Post: #1
Title: تاني 4848 تبا لكم
Author: عبدالحفيظ ابوسن
Date: 07-14-2018, 08:06 AM
08:06 AM July, 14 2018 سودانيز اون لاين
عبدالحفيظ ابوسن-no where
مكتبتى
رابط مختصر كهربتي في السوق امس الصباح قطعت
زمان كان في عدادات ثابتة . لو كملت بتقرا صفر . عدادات ممتازة جدا . وحسب كلام مهندس قال ما بتبوظ ابدا . مدي الحياة
المهم الظاهر واحد من الجماعة استورد عدادات متحركة بي حجار بطارية ووصلة كهرباء . ولازم الحجار تكون جيدة جدا جدا وجديدة .. يعني غالية جدا . وطوالي تكون غازيها في الكهرباء حتان تقرا معاك
المهم حسب ما ناس الكهربا شالوا كل العمال المهرة القدام للشارع وبدوا يشغلوا شباب صغار عمالة مؤقتة للصيانة
اقل مشكلة في العداد يركبو ليك عداد ابو وصلة وتبدا معاناتك
اول شي تسك كهربتك المدخلها زمان لانو عداد جديد بي نمرة جديدة
اها
امس الصباح كهربتي قاطعة وكمواطن بسيط ومطيع ضربت 4848 من حر رصيد تلفوني
وبلغت
نشكرك لاتصالك ورسلو لي رسالة
من امس الصباح
وحتي هذه اللحظة اشيل وارجا فيهم ما جو
ضربت من حر مالي
لا والله ما بنقدر نرفع بلاغين .بلاغك ياهو دة قاعد لكن ما تشفق بصلوك
وكمواطن بسيط مطيع بقول ليهم
تبا لكم ثم تب
وتبا لمن جعل هذا يحدث لنا
|
Post: #2
Title: Re: تاني 4848 تبا لكم
Author: عبدالحفيظ ابوسن
Date: 07-14-2018, 08:27 AM
Parent: #1
لامن يستبدلو ليك عداد جديد اصلا ما بكون استبدال
بركبو ليك عداد جديد بي رقم مختلف
عدادك القديم بكون فيهو كم متر كهربا حقتك . اها بتروح عليك . مفروض تلقائيا تنزل ليك
بدوك كم متر مع العداد الجديد وبتقابلك مشكلة لامن تجي تدخل كهربا جديدة . ما بقبلها . تضرب 4848 يقول ليك امشي المكتب
تمشي الكتب يدوك 20 رقم تدخلهم اول حتي يقبل ليك كهربا جديدة
والموضوع ما بتم بسلاسة كلامي دة
روحك بتنسل عديل وزمنك بروح
يعني بي قروشك ما ترتاح معاهم لازم ينجضوك ويقعدوك في علبك
ودة اصل الحكاية
وضروري النضال
|
Post: #3
Title: Re: تاني 4848 تبا لكم
Author: عبدالحفيظ ابوسن
Date: 07-14-2018, 08:48 AM
Parent: #2
4848
دة رقم في الخرطوم . يعني كل السودان يبلغ في الخرطوم
وعادي ممكن يكون بلاغك رقم مية وحاجة . وتقنب تنتظر . وتقريبا ما متأكد حصلت لي كم مرة . بعد عشرة دقايق من الانتظار السيستم بطلعك وتضرب تاني وبرضو ممكن تلقاهو مية وحاجة ودة كلو من جيبك
زمان البلاغ محلي
بتضرب الزول البرد بكون من كوستي وبعرف الاحياء والتفاصيل
هسة بتاخد زمن في توصيل معلوماك
مرة واحدة قالت لي كوستي ياتو ولاية ؟
دة لو سمعتها كوستي فعلا
والاسم برضو
صاح النظام القديم كان فيهو معاناة يعني عادي تضرب ما يردو
ولا يختو السماعة برة
ولا معاكسات للنساء لامن يضربن
لكن حكاية كديس ضنبو في الابيض وراسو في الخرطوم دى فيها معاناة وقلة قيمة للمواطن
ملحوظة
لو مشيت مكتب كوستي بقولو ليك ما بنستقبل بلاغ اضرب 4848
|
|