التصويت علي سودانية حلايب

11:35 AM May, 12 2018 سودانيز اون لاين
فرح الطاهر ابو روضة-...................

مكتبتى
رابط مختصر
هكذا قالوا يوجد تصويت مهم
علي موقع التلفزيون الروسي
وقالوا التصويت مهم لتشيكل القرار الروسي
وقالوا سارع بالتصويت عشان القرار الروسي يكون في صالحنا
سمح افرض انا زرت معاكم الموقع وحلايب الروس قالوا سودانية من امها وابوها وجدها
السؤال وين الارادة البترجع حلايب ؟؟؟
ووين الوطن البترجع ليه حلايب ؟؟؟؟
وانسان حلايب نفسه لو فيه شوية عقل معقول يرضي بقرار سودانيتو من الروس او الامم المتحدة حتي ؟؟؟
وفي الايام دي بالذات  ؟؟؟والجابر شعب حلايب وانسان حلايب علي الجحيم شنو اصلا ؟؟؟
ياخ والله يكون حامد الله انه لقي ليه دولة تتسلبط فيه
وانا بفتكر أمو راضيه عنه والله صحي،
وعشان تكونوا عارفين الان في مزاج شعبي في حلايب وكبير جدا بدا يتشكل لدي انسان حلايب
انهم ما عندهم علاقة بالسودان ولا السودانيين
ده كله بسبب اهمال الانقاذ لانسان حلايب وتفريطها المخجل في حلايب ولو استمر الوضع ده  ناس  الجزيرة وامتداد المناقل والنيل الابيض وكل السودان الفضل لو لقو ليهم دولة تتسلبط فيهم مقابل انقاذهم من جحيم الانقاذ وفسادها ما ح يقولوا لا والناس الشايلة الرابط ده  وحائمه بيه وماسكة بالناس مساحة وزمن  انا شايف دي حسادة منكم ساكت ولا غالبكم التسوهو وكدي براوقة وقبل تصويتكم علي سودانية حلايب جاوبو  لي علي الاسئلة دي السودان في اليوم بغادروه كم مواطن  ؟؟؟ حصل سالتو منهم وعن اسباب المغادرة ؟؟؟وكم مواطن بياخد الجنسية البديلة او المزدوجة عشان يمشي امور حياتو بعد ما فشل في حياة جيدة في ارض الوطن. يا ناس هوي من الاخر شوفو اولياتكم وين وحلايب احتلت بتفريط وخراقة النظام ده وطالما هو موجود ستظل محتلة وزي ما قلت ليكم قضية حلايب وغيرها من المناطق الحدودية المحتلة قضية سيادة وطنية يفتقدها هذا النظام وبالتالي يبقي أن يكون الروس سودانيين اكثر من الحكومة السودانية دي عايزه ليها فهامة ههههه والله صحي، كدي في الاول تعالوا نعمل كلنا  علي تهيئة الظروف البتخلي الحياة بكرامة ممكنة داخل السودان لما نعمل الحاجة دي انا متاكد اهل حلايب براهم ما حيرضوا بغير السودان وطن ولا الفشقة،وجنوب السودان ذات نفسه بجييكم راجع والمفكرين في الانفصال في دارفور وجبال النوبة بنسوا موضوع الانفصال  تماما فكدي ارخو الرابط ده شوية واعملوا ليكم رابط زي ما عمل الروس ووزع الجداد الالكتروني الرابط يكون للتصويت علي هل الحياة في السودان في ظل الواقع ده ممكنة ؟؟وكيف يمكننا تغيير الواقع المازوم،انا ح اكون اول المصوتين في الجزئية الاولي من النقاش بانه لا غير ممكنة وفي الجزئية الثانية حتكون لينا صولات وجولات فيما يخص اسقاط النظام ولجان المقاومةووحدة المعارضة السودانية،وغيرها من الاليات التي تجعل من السودان وطنا ممكنا. فكل الوطن ينتظر الخلاص علي ايدينا ومش حلايب وبس نحن والخلاص ما محتاج لتصويت روسيا ولا امريكا ولا دول التحالف الخليجي حتي.

سلام ابوها ..

كدي خلونا من حلايب الله يلمنا في الخرطوم المستعمرة
من قبل الاستعمار الداخلي !!! حلائب بترجع .

يا بت عمسيب
التلفزيون الروسي سحب التصويت بعد تحركات وضغط من الحكومة المصرية
ولربما اعتذروا رسميا للمصرين

الحبيب أبو روضة ..
إنت متابع جيد للاخبار ..
الخبر عمل زوبعة لفترة وجيزة في التلفزيونات
تدخل وزير الخارجية المصري مباشرة في الموضوع
وتم الايقاف ..
القناة السودانية لم تتطرق أبداً للموضوع ولم تستغل الفرصة

تحياتي أبوروضة