Post: #1
Title: ظهور آب لمبة الأصلي في وادي قبقبة
Author: Osman Musa
Date: 03-27-2018, 07:54 PM
07:54 PM March, 27 2018 سودانيز اون لاين
Osman Musa-
مكتبتى
رابط مختصر شافوهو بي لمبتو يتحاوم في الوادي .
قالوا يظهر مسافة كيلو لكن قدر ما انت تركض وراهو هو جاري .
|
Post: #2
Title: Re: ظهور آب لمبة الأصلي في وادي قبقبة
Author: Dr. Ahmed Amin
Date: 03-27-2018, 10:18 PM
Parent: #1
تحياتي أستاذ عثمان موسى وعساك طيب ..
ظاهرة (ابولمبة) يعرفهــا تماماً سائقي اللواري السفرية في بقاع مختلفة من السودان ويخافون منها لأنها غالبا تتسبب في ضياعهم
أنا عشت في مشروع الجزيرة سنين طويلة وكان الوالد يعمل مهندس زراعي (مفتش) وكنا نسمع من أصحاب اللواري قصص تحير 
فعلا هي ظاهرة غريبة يربطها البعض بالجن ..
|
Post: #3
Title: Re: ظهور آب لمبة الأصلي في وادي قبقبة
Author: محمد بابكر احمد
Date: 03-27-2018, 10:43 PM
Parent: #2
دكتور احمد امين
ابولمبة الزمن ده الموبايل كلهم بجننو وبنورو الليل كلوا
تحياتي وسلامي
|
Post: #8
Title: Re: ظهور آب لمبة الأصلي في وادي قبقبة
Author: Osman Musa
Date: 03-28-2018, 11:08 AM
Parent: #3
عزيز نا محمد بابكر سلامات
ياخ لمبة الموبايل تختلف من لمبة آب لمبة الأصلي هههههها.
آب لمبة الأصلي شغال بي 2000w .
ولو تابعت دربو من قبقبة ح تلاقي روحك في سواكن .
|
Post: #4
Title: Re: ظهور آب لمبة الأصلي في وادي قبقبة
Author: Osman Musa
Date: 03-28-2018, 08:31 AM
Parent: #2
دكتور احمد سلامات قالوا ضاحكين و بي صوت واحد : أي ده آب لمبة الأصلي . قالوا : بس رقدتنا كدي في همبريب الوادي بعد ما نضرب العصيدة يظهر . وكل يوم وفي نفس المسافة . لكن اكيد بعد تعب النهار ما بكون فينا حيل نساكك . ومرات نشوف الدابي آب جوهرة . كاشف كشافتو قدامو و كاسح بي سرعة 1000 كيلو في الساعة .
|
Post: #5
Title: Re: ظهور آب لمبة الأصلي في وادي قبقبة
Author: الحاج حمد الحاج
Date: 03-28-2018, 08:39 AM
Parent: #4
يعني يا عثمان دا أبو لمبة (فيليبس) و الله مركب بطاريات انرجايزر هههههههههههههههه
|
Post: #6
Title: Re: ظهور آب لمبة الأصلي في وادي قبقبة
Author: Awad Omer
Date: 03-28-2018, 09:34 AM
Parent: #5
ان شفت ابلمبة عديل ..شوف عين في القضارف ..
يعني كنت ...ماشي بااليل من خارج المدينة ...وبعدين مرة تجي عجلة بي خطراتها ماشة قدامي وتختفي 0..ومرة لوري سفنجة ...ومرة هوستن ..ومرة سيرة ودلوكة.
|
Post: #7
Title: Re: ظهور آب لمبة الأصلي في وادي قبقبة
Author: aosman
Date: 03-28-2018, 09:50 AM
Parent: #6
Quote:
يعني كنت ...ماشي بااليل من خارج المدينة ...وبعدين مرة تجي عجلة بي خطراتها ماشة قدامي وتختفي 0..ومرة لوري سفنجة ...ومرة هوستن ..ومرة سيرة ودلوكة.
|
كلام عجيب!!! وإنت هسي بكامل قواك العقلية والجسدية والنفسية؟
|
Post: #9
Title: Re: ظهور آب لمبة الأصلي في وادي قبقبة
Author: محمد المرتضى حامد
Date: 03-28-2018, 11:26 AM
Parent: #7
أيوا يا عثمان..
بلدنا فيها أبولمبه كتار..
أنا محمد دا لاقوني أم لمبه كتيرات في الآونه الأخيرة في السودان وخارجه،
برضو لاقوني أمهات لمبات لا بأس بهن LED
واحد أبولمبه جهة كسلا ضهَّب الشركة الصينية وساقا إرتريا ومن هناك فرررر لشنغهاي..
ورجع بعد داك ختف ال VXR 5.7
|
Post: #10
Title: Re: ظهور آب لمبة الأصلي في وادي قبقبة
Author: محمد المرتضى حامد
Date: 03-28-2018, 11:29 AM
Parent: #9
(أنا محمد دا لاقوني أم لمبه كتيرات في الآونه الأخيرة في السودان وخارجه،)
تصحيح : أنا محمد دا لاقوني أبو لمبات وأم لمبات كتار في الآونه الأخيرة في السودان وخارجه،
|
Post: #11
Title: Re: ظهور آب لمبة الأصلي في وادي قبقبة
Author: Asim Fageary
Date: 03-28-2018, 11:52 AM
Parent: #10
سلام مربع للجميع
يا أخوانا قصة أب لمبة دي زمان شرحوها لينا في الفيزياء
قالوا الأرض بتكون فيها فسفور وبقايا فسفور لذلك دايما تكون هذه الظاهرة في الأٍاضي الزراعية حيث توجد بقايا الفسفور من الأسمدة
عشان كدا ناس مشروع الجزيرة والمناقل عندهم قصص أب لمبة مشهورة
أما أن تقولوا شيطان ولا غيره فأنا لست مع هذا الرأي
هو الشياطين والجن ديل عينهم في البلاد الجميلة البجيبهم السودان شنو ؟!
تحياتي
|
Post: #12
Title: Re: ظهور آب لمبة الأصلي في وادي قبقبة
Author: Awad Omer
Date: 03-28-2018, 11:59 AM
Parent: #11
كلام عجيب!!! وإنت هسي بكامل قواك العقلية والجسدية والنفسية؟
الحمد لله ..بخير .. لانه الحاجات دي كنت سامعة ومتوقعة ...ومش مقتنع بقصة الفسفور والتشريع بتاع الافندية الزمان دة ززالقضارف دي ما فيها حتة مبيد او فيرتلايزر ...... .وانا برضو كمان انسان موحد ..
|
Post: #14
Title: Re: ظهور آب لمبة الأصلي في وادي قبقبة
Author: Asim Fageary
Date: 03-28-2018, 12:04 PM
Parent: #12
وانا برضو كمان انسان موحد ..
سلام مربع أخي عوض عمر
الإنسان الموحد دا يعني من شروط أن يكون موحد أن يؤمن بخرافات أب لمبة وما شابهها ؟
الإيمان بالله
برسله
بكتبه السماوية
بالملائكة
وبالقضاء والقدر
...
شايف ديل ما فيهم الإيمان بأب لمبة والخرافات !
تحياتي
|
Post: #15
Title: Re: ظهور آب لمبة الأصلي في وادي قبقبة
Author: Awad Omer
Date: 03-28-2018, 12:07 PM
Parent: #12
يا زول كمان اقولليك ..
مرة زمان راكبين لوري من رفاغة في اتجاه الفاو والقضارف وبالليل ...
من كترة ناس ابلمبة اللاقونا ...مرة في شكل بيارة بانوارها ...ومرات لواري ...ومرة ناس راكبين حمير و بيتونسو كان ....من كترة ابو لمبة لقينا نفسنا في مدينة المفازة وفي اتجاه تاني ززيعني لافين في الفاضي ..لمن قريب الصبح عرفنا الطريق من جديد ..
|
Post: #13
Title: Re: ظهور آب لمبة الأصلي في وادي قبقبة
Author: محمد المرتضى حامد
Date: 03-28-2018, 12:01 PM
Parent: #11
(أما أن تقولوا شيطان ولا غيره فأنا لست مع هذا الرأي )
عاصم سلام..
كلامك دا ما صاح ، لا تقارير المراجع العام ل 29 عاما لا خط هيثرو لا الشركات الصينية الضهبت لا العمارات القامت والوقعت ، لا ..
دا كلو ما كفاك وبرضو تقول لي فوسفور وأوزون ؟ ياخ مش تحمدو الله إنو أب لمبه المره دي ما جاكم طافي نورو؟
خلي قلبك معاي شويه..
|
Post: #16
Title: Re: ظهور آب لمبة الأصلي في وادي قبقبة
Author: Asim Fageary
Date: 03-28-2018, 12:09 PM
Parent: #13
عاصم سلام.. كلامك دا ما صاح ، لا تقارير المراجع العام ل 29 عاما لا خط هيثرو لا الشركات الصينية الضهبت لا العمارات القامت والوقعت ، لا .. دا كلو ما كفاك وبرضو تقول لي فوسفور وأوزون ؟ ياخ مش تحمدو الله إنو أب لمبه المره دي ما جاكم طافي نورو؟ خلي قلبك معاي شويه..
تحايا وسلام أخي محمد المرتضى حامد
غايتو بالطريقة دي الإنهيار الإقتصادي ممكن يكون سببه أب لمبة ويصرح بذلك عادي في البرلمان وتسجل الإخفاقات ضد أب لمبة !
البلد دي يا أخوانا ماشة ل ويييين ؟
قبل أيام كان في بوست هنا مفتوح عن وفاة العالم ستيفن هوكينز
غايتو لو ما كان مات كنا رفعنا ليهو تقرير عن أب لمبة يمكن كان تخلى عن كل علمه ومات على دين أب لمبة
المهم، سوف أكون معك بالقلب والعقل .. دا لو فضل لينا عقل بعد دا !
تحياتي و ودي لكم
|
Post: #17
Title: Re: ظهور آب لمبة الأصلي في وادي قبقبة
Author: Awad Omer
Date: 03-28-2018, 12:20 PM
Parent: #16
اقول ليك كمان ...
مرة كمان راكب عجلة وجاي ماشي الحلة بالليل ...اشوف ناس من بعيد في طرفة الحلة ماشين وعندهم فانوس ...قدر ما امشي ما احصلهم ..انا قايلهم ناس بيطلعو زي الناس برة الحلة ..وقلت خلاص دي طرف الحلة ...قدر ما امش ما احصلهم ..يختفو مرة ويظهرو مرة ..
بعد زمن طويل وصلت اطراف الحلة ... لقيت ليك .. جماعة بيلعبو في قمار وبالفانوس وبيتغالطو كمان ومتشاكلين.
|
Post: #18
Title: Re: ظهور آب لمبة الأصلي في وادي قبقبة
Author: MOHAMMED ELSHEIKH
Date: 03-28-2018, 01:01 PM
Parent: #17
ياجماعة مرة كنا قاعدين في الهواء الطلق غرب النيل ومعزومين عشاء في بيت اولاد عمنا وهم الأتنين متكاجرين دايما.
وكنا نرى نور يتحرك بالناحية الشرقية من النيل فاخبرنا بن عمنا الأكبر انو دا "ابو فانوس" ودايما بيجي يتحاوم في المكان دا.
بعد شوية
الكبير دخل جوة وجاء بن عمنا الصغير وقال:
" فلان اخوي دا قال لكم داك اب فانوس بالشرق طبعن . ههههههاي . ياخي دي امنة بت ملين عندها بامية بتجي تلقطها كل يوم بالليل وشايلة لمبتها"
|
Post: #27
Title: Re: ظهور آب لمبة الأصلي في وادي قبقبة
Author: Osman Musa
Date: 03-28-2018, 08:49 PM
Parent: #18
عزيزنا محمد الشيخ سلامات
أبو فانوس و ابورتينا وابورقبتين حمار . و ود القيزان . ديل كلهم المساكين انقرضوا .
و ظهر آب لمبة الأصلي .
آب لمبة ما عندو أي علاقة بي قصص الاتجار بالبشر . يعني عندو هواية يضيع الزمن
و يخليك تلف و تلف و تلف .
|
Post: #25
Title: Re: ظهور آب لمبة الأصلي في وادي قبقبة
Author: Osman Musa
Date: 03-28-2018, 05:00 PM
Parent: #9
عزيز نا و مستشارنا ود حامد سلامات يا مك
والله جد تلخبتت علي الدهابة المساكين اللمبات . الهيبو يا محمد اخوي ضرب شباب قبقبة
وبي جاي يجي آب لمبة يكاوش الكاوشوهو المساكين بعد صفافير الديتيكترات و كرجع الطواري
و المحافير . انت يا محمد ليه زي ناس آب لمبة الأصلي ديل ما بتحلإليهم الحاجات إلا بعد ما تبيض ؟
الشغل الكتامي في بلاد النيلين الطويلين مافي ليه مثيل إلا في بوركينا ف ... . ربك يستر .
عليك ألله حصل سمعت ليك بي جبل يصبح مافي ؟ والفريق يصبح خلا .. وقالوا شنغهاي مرحلا تم تتم تم
|
Post: #24
Title: Re: ظهور آب لمبة الأصلي في وادي قبقبة
Author: Osman Musa
Date: 03-28-2018, 04:39 PM
Parent: #7
عزيز نا aosman سلامات
تلخبتت علي الدهابة اللمبات . يا اخوي
|
Post: #23
Title: Re: ظهور آب لمبة الأصلي في وادي قبقبة
Author: Osman Musa
Date: 03-28-2018, 02:18 PM
Parent: #6
عزيز نا عوض عمر سلامات
قالوا ود عمهم المهاجر في كلفورنيا جاب ليهم gold detector و ground scanner
شغل امريكان . ومن قولة تيت القصة انبشكت . يومأتي 40 و 50 جرام . بس القصة البلمو الفيل
يجي يكاوشو آب لمبة . ياخ ديل في أي بكان . ههههها
|
Post: #19
Title: Re: ظهور آب لمبة الأصلي في وادي قبقبة
Author: Osman Musa
Date: 03-28-2018, 01:12 PM
Parent: #5
عزيز نا الحاج حمد سلامات
قالوا الجانا في زمن الحكومة الراهنة اصلي . فيهم الصيني والفرنسي و الروسي و الهندي .
بتاع اللمبة أم خيت انقرض .
اب لمبة الجديد ممكن عادي يشلحك البطاقة الشخصية بتاعتك و يجرك لي خارج الحدود السودانية .
ويستلم طوريتك و محل مقيلك . ههههها
قولو سكيناك لي سيدي الحسن . أبو جلابية نور كاشف .
|
Post: #20
Title: Re: ظهور آب لمبة الأصلي في وادي قبقبة
Author: محمد المرتضى حامد
Date: 03-28-2018, 01:42 PM
Parent: #19
(اب لمبة الجديد ممكن عادي يشلحك البطاقة الشخصية بتاعتك و يجرك لي خارج الحدود السودانية ).
أيوا كده،
وفي أبو لمبه موديل 2018 ودا تتبعه جوالات السكر ويحدث النمل ..
وأظنك سمعت بالنكته المتداولة اليومين ديل وتقول (دخل الكافتيريا ، طلب شاي ساده،
قالوا ليهو: سكرك كيف ؟ قال ليهم: نملتين ونص)
-
أبولمبه اللغف 476 جوال سكر دا يا عثمان بيشتغل على ال Power Saver Mode
|
Post: #21
Title: Re: ظهور آب لمبة الأصلي في وادي قبقبة
Author: Asim Fageary
Date: 03-28-2018, 01:52 PM
Parent: #20
حسب معلومات من مصدر ما إنه أب لمبة ناوي يتدخل في الإنتخابات وصناديق الإقتراع
وإحتمال كبير يجمع كل عشيرته ويصوتو في الإنتخابات
ودي المشكلة الأساسية لأنه أب لمبة أكيد حيصوت لأهله وأحبابه وعلى الشعب المغلوب أن يتحمل مزيداً من الضغوط
تحياتي
|
Post: #22
Title: Re: ظهور آب لمبة الأصلي في وادي قبقبة
Author: walid taha
Date: 03-28-2018, 02:12 PM
Parent: #1
quoteقدر ما انت تركض وراهو هو جاري quote
الجرى بقى شديد فى السودان ، يبدو أنو حتى أب لمبة (الأصلي ) معصور
فتأمل
|
Post: #26
Title: Re: ظهور آب لمبة الأصلي في وادي قبقبة
Author: Osman Musa
Date: 03-28-2018, 05:13 PM
Parent: #22
عزيزنا عصام فقيري يا أخونا في الوطن الشبعان الجعان سلامات يا مك
آب لمبة الشرحوهو ليك زمان الناس في الفيزياء دأك كان آب لمبة ود الحلال .
هسع طلع واحد حالق كارلويس يقاسمك في دهبك و في السمسم و القرض .
. يازول . يازول .
|
Post: #28
Title: Re: ظهور آب لمبة الأصلي في وادي قبقبة
Author: Mahjob Abdalla
Date: 03-28-2018, 09:57 PM
Parent: #26
يا اخي الحكاية دي نسيتها خالص,
و تشكر كثير رجعت لينا ذاكرتنا من ايام الطفولة و كيف كان الواحد يصدق الحكاية دي تماما رغم اني ما شفتها لكن اهلنا كانو بحذرونا انو لو مسافر بالليل و شفت ليك نور بعيد ما تتبعو. خليك في طريقك دغري.
|
Post: #29
Title: Re: ظهور آب لمبة الأصلي في وادي قبقبة
Author: Osman Musa
Date: 03-29-2018, 06:17 AM
Parent: #22
عزيزنا وليد طه سلامات
آب لمبة الأصلي الجديد يا وليد عجيب . ممكن يساعدك كيف تبراهو
يوصلك لي سماسرة تجارة البشر و بي 30 جرام من دهبك .
|
|