سمعت ليك أكثر من تسجيل تتحدثي عن السحر والدجل والشعوذة في السياسة السودانية في البداية أنا قلت الموضوع يمكن إشارة عابرة وتعدي زيها وزي الخزعبلات المنتشرة في السياسة السودانية ولكن تكرار الطرق علي الأمر هو ما دعاني لإفتراع بوست عن الأمر ...
حسب ما أري أن الأمر لا يتعدي مربع الأوهام والخرافات التي تحيط بالحياة الإجتماعية في السودان عشان كدا أي حاجة غير مفهومة في السودان طوالي يتم درعها علي السحر والشياطين (المساكين) أي زول في يجيه وجع بطن طوالي يقوم يهلوس بيموضوع السحر أي زول يفشل في أي حاجة ( عمل أو إمتحان ) طوالي الشياطين أولاد الحرام ديل السبب ياخي حتي تأخر الزواج طوالي مدروع في الدجل والسحر فيبقي الموضوع دا جهل وعدم وعي من المجتمع تجاه إنتشار مثل هذه الظواهر
خليني اسألك سؤال يا تراجي : السياسين في الغرب ديل ماشين امفكوا ساي ( لا تحصين ولا أوراد ولا محايات ولا حجبات) ليه الشياطين أولاد الحرام ديل ما يمشوا يتلحوا الخواجات والناس الماعندهم ديـن ليه ما يمشوا يحاوطوا ترمب يخلوه يفك الصين بالنووي أو يتلبس أي سياسي غربي
دا كلام فارغ ومجرد أوهام لا علاقة لها بالواقع
Post: #2 Title: Re: يا تراجي شغل السحر والدجل في السياسة دا ك Author: علاء سيداحمد Date: 04-21-2018, 11:27 AM Parent: #1
سلام ياعبدالعظيم
والله كلام غريب .. ان يعتقده ضعاف الفكر والواهمين امر مقبول .. لكن ان يعتقده من نتنسم فيهم الاستنارة فهذا لعمرى قمة الانحطاط الفكرى .
Post: #3 Title: Re: يا تراجي شغل السحر والدجل في السياسة دا ك Author: Khalid Abbas Date: 04-21-2018, 11:30 AM Parent: #1
محاولة لنفى الفشل عن الرئيس وجعل الخزعبلات هى الشماعة
Post: #4 Title: Re: يا تراجي شغل السحر والدجل في السياسة دا ك Author: عبدالعظيم عثمان Date: 04-21-2018, 11:42 AM Parent: #3
غايتــو الكلام البتقول فيه تراجي عن موضوع السحــر اذا فعلا هو الكلام الحايم في القصر الجمهوري دي تبقي مصيبة بالجد انا كنت قايل الموضوع عبارة عن طلس ونكات واتساب لكن أن تستمر تراجي بالطرق علي الموضوع بالطريقة دي أتوقع أن دولاب العمل في السودان تحركه الشياطين أولاد الحرام (حسب أوهاهم) وعشان كدا هم ما بيحسوا بأي مسؤلية تجاه الفشل ولا نفسهم بتسدا اذا فشلوا في حاجة لأنه الشماعة جاهزة ( السحر) معقول البلد تحكم بي ناس دي طريقة تفكيرهم
سحر شنو وشياطين شنو يا ناس الحقوا البلد الناس ديل شكلهم متعلقين بعالم الجن الوهمي عشان كدا بلة الغائب واحد من النجوم في البلد مصيبة جد
Post: #5 Title: Re: يا تراجي شغل السحر والدجل في السياسة دا ك Author: عبدالعظيم عثمان Date: 04-21-2018, 11:45 AM Parent: #4
Quote: سلام ياعبدالعظيم
والله كلام غريب .. ان يعتقده ضعاف الفكر والواهمين امر مقبول .. لكن ان يعتقده من نتنسم فيهم الاستنارة فهذا لعمرى قمة الانحطاط الفكرى .
سلامات يا علاء سيد أحمد
ياخي دا موضوع خطير جدا أن يعتقد بعض المثقفين بهذه الأوهام يبقي مافي فايدة ومافي فرق بينهم وبين المخمومين بالشيوخ والسحر فعلا إنحطاط فكري وجهل غير طبيعي
Post: #6 Title: Re: يا تراجي شغل السحر والدجل في السياسة دا ك Author: عبدالعظيم عثمان Date: 04-21-2018, 11:48 AM Parent: #5
Quote: محاولة لنفى الفشل عن الرئيس وجعل الخزعبلات هى الشماعة
تعرف يا خالد عباس ما أظن الموضوع الناس ديل شغالينه بهذا الوعي أتوقع أن الحقيقة هي أن السودان محكوم بمجموعة من الجهلاء المتخلفين الذين يتعلقون بأستار الجن والسحر مكانهم المستشفيات لتلقي العلاج وليس كراسي الحكم
Post: #7 Title: Re: يا تراجي شغل السحر والدجل في السياسة دا ك Author: عبدالعظيم عثمان Date: 04-21-2018, 11:53 AM Parent: #6
اذا كان الناس في السودان يتغنوا مع منتصر هلالية جيبو لي الشيخ يقرأ لي أوراد ليه ما يكون القصر الجمهوري مرتع للدجالين والشيوخ وبياعين المحايات منتهي التخلف والجهل
Post: #8 Title: Re: يا تراجي شغل السحر والدجل في السياسة دا ك Author: Asim Ali Date: 04-21-2018, 12:08 PM Parent: #7
الاخ عبداعظيم وضيوفه - سلامات ياخى ما اظن كلام تراجى دا مبالغه واضرب ليك مثل واتمنى لو فى زول متذكر يضيف . فىواحد من مؤتمرات الحوار فى بدايات عهدهم اذكر كان فى ورقه مقدمه بعنوان (استخدام الجن فى التنميه). .ما اظن تراجى ماقطعتو من راسا
Post: #9 Title: Re: يا تراجي شغل السحر والدجل في السياسة دا ك Author: Asim Ali Date: 04-21-2018, 12:19 PM Parent: #8
«الجن» و«الأنس» و«الملائكة» في أدبيات المؤتمر الوطني الصحافة - 20 - 03 - 2010 في أيام مداولة حكومة (الانقاذ الوطني) لمناقشة الخطة الاستراتيجية القومية العشرية التي تداعى اليها أهل الخبرة والاختصاص من السودانيين في الداخل والخارج من أجل إيجاد الوسائل المناسبة لتنفيذ هذه الخطة، حتى تغدو البلاد خلال السنوات العشر القادمة في صورة أفضل من التي تعيشها قبل تنفيذ الخطة القومية الاستراتيجية العشرية. ومن بين الاشياء الظريفة التي اثارت الضحك هو المقترح الذي تقدم به الدكتور عمر أحمد فضل الله مدير مركز الدراسات الاستراتيجية وقتها بان تستعين الحكومة ب (الجن) في تنفيذ هذه الخطة العشرية، ولم يبين وقتها عمر احمد فضل الله الاسباب التي دعته الى ذلك اذا كان فعلا ان الخطة لا يستطيع (الأنس) تنفيذها كاملة ولابد من الاستعانة ب (الجن) في تنفيذها، أوانه يرى (للجن) قدرات خارقة يمكن توظيفها في تنفيذ هذه الخطة. ولكن يبدو ان الحكومة لم تستطع الاستعانة ب (الجن) وذهبت في تنفيذ الخطة حسب الامكانيات المتاحة ولكن الحكومة اسندت الأمر للمجلس القومي للتخطيط الاستراتيجي اخيرا للدكتور (تاج السر محجوب) ولم تظهر له حتى الآن قدرات (خارقة) مثل (الجن) الذي اراد د.عمر أحمد فضل الله استخدامه في تنفيذ الخطة ويبدو ان تاج السر سيكتفي بقدرات (الأنس) والتجربة (الماليزية) فقط. ويبدو ان الحكومة لم تكتف بمقترحات د.عمر أحمد فضل الله باستخدام (الجن) فلجأت الى استخدام (الانس) في واحدة من أهم المشروعات وهو ترعتا (كنانة والرهد) وجمعت لها التبرعات وأعدت الآليات التقليدية من (طوريات) و(كواريق) و(ازميلات) وغيرها ودعمت كل هذه بحملة اعلامية ضخمة، ولكن اصبح مصير هاتين الترعتين مثل مصير قناة (جونقلي) ولكن يبدو ان (الجن) فشلت المحاولات لاستخدامه في تنفيذ الخطة، ايضا فشل (الانس) في تنفيذ ترعتي كنانة والرهد. اما الملائكة ايضا لم تخرج من الادبيات فقد ذكر احد المحررين بصحيفة «الاخبار» في حوار مع (السنوسي) مساعد الامين العام للمؤتمر الشعبي، حيث قال المحرر للسنوسي ان احد مرشحي المؤتمر الوطني ذكر أن الملائكة ستصوت معه في الانتخابات القادمة، وقد استدرك السنوسي الامر وقال ان هذا هو التزوير بعينه.. ويبدو ان المؤتمر الوطني حاول استخدام (مخلوقات الله) من الجن والأنس والملائكة في تنفيذ برامجه، ونحمد له انه لم يفعل كما تفعل (قوى) أخرى في انها تتحالف مع (الشيطان) في تحقيق أهدافها. https://www.sudaress.com/alsahafa/3098https://www.sudaress.com/alsahafa/3098
Post: #10 Title: Re: يا تراجي شغل السحر والدجل في السياسة دا ك Author: Osama Mohammed Date: 04-21-2018, 12:27 PM Parent: #7
ح يجيك واحد ناطي يقول ليك مذكورة ف القران والسنة.
Post: #11 Title: Re: يا تراجي شغل السحر والدجل في السياسة دا ك Author: أيمن الفاضل Date: 04-21-2018, 02:18 PM Parent: #10
تحياتي عبد العظيم و المشاركين حاجة توجع القلب في العالم كله في مواهيم و دجالين لكن المواهيم عندنا حاكمين البلد و الاسوأ منهم ناس المعارضة العلمانيين و المفروض يكونو مستنيرين تراجي دي فضيحة ياخ المفروض تكون كوزة
Quote: ح يجيك واحد ناطي يقول ليك مذكورة ف القران والسنة.
ديل يا أسامة ايمانهم غريب خلاس القرآن والسنة فيهم ايات واحاديث كتيرة تقول النافع والضار هو الله، وعالم الغيب هو الله، ولاتجوز الاستعانة بغير الله خلو دة كلو ومسكو في وجود السحر والعين في القرآن
Post: #12 Title: Re: يا تراجي شغل السحر والدجل في السياسة دا ك Author: nour tawir Date: 04-21-2018, 02:32 PM Parent: #11
سلام يا عبدالعظيم...
الشياطين (بذّاتيتها) لا تستطيع ان تفعل ما فعلته و تفعله الانقاذ... فلا داعى لظلمهم و اتهامهم لصرف النظر عن فشل الانقاذ... تراجى مصطفى لا علاقة لها بالسياسة و لا تفهم كوعها من بوعها.. و ما أنتشارها بهذا الشكل المرضى الا انعكاس لما وصل اليه الحال من تردى و انحطاط حضارى...