البشير دا ممسك ضنب الككو لي منو !!!!!

09:46 PM June, 13 2018

سودانيز اون لاين
Salah Zubeir-UAE
مكتبتى
رابط مختصر

يجغم في القهوه مع كنق سلمان ...
وهاك يا تبسم وقرقرابا ...
البلد الحياه فيها وقفت دت من
زمن الرغيفه بقت بي الف جنيه
مرورا" بي أزمة البنزين وازمة
غندور مرورا" بإعلان وزير المالية
علي رؤوس الأشهاد بافلاس البلد
وخلو الخزينة من الدولارات وتاني
يوم للإعلان البشير ينزل في المدينة
المنوره معتمرا" ومتمتعا" بالإجازة
مع أسرته وأطفال أسرته ...
تصرفات رئيس جمهورية البلد فيها
مليون إننا (علامة شدة للنون مافي)
سمعت تحت تحت يوم ٢٢ ... في شنو؟؟؟ !!!
حكاية كوز وأمن شعبي معاي ما
لافقه ...
ليكم اللحم والعضم زاتو اهرسو ...
يتبع

سلامات صلاح

ما تستغرب دي تصرفات عادية...التسلط و الدكتاتورية مراحل
فيها النكران ، عدم الاحساس و التبلد ، رمي اللوم على الضحايا
اوهام العظمة و تضخيم الذات.
تعرف هسي شعور شنو؟ انه لا زال المنقذ و المخلص و صمام الامان.
طبعا الحاجات نتيجة الاوهام و بطانة السوء.
التاريخ كلو سير و عبر لكين منو البيعتبر

سلام ياصلاح اخوي وعيد ينعاد عليك بالخير والبركة
غايتوا بعد كلام وزير المالية الذي اعلن فيه الافلاس
نحن الشعب ماقادرين نستقر علي امر خلي بشة
شايل البنية وكوم حروم معاه في العمرة كانه البلد
مستقرة غايتوا ود الباوقة المفروض يخجل ليه مادام
هو بقي مابخجل

البشير زاااااااااتو مسكوه ضنب الككو .....
بلد مافيها كاش و مافيها بنزين و مافيها اي شي ...
و هو سايق اهلو و حايم بيهم ... ؟؟؟؟
البلد الله يكون في عونها ....

البشير دا ممسك ضنب الككو لي منو .. !!!؟
ما أظن يكون الشعب السوداني أحد اهتماماته
لانو (الدبر) الفي ضهر الشعب قديبيييم محصول
٢٩ سنه ... ما أظن يكون حاسس بي عمايلو
فيهو ... هسي انفناستو بالاموره الشايله دي
في زول بقول عليهو دين ولا جروره من الدكان
الفي الناصيه ....

Quote: يجغم في القهوه مع كنق سلمان .

صحي ... كويس برضو

البشير دا ممسك ضنب الككو لي منو ..!!!؟
ياربي يكون داير يشق المعارضين كافه
بالمغسه البيشيل ويغرغره ليهم بالسنين ...
قطع شك المعارضه ما عندها حساب
نهائي فاتحاهو في دفتر النظام ولا
حتي راتب معاشيين ما عندها ...
بعدين المسك دا مو دايرلو يدين
وعضلات ... هههه وووين للتبش دا ...

البشير دا ممسك ضنب الككو لي منو ... !!!؟
طبعا" ناس النظام والمؤتمر والشعبي
والإسلاميون كافه ياهم القاعديين
تحت شجرة عمر والداير يشوفم
يمشي يراجع قوايم المسافرين لي
مكه واستطنبول و كوالالمبور ودبي
وباقي الشعب قاعد في هجير بلدنا ..
اها الككو دا ما ليهو عولاقه بالبلد
وناس البلد سواء معذبين ولا
متمتعين .... يبقي ضنب الككو دا
ماسكو منو يا الله ...
غايتو من سير الأحداث منذ
إعلان ميزانية ٢٠١٨ الي الآن
تشير بوضوح لإدراج هذه الأحداث
كأدلة في ملف التفاوض المزمع مع
المجتمع الدولي (امريكا وحدها لا
شريك لها) يوم ٢٢ (يونيو أو يوليو)
لبلوغ الأهداف الآتية :-
١ :- رفع إسم السودان من جدول
الدول الراعية للإرهاب مما يتيح
للحكومه الآتي:-
@ المطالبة بي شطب الديون
@ المطالبة بي حقوق السودان في
التمويل من الصناديق الدولية وحتي
الإقليمية....
@ فتح القنوات الدولية للتحويلات
الماليه من وإلي السودان ...
٢ :- التطبيع الكامل مع المجتمع الدولي
ولا مانع من عربون محبه بإعلان عدم
ترشح البشير لأي إنتخابات جديدة.

Quote: سلامات صلاح ما تستغرب دي تصرفات عادية...التسلط و الدكتاتورية مراحل فيها النكران ، عدم الاحساس و التبلد ، رمي اللوم على الضحايا اوهام العظمة و تضخيم الذات. تعرف هسي شعور شنو؟ انه لا زال المنقذ و المخلص و صمام الامان. طبعا الحاجات نتيجة الاوهام و بطانة السوء. التاريخ كلو سير و عبر لكين منو البيعتبر

تحياتي ناصر ....
ياخي ما أظن في حاجه فايتا
عليهو ... وهو عارف السودانيين
ناقشنو كووويس لكن مشكلتو إنو
ما قادر يفرق بين الفساد والحق
المكتسب بي سبب وظيفة أو
قرابه ... هسع خلي البيعمل فيهو
هو ... وشوف كمية الفساد البيعملو
فيهو الدكتوره مرتو واخوانو أولاد
امو وابوه .. حاجه فعلا" مقرفه ...
انا غايتو (شفتا) الفساد الجد عاملنو
برا السودان لكن جوا البلد إلا اللسته
بتاعت دكتور التجاهل ...

Quote: سلام ياصلاح اخوي وعيد ينعاد عليك بالخير والبركة غايتوا بعد كلام وزير المالية الذي اعلن فيه الافلاس نحن الشعب ماقادرين نستقر علي امر خلي بشة شايل البنية وكوم حروم معاه في العمرة كانه البلد مستقرة غايتوا ود الباوقة المفروض يخجل ليه مادام هو بقي مابخجل

مرحب حبابك محمد وربنا يتقبل منك
الطاعات وكل الدعوات وعيدك مبارك وسعيد ...
والله يا محمد لي فترة بفكر ومنتظر
الزول الأهبل دا يطلع في التلفزيون
من شهر يناير مع ظهور الميزانية
الكارثية دي ويقول للناس أي حاجه ...
حتي الكضب استكثرو فينا .

@ المطالبة بي شطب الديون
@ المطالبة بي حقوق السودان في
التمويل من الصناديق الدولية وحتي
الإقليمية....

---------------------------


سلام يا صلاح

كل سنة وانت طيب

يا عزيزى اى حديث عن شطب ديون وتمويل خارجى في هذا التوقيت يعنى ضخ دماء جديدة لهذا النظام من اجل استمراره ..

هذا النظام ما كان محروم خالص من قروض ومنح خارجية وهنالك مشاريع خدمية قامت في عهده بقروض ومنح لكن المنجز في ارض الواقع ما كان بحجم هذه القروض والمنح وذلك بسبب الفساد وزاد حجم الديون في عهده بمتوالية هندسية والقروض دى كلها أتت في الزمن الذى كانت عائدات البترول بمليارات الدولارات شهريا لكن الفساد هو الذى اتى بالقروض في ذلك التوقيت وزاد من حجم الديون دون اى ان يكون هنالك اى منجز مجود في ارض الواقع وما تنسى بان كل ديون السودان في عهدى مايو والإنقاذ والإنقاذ هو صاحب النصيب الأكبر بنسبة 70% من حجم الديون .. عليه اول حل ان يذهب هذا النظام غير ماسوفا عليه ومن ثم تشكيل حكومة انتقالية تسعى لحل مشاكل البلد السياسية لانو المشاكل السياسية هي التي أدت الى عدم الاستقرار الاقتصادى بجانب الفساد في دولة الاخوان المسلمين وهى التي أيضا أدت الى الحروب وغياب السلام والامن وذلك بقيام مؤتمر دستورى يشارك فيه الجميع من اجل اعداد دستور دائم يعطى كل ذي حق حقه ويبنى دولة العدالة والمواطنة المتساوية لجميع الشعب السودانى بصرف النظر عن جنسهم ودينهم لانو اى حكم دون ان يطبق هذه المطالب حكم سوف لن يستمر ولن يستقر ولن يكتب له النجاح وحنكون في نفس الدوامة حتى لو وجد هذا الحكم القبول من المجتمع الدولى .. قبول الداخل وصاحب الشأن اهم من قبول الخارج ولن يستطع الخارج في مساعدة الحكومة في الاستقرار والسلام وتنمية البلد في ظل غياب المواطن وهضم .

Quote: البلد الله يكون في عونها ....

حاج العوض ... العيد مبارك عليك
وربنا يديك الصحة والعافية ....
ياخي ونعم بالله ... بس ساعدو
إن شاء الله بي جكه بس ...

Quote: صحي ... كويس برضو

قال ليك لو عايز تقضي ويك أند بدون
ما ينادوك للشغل تتبع القولدن روول
تكلم جماعتك يوم الخميس إذا لقو
اي حاجه فاتحه ما يقفلوها وإذا كانت
مقفوله ممنوع فتحها ...
هسع مداخلتك دي حا نخليها كدا
هو الواحد ضروري يكون فاهم
كل حاجه ....

Quote: ٢٩ سنه ... ما أظن يكون حاسس بي عمايلو فيهو ... هسي انفناستو بالاموره الشايله دي

كل سنة و انتم بخير يا اخ صلاح
أضف كمان الإبتسامة اللزجة الشمتانة، الممكن تتفسر بي ( تستاهلوا اكتر من كدا، و قاعد على قلبكم الى الأبد بعد الإنتخابات) !
اللهم يا رب زدهم ذنوباً، و أرسل عليهم عذابك و غضبك وخذهم أخذ عزيز
مقتدر ، اللهم دمرهم فرداً فرداً، اللهم ألهمنا القدرة و الحكمة لنقتلعهم حتى لا يبق منهم أثر. آمين.

أخونا خالد حاكم .. تحياتي وتعود الأيام
عليك بي موفور الصحة والعافية وعيد سعيد ..
والله يا خالد المطالب دي لو متحكم
فيها الشعب السوداني كان عمل لي
عمر البشير حبس بول وحبس إست ..
أمريكا والغرب عندهم مصالحم التي
لا تعنينا بي نكله وما بهمهم مين
يحكمنا ... بعدين مؤتمر دستوري دا
ما يكون حق الإمام ... غايتو أكان علي
احزابنا دي أخير لينا عسكري ديكتاتور
معاهو ٧ ضباط كلو واحد شايلو مطرق
ونبقي ناس شغل وإنتاج وأي واحد
يخستك يدوهو فوق رويسو ... البلد
شبعت تحزب وتنظير (١١٤ حزب) ...

Quote: اللهم يا رب زدهم ذنوباً، و أرسل عليهم عذابك و غضبك وخذهم أخذ عزيز مقتدر ، اللهم دمرهم فرداً فرداً، اللهم ألهمنا القدرة و الحكمة لنقتلعهم حتى لا يبق منهم أثر. آمين.

اللهم آمين ... اللهم امين يارب ...
دكتورة نعمات امنياتي ليك بي
موفور الصحة والعافية والخير
الكتير والسعادة ... وعيدك سعيد

الاخ Salah Zubeir وضيوفه الكرام عيدكم مبارك..
ضنب الككو ماسكنو ناس المعارضة قدر ما تكتم علي الكيزان وتتفائل المعارضة بقرب نهاية النظام بقدرة قادر يتخارجوا منها..
ديل لا بموتوا ولا بفوتو..

عيدك سعيد يا عارف ناشد وتمنياتي
ليك بدوام الصحة والعافية ...
وشكرا" علي المرور ...
تحياتي واحترامي ...

الشعبية ي حبيبة
فعلا كنت من سكان الشعبية لا اذكر في أي مربع ولكننا تركنا الشعبية تقريبا عام 76 او 77 علي ما اذكر كنت اسكن في آخر الشعبية ومنزلنا يفتح علي ميدان فريق الشعلة وكنت حينها العب في أشبال الشعلة وكان قريبا لها منا وداعة وصلاح الحلبي يلعبون في الشعلة وكان يدربنا الكوتش كابوس لاعب شمبات..
كان وقتها يأتي لمنزلنا يحمل بسطونة ويجرنا للتمرين لأننا كنا نتهرب من السويدي وطبعا الزمن داك أخوك كان منقطة احاورك في فنجان ههههههه.
بعد داك صلاح طيارة لو تذكره عمل ليهو فريق اسمه النجوم وسجله في الرابطة..
ياااخي ذكرتنا بماضي جميل وأيام لا تنسي..
والله الكورة كان لنا معها مشوار وذكريات...