الصعايدة يحتلون غرب امدرمان

06:53 AM September, 02 2018 سودانيز اون لاين
Osman Musa-
مكتبتى
رابط مختصر صعايدة مد البصر في غرب امدرمان . كلهم مشمرين السواعد علي الواسوق والمناجل . ما كنت متخيل الارض الشاقيها شريان الشمال الكانت زمان بتتشاف رهاب ممكن تنتج زي ده العنب وزي ده التين وزي دي المنقة .
غايتو الصعايدة ديل تفتيحة جد . اكتسفوا انو في البلد دي ممكن اي زراعة
زراعة تنجح

حقيقة تندهش بين شخاليب العنب والزيتون والتوت والتين .
وتلاقي نفسك في شكك . يازول انت في غرب الحبيبة امدرمان ولا في
في جنة عدن .
ضربنا التين الامدرماني العجيب تين النيل الممدد تحت الارض واتلفتنا شمال
يمين . والله يا جماعة في اللحظة ديك اتذكرنا حلقة في القناة الرابعة مع
العداء. كارل لويس. يتكلم فيها عن التين وعن توازن الجسم والسعرات الحرارية
اتذكرت كلامو وجد. في ديك اللحظة حسيت. بي اني ممكن اقوم جاري .
السودان جنة. بس حكومتو ضهبانة من اكتشاف جناتو .

السبب والوداني غرب امدرمان كان زيارة شاب محكوم بالاعدام في السجن . بعد طلعنا من السجن دخلنا مزارع التين والعنب الرامي فوق بيتنا. والله العظيم جد بكيت بين الشخاليب . بكيت علي حال المساجين السودانيين عيال النيل واسياد العنب . ولقيت نفسي اردد. في. يا. صعايدة. يا تدخلوا السجن . انتو. ونزرع نحنا. يا. نزرع. كلنا. .

السلام عليكم
يزرعوا بس أتأكد من البلهارسيا والكبدي البائي

بتنا العزيزة بت حاج المشرف سلامات . بلهارسيا ؟ يازولة اقولك ديل ضاربين تين ولبن وضاربين همبريبنا . ديل عايشين في مساحات رحيبة . والله انا افتكرت نفسي في مزارع اتلانتا جورجيا . الصعايدة يازولة عايشين هنا باشوات . البلهارسيا و الهيبو مسك اهلنا . الهيبو. عندنا. عامل. حزام. . الهيبو ضارب التشاشة . الفارشين النعناع و التبش و الشطة و المساويك و المناقيش و ابر الخياطة و حلاقين الضل . البلد. رايحة. بي. فجة. وقايمة. بي فجة. لكن الفجتين ما في صالح صحة وامان البلد . علي كل حال شبعنا من التين. والاعناب .
ورجنا نردد يارب خفف علي الطاقات المحكومة في سجون السودان الحبيب

بعد ما بكينا علي اطلال جضوول شجرة الصندل المكبورة من تحت . وفوق عين
كاميرات المتحف عرفنا انو. في البلد دي لو. زرعت اب قرشين ممكن يفرهد .
وبدون ماروق .
هسع عليكم الله الحرامية ديل بدل يقطعوا الصندلة . مش كان احسن يشتلوا
منها فرع. نظام. ترقيد. الفرع المعمول. بيهو. في اي مكان .
غايتو. الصعايدة. لقوها. . لكن المضحك. صفوف الرغيف في بلاد التين والزيتون

سلام يا صديقي
ياخ اي حتة فيها زراعة وجناين وخضرة؛
وخضرة طوالي بنجي
نحن مزارعين ابناء مزارعين
لاحظت حاجة اولادنا الشباب الصغار عشرينات وبداية التلاتينات
هجروا ارض اهلهم تلك المنكمشة القليلة الفدانات
الكتيرة الاهل وذهبوا يزرعون في ككا وفي حفير مشو
وفي المناقل وفي ود عشيب شرق الجزيرة
حيث الاراضي رحبة واسعة وقرير
وحققوا نجاحات خرافية
مقارنة بصغر اعمارهم
وتركوا الفدانات الشحيحة على ضفة النهر
ليفلحها زويهم
انحني لهم
جيل مبدع.....

............
رجعت من السودان يا صديقي قبل شهر بالساعة
لم اتوفق في لقياكم
سنلتقي يوم بكرة الجميل حتما،
؛؛؛
ما زلت طالبك منقة صفراء ورويانة،
وشية جمر
خروفا ماكل من قش بشرب نز على ارض النيل الخصيب؛
ولا باس من كاس شربوت معتق تمرو مختلط بالقش بتاع خروفنا الفوق دا...
وريقي جام من هسع؛

حبيبنا عثمان .. مودتي ..
صحيح الصعايدة ديل ناس شغل صاح .. أذكر زمان يعني قبل أكثر نصف قرن
عندنا في الشمالية هناك في منطقة البرقيق وكرمة .. مزارع واسعة حتى مازالت إسمها ( أمبابة )
كان الصعايدة ناس عمنا أبوالحسن ودسوقي وفوزي ..
أذكر أنهم كان يدربوا الوالد ( الله يرحمه ) كيفية الزراعة الناحجة للخضار للخضروات التي كانت
ثقافة جديدة للترابلة ( الجزر ، الفلفل الاخضر ، البنجر ... إلخ )
بصراحة الناس ديل كانوا محترفين في زراعة الخضار والفواكه وقدراتهم كانت عالية جداً
منهم من رجع بعد الانهيار الحصل في البلد ومنهم من توفى إلى رحمة الله ..
حبيبنا عثمان .. الصعايدة ما عندهم إجازة وجلسات الونسة إلا يوم سوق القرية ويوم الجمعة
سكن في الحواشة وعمل متواصل في المزرعة ولديهم قوة جسمانية عالية جداً ..
لأن والدي الله يرحمه زمان كان يسافر مصر كانت لديه معرفة بهؤلاء ( مزاح وهظار وتقديم مشورة )
صحيح نحنا شطار في زراعة الفول والقمح وكذلك شتل النخيل وأنواعها وفي تربية البهائم
ولكن هم خطرين جداً في الخضار ..
حتى عندنا عندما تشتغل أكثر من اللازم بالدنقلاوية ( إر سييدريه ) ومعناها ( يا أخي إنت صعيدي)؟؟
ما يعرفوا لا مأتم لا سماية ولا عرس ولا مرض ولا قريبي جاء ، فقط عمل .. شغل ..
المهم بعد فترة أصبحوا آباءنا لديهم خبرة واسعة زراعة الخضروات الشتوية ( وهي الاهم )

معليش حبيبنا عثمان طولنا عليك .. رجعتنا لزمن الترابلة التمام .. ما كنا نشتري إلا السكر والشاي والزيت
القرب من مصر ليس بذلك السوء لأنهم أيام عبدالناصر كانوا تعبانين شوية ونحن كنا أفضل لأنهم كانوا محاصرين
من الامريكان ( ما في تبادل تجاري مع الغرب .. الصعايدة كان يرسلوا الشاي أبو دينار والسجاير ، والحبر وقلم التروبين ..إلخ )

عن تجربة وقرب معهم الصعايدة عقيدتهم العمل .. حتى أحياناً الصلاة مرة مرة ..
وأكلهم في الحواشة فجل وبصل أخضر وجرجير .. إلخ

زمن يا عثمان .. ليت الشباب يعود يوماً

عزيزنا الاخ علي عبدالوهاب سلامات والعيد مبارك عليك
غايتو الصعايدة لقوها . الناس ديل ماسكين شريان الشمال ده من
امدرمان وكاسحين علي الشمالية . انا بتخيل الخصوبة دي ما ساكت
احتمال كبير. النيل كان زمان في المكانات دي . ياخ تراب زي التمباك
طين اخضر لوك .
ترمي قصبة تخلف. برتقالة . ترمي قرش يفرهد 7سنابل في كل سنبلة
21 بالقديم. . الارض يا. ود عبدالوهاب هي الحل. .

الاخ الفنان عبدالمنعم سلامات والعيد مبارك عليك
ارضنا عجيبة يا منعم . لمان كانت الحكومات الرشيدة ماسكة في الارض كان
الجنيه يساوي 3 دولار .
ولمان فكينا الدرب وفرتكنا. دواليب المحالج و مسكنا في الفاضي دقينا الدلجة .
ربنا. وهبنا. اجمل. ارض. . ونطولينا فيها. اصعب جماعة .
علي كل حال المشاوي طاقة والبقنية هيع تبزبز. منتظراك .

سلام يا عثمان وضيوفه الكرام

يا عثمان الصعايدة لهم تاريخ ناصع البياض عندنا فى الشمالية
عمى عبدالله انصار رحمه الله رحمة واسعة كان رجل اقتصادى وهو اول من قام باحضار الصعايدة من صعيد مصر الى مناطقنا فى الشمالية
حيث طلب منهم ان يقوموا بزراعة الخضروات والفواكه حيث خصص للفواكه جنينتين مساحة احداهما ثلاثة فدان والاخرى اربعة فدان
حيث قاموا بزراعة ( البرتقال واليوسفى واللارانج والقريب فروت والمانجو والموز والليمون والتين ) ومساحة غير محدودة للخضروات
اذكر تماما يومى السبت والثلاثاء اللوارى كانت تأتى الى مزرعته لتحميل الخضروات والفواكه الى سوقى كرمة النزل والبرقيق
الكلام دا فى ستينات القرن الماضى وقد كان من الرعيل الاول لجبهة الميثاق الاسلامى . حيث فى كرمة البلد كانوا لا يتعدون على اصابع
اليد الواحدة والدائرة كانت من الدوائر المقفولة للازهرى بقيادة خالنا العزيز رحمه الله رحمة واسعة جعفر سيداحمد .

يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَىٰ وَجَعَلْنَاكُمْ شُعُوبًا وَقَبَائِلَ لِتَعَارَفُوا ۚ إِنَّ أَكْرَمَكُمْ عِندَ اللَّهِ أَتْقَاكُمْ ۚ إِنَّ اللَّهَ عَلِيمٌ خَبِيرٌ (13)
من سورة الحجرات 13
وأنا أستغرب من كل طرح عنصري يدعو الي إستعلاء قوم فوق قوم آخرين أو الحكم علي شعب بسبب أخلاق أقلية أو أمراض أو فقر أو لون أو عرق....ففي كل شعب في الدنيا هنالك السئ وهنالك الجيد وحتي في مجتمعنا السوداني .....!
والنزوح من قطر إلي قطر تفرضه عوامل عديده....أهمها الجانب الإقتصادي في البحث عن حياة أفضل....وبمرور الزمن قد يحصل هذا الإنصهار بين الشعوب سواء أكانت عربية أو أفريقية
أو أي قوميات أخري....هذا الإنصهار حتمية من حتميات التاريخ ولا يمكن لأي حضارة بكل جبروتها أو أفكارها المتقوقعه... أن تتفادي هذا الإنصهار....!!
لذلك لابد من إحترام هؤلاء الذين جاءوا إلي بلادنا من أفارقه ومصريين وسوريين وفلسطينيين وآسيويين ...ألخ والإستفلده من خبرات هؤلاء في كل المجالات....ولا يجب أن نركز فقكط علي الجوانب السلبيه من تصرفات البعض منهم.....!!
الآن نحن السودانيون فرضت علينا الظروف الإقتصاديه الهجره إلي بلدان أخري....وفينا الصالح والطالح وقد لا نرضي أن يعاملنا البعض علي ضوء تصرفات الأقلية.....!!!
ولكن بكل اسف نجد هذه النظرة الدونية تهيمن علي سلوك بعض مواطنينا في الحكم علي الشعوب الأخري....!!
وكما أسلف الأخوة من الشمالية.....فعطاء وجهد الإنسان من جنوب مصر الذي أجبرته الظروف الإقتصدية إلي الهجرة إلي شمال السودان...لا تتخطاه إلا عين جاحد أو جاهل...فلقد سكبوا جل خبرتهم في إنتاج العديد من الخضروات والفواكه والبقوليات...ألخ ومنهم من تزوج وإنصهر في سكان الشماليه...وهذه حتمية التاريخ إن شاء البعض منا أو لم يشأ....وكذلك ينطبق هذا التمازج بين كل شعوب الأرض...!!!

مرحب اخي ابراهيم عبدالعزيز
والف شكر علي المرور الكريم

عزيزنا الاخ علاء سلامات وعيدك مبارك
الكنوز السودانية يا اخ علاء وضحت للعالم كلو .
الارض المدهشة .
زمان الناس مفتكرين انو. التين والزيتون والعنب ما بقوم الا
في مناطق البحر الابيض المتوسط و اليمن .
لام لاحدي ما دخلت امدرمان التحدي . ماشاءالله يا علاء علي العنب
السوداني . يا سلام

ياريت الناس تفكر في فتح ميجر من النيل ناحية
غرب امدرمان . وممكن المجر يطلع من النيل شمال جسر
الحلفاية في اتجاه الغرب .

بوست يريح الأعصاب ويزيد مساحة الأمل في المستقبل Great Expectation>>>
:
:
:
:
:
:
:
مع التحيات لله الزاكيات

توجد عندنا أرض خصبة ومياه أمطار وأنهار وآبار
لكننا للأسف لا نحب الزراعة ولا يوجد سياسة تشجيع وتربية على الزراعة
شعب غافل وحكومة ونظام لئيم نعمل شنو ؟!
مصيبتنا كبيرة وتمغس...
والله بمر بمستنقعات من مياه الأمطار تستمر قرابة عام لا تجف
لو رموا عليها أي بذور لأشجار لنبتت دون حاجة لرعايتها
لكننا لا نحب الزراعة ولا الخضرة
فقط نلهث ونسعى وراء غابات الأسمنت
نحن مصيبتنا كبيرة ومن الصعب أن ننهض
لأن مفاهمنا كلها مقلوبة ومعكوسة ومنكوسة.

فعطاء وجهد الإنسان من جنوب مصر الذي أجبرته الظروف الإقتصدية إلي الهجرة إلي شمال السودان...
لا تتخطاه إلا عين جاحد أو جاهل...فلقد سكبوا جل خبرتهم في إنتاج العديد من الخضروات والفواكه والبقوليات

=========================
حبيبنا جمال ودالقوز .. تحياتي
والتحية خالصة للحبيب .. إسمان (بالنوبية) بوست جميل
الاحباب الكرام .. كانت لدينا مصر أخرى غير السياسية والاحزاب وغيرها
مصر في مفهوم أهلنا كانت مختلفة بعيداً عن السياسة .. ( تجارة وزراعة وعلاج .. إلخ) مصالح متبادلة
كان زمان الناس يرسلوا ( الشاي واقلام الحبر والحبر والسجاير .. إلخ .. ويأتوا بالغزلي والكرب والكولونيا
واللحاف عشان الشتاء ، وذهب الزنية الدينار والعكش والفرج الله والجنيه الذهبي ..إلخ )

وأتذكر قبل نصف قرن وأكثر .. كان المقاولين المسئولين عن حفر جدول مشروع البرقيق بعد الفيضان
يأتون بالعمالة من صعيد مصر طبعاً قبل ظهور ( الكراكات والمعدات الاخرى ) المقاول كان من ناس البلد
كان عمنا ( حفني ) الله يرحمه .. يأتي بعشرات العمال الصعايدة لينظفوا الجدول الرئيسي من ترسبات الطمي
حتى أهلنا جمعياً كانوا على ثقة بأن هذا عمل شاق ومن إختصاص هؤلاء ..

وقرأت قبل فترة في موقع من المواقع بأن الحاكم الانجليزي ارسل خطاب إلى حاكم مصر يطلب منه
إرسال 100 من الصعايدة إلى السودان وذلك لحفر جدول مشروع الفاضلاب لأن 700 عامل سوداني
لم يستطيعوا إكمال الجدول حسب الوقت المحدد ..

هكذا الدنيا تجد بعض الشعوب لديها الصبر والقوة الجسمانية وبعضها تتميز بصفات إنسانية عالية جداً وموارد طبيعية
وتتكامل هذه المعطيات ليكون هناك ناتج إنساني يفيد الجميع بل كل البشرية ..

شكراً الحبييب عثمان ..

فعطاء وجهد الإنسان من جنوب مصر الذي أجبرته الظروف الإقتصدية إلي الهجرة إلي شمال السودان...
لا تتخطاه إلا عين جاحد أو جاهل...فلقد سكبوا جل خبرتهم في إنتاج العديد من الخضروات والفواكه والبقوليات

=========================
حبيبنا جمال ودالقوز .. تحياتي
والتحية خالصة للحبيب .. إسمان (بالنوبية) بوست جميل
الاحباب الكرام .. كانت لدينا مصر أخرى غير السياسية والاحزاب وغيرها
مصر في مفهوم أهلنا كانت مختلفة بعيداً عن السياسة .. ( تجارة وزراعة وعلاج .. إلخ) مصالح متبادلة
كان زمان الناس يرسلوا ( الشاي واقلام الحبر والحبر والسجاير .. إلخ .. ويأتوا بالغزلي والكرب والكولونيا
واللحاف عشان الشتاء ، وذهب الزنية الدينار والعكش والفرج الله والجنيه الذهبي ..إلخ )

وأتذكر قبل نصف قرن وأكثر .. كان المقاولين المسئولين عن حفر جدول مشروع البرقيق بعد الفيضان
يأتون بالعمالة من صعيد مصر طبعاً قبل ظهور ( الكراكات والمعدات الاخرى ) المقاول كان من ناس البلد
كان عمنا ( حفني ) الله يرحمه .. يأتي بعشرات العمال الصعايدة لينظفوا الجدول الرئيسي من ترسبات الطمي
حتى أهلنا جمعياً كانوا على ثقة بأن هذا عمل شاق ومن إختصاص هؤلاء ..

وقرأت قبل فترة في موقع من المواقع بأن الحاكم الانجليزي ارسل خطاب إلى حاكم مصر يطلب منه
إرسال 100 من الصعايدة إلى السودان وذلك لحفر جدول مشروع الفاضلاب لأن 700 عامل سوداني
لم يستطيعوا إكمال الجدول حسب الوقت المحدد ..

هكذا الدنيا تجد بعض الشعوب لديها الصبر والقوة الجسمانية وبعضها تتميز بصفات إنسانية عالية جداً وموارد طبيعية
وتتكامل هذه المعطيات ليكون هناك ناتج إنساني يفيد الجميع بل كل البشرية ..

شكراً الحبييب عثمان ..

عزيزنا الاخ محمد حمزة سلامات وعيدك مبارك
الارض دي لو كحلتها في حر النهار وانت كاسح غرب ما حتصدق انو كل الخير
ده حيطلع من بطنها . عنب ؟
زيتون ؟
تين عديل ؟
رمان ؟
المخجل يا اخ. محمد. انو. كتير. من المتفرجخين في مكاتب الحكومة لا
يفهمون دي. النعمة. . ولا. دايرين ..

مرحب أجمعين. صعب يا أبو عفان عمل ميجر يتجه غربا من النيل لأن طبوغرافيا الأرض كما تعلم تنحدر من تلك الجهات شرقا ناحية مجرى النهر. أتذكر وأنا صغير كنت بحلم بأن تزرع الشوارع باشجار المنقه والجوافة والبرتقال والنخيل والليمون. زمان كان الخرطوم في المغربية ريحتها ياسمين. مفروض كل بيت تكون فيهو أحواض زراعه. الله كريم بتقوم فيها الطماطم في الخلا وطماطم سكريه كمان. فضلا عن الملوخية البريه الطاعمه.

عزيزنا الاخ منتصر سلامات وعيدك مبارك
ارض في قمة الجمال محتاجة يزوجوها بي موية النيل عشان
تلد القناديل والشخاليب و التمور .

عزيزنا الاخ عثمان علي سلامات
ومشكور علي المرور الكريم والمشاركة . نعم في انحدار من الغرب للشرق جهات
النيل ونفس الشي من الشرق للغرب جهات النيل . لكن حكاية يتعمل ميجر من النيل
جهات الغرب ما مستحيلة في ميات الترع طالعة من النيل جهات الغرب وماشة
مسافات طويلة زي ميجر مشروع الزيداب اول المشاريع الامريكية الانجليزية
سنة 1880 . طبعا المشروع ده بداهو. رجل دين مهندس زراعي امريكي 1880
والمشروع. اتوقف بي سبب الثورة المهدية. بعد عودة الانجليز
اعيد. العمل. في المشروع. وتم تركيب المحالج. وتم. الانتاج. 1904 .
الموية يا. اخ. عثمان بالميزان. ممكن تطلع وتروي. جبال. . حسب. ارتفاع
نقطة. الرفع. وده. طبعا. شغل جماعة المساحة .
مافي اي. شي. يمنع قيام. ترعة. عملاقة. تقد. امدرمان وتكسح لاحدي داخل
كردفان جهات الغرب. ولاحدي. دنقلا. جهات الشمال. والوديان. الغربية. دي
كلها. صالحة. للزراعة. .

تحياتي استاذ عثمان.
الزراعة بوطننا امرها مذهل ؛ فالقطن تم ادخاله الي السودان فوجد نجاحا كبيرا و كذلك السنمكة و التي لنجاحها صارت عشبة برية تنبت دونما رقيب.
التين قابلني بالسودان و لكن ما يحيرني حقا هو العنب ففي مدينة نيالا مثلا تجده بدرجة عالية من النجاح في حي واحد فقط هو حي السنما و الذي لا يكاد يكون به منزل الا و زرعت فيه شجرة عنب ، اما الاحياء الاخري بنفس المدينة لا تجد بها زراعة العنب رغم ان بعضها يقع علي ضفتي الوادي حيث البساتين و المياه الوفيرة ؛ فيبدو لي ان الامر مرتبط بالتجربة و الخطأ و لا علاقة له بالدراسات العلمية و التخطيط.
بعض مناطق دارفور ينبت فيها التفاح بنجاح مثل جبل مرة و رهيد البردي.
لذلك فالسودان لا خوف عليه الا من القتل و التمزيق ؛ و لكن يسرق السارقون ما شاءوا لهم الجشع و سيبقي السودان غنيا بامكانياته الزراعية البكر . فما لم يبيعوا ارض اجدادنا فلا خوف علي السودان.

نتابع

حقيقة اهلنا الصعايدة صحبان الارض والنيل و حقيقة هم شعب
شتال للخير و للخضرة . ليهم التحية مربعة وهم متشمرين علي الواسوق
والمحافير .

الاستاذ عثمان موسى ..

تحياتى و تقديرى ..

معلوم ان المزارع المصرى جاد فى عمله .. يا ليتنا نتعلم منهم و نكون جادين فى اعمار السودان ..

اقترح ان تغيير عنوان البوست على ان يكون .. الصعايدة يعمرون غرب امدرمان ..

تحياتى ..