Post: #6 Title: Re: الباشمهندس بكري أبوبكر .. دكتور التجاهل ال Author: علي عبدالوهاب عثمان Date: 04-16-2018, 12:56 PM Parent: #5
الحبيب بكري .. سيد الحوش أجمل بوستات الاغاني والفرح يجلبها لنا الدكتور خاصة أغاني قريبنا وردي الجميل .. ندين ونستكر بشدة أي مساس لكوتة دكتورنا الذي ينثر الفرح أينما حل ..
مع التحية ،،
Post: #7 Title: Re: الباشمهندس بكري أبوبكر .. دكتور التجاهل ال Author: Biraima M Adam Date: 04-16-2018, 03:18 PM Parent: #6
يا دكتور التجاهل التجاهل،
شوف لو بكري ما رجع ليك الكوتة .. يعنى أنت غير مناصر لحميدتي .. وأنا وضعت الولاء لحميدتي شرط لزيادة كوتتك .. أنت دحين أتحلل .. قبل ما يرجعوا ليك الكوتة.
------------------------------------- ول أبا علي عبد الوهاب .. تهانينا بالحديد .. الراقد هبطرش في حفير مشو .. أها شايلين العدة وجاينكم.
بريمة
Post: #8 Title: Re: الباشمهندس بكري أبوبكر .. دكتور التجاهل ال Author: علي عبدالوهاب عثمان Date: 04-16-2018, 04:00 PM Parent: #7
أديبنا الجميل بريمة .. مودتي .. دخلت القوقل وقرأت عن مناجم الحديد وجدت أن نصف الكرة الارضية حديد .. المنطقة دي جميلة جداً يا الحبيب بريمة ده وادي القعب كان إستراحة درب الاربعين للابل من كردفان ودارفور إلى مصر .. واحة فيها كمية من المياه .. وسكانها من اخوانا العرب رعاة الابل وكمان مزارعين ومن كثرة المياه تجد الطفح المائي .. وزمان كان فيها رمال كان الناس يدفنون أجسادهم فيها لإزالة أمراض الرطوبة وآلام الظهر .. كان يأخذوا معهم طعام أسبوع كامل ويعملوا أعشاش ثم العلاج الطبيعي وكما هو معروف الحفير ومشو رابط فيها يونس ودالدكيم قائد جيش الانصار .. في كتاب ونستون ترشل معركة النهر عندما قرأت عن معركة الحفير وجدت أن جيش كتشنر بواخرها رست عندنا في جزيرة أرتقاشا وقصفت الحفير لم يذكر إسم الجزيرة ولكن من خلال الوصف والجغرافيا واضحة جداً .. لأننا في الضفة المقابلة لحفير ومشو وتلاحظ أن إسم ( حفير ) مسمى عربي وتقريباً من مصطلح الرعاة .. وكبارنا كانوا يحكوا لينا عن مجاعة سنة 1306م ( سنة ستة) أهلنا في جزيرة أرتقاشا ربطوا المراكب بالغرب ولأن آباءنا الانصار لم يكن لديهم خبرة بملاحة في الانهار وكذلك عدم الخبرة بالسباحة تم حرمانهم من خيرات الجزر وقيل أنها كانت من أصعب السنوات بالنسبة لأجدادنا ولكن وجود النخيل والتمور خفف من الوضع ومركز الثاني للانصار جيش يونس كان بالقرب من دنقلا المدينة قرية إسمها الديم ومازال سكانها عرب أقحاح .. حقيقة بريمة إنت زول جميل .. رجعتني للبلد في ثواني .. تحياتي يا اصيل ..
Post: #9 Title: Re: الباشمهندس بكري أبوبكر .. دكتور التجاهل ال Author: Biraima M Adam Date: 04-16-2018, 05:36 PM Parent: #8
ول أبا علي،
Quote: وكبارنا كانوا يحكوا لينا عن مجاعة سنة 1306م ( سنة ستة) أهلنا في جزيرة أرتقاشا ربطوا المراكب بالغرب ولأن آباءنا الانصار لم يكن لديهم خبرة بملاحة في الانهار وكذلك عدم الخبرة بالسباحة تم حرمانهم من خيرات الجزر
ههههاي .. حصل مرة سافرت جزيرة نسري في جوار شندي .. وسكنت مع أهلها ، أهل صحبي في الجامعة.. كنا في أجازة في الجامعة .. شلنا المركب ودخلنا بيهو البحر .. وأنا طبعاً أخوك واقف كك في العوم .. ألمي كن لحق مناخريني .. يا هو أنا ميت ميت ..
الجماعة أنطوني عصاة طويلة عشان ندفر المركب إلي داخل البحر .. ونحن راكبين فيها .. أتاري الناس تضع العصاية في الطين ثم تدفع بالمركب تجاه البحر .. أنا وضعت العصاة في مؤخرة المركب .. وركزت فيها بكل قوة .. المركب لم يتحرك شبر .. الشباب ضحكوا قالوا لي أنت زول تعبان ساكت .. أدفر شديد .. وأنا نشيل وندفر .. ولم يتحرك المركب .. جاء عربي بحماره .. ووقف في القيفة .. ثم قال .. عوووع يا زول عوووع .. أنت جاي من الصحرا ولا شنو؟ .. دا شنو البتسوي فيهو دا .. ركز العصاي في القيف هناك وأدفر لغادي! والله الناس رقدوا من الضحك .. وأنا أبيت دت نسلمهم العصي .. حتى حركت المركب .. لكن والله أبسط الأشياء .. الأنسان محتاج يتعلمها .. عشان كده لما قال القرآن .. أسألوا أهل الذكر أن كنتم لا تعلمون .. هذه حقيقة ..
العربي قال اليوم مولانا يجري وين، ألم يقل القرآن وما قصرنا في الكتاب من شيئ .. يا مولانا عوووك .. سعر الرغيفة اليوم بكم؟ مولانا نادي الفران .. يا فلان؟ سعر الرغيفة بكم .. قال له بكذا .. ألتفت للأعرابي .. قال له سعر الرغيفة بكذا .. الأعرابي رد .. مولانا ما قلتم .. الكتاب فيه كل شيئ .. مولانا قال نعم .. وأسألوا أهل الذكر إن كنتم لا تعلمون .. بتاع الفرن من أهل الذكر في مجال سعر الرغيف. العربي جاء بحماره وعلمني كيف ندفر المركب في نص البحر ..
أنت عارف يا علي، الحديد ح يجيب ناس غرباء .. وشركات تعدين .. وزيادة ضغط علي الموارد البسيطة أصلاً .. واقفين معاكم في الشمال عشان الحروب لا تتمدد إلي أخر عمقنا الآمن في الشمال .. حسي الحل شنو؟ .. المرة دي أنا خايف يرحلوكم زي ما رحلوا الحلفاويين ..