تركيا تشهد طفرة اقتصادية قوية و مدهشة . صور

10:57 PM May, 26 2018 سودانيز اون لاين
Osman Musa-
مكتبتى
رابط مختصر الاقتصاد التركي يشهد طفرة ضخمة . و بعد شهور قليلة ح يتابع العالم كلو افتتاح مطار اسطمبول الجديد . المطار الاضخم في العالم . و ح تقوم مكان مطار اتاتورك الحالي تاني اكبر حديقة في العالم .
..
نحاول نقل صور من المطار الجديد . والكتير من ناطحات السحاب
وكتير من المدن الجميلة في تركيا

الطفرة الصناعية في تركيا شاملة . لكن
في المدن الحدودية الشرقية النهضة الصناعية واضحة
اكتر . بعد دخول حوالي 5 مليون سوري . تركيا تطور
عجيب في المدن التركية وحركة تجارية رهيبة .

مطار اسطمبول الجديد يعتبر اكبر مطار حديث في العالم .
بي امكانية خدمة 200 مليون مسافر في السنة . المطار تحفة معمارية
مدهشة . يطل علي بحر مرمره .

بلاد جميلة تركيا .
في مطعم اسمو كالابيرا . المطعم ده في مضيق جالانا كوبرسي . في منطقة
فيها مناظر رهيبة . المطعم ده مليان زباين 24 ساعة . طباخين من الشرق
والغرب . سمك الغرنار بالجرجير و الروبيان و سمك الترس وحتي ملاح
الكرارة السودانية . الاتراك بقولوا انو المطعم ده بيقع في اجمل نقطة علي
مضيق اسطمبول .

واضح جدا ترحيب الاتراك بي السوريين الهاربين من الجحيم .
و واضح جدا دعم السوريين لخدمات المعمار و التصنيع والريل استيت .

كنت محظوظ انو الليلة الاحد . و في عطلة الاحد لا بكون في شغل لا وجع راس
. الحمد الله قدرت الليلة الاقي فرصة في واحدة من رحلات اليخوت
البحرية للسياحة والفرجة في مضيق البسفور .
و في التل .
ومن خلال الرحلة دي ممكن تتفرج في اكتر من سبعين في المية من مدينة
اسطمبول زي ما بقول مرشد الرحلة .

شوقتنا اخ عثمان

يا ريت لو افدتنا معك بخيارات الفنادق والاسعار و كدا

تمنياتنا برحلة سعيدة

وفي انتظار الصور و بخاصة المطار الجديد

عزيزنا الاخ طارق سلامات
رمضان في تركيا جميل والحياة في رمضان حلوة .
ورحل السياحة المطلوبة اكتر هي رحلة الجسر المعلق .
والجسر ده بيربط مابين قارة اوروبا وقارة اسيا .
و من فوق الجسر المعلق ح تشوف القارتين الاسيوية
والاوروبية . و ح تستمتع جدا بي منظر قصر
السلاطين .
الرحلة بتاخد معاك نص اليوم و بتكلفك 30 دولار .

تركيا الان الدولة التانية بعد الصين في تصنيع و تصدير الالمونيوم
و الفيرنيتشر للعالم .

و ح نمسك ب الشرح والصور المدن التركية الناهضة في الصناعة والتجارة
ونمسك في الاول مدينة غازي عنتاب . المدينة الحدودية لي سوريا . ودي الان
من اكتر المدن الناهضة في الصناعة و التجارة والسباحة .

جزيرة الاميرات من اهم الجزر ال 9 الموجودة في بحر مرمره
في مدينة اسطمبول . بقولوا كانت في الماضي منفى للامراء والاميرات
البيزنطيين . وده البميز معمار القصور والبيوت الشامخة في الجزيرة .

نتابع

نتابع النهضة التركية الشاملة .
افتتاح اكبر المطارات في العالم
و اكبر المدن الطبية في العالم
و ثاني اكبر الحدايق في العالم

ممتع جدا المشي كداري في المتحف الاسلامي . المتحف ده ايام الدولة
العثمانية كان سكن السلاطين والامراء وموجد في المتحف سيف وشعره
الرسول عليه الصلاة والسلام .و مصحف سيدنا عثمان بن عفان رضي الله عنه
و خزينة الدولة العثمانية . المتحف من اهم المزارات التاريخية في العالم .

يا عثمان موسى كيفك ياخي ...

الليلة كنت فاطر مع صديق شغال في بانك اوف مونتريال

Vp في البنك مسئول من الإئتمان الخارجي و تسليف الدول و مشاركتهم في مشارييعها ...

الغريبة اليوم بتكلم عن انه اقتصاد تركيا مضطرب جداً ... و انهم في وضع سئ .. ما عندهم مشاريع اقتصادية قوية يقوم عليهت عماد الدولة ...

و انهم متجهين للافتراض و ما عندهم ثوابت كتيرة اتسلفوا على حسابها كغطاء ...

عزيزنا المهندس قباني سلامات
زمان تركيا كانت تعبانة . والله يا قباني اقوليك حاجة . يجوز سوريا كانت احسن
منها في سنة ١٩٨٥ .
في سنة ١٩٨٥ بدينا تجارة من اسطمبول لي لندن مع مشترين صغار . نظام
توزيع ملبوسات في شرق لندن . وكان عمل متواصل واهو علي قدر الحال .
سنة ١٩٩٥ انقطعت من السودان وتركيا وسويسرا و جيت نيويورك . وكان
الشغل مولع نار في مانهاتن ايام كلينتون شغل زي الشغل . ودخلت حرب
العراق وجات الازمة المالية . وراح من الناس راس الخيت .
اها يا قباني تركيا اليوم بتشهد نفس ايام مانهاتن في زمن كلينتون .
ايام كان ناتالي بتطلع مسرح التايم اسكوير بي الشبط ابو نص مليون
دولار ونجي نحنا المساكين نعاين لي المسافة البين الشبط و الركبة .
والله يا قباني يحكي لي امريكي بروكر صاحب مكتب في اسطمبول
قال المكتب حقهم في سنة ٢٠١٨ دي باع 3 الف شقة في منطقة مطار
اسطمبول الجديد . يازول ماشاءالله دي بلد شابة لي فوق بي سرعة .
صناعات شاملة و عندهم جودة . في حركة تجارية يا قباني ما عادية .
موظف البنك ده انساهو . لو داير تعمل حاجة احسن ليك براك تجي
تعافر يمكن ياخ ربنا يسهل عليك .
وبعدين يا قباني والله كمان عندهن جنس شاورما بي الشطة .

يا عثمان ياخي و الله زولي ما مجرد ( موظف بنك ) عادي ... :)

الرجل تحت يده قرارات بمليارات الدولارات ...و ده شغله مع الدول الزِّي تركيا ...

انت منبهر بما تراه عينك في سوق الله و اكبر و على اسكيل ممكن لسه فوقه رقشة ...

عموما يا صديقي ربنا يوفقك دائماً ... بس انا اثق في لغة الأرقام ...

دي وظيفة زولي و تركيا تقع ضمن اختصاصه

Vice President Risk Distribution - Global Trade and Banking - BMO Capital Market at Bank of Montreal

الاخ عثمان موسى.

كلام يحى قباني ده كلام صحيح، والدليل على ذلك هو أن أرضوغان يريد أن يجري أنتخابات مبكرة، الغرض منها ضمان فوزه قبل أن ينكشف أمر الاقتصاد التركي المتدهور.
تركيا في السابق يا جماعة أستفادة أستفادة كبيرة من غزو أمريكا للعراق. بالاضافة الى وصول الاخوان المسلمين الى السلطة، فهم سوف يخربون الديمقراطية العلمانية في تركيا، كما خربوها في مصر،السودان والجزائر. الكيزان كان حكموا بخربوا وكان عارضوا برضو بخربوا، في كل الحالات هم جماعة تخريبية فقط.

لا لا والله يا اخ يحي ولا في انبهار ولا حاجة .
ياخ بعد صحبة الحبيبة مانهاتن تاني في انبهار ؟
طبعا الفرق بين اسطمبول و نيويورك زي الفرق بين شربات المحريب
و البيبسي . لكن كمان يا اخوي
انا شايف بي عيني الشراكات القايمة بين امريكا وتركيا . و حركة
الطيران و الشحن و الدفسيبة العجيبة في اسواق المال . يا قباني
ياخ انا عارفك انت نهضة البلدان بتشمها شم . واكيد متابع احسن مني .
بس النهضة الشغالة بي جاي دي حقيقة .
ياريت لو بعرف اصور كنت رسلت ليك صور الناطحات القايمة بين الواطة
والسماء السابع . وانشاءالله العالم كلو يكون ابرح و اجمل .

عزيزنا الاخ دينق سلامات ورمضان كريم قبل 33 سنة يا اخ دينق كنت بمسح جزمتي ورنيش في حي لاللي بي مليون ليره بس ورنيش . عملة كانت زي الشلتوت . و عجلة الاقتصاد كانت منفسة . ونص العمال الاتراك كانوا مشتتين بين المانيا و السعودية والامارات . هسع الناس دي كلها بتساهم في حركة البناء في داخل البلد . في ده الزمن يا اخ دينق تركيا هي البلد الوحيد الفيه حركة بناء و بعد تركيا طوالي
رواندا . بتخيل .
رواندا يا اخ دينق الليلة عالم تاني . حسب قول الشافوها في ها اليومين .

نتابع الطفرة

حبيبنا عثمان موسي وضيوفه ،سلام وتحية
لست متخصصا فى الاقتصاد ولكنى متابع لصيق لما يحدث فى اسواق المال عموما
شهدت فترة الانهيار الكبير الذى حدث فى العام 2008.
الطفرات الاقتصادية ,واظنك تتفق معى ,لا يتم قياسها بارتفاع البنايات الشاهقة و المناظر الخلابة وانت منّ اهل مكةّ واهل مكة ادرى بشعابها.
اهم عامل يتم به قياس اى طفرة فى اقتصاد اى بلد ما هو بحساب الناتج المحلى

Q أهم معيار اقتصادي لقياس حجم اقتصاد أي دولة هو "الناتج المحلي الإجمالي". والناتج المحلي الإجمالي هو إجمالي قيمة جميع السلع والخدمات النهائية التي ينتجها اقتصاد الدولة خلال فترة معينة. والمقصود بسلع وخدمات (نهائية) هي السلع والخدمات التي يتم استهلاكها فعلا وليس السلع او الخدمات التي تستخدم كوسيط في عملية إنتاج السلع. فلو اشترى مصنع سيارات حديدا بمئة مليون ريال ليصنع سيارات ستباع بالسوق بـ 400 مليون ريال. فإن الرقم الذي سيدخل الناتج المحلي هو الـ 400 مليون ريال، وليس الـ 100 مليون ريال التي تمثل قيمة الحديد الذي استخدم في صناعة السيارة.
الوسيلة الأشهر المستخدمة في حساب الناتج المحلي الإجمالي للوصول لإجمالي قيمة السلع والخدمات النهائية التي ينتجها الاقتصاد هي طريقة (المصروفات). بهذه الطريقة إجمالي الناتج المحلي يساوي الاستهلاك (استهلاك الافراد) زائد الإنفاق الحكومي زائد الاستثمارات زائد الصادرات بعد ذلك يتم خصم الواردات.
ومن خلال معرفة الناتج المحلي الإجمالي يمكن حساب الناتج المحلي للفرد. ولهذا فللرقم أهمية كبرى لأنه مؤشر مفيد لمعرفة مستوى الإنتاجية لمواطني تلك الدولة كما أنه مؤشر لمستوى رفاهية المواطنين. مع ملاحظة أن الناتج المحلي للفرد لن يعطي تصور حقيقي عن إنتاجية الفرد إذا كان اقتصاد الدولة ريعية. لأن غالبية دخل الدولة ناتج من سلعة لا ينتجها المواطنون وإنما يتم استخراجها وبيعها مباشرة من دون أن يكون للفرد دور مؤثر. كما أن الناتج المحلي للفرد يمكِّننا مع معرفة مستوى النمو الاقتصادي في دولة ما من خلال متابعة الرقم خلال ثلاثين سنة على سبيل المثال، خاصة إذا تم تصحيح الأرقام التاريخية لتعكس القوة الشرائية الحقيقية وتأخذ بالحسبان مستوى التضخم.q

هذا الكوت لشرح موضوع الناتج المحلى بصورة اوضح.،
هناك عوامل اخرى تساعد على ان هنالك ذفرة فى بلد ما
و هى :
سهولة الحصول على التمويل المالى لاى مشروع دون تعقيدات بيروقراطية و دا بعتمد على ّالانترست ريتّ بتاع البنك المركزى للبلد المحدد ووكلما كان النترست ريت اقل كلما كانت الامور فى صالح وجود طفرة حقيقية ز
وجود القوانيين الاستثمارية المرنة.
واخيرا ،ذى ما ذكر دينق ،وجود استقرار سياسي مع وجود نظام قضائى لا يحابى على اساس الانتماء السياسي ،اظن دا كلو ما متوفر حاليا فى تركيا فى ظل المحاكمات الصورية للخصوم السياسيين .
،،عموما لدى رغبة اكيدة فى زيارة مضيق البسفور قريبا ..
تسلم ..

عزيزنا استاذ مرتضي سلامات
كويس . حاول زور مضيق البسفور . والمسجد الازرق
والمنارات الستة .
واديها جكة في كم مدينة وتعال معرج تاني علي اسطمبول
حتلاحظ الفرق الشاسع بين اسطمول الان و اسطمبول قبل 30 سنة
في تطور فظيع في الاقتصاد التركي الان .
وفي تطور في كل المناحي .
في الصناعة و في الزراعة و في الصادرات .