حفينا في صف التنوك و فترنا من صف البنوك

10:15 AM May, 18 2018

سودانيز اون لاين
Osman Musa-
مكتبتى
رابط مختصر

حفينا في صف التنوك
وفترنا من صف البنوك
الغاز قطع دايرين نلوك
لو قلنا حاجة بيكتلوك
سنة في الزنازين يهملوك
ما برحموك
شلوت معاو يلعن ابوك
باجوز يجوك
ما انو بس دايرين رغيف
ما بفهموك
ما انو بس دايربن نصل
ما بعبروك
ما انو بس دايرين بصل
ما بعشموك
فترنا من صف التنوك
و تعبنا من صف البنوك
....
نتابع
osman musa

تابع بالله

بتنا العزيزة تماضر الطاهر سلامات
ورمضان كريم عليك
وربنا يقويك علي الوقفة في صفوف ماكينات السحب الفاضية من قرش .
.. متابع

ههههههه ما عندي حاجة اسحبها وحياتك
لكن صف التنوك محمدني

تابع ساي

فترنا من صف التنوك
وتعبنا جرجرة البنوك
ناس الضرايب يضبحوك
ناس الذكاء وناس النفايات يخبتوك
تدفع ضروري يدفعوك
تنضم في لحظة يكلبشوك
ما برحموك .
...
نتابع

فترنا من صف التنوك
ديل في الحراسة يعلقوك
دمك ينقط يعدموك
عرقك يخرخر يرفسوك
ما بعرفوك
مهما عملت بيمسحوك
في نصهم ياخ انت ما بتعرف
صليحك من عدوك
و بضيعوك
في اي لحظة يفلسوك.
في اي لحظة بينكروك
في اي لحظة يسوطوا عينك و يطعنوك
في اي لحظة انت حشرة
وانت واجب يدهسوك
..
نتابع

لو قلت كلمة يفلكبوك
تطلع تظاهر يسحقوك
تكدح وتعرق ينهبوك
تطفش تسافر بلحقوك
تزرع وتنتج يسجنوك

عينك يا تاجر يسرقوك
تقول حرام عليكم يبشتنوك
تسكت تخليهم بالمغسة يكتلوك

سلام حبيبنا ابوعفان ورمضان كريم

تحياتي واندهاشاتي

عزيزنا محمد هارون الذي ضرب كوع ويست منستر ولبد سلامات ياخ
ديل لو بقيت لورد يلحقوك
ههههها . صعبين شديد ما بريحوك .

عبدالعظيم .
والله يا عبدالعظيم ديل في سكاتك يحسدوك
تطلع من البلد الصعب .
بره البلد هم يلحقوك
تجي بالمطار يا وقعتك ح يجمركوك
في اي حته معاك معاك بحصلوك
تعبنا من صف التنوك
وحفينا من تعب البنوك

بالله دخل لينا (يشلبوك) في شطرة مفيدة

يا عثمان ديل بمصوا دمك وبلحسوك
بالكضب والهمبتة بشيلوا مالك ومال ابوك
ديل الضمير مات من زمان بقي همهم بس يفقروك
حالفين قسم ما يريحوك.. تمشي المقابر يدفنوك
تقفل خشم بابك يجوك.. تطلع علي السوق يلحقوك
تمشي الزراعة يحصلوك.. تحرد تمش بيتكم يجوك

اخونا سفيات سلامات يا ختري .
ههههها
ديل في الدقيقة خمسة يشلبوك
زواج جماعي يكلفتوك
ما اصلو هم كايسين طريقة يمقلبوك
وتلف علي صف التنوك
حالة البلد حالة عدوك
باعونا في دلالة الزمن
ومن تاني تاني بيشتروك

عبدالعظيم
لو مره بس داير تفرفر بشنقوك
لو مره تحكي عن الرغيف ح يبشتنوك
ما جنهم هاوين بفرحة يكلبشوك
زهجنا من صف التنوك
و حفينا في صفوف البنوك

نتابع الوقوف

فترنا من صف البنوك
و تعبنا من هادي التنوك
بلدي الخسارة يكسروك
بلدي الحقارة بمرمطوك
بلدي الجعان و ملان عسل
اتفننوا كيف يسرقوك
اتفننوا في شكل الكضب
يا خوفنا كلك يرهنوك .