مشاكل الأطفال هل تستحق كل هذا ؟

08:48 AM May, 02 2018

سودانيز اون لاين
محمد حمزة الحسين-امدرمان- ابوسعد
مكتبتى
رابط مختصر

زمان زمن الزمان الزين والشعر مغطي الأضنين ...
كنا لمن نشوف الأستاذ نهرب حتي لا نلتقي عيناهـ ...
في ذلك الزمان كان كل الكبار ابواتك ومربين يأمروا وينهون من غير غبن وضغاين ...
عمي ابو عبد الله الله يرحمه كان طوالي شايل جريدتو الخضراء اسبوع جلدتك ما تسقط
وبعد الاسبوع تكون عاايش في رعب تاني اسبوع مما يجعلك تعمل الف حساب للخطأ ...كانت البويت اغلبها إن لم تكن جميعها
تفتح في بعض لعدم الحوش او بي نفاج في حالة وجود الحوش ...
الأطفال كانو اشقياء لكن مليانين مروة مافي شافع برسلوه بقول (ابيت).
كنا بناكل في اي صحن يتملي اكل من غير ما تفكر انو دا بيتكم او بيت الجيران...
وكنا عاجي ممكن ناكل مرتين واحياناً تلاته خاصةً لو الاكل فيهو (دنسه) .
كنا غبش ووسخانين نفضل الحمام في البحر أو الجسر الكبير ... والصغار كانو يفكو الطين في النمرهـ او ابو سبعين ...
كان الاطفال لعبهم وسلوكهم كلو ( جوطه وغاغه ) واعدي من اي كبير تسمع يا ولد زول بقول بغم ماف كان اسمنا العوين ...
غايتو لمن كبرت وعرفتو كلمة العوين عند بعض اهل السودان تعني النسوان قلتا في نفسيغايتو اول زول جاب الكلمه دي ظلمنا ظلم الحسن والحسين.
:
:
دي صورهـ :\
حسي الشفع نضاف ويا قدام التلفزيون او الأجهزة الرقميه
الحمام بي بشكير او موية دافيه مرتين في اليوم ...
وان بقيت راجل رسل لك فيهم واحد وانتظر كان غردك يجيك .
دا لو ما سمعت فارغ ...
وأوعك حسك تهبشلك واحد او تنهروا لو ما جوك والدينو وروك المكشن بلا بصل تبقي محظوظ ...
لانو الطفل نفسوا ممكن يجدعك بالحجار او يكشحك بي الرملا دا لو ما مشي نفس لك لستك العربيه او كسر لك القزاز ...
ولو بقي حنين وعشمان ممكن يترسل لك بي بالباقي ...
ياخي زمان ممكن يكون الباقي تعريفة وإتطورت الأمور شويه شويه بقي ابقرشين ...
حسي الباقي قزازة الداقوي بي سته من الجنيهات يعني العشره دي تقنع منها عديل ...
في المدرسه منعو الجلد بقي الطالب يحمر للإستاذ ولو الاستاذ حمشعادي ممكن ولي الأمر يجيك تسمع ما كثر ودل عن حدودك ...
:
:
زمان ممكن يكون في ولد واحد وسط بنوت وامووابوهو شفقانين عليه ممكن يزعلوا منك لو اتجرأت وضربتو او ساي عنفتو .
لانو بكون بطران والنهره ساي ممكن يبكي والقايمه تربط وممكن يتخاصموا ايام وليالي حتي يتدخل الاجاويد ويكون عاذرين اهل الطفل المدلل...
وترجع المياهـ لمجاريها وتكون عرفت الدرس ...
:
:
لكن :/
ان تصل الأمور لدرجة تعمر كلاش وتقتل جار هذا ما صدمني وما كنت قادر استوعبو ...
صبرت ثلاث ليالي قلت الأمر فيهو إنا ....
لكن خاب ظني في الأمر شفع ومشاكل عيال مهما كان ما قادر استوعب والامر غير مبلوع البته ...
لاحولة ولاقوة إلا بالله العلي العظيم ...
أين العُشرهـ ...؟!
أين حق الجار ...؟!
أين الحكمة وضبط النفس ؟!
ماذا دهانا ...!!!
ماذا حل بكارئم الأخلاق ...!!!
كان ما أخاف الكضب اقول مات المقتول وذهب القاتل للسجن والصغار رجعوا يلعبون الالبلي استيشن مع بعض .
ولي عودهـ
مع التحيات لله الزاكيات

فجعت منطقة الباوقه قبل ثلاثة ايام بجريمة قتل جار لجارهـ بطلق ناري من سلاح اتوماتيكي (كلاشينكوف)
المقتول من قبيلة العباده الريشاب ...
والمقتول من قبيله الكحولة الحسانية ...
وهم من القبائل التي نزحت لمنطقة الباوقه واستقرت بالتقادم في الشريط الغربي بنهاية امتداد المشروع ..
وكانوا قيمة مضافة للبلد في مواسم الزراعة والحصاد ...
وببزوغ نجم التعدين الاهلي تحسنت اوضاعهم وزاد الاستقرار وسطهم وتحول الكثير منهم
الي تجار او مقدمين خدمات مثل المخابز او احتراف التعدين كمهنة رئيسيه ...
البلد آمنه ولا حوجة لحمل او تخزين السلاح ...
ناهيك من الإضطرار لاستخدامه ضد الجيران والحبان والسبب مشاكل اطفال ...
:
:
أنا ما مستغرب عملية القتل لان الكثير قُتل غيلة وغدراً وسهواً ...
لكن مستغرب السبب اطفال اتشكالوا تقتل زول لاحولة ولاقوة إلا بالله العليّ العظيم ...
الأطفال هم فلذات اكبادنا لكن عمروا الدق ومراقبة الكبار ما غيرت طبع ولا كسرت خاطر طفل بل بالعكس ...
سيشب علي احترام الكبير وتوقير الصغير ومراجعة النفس عن الاخطأ التي يقع فيها من حين لآخر ...
نترحم علي القتيل وندعو الله ان يلم شمل القاتل ويعفو اهل القتيل عن كثير ويتدارك كبارنا فضيلة العفو ..
والحكمة وضبط النفس ...
ولي عودة
:
:
:
:
مع التحيات لله الزاكيات

من مايقال (من امن العقوبه اساء الادب).
(ليك اللحم ولينا العضم)
دا حال اليومين ديل الاحترام للكبير وكثير حتى الوالدين اقلو تعامل من غير احترام .
وزاد الطين بله انو الابوين لايعاقبو ويسيطرو على ابنائهم يرفضون مبداء العقاب فى المدرسه يخلى الطالب يزيدجرعه التمرد .
.
انا بقول كدا رغم تجربتى فى التدريس فى المدارس كنت لااستخدم الجلد كوسيله عقاب رغم دخولى الفصل بوسيله جلد .
لكن كنت استخدم اسلوب متاح -دون طرد الطالب من الفصل كعقاب بديل للجلد- والعقاب كان وقوف الطالب اخر الفصل مع رفع يد او اليدين لاعلى طول الحصه .
كان المدير - وهو استاذى فى نفس المدرسه - يمر امامالفصل وعلامات الاستغراب باديه عليه ولكن لم يناقشنى ابدا فى اسلوب عقابى .
.
طبعا الوزاره منعت الجلد لكن ماوضعت بدائل عقاب لردع الطالب عن الخطا وتحميلو المسئوليه.
.
مش مشاكل الاطفال بس نصاحبها ردود افعال لاتتناسب مع حجم المشكله بل فى المواصلات او السوق او خلاف بين اثنين حول اى موضوع يتطور الى احيانا الى عدم القدره على السيطره عليه وحله بسلام ورضا .
واديك مثال حادثه القتل فى احدى الجامعات الخاصه فى بين طالبين حول صوره قريبه احدهم
نموذج جديد للعنف فى البيئه الطلابيه نموذج جديد للعنف فى البيئه الطلابيه
.
اظن المعاناه والاحباطات قد تكون واحده من الاسباب فى كثير الاحداث والحوادث دخيله على المجتمع
.
تحياتى الاخ محمد حمزه

شكراً اخي عاصم علي للمشاركة واثراء البوست
ولي عودة بإذن الله
:
:
:
:
:
مع التحيات لله الزاكيات