Post: #1
Title: يا جماعة هسع في داعي لي تغيير ورقة العملة ام 50
Author: Osman Musa
Date: 06-08-2018, 08:28 AM
08:28 AM June, 08 2018 سودانيز اون لاين
Osman Musa-
مكتبتى
رابط مختصر تاني جرجرة و تاني صفوف فوق لي الصفوف الما انتهت
و تاني تعطيل للناس وللانتاج الماجايب حقو . و حر و فتح حسابات و امشي جيب وتعال باكر . و السستم عطلان و المدير مافي . شنو الداعي .
|
Post: #2
Title: Re: يا جماعة هسع في داعي لي تغيير ورقة العملة
Author: Osman Musa
Date: 06-08-2018, 05:03 PM
Parent: #1
الموضوع شرك
|
Post: #3
Title: Re: يا جماعة هسع في داعي لي تغيير ورقة العملة
Author: منتصر عبد الباسط
Date: 06-08-2018, 05:06 PM
Parent: #2
شافو الناس الحجزو قروشم واتحكموا فيها ساكتين
دا الطمعهم في نصب الشراك للبقية.
|
Post: #4
Title: Re: يا جماعة هسع في داعي لي تغيير ورقة العملة
Author: elsawi
Date: 06-08-2018, 05:18 PM
Parent: #3
سلام اخي عثمان موسى و سلامات لضيوفك و كل عام و الجميع بخير
دعني اورد لك ما كتبه الأخ عصام حسن في منبر الحوار الحرعله يوضح
لك و للإخوة و الأخوات القراء الأسباب الفعلية لتغيير ورقة العملة
Quote:
بداية العذاب الفعلي للمواطن وفتح ابواب كبيرة للفساد
عصام حسن - منبر الحوار الحر
الملاحظ ان منشور بنك السودان الخاص بالعملة الجديدة مافيهو سيرة للاستبدال .. يعني لو عندك حساب تمشي تورد قروشك وتطلع فاضي غصبن عنك.. ولو ما عندك حساب يشيلوها منك ويفتحوا ليك حساب ويقولوا ليك مع السلامة.
كالعادة الجماعة ديل لا يمكن يطلعوا قرار صحيح ولازم يكون غلط ويعذب الشعب!!
أول حاجة إنت لو طبعتا عملة جديدة مفروض تكون بفئة أعلى زي ألف جنيه وخمسمية جنيه مش تعيد طباعة ابو خمسين تاني!! العملة اتدهورت ولازم تكون في فئات كبيرة تسهل للناس التعامل ولكن اعادة طباعة ابو خمسبن يوضح ضعف الرؤية والتخطيط المستقبلي وتبديد إمكانيات الدولة في طباعة عملة ما بتراعي الحاجة الفعلية لتسهبل التداول ولا بتستصحب اي رؤية مستقبلية.
تاني حاجة واضح ان القصد من القرار مش سحب عملة مزورة زي ما قالو لكن القصد هو إستعادة السيولة الهربت من البنوك باستخدام القوة عن طريق ارغام الناس على توريد السيولة العندهم بدون مقابل او يمكن بمقابل ضعيف قد يكون 10-5% فقط.
وعرفنا من مصادر متعددة ان الشهر ده كتير من المؤسسات تاخرت في صرف مستحقات العاملين (البيتم صرفها كاش) لانعدام السيولة بشكل كامل في البنوك علشان كده عايزبن يستعيدوها بالقوة لأن الطباعة ح تخلي الجنية يواصل في التدهور بشكل مريع.
لو كان القصد هو سحب عملة مزورة كان ممكن يتم طباعة كمية كبيرة من العملة الجديدة اولا تكفي الاستبدال وسحب القديمة تدرجيا مع فتح الباب للإستبدال لكن الواضح حاليا ان العملة الجديد ماطبعت بقدر كبير بيكفي الاستبدال ومافي عمليات استبدال ح تتم والبيتم هو ارغام الناس بالقوة على توريد السيولة العندهم للبنوك دون استبدال.
وواضح ان العملة الجديدة ما ح تتوفر إلا بقدر قليل جدا وفي سداد الاستحقاقات الحكومية فقط زي المرتبات.
الآثار الكارثية المتوقعة للقرارات العشوائية:
1- نتيجة التخبط والقرارات (الديكية) دي ح تكون خنق السوق و(شنق) المواطن بصورة قاسية بايقاف كل التعاملات وح يضرر المرضى ويموت الناس المحتاحين عمليات وحتى شراء الطعام والشراب ح يكون مستحيل بتجفيف السوق من السيولة.
2- وفي اطار مقاومة الناس لتوريد السيولة العندهم للبنوك ح تظهر عمليات غريبة وهي شراء العملة الجديدة بنسبة من العملة القديمة وح يستفيد من الغباء والعبط والقرارات الديكية دي ده عمال البنوك والناس النافذين في المؤتمر الوطني ويحققوا ثروات ضخمة من بيع العملة الجديدة… وممكن ابسط فراش في بنك يبيع 800 الف بمليون ويحقق 200 الف فايدة في دقائق واي موظف بنك ممكن يبيع 20 مليون ب 24 مليون ويحقق 4 مليون (4 مليار بالقديم) فايدة في دقائق.
علشان كده الناس مفروض تنتبه وتكون حكيمة وهادئة وتبحث عن بدائل وما تجري تورد السيولة العندها وتقعد تتلفت.
المشكلة الكلام القلناهو فوق ده والآثار السالبة دي انا اتحدى متخذي القرار انهم عملو حسابها وتخوطوا ليها او حتى مجرد خطرت بعقولهم او توقعوها … لان عقولهم قاصرة عن فهم اي شيء واداراك اي شيء…
الديك بيظل ديك … عمرك شفتا ليك ديك بقا صقر وطار؟؟ |
|
|