لماذا المزايدة على المناصير؟

08:57 PM August, 18 2018

سودانيز اون لاين
محمد البشرى الخضر-العين-الإمارات
مكتبتى
رابط مختصر

قابلني في اكثر من فضاء اسفيري اصوات تلوم اهل القرية المنكوية بفقد فلذات اكبادها على قبولهم حضور البشير للعزاء
بعضها تطرّف في لومهم ووصفهم ببيع ابنائهم!

أدناه رسالة ارسلها احد ابناء المناصير لهؤلاء المزايدين
اعيد نشرها للفائدة و لنوقف وضع المزيد من الملح على الجراح المفتوحة

Quote: بالنسبه للناس البي تتكلم عن استقبال المناصير للرئيس. ... داير اذكر الناس العام الماضي الرئيس اعلن زياره للمناصير .واهلنا رفضو الزياره وقالوا ليهو انت غير مرحب بك في المناصير ...... اليوم فقد المناصير ابنائهم وجاءتهم الوفود للتعزيه من كل بقاع السودان ... عندما اعلن الرئيس زيارتو للتعزيه كان الناس امام خيارين إما رفض التعزيه وهذا مارفضه اهل الضحايا بإن الوضع يختلف والعزاء واجب وان اختلفنا مع المعزين . او قبول العزاء والعزاء فقط وهو ماكان . تم رفض اي مظهر من مظاهر التكبير والتهليل والناس كانت تستغفر وتحمد الله وتردد حسبنا الله ونعم الوكيل . عندما جاء الرئيس حاول البعض من هتيفة المؤتمر الوطني التكبير . ...حديث ممثل الاسر واضح بإنه مرحبا بك معزيا فقط .وصمت الباقين رساله واضحه بإنك غير مرغوب فيه ولكن قيمنا تمنعنا من رفض تقبل العزاء ... اما جلوسه علي الكراسي هذا طبعه ونحن لا نلام علي طباع غيرنا .فالكراسي كانت غير موجوده كانت جاءت مع طائرات المقدمه او من المحليه او غيرها...... عندما ذهب للنساء هتفت بإستمرار الكذب لاكثر من عشرين .وان حاول مرافقيه لغوسة الموضوع .... من يحاول ان يقول بإن المناصير خائفون من مواجة الرئيس .ا لتجارب برهنت سابقا خرجنا في الخرطوم واعتصمنا في الدامر . نحن نصارع منذ عشره اعوام وقمنا بقفل المنطقه علي اي مسؤول حكومي لاكثر من ثلاثه اعوام ماتقولوه فعلناه . ولي اسي البعض يتساءل هو في المناصير الحاصل شنو ومالن . لاتحملو المنكوبين اكثر ممايتحملون .

لا تحمّلوا المنكوبين أكثر ممّا يتحمّلون - صدقت يا صاحب الرسالة! يكفيكم النكبة التي انتم فيها ربنا يصبركم ويأجركم في نصيبتكم
فلم يعد في القلب متسّع لحزن آخر!

ايضا انتشرت صورة لخمسة فتيات على انّها صور الأخوات الخمس الشهيدات صبّر الله والديهن و جعلهم شفعاء لهم



للأسف اتضّح أنّها مقطوعة من صورة لا علاقة لها بالحادث تجمع طالبات احدى مدارس امدرمان



وقد نشر قريب احدى البنات الصورة الاصلية مناشدا الناس بعدم الترويج للصورة المفبركة, و التي لا أدر ما الفائدة التي جناها من قام بهذه الفبركة وما الغرض منها !!

زميلنا محمد ابراهيم نشر تعليق على صفحته فيه الصورة الشهيرة التي تقول "عدم الإحساس مشكلة" وقد صدق !
فعلا ما سجري من اكاذيب لا داعي لها ومزايدات سخيفة تدل على عدم الاحساس بالماساة التي يعيشها اهلها, و الأمر لا يعدو عند البعض مجرد "ترند" اسفيري و لايكات وريتويتات و سبق صحفي وسائر عوارات الأسافير السودانية المعتادة!!

الفشل و العجز اغلب المعارضين بحاولو يرموه في غيرهم ...
ما عليهم لوم و تصرفهم صحيح 100% ...
القصر الجمهوري معروف و القيادة العامة معروفة خليهم يمشو ينتظروا البشير هناك ...

يكتل القتيل ويمشي في جنازته
جني

هناك فى ايطاليا وفى مدينة جنوى حصلت كارثة جراء انهيار جسر حيث قتل اكثر من 40 شخص
وقد اقيم اليوم تشييع رسمى لبعض ضحايا الكارثة .معظم اهالى الضحايا رفضوا حضور مراسم التشييع
بحجة ان قتلة ابنائهم موجودين فى المراسم وهذه مهزلة ..
وقد اعلن ان اليوم حداد وطنى فى ايطاليا ..

تصوير جوي لموقع انهيار جسر جنوى


قناة الجزيرة فضحت الحكومة اليوم واشارت الى انّ سبب ارتفاع المياه فى منطقة البحيرة ليس بسسب الفيضانات فقط انما بفعل اغلاق ابواب سد مروى
وتحذير المواطنين من شهر اربعة بان الفيضانات ستكون كبيرة وعليهم اخلاء المنطقة ( بمعنى اغراق المنطقة وتهجير المواطنين الرافضين الرحيل من قبل انشاء سد مروى قســـراً )

وبمعنى ان البشير له يد فى قتل اطفال المناصير .

{ فعلاً يقتلون القتيل ويمشون فى جنازته }

فعلا عدم الاحساس مصيبة .. ومتى كان للكيزان احساس

تصوير جوى لموقع كارثة جسر جنوى

ياودو مافي زول بزايد عليهم
والناس موجوعة جدا لماحدث . وجع حقيقي
والكلام القالوهو من وجعهم بس
اعتقد انو خطاب غير موفق وينتقص من قدر الناس
ويصب في مصلحة النظام
التقييم خاطئ جدا من الذين كتبوا الخطاب
قضية المناصير ذات نفسها تفاعل معها الناس بشكل جيد وحقيقي

تحياتي شباب وشكرا ع المرور
يا ود اب سن, ما تقول ما في زول زايد عليهم, قول أنا ما زايدت- وللدقة أكثر ممكن تقول ما لاقتني مزايدة! الزمن دا ما تضمن إلّا رقبتك!
انا لاقتني في أكثر من فضاء اصوات تلوم المناصير على استقبال البشير و اصوات تنظّر لهم وتورّيهم مفروض كان يعملوا شنو وغيرها اكثر تطرّفا وصفتهم بالخانعين و ببيع ارواح ابنائهم!
و محمد ابراهيم لاقته هذه المزايدة فعلّق عليها وكاتب الرسالة مش لاقته بس بل وكمان استفزّته ودفعته لكتابة هذه الرسالة
ما كل ما لم نراه أو نعلم عنه يعني انه لم يحدث او ليس موجودا!
ورسالة الرجل ليست في صالح النظام ولا شيئ أساسا في صالح النظام في الف باء هذه الماساة وحتى ياءها
هذه الكارثة من بعد قضاء الله وقدره لا سبب لها إلّا النظام و سده وصلف القائمين على أمره و تجاهلهم لأهل المنطقة وربّما معاقبتهم على خيارهم البقاء في اراضيهم!
هذا لا خلاف عليه ولا يستطيع اي من اهل النظام انكاره.

الموقف الانساني والوطني ازاء غرق التلاميذ والتلميذات ما فيهو تركيب او تعقيد .. موقف مباشر وبسيط جدا .. الحزن والغضب .. الحزن سببو معروف .. والغضب يكون ازاء حكومة الفساد والافساد لانها مسؤولة تماما من هذا الموت المجاني.

طيب ..
الموقف من استقبال اهل الضحايا للجلاد عندما اتاهم معزيا .. هو موقف اكثر تعقيدا بقليل ولكنو ما زال يندرج تحت المفاهيم البسيطة ..

في زول بيحتكم لما يدعى بالاعراف والتقاليد الخ الخ الخ .. وفي زول تاني بيقرأ الاشياء خارج هذا الاطار

اها في نوع تالت شايف انو الناس تنكتم وتخلي اهل الضحايا في حالم ..

انا من النوع التاني .. وحيكون من اهل الضحايا في ناس كتار زيي .. وفي ناس كتار من النوع الاول .. بما اني من النوع التاني انا شايف انو الوعي الحقيقي يرفض تماما مثل هذا الهراء المتمثل في تقديم العزاء من قبل البشير .. عزاء بتاع الساعة كم وهو المسؤول الاول عن هذه الجريمة؟!

الكلام ده كلو بسيط جدا .. وجهتي نظر متعارضتان .. في ناس بتقول زيد وفي ناس بتقول لا .. عبيد وبس

يلا الكلام ده كلو ما عندو علاقة بي فرض وصاية او تحرش غير لائق او تسلط مفاهيمي على اهل الضحايا .. السودان كلو وقف معاهم .. وهم ذاتم فيهم من قبل عزاء البشير وفيهم من رفض .. الاختلاف في الرأي حولذاك اختلاف طبيعي جدا .. وان احاجج بموقفي بصفة مواطن بسيط ده حق وواجب كمان .. من حقي اقول الشايفو .. ومن واجبي كمان اقول الشايفو في اي قضية عامة..

اعلاه كلو مفهوم بسيط جدا بالمناسبة...

Quote: يلا الكلام ده كلو ما عندو علاقة بي فرض وصاية او تحرش غير لائق او تسلط مفاهيمي على اهل الضحايا

برضو دا كلامك و شوفك انت يا دكتور و ليس هذا هو المعني برسالة ابن المنطقة ولا بتغريدة ود ابراهيم ولا بالبوست اساسا!
المعني به من فرض الوصاية ونظّر للناس بل وخوّنهم وبيّعهم اراواح ابنائهم عديل كدا, وليه دا كلّو! عشان فاتت عليه فرصة ترديد اشعار وواغاني و هتافات كيف ان المناصير هاجموا البشير وتظاهروا ضده و طردوه من الخيمة!

محمد سلامات

انا والله ما لاقاني نموذج زي البتقول عليهو ده ..
ممكن يكون في نماذج ما لاقتني لانو اسفير الله ده واسع ولكن .. لاقاني لغاية الان 4 بوستات زي كلامك ده في دائرتي الاسفيرية؟!

عادي يا دوك, كنت قد كتبت لود اب سن

Quote: ما كل ما لم نراه أو نعلم عنه يعني انه لم يحدث او ليس موجودا!

يا ودو ليه بتفترض رأي الزول دة هو رأيه فقط لما حدث وتجي تحاكم افراد وتعمم عليهم؟
انا شخصيا وددت لو لم يستقبلوه . وبدون حمولات سياسية . يقعدوا في بيوتهم بس . بدون مواجهة كرأي عام
طيب ما عملوا كدة . انا ما بحاكمهم ولا بنتقص من قدر حزنهم
الكلام عن الاخلاق السودانية والعادات وكدة
يا ودو عادي جدا في السودان بتم رفض تعزية احدهم اذا كان قاتل مثلا . طبعا هو بكون في الحراسة لكن بتم رفض تعزية اسرته . بدون شتايم او مواجهة يا رسلو ليهم ما تجونا او جوهم وقالوا ليهم ماعندنا بكا ورفضوا يشيلوا الفاتحة
وهو سلوك معروف وغير مستغرب لا من اهل الميت ولا اهل القاتل
ف شنو
برضو مايزايد علينا بالسلوك والاخلاق السودانية
شفت ؟ شفت ممكن نصل لي وين في النقاش
امر محزن حقيقي
والاحزن منو ان يجي كلام زي دة من اهل الموتي
رغم كل الشعب السودان عدا الكيزان بعتبرو هم اهل وجعة

يا ودو انا بتكلم عن فهم حتي لو افترضه افتراضا
بعدينك ياخ تسأل الزول تقول لاقاهو كلام ورد عليهو
وقت يقول ليك مالاقاهو تقول ليهو هذا لاينفيه!!
يا ودو
الاشارة بتاعتك دي من البداهة البدائية جدا ياخ
واتيانك بها يؤخر الحوار ويحصره

Quote: يا ودو ليه بتفترض رأي الزول دة هو رأيه فقط لما حدث وتجي تحاكم افراد وتعمم عليهم؟

ما فهمتها دي يا قريبك
وانا لا اعمّم, أنا اعني من زايد فعلا على ما جرى ولام بل خوّن اهل الشهداء بإذن الله
وهذا ليس تعميما بل تخصيصا, انت مثلا قلت "وددت لو أن ... إلخ" و اكتفيت بهذا ولم تخوّن أو تلوم أو تنظّر للناس ماذا يفعلون أو تحاكم أحد إذن انت خارج دائرة المعنيين بالبوست! أين التعميم هنا

التعميم في اننا ننقاش الامر لو صار ظاهرة تستحق الوقوف عندها ولا نفتح بابا للخلاف من اجل اراء مفردة ونادرة
نقاش الامور المفردة احيانا يعممها ويلقي بظلاله عليها
مثلا
في قصة التراث الشهيرة الزول الركب معاهو منقطع ثم سرقه فناداه المسروق
امشي لكن ما تحدث زول خوف من انقطاع المروءة

كم تعليق سالب يعني مطلوب حتى يتم النقد و الرفض؟
اضمن ليك خمسة حتى الآن, أنا قريت تلاتة وود ابراهيم قول قرا واحد وعلى ضوءه كتب البوست و صاحب الرسالة قول قرا او سمع تعليق واحد برضك !
دا كلام غريب يا قريبك, تعليق واحد سلبي يكفي لنقده, مثلا حديث الترابي المنسوب للرئيس موضوع اغتصاب الجعلي للغرباوية كان يحتاج كم تعليق او حديث شبيه ليصبح ظاهرة ويتم نقده في رأيك؟

مالك يا اود اب سن الليلة! ما عهدتك بتجادل ساكت كدا لخاطر الجدل فقط!

ود اب سن حرّق روحك مش ؟
المهم زي ما قال ود المشرف
اختلفت زوايا الشوف والحزن واحد

تحياتي يا بشرى وزوارك

وهل الترابي زول واحد ؟
ابدا ودو
لكن في هذه اللحظة سيصرف انظار الناس عن التعاطف والوحدة

حراق روح اكتر من الكارثة نفسها يا ابوعاقلة! ما اظن

يا ود اب سن من صرف النظر عن التعاطف هو من حاول المزايدة على المناصير ابتداء و خوّنهم و حمّل جراحهم اكثر ممّا تحتمل
و التعاطف و الإحساس بألم وعظم المصيبة ليس امرا ثانويا تصرف الحقيقة الناس عنه
قصة لا صوت يعلو فوق صوت المعركة أو ادفع الاوساخ تحت السجادة دي اثبتت فشلها.

المسؤول عن هذا الخطأ القاتل هم ناس الشرطة وسائق المركب.
الشرطة عليها ترخيص هذه المركبات والتأكد من وجود حاجات السلامة في حالة الطوارئ،
سائق المركب وغيره مستهترين بأرواح الناس
الآن بهد ثورة الصناعة الصينية، ملابس الطفو لا تكلف شيئاً.
في السودان الناس جاهلة جهل مريع بإجراءات السلامة على كل المستويات

قبل أيام دخلت شندي خمسة صباحاً
انتظرت بالعربية لحدي محطة الوقود تفتح،
نزلت من العربية ماشي أشرب شاي
لاحظت جزء من المظلة آيل للسقوط
رجعت زحيت العربية مسافة أمان
وأنا بشرف في الشاي سقطت

قلت في سري
حتى بعض القدر عندو دواء

وما هو الخطأ في مطالبة أهلنا المناصير برفض استقبال القاتل البشير؟
شخصيا أدعو كل المتضررين في أي منطقة بالسودان لعدم استقبال البشير
ولن أكون في حاجة لتبرير دعوتي هذه. كما أرفض أن أوصف بالمزايد

وبالمناسبة الرفض حصل على نطاق واسع في المنطقة المنكوبة
دون حاجة أو انتظار لمطالبات (المزايدين)

وهؤلاء الذين ظهروا في الفيديو ليسوا هم جميع أهالي المنطقة
كما أننا لا نعرف ما في نفوسهم
كونهم حضروا عزاء البشير لا يعني عدم رفضهم لزيارته

بالمناسبة كتبت مداخلتي هذه مسنودا بتواصل يومي
مع أقاربي وأصدقاء ومعارف من أهل المنطقة

طالب بي راحتك من حقك ومن حقّهم اخذ الخيار البريّحهم
لكن لمّأ تخوّنهم على ضوء خيارهم الما عجبك و تلومهم وتصفهم بالجبن وبيع ارواح ابنائهم دي مزايدة ومرفوضة بالطبع
فإن فعلت فلا اسم يصف هذا الأمر سوى المزايدة, وإن لم تفعل لا احد يحجر عليك حق "المطالبة"

وما هو الخيار البريحهم الذي فعلوه يا ود البشرى؟
لم يذهبوا لاستقبال البشير عند مهبط الطائرة ولم يهتفوا له
قاعدين في خيمة العزاء ورفعوا أياديهم بالفاتحة
شوية مؤتمرجية وأمنجية هتفوا بصوت خفيض منكسر: الله أكبر

اثنان من أخوالي يعملان بالتدريس في المنطقة وحدثاني عن
حال عموم أهل المنطقة الذين رفضوا الذهاب لخيمة العزاء
بل إن آخرين تركوا الخيمة عند حضور القاتل

أنت يا ود البشرى من حقك ألا تطالبهم برفض استقبال البشير

في موكب تشييع الاستاذة فاطمة احمد ابراهيم احتج كثير من المشيعون ضد وفد الحكومة وهتفوا ضدهم بديل الحرامية...وقد اثار الحدث جدل واسع واختلاف في الرؤي...قبل كم يوم تكرر المشهد بزيارة محمد عطا لمنزل الفنان الكابلي واختلف الناس حول هذه الزيارة...المشهد الان يتكرر بشكل درامي ان يقوم القاتل والمجرم الحقيقي بزيارة اسر الضحايا وهو يعلم حالة الحزن والغضب التي اجتاحت الشارع السوداني ...الملاحظ حالة الانقسام الحادة وسط الشعب ولا ابالغ ان اقول المستفيد الاول هو النظام واهله يلعبون علي وتر العاطفة والسماحة السودانية وما يمكن ان يحدث لهم في حالة زوال ىنظامهم...بالعربي كدا مثل هذه الاحداث تعتبر بالونة اختبار لهم...نتذكر ايضا كيف اعادوا نميري للسودان وقضي باقي حياته فيه حتي توفي وتم تشييعه بهدؤ من قبل الشعب الذي انتفض عليه بدون اي محاكمة...للاسف النظام الكيزاني يخطط دايما بهدؤ وذكاء وخبث ونحن لا نفكر لانخطط ولا نتفق علي شئ يجمعنا ويوحدنا ضد نظام تغلغل في ارواحنا واجسادنا وعقولنا ...ساظل اردد نحن ماجاهزين ياجماعة....

المهم ليس من حق أحد وصف الناس بما ليس فيهم
أرفض وصفي وأمثالي بالمزايدين

طيب يا ودو to cut the long story short
ممكن نماذج لتلك الكتابات المخونة للمناصير
ويستحسن سكرين شوت

ياود البشرى خليك من الفضاءات انا المعاك دا بــلوم المناصير فى استقبالهم للبشير
حسب الدفوعات التى وردت فى مشاركتى السابقة اولاً وثانيا : لانه اتى بعد ايام ولم يأتى فور
حدوث الكارثة متفقدا لهم ومواسيا . ثالثا : ماذا قدم لهم ؟؟ رابعاً : لا بارك الله لا بارك الله لابارك الله فيك
يا البشير لا فى الدنيا ولا فى الاخرة . اوجع الله قلبك كما اوجعت قلوبنا

عدم الاحساس مشكلة فعلاً .. ومتى كان للكيزان احساس .

Quote: انا لاقتني في أكثر من فضاء اصوات تلوم المناصير على استقبال البشير

وحتى لايكون المكيال بمكيالين

على الناس ان لاتنسى ابداً طرد اهل البرارى ل نافع على نافع من عزاء السنهورى .
حتى لايقول احد من الناس استقبال من يأتون للعزاء حتى ولو كانوا اعداء عادة وقيمة سودانية .

معاوية وحفيظ
هناك تيار كراهية متنامي ضد النشاط العام المدني سواء كان نشاط حزبي أو من قبل ما يدعى بالنشطاء.. دي ظاهرة تستحق الوقوف

المفارقة أن هذا التيار يضم عدد كبير من النشطاء في الخارج .. اعتقد ان هناك جانب سيكلوجي في الموضوع .. سأحاول الكتابة عنو

بعد القبض على جيفارا، سأل قائد الحملة الراعي الذي وشى به عن سبب وشايته برجل يدافع عن حريتهم وحقوقهم؟!
فقال: لأن نشاطه يفزع أغنامه. والأعجب أنه لم يكن إلا راعي للأغنام وليس مالكها!

Quote: لم يذهبوا لاستقبال البشير عند مهبط الطائرة ولم يهتفوا له قاعدين في خيمة العزاء ورفعوا أياديهم بالفاتحة

عز الطلب يا ود الزبير وليت المزايدين راول ما رايت, ما كان ستكون هناك مشكلة تدعو اهل الشهدا بإذن الله للحديث و الدفع عن انفسهم تهم الخيانة و التخاذل!
المشكلة ان من هؤلاء من يريدون موضوعا اسفيريا للهتاف و اللايكات طالبوا المناصير بعدم قبول العزاء اساسا, ومنهم من طالبهم بالهتاف و التظاهر و كمان بضرب البشير و المرافقين له!
لكن المصيبة في من اتى بعد الزيارة يلومهم على عدم قيامهم بواجبه عنه و وصفهم بخونة دماء ابنائهم والمتخاذلين!

Quote: المهم ليس من حق أحد وصف الناس بما ليس فيهم أرفض وصفي وأمثالي بالمزايدين

قلتها ليك فوق ولا مانع من اعادتها
ان كنت زايدت عليهم فلا صفة او اسم يمكن اطلاقه عليك سوى انّك مزايد! ببساطة شديدة
شوف يلا هل زايدت عليهم ام لا والبس الطاقية المناسبة

to cut story short يا قريبك:
ان كنت زايدت عليهم فهذا امر مرفوض, غير كدا البوست لا يعنيك لدرجة ان تتحسس بالطريقة دي
بالنسبة لنماذج سكين شوت انا اطلعت على ثلاثة مساهمات بهذا المعنى احداها في قروب يجمعمنا لذا احيلك ايّاها بالنسبة للمشاركتين التانيات ليس لي حق نقلهن خارج القروبات المعنية.

اذن يا علاء احيلك للرسالة المنشورة اعلاه من احد ابناء المناصير فأنت معني بها وبما ورد فيها

نسيت يا قريبك اقول ليك ان شاء الله لو لقيت طريقة براسل ليك ود ابراهيم بفحوى سؤالك عن الذي دفعه لكتابة التغريدة المصورة اعلاه لربما وجدت عنده اجابة تريحك وتكت الستوري شورت
بالنسبة لصاحب الرسالة لم اعرفه لاراسله لك

ياودو طول بالك
انا اصلا ما بتكلم عن نفسي ولا متحسس
ولا بخاطب فيك ككاتب المقال ولكن بخاطب فيك كشخص تؤيد ما جاء فيه
اكان انت ولا القراء ولا انا عندنا قروبات وخاص وفيس بوك وغيرو . للحقيقة كتجربة شخصية لم اصادف مابين معارفي واصدقائي من ادان او خون
في المنبر هنا بتجي اخبار وبعض الناس بطالبو الكاتب بحذفها لتقديرات قد لايكون فيها صدقها او كذبها

البال طوييييل يا قريبك .. أطول من ليل الانقاذ ابو تلتين سنة دا!
لكن انت دخلتك عرض بامانة
ما ممكن تنفي حاجة انت لم تسمع بها! وتقول مافي زول خوّن او زايد على اطلاقها كدا!
قول انا ما خونت ولا زايدت أوكي بنقبلها منك ونقول ليك البوست لمن فعل
لكن تنفي كدا بس وكمان تديها كوز فقدان تعاطف و في صالح النظام!! علي اليمين بالغت
دي ذكرتني قصة شهيرة دارت هنا بطولة منعم بيجو وعمر الانصاري وبوست حذف لأسباب اضطرارية

يا ودو ولي بكرة مالاقيت زول خون المناصير
وزي ماقلت ليك فوق حكاية النفي لأني لم اعرف معلومة من البداهة بمكان الموافقة عليها لا تعني صحة ما قبلها
التخوين دة امر مختلف جدا عن
مافيهم واحد كان يعمل ويعمل
ديل ناس خايببن ساي مفروض كان يعملو ويعملو
ابسط ليك المثل
واحد بحكي ليك في قصة مع زول حقرو وتعامل معاهو بلطف شديد .. تقوم تقول ليهو مثلا
مفروض كان تتف ليهو في وشو
دة جبن منك مفروض كان
لكن ابدا ما بتعني انو خاين .. يخون منو مثلا؟

Quote: اذن يا علاء احيلك للرسالة المنشورة اعلاه من احد ابناء المناصير فأنت معني بها وبما ورد فيها

ياود البشرى رسالة المنصورى الواردة فى صدر البوست لا تعنينى فى شئ .

Quote: يا ودو ولي بكرة مالاقيت زول خون المناصير

لاقيت كم زول اساسا, كم في المية كم كتاب الاسافير الاتناولوا الموضوع دا مثلا !
طيب الزول الكتب الرسالة لاقي و سمع وقرا وعلى اساسها رد! ح تقول ليه لأ ما حصل وتنفي ليه وتقول ليه اسي انا كنت هناك وما في حاجة زي دي

يا علاء قولة انت معني تفرق عن كون الرسالة تعنيك ام لا
الأولى وردت بمعنى ان ممن وجه لهم هذا الرد على كلامهم وطريقة تفكيرهم
بالطبع انت حر في ان تراجع نفسك او تستمر في المزايدة عليهم مافي زول ح يمسك ليك عصا
لكن فقط لتعلم انها مزايدة مرفوضة

Quote: لكن فقط لتعلم انها مزايدة مرفوضة

ياود البشرى انا لم ازايد عليهم ولم استنكر عليهم استقبالهم للبشير ولم اقول بانهم باعوا ابنائهم ومشاركاتى لازالت موجودة انما الومهم فى استقبالهم للبشير وضربت مثالين مثال من الخارج ومثال داخلى :
مثال اهل متوفين جراء فساد رفضوا استقبال الحاكمين وهؤلاء غير مسلمين .. والمثال الاخر اهل المتوفين لم يرفضوا استقبال احد الحاكمين فقط انما طردوه شر طرده من صيوان العزاء .
وثانيا وهذا هو الاهم : جلبت مقطع فيديو خاص بقناة الجزيرة حيث ورد في المقطع ما يدل على ان البشير وحزبه لهم يد فى مقتل هؤلاء الاطفال وفيما حاق بالمناصير من اضرار بالغة فى مساكنهم وارزاقهم .

خلاص يا علاء لوم ما مزايدة
لا يمكنني بالطبع التحدث بلسان المناصير, لكن لو كان المر متعلّق بي فلتعلم ان حتى هذا اللوم ارفضه!
فأنا ادرى بحالي ومواقفي ولا انتظر تنظير او وصاية من أحد يورّيني اعمل شنو وما اعمل شنو, ولا اقبل المقارنة بآخرين فقراراتي وخياراتي نابعة من ارادتي أنا لا تقليدا أو تأسيّا بأحد
والأهم من ذلك, اعلم جيّدا من قتل ابنائي أو تسبب في ذلك ولا انتظر تقرير من الجزيرة او بوست في سودانيز!
هذا عنّي أنا

Quote: لكن لو كان المر متعلّق بي فلتعلم ان حتى هذا اللوم ارفضه!

وانا ايضا يا ود البشرى لو كان الامر متعلق بى والله ثم والله ووالله لطردت البشير شر طردة .

كثير من كتابات التيار الانا اتكلمت عنو كانت تدور وتنتقد حديث البعض عن انعدام الوعى عند الذين تقبلوا العزاء من اهالي الضحايا ..

بمعنى انو اصلا (اغلب الكلام) ما كان عن تخوين الخ الخ .. اغلب الكلام كان غضب من اتهام الناس الاتلقت العزاء بانهم ما واعين ..

كلام محمد البشرى عن تخوين واتهامات ببيع موتاهم الخ كلام مدان .. بس السؤال الكلام ده كان وين وحجمو شنو عشان يثير موجة من الاستياء ؟! تفتح الفيس تلاقي كم بوست عن (لماذا المزايدة على المناصير) .. تفتح سودانيز تلاقي (لماذا المزايدة على المناصير) .. المزايدة الرهيبة دي كانت وين؟!

شكرا يا ود البشرى ويديك العافية

بعض الذين كتبوا عن المزايدة هم من مناصري نظام القتلة
عايزين يزعموا وجود حاجة غير موجودة وهي
أن أهل النكبة استقبلوا القاتل
وهذا زعم كاذب وللأسف مرّ على الكثيرين من أصحاب النوايا الحسنة

ثم هناك سؤال و أوجهه هنا لزميل المنبر الباشمهندس محمد إبراهيم
الذي تشهد مداخلاته في هذا المنبر بمعارضته الشرسة لهذا النظام:
لماذا لا ننتظر من أهل النكبة أن يطردوا رئيس العصابة القاتلة
نيابة عنا أو أصالة عن أنفسهم؟؟
أليس هذا هو الفعل الطبيعي المنتظر؟
أليس من الطبيعي أن ترفض استقبال من كان السبب في قتل بناتك وأبنائك؟
لماذا لا ننتظر منهم ذلك؟
أليسوا سودانيون عانوا من هذا النظام مثلما عانى بقية السودانيين؟
ألم يفعلها غيرهم من قبل؟؟!

ههه بدأت افهم مشاعر صفية مثلا حين تحدثت بما جرى لها وكذّبها الدجاج الالكتروني و آخرون كونهم ما شافوا بعيونهم !!

Quote: بعض الذين كتبوا عن المزايدة هم من مناصري نظام القتلة عايزين يزعموا وجود حاجة غير موجودة وهي أن أهل النكبة استقبلوا القاتل وهذا زعم كاذب وللأسف مرّ على الكثيرين من أصحاب النوايا الحسنة

هناك معضلة منطقية في العبارات اعلاه, من زعم نجاح استقبال البشير هو من اعترض عليه ولام / طالب / عاتب / زايد أو خوّن المناصير ابتداء!
وهؤلاء نظريا معارضين شرفاء .. إلخ إلخ طيب كيف يقفون مع مناصري القتلة نفس الموقف

المعضلة الأخرى .. ولاّ خلّيها اسّي

ما فهمت كلامك يا ود البشرى، لكن عايز أسألك
انت مؤيد للاستقبال سواء أكان مزعوما أو حقيقيا
ولّ زعلان لهذا الاستقبال وعدم طرد المجرم وكنت تتمنى أن يُطرد؟

اشرحو ليك ما مشكلة
انت تقول بعض من كتبوا عن المزايدة هم انصار النظام وعايزين يروجوا لكذبة حدوث استقبال ثم اعتراض بعض الناشطين عليه ومزايدتهم بذلك, صاح كدا!
طيب التناقض ان اول من كتب عن حدوث الاستقبال هم الناشطين ديل الذين اعترضوا عليه ومنهم من زايد وخوّن، إلخ حتى من بعد جاء انصار النظام وكتبوا عنه
يبقى دو ذا ماث وشوف من الذي روّج للكذبة او موضوع الاستقبال ابتداء!!
بالنسبة لسؤالك, لو القصة تمنّي كنت اتمنى ان مش فقط يعترض المناصير على حضور الرئيس للعزاء بل يحرجوه و يرفضوا رفع الفاتحة معه وممكن اسرف في التمني بأن يقوم احدهم بصفعه على قفاه إن لم يكن اكثر من ذلك
لكن وحيث ان هذا لم يكن خيار اهل الوجعة بحشي خشمي قش و احبس امنياتي داخلي لا بلومهم ولا اعاتبهم وبالطبع لا اخوّن او ازايد عليهم.
هذه الاجابة تقديرا ليك يا ود الزبير لو كان واحد تاني ما كنت اجبت او سمحت له باستجوابي هكذا

أشكرك على التقدير يا ود البشرى
دعنا نحتفظ بطاقتنا ليوم فعل وعمل على الأرض
وكل سنة وأنت بألف خير رغم المآسي والإحن