيضا في التعامل معهن، وحياتنا الزوجية معهن، هي الأخرى جافة وخالية من الرومانسية والتعامل الرقيق مع القوارير.
شكرا اخي عبدالله
|
Post: #4
Title: Re: نفس الراجل للمرأة متل الموية للخضار
Author: أحمد الشايقي
Date: 09-03-2018, 04:10 PM
Parent: #3
شكرا أخ اسحــق
دا كلام حنــون
|
Post: #5
Title: Re: نفس الراجل للمرأة متل الموية للخضار
Author: امتثال عبدالله
Date: 09-03-2018, 06:16 PM
Parent: #4
اسحق ود بلة
ام ولا كل الامهات...
ما عندها وليد عازب لسع ما اتزوج ؟ وجه ضاحك ...بقهقة
|
Post: #6
Title: Re: نفس الراجل للمرأة متل الموية للخضار
Author: صديق مهدى على
Date: 09-03-2018, 06:30 PM
Parent: #5
كلمات مختارة جميلة يا اسحاق بس نحنا احلى واغلى تحياتى للام صانعة الود
والمحبة والمربية المخلصة
|
Post: #8
Title: Re: نفس الراجل للمرأة متل الموية للخضار
Author: إسحاق بله الأمين
Date: 09-03-2018, 10:31 PM
Parent: #6
شكرا أخي صديق مهدي
ديل جيل أمهاتنا المشلخات، الحكيمات، العاقلات،العارفات مصلحة اولادهن وبناتهن.
|
Post: #7
Title: Re: نفس الراجل للمرأة متل الموية للخضار
Author: إسحاق بله الأمين
Date: 09-03-2018, 10:25 PM
Parent: #5
أم نادرة
أم زي دي بتكون زوجت أولادها من سن 18 سنة وبناتها من سن 15سنة
ياليت لو عندها أخوات.
شكرا أختي امتثال
|
Post: #9
Title: Re: نفس الراجل للمرأة متل الموية للخضار
Author: إسحاق بله الأمين
Date: 09-03-2018, 10:38 PM
Parent: #4
مولانا أحمد
ده كلام امهات خبرن الحياة وبعرفن كيف يتعاملن مع ازواجهن ، عشان كده استمرت الحياة واحتفظن بأزواجهن.
تحياتي وأشواقي
|
Post: #10
Title: Re: نفس الراجل للمرأة متل الموية للخضار
Author: صديق مهدى على
Date: 09-03-2018, 11:13 PM
Parent: #9
غايتو عليك جنس خفة دم ههههها
|
Post: #11
Title: Re: نفس الراجل للمرأة متل الموية للخضار
Author: إسحاق بله الأمين
Date: 09-04-2018, 06:10 AM
Parent: #10
وانت أخي صديق رجل لطيف وظريف
صاف الود
|
|