Post: #2
Title: Re: الكلام دة ما صاح
Author: عبدالحفيظ ابوسن
Date: 03-26-2018, 04:42 PM
Parent: #1
الخرطوم: طيبة بشير
ألقت شرطة بحري شرق أمس القبض على مأذون شرعي مزيف يقوم بتزويج المواطنين دون تراخيص رسمية من الجهات المختصة ويستخرج قسائم زواج مزورة.
وكان أحد الأزواج قد اختلف مع زوجته وتقدم بدعوى للمحكمة الشرعية لإعادة الزوجة إلى بيت الطاعة، وأثناء ذلك طلب القاضي من الزوج إحضار القسيمة، وعند إحضارها اتضح للمحكمة أنها مزورة ووجهت المحكمة بفتح بلاغ في مواجهة الزوج الذي أقر اثناء التحري بأن القسيمة حررها له المأذون الذي قام بعقد قرانهم وأحضره بنفسه بعد أن أرشده إليه بعض الأشخاص لمعرفتهم أنه مأذون شرعي، ولم يكن يعلم بغير ذلك، وقام الزوج بإرشاد الشرطة إلى المأذون التي أوقفت المأذون والزوج والشاهد الذي شهد على الزواج .
الصيحة
|
Post: #3
Title: Re: الكلام دة ما صاح
Author: كمال عباس
Date: 03-26-2018, 05:40 PM
Parent: #2
سلام اخ أبوسن حكاية السجلات الرسمية والمأذون الرسمي والمعتمد لدي. السلطات دي كلها وسائل عصرية ويمكن مع تعقيدات الحياة وضرورة التوثيق وحفظ الحقوق أصبحت مسالة ضرورية ! ولكن !! ولكن شرعا صحة الزواج لا تتقيد بهذه الإجراءات ولا هي شرط في صحة عقد الزواج !!**
**يعني في الحالة أعلاه الزواج صحيح طالما استوفي أركان الزواج التقليدي المعمول بها في العهود السابقة !! اما الإجراءات التي تتخذ في حق المأذون غيرالمسجل فهذا شان اخر تحكمه النظم والضوابط السائدة ولكنه لايسقط صحة الزواج طالما ما استوفي الأركان المعروفة !!
وفِي آراء تجيز الزواج حتي بدون مأذون سواء ان كان مسجل او غير مسجل !!
بس الحكاية شنو طبيب مزيف !!مهندس مزيف !!استاذ جامعي بشهادة مضروب وزير بشهادة منجورة !!شركة تعدين وهمية ! ومازون مدعي انو رسمي الحكاية دي ماشة علي وين ؟
|
Post: #4
Title: Re: الكلام دة ما صاح
Author: عبدالحفيظ ابوسن
Date: 03-26-2018, 08:38 PM
Parent: #3
بس ياهو يا كمال
تشكر
مافي تزييف ولا حاجة
والمأذون ما عليهو شي
ممكن الدواير الحكومية ما تعتمد القسيمة الا ان تكون مختومة ولا طالعة منهم . ليس من حق احد ان يطعن في صحة القسيمة . وحتي لو مافي قسيمة زاتو . قال مرتو وممكن يشهد ناس .
طبعا
السلطة القضائية مطلعة دفاتر قسايم . توزع علي المؤذنين . وبي رقم متسلسل .. وعندها قيمة مالية محددة . المأذون بدفع رسومها ويلقط رزقو منها .
شايف حكاية مزيف دي ما ظابطة وما صحيحة
|
Post: #5
Title: Re: الكلام دة ما صاح
Author: محمد محمود محمد
Date: 03-26-2018, 08:49 PM
Parent: #4
مع الفوضى الضاربة البلد ، كل شي متوقّع
:
هسا في جيلنا ده ي ابوسن ، في زول عارف قسيمتو وين ؟ .. النشوف المأذون أصلي ولّا ضارب 😊
تحياتي.
|
Post: #6
Title: Re: الكلام دة ما صاح
Author: محمد أبوالعزائم أبوالريش
Date: 03-26-2018, 08:49 PM
Parent: #4
سلام ....
الزواج زي الطلاق ..
هو صحيح في شكلو الوارد في الخبر.
أما الدفاتر والتسجيل، فده إجراء ديواني لا ينقص عدم وجوده من شرعية الزواج.
الطلاق نفس الشئ ... يقع إذا طلق الزوج زوجته شفاهةً وأشهد ناس على ذلك.
ما يتبع ذلك من استخراج قسيمة طلاق أيضاً إجراء دواوين لتنظيم سجلاّت الدولة .. والمطلّقة لن تحتاج للورقة (قسيمة الطلاق) إلاّ إذا كانت تنوي الزواج مرةً أخرى، تثبت بها أنها ليست في ذمة رجل (وهذا الشئ يمكن أن يتم أيضاً بشهادة شهود).
أتحدّى أي مفتي.
|
Post: #7
Title: Re: الكلام دة ما صاح
Author: عبدالحفيظ ابوسن
Date: 03-26-2018, 09:00 PM
Parent: #6
صدقت يا محمد محمود
هسة انا قسيمة عرسي ما معروفة وين . لا حقتي لا حقت زوجتي
يعني بي منطقهم دة نكون ما متزوجين ولا شنو؟
الكلام دة حصل بداية مصالحة نميري مع الكيزان .. يقبضو المرة والراجل ويطالبوهم بالقسيمة . عادي ممكن يبيتو حراسة يوم يومين تصدق
في طرفة بحكيها الرشيد علي عمر المحامي كان صح ولا كضب
قال واحد غسال جوهو جوة بيتو بالليل وقبضوهو متلبس هو ومرتو . ودوهم المهلاوي . المهم ناس الحلة شهدو انو دي مرتو . وليهم كم سنة ساكنين جمبهم
قال المهلاوي عاين ليهو كدة وحكاية يمرق براءة ما عجبتو
قال ليهو قالوا قبضوك عريان جوة البيت والبيت دة فيهو ملايكة مسكو جلدو
بعد انجلد قال ليهو يا مولانا خلي ملايكتك ديل يدفع الشيرنق حقهم في الايجار
|
Post: #8
Title: Re: الكلام دة ما صاح
Author: عبدالحفيظ ابوسن
Date: 03-26-2018, 09:07 PM
Parent: #7
صحي يا ابوالريش
حتي لو مافي ورقة زاتو
الزواج طلب وايجاب
والطلاق دة ما داير ورقة ولا شهود زاتو
عايشت قصة طلاق .. وفتاوي .. واحدة قالت مطلقة تلات مرات والراجل قال مرتين . والعوة قامت
الراجل راغب في المرة وهي قالت تلاتة .. حرمت عليهو وبينهم اطفال . والطلاق بحصل وهم براهم
المرة تحكي وهو يحكي وما خلو زول ما استفتوهو من الذين يفتون
اها
الحصل شنو
المرة تراها خاتة عينها علي راجل تاني طقتو عرستو
|
Post: #9
Title: Re: الكلام دة ما صاح
Author: عبدالحفيظ ابوسن
Date: 03-26-2018, 09:12 PM
Parent: #8
دي ذكرتني سؤال الشهادة ما حكم من زني بزوجته المطلقة
|
Post: #10
Title: Re: الكلام دة ما صاح
Author: عبدالحفيظ ابوسن
Date: 03-26-2018, 11:16 PM
Parent: #9
الشعب السوداني لا يتصالح مع الطلاق
دايما بسعو لي بقاء الاسرة رغم العيوب الكارثية احيانا
يقول ليك عشان اولادك ... عشان اهلها ناس طيبين .. عشان عشان
وعندهم مرجوعة في مسماها ...
يقول ليك لو طلقت المرة ما تمرقها من البيت .. وفلسفتهم امكن نفسك تسوقك ليها وتواقعها ودة بيعتبر رجوع
ومثقفين جدا فيما يخص الطلاق
ف شنو ما ممكن تفهم عقلية من وضع السؤال إلا بقراية الخبر دة
|
Post: #11
Title: Re: الكلام دة ما صاح
Author: كمال عباس
Date: 03-27-2018, 00:57 AM
Parent: #10
بس ياأخ عبد الحفيظ الطلاق مرات يقع من دون قصد !
يعني النية والعزم غير متوفران !
يعني في السوق أو لعب كتشينة يتلفظ الزوج علي بالطلاق من
يقصد إيقاع الطلاق أو في حالة نقاش أو غضب فلتت هذه
الكلمة من الزوج من دون يقصدها !
يعني بعد دقيقة إكتشف إنه تلفظ بلفظ لم يكن يعنيه! ببساطة تنهار أسرة وتتمزق ويتشرد أطفال نتيجة لفلتة لسانوفوران لحظة ! يرتبط مصير أسرة وتتفتت روابطها هكذا وبكل
بساطة !
في رأي أن العزم النهائي والنية الصادقة هي مايحدد الرغبةالجادة في الإنفصال ! إذا تعثر التوافق ووصل الطرفان لطريق مسدودة وكانت الرغبة جادة في الطلاق عندها فليقع الطلاق !
بعض الناس متمسكون بالقول أن لفظ الطلاق جده جدوهزله ! فهل يترك الأمر هكذا ليقع الطلاق باللفظ المعهود ولكن بلا نية
أورغبة حقيقية؟
|
Post: #12
Title: Re: الكلام دة ما صاح
Author: عبدالحفيظ ابوسن
Date: 03-27-2018, 06:08 AM
Parent: #11
متفق معاك يا كمال
اعتقد ان مجرد النكث بحليفة الطلاق لا يعد طلاقا . لايمكن الاستهانة بعلاقة مثل العلاقة الزوجية وجعل تدميرها بحليفة عابرة
اعتقد ان الامر يحتاج للنية الحقيقية والقصد
واحد صاحبنا كثير الحليفة بالطلاق لامن تناقشو يقول ليك
قصدي الاكرام واهلنا ديل ما بقتنعو الا كدة .. ولو زول كسر حليفتي ما بطلق
|
Post: #13
Title: Re: الكلام دة ما صاح
Author: Asim Fageary
Date: 03-27-2018, 07:51 AM
Parent: #12
الكلام دة حصل بداية مصالحة نميري مع الكيزان .. يقبضو المرة والراجل ويطالبوهم بالقسيمة . عادي ممكن يبيتو حراسة يوم يومين
سلام مربع يا ود أبوسن
إنت ماشي بعيد مالك
زميل المنبر بخاري عثمان الأمين وزوجته زميلة المنبر أيضاً نجلاء
تعرضا لذات الموقف و وصلوهم الحراسة وهما متزوجان وكانوا حينها طلاب بالجامعة
تحياتي
|
Post: #14
Title: Re: الكلام دة ما صاح
Author: عبدالحفيظ ابوسن
Date: 03-27-2018, 08:17 AM
Parent: #13
ودة الحالة كانو مساعد ياي يا عاصم
اها شوف لامن يبقو شاسي عديل ومكنة كمان
|
Post: #15
Title: Re: الكلام دة ما صاح
Author: محمد فضل الله المكى
Date: 03-27-2018, 08:46 AM
Parent: #14
.
ود اب سِن سلامات
زي ماقال اخونا فقيري أيام شريعة نميري ، عسكري من الجنوب الحبيب
وقف ليهو عربيه بالليل فيها راجِل ومرة... قال للراجل ( ماريا دي بتاع منو)
الزول قال ليهو ( دي مرتي ) اللخو نسى إسم القسيمة قال للراجل ( فاتوره
بتاو وينو )..
آ هااااااااا اخونا ( موثق عقود النكاح ) دا.. وطبعاً دا إسمو الشرعي.. دفتر القسايم
العندو دا قطِع شك رسمي... وبالتالي أكييييد بتتوزع نظير نسبة.
هو 15 مالي إيرادات لو ما حصلوه بالدفع الإلكتروني دا كان تلقاهو في قُفة سِت الشاي.
|
Post: #16
Title: Re: الكلام دة ما صاح
Author: محمد فضل الله المكى
Date: 03-27-2018, 08:46 AM
Parent: #14
.
ود اب سِن سلامات
زي ماقال اخونا فقيري أيام شريعة نميري ، عسكري من الجنوب الحبيب
وقف ليهو عربيه بالليل فيها راجِل ومرة... قال للراجل ( ماريا دي بتاع منو)
الزول قال ليهو ( دي مرتي ) اللخو نسى إسم القسيمة قال للراجل ( فاتوره
بتاو وينو )..
آ هااااااااا اخونا ( موثق عقود النكاح ) دا.. وطبعاً دا إسمو الشرعي.. دفتر القسايم
العندو دا قطِع شك رسمي... وبالتالي أكييييد بتتوزع نظير نسبة.
هو 15 مالي إيرادات لو ما حصلوه بالدفع الإلكتروني دا كان تلقاهو في قُفة سِت الشاي.
|
Post: #17
Title: Re: الكلام دة ما صاح
Author: عبدالحفيظ ابوسن
Date: 03-27-2018, 09:04 AM
Parent: #16
هاك يا محمد
واحد من ناس الضهاري الفوق .. الله جابو المدينة لي غرض هو ومرتو
قبضوهو
وين القسيمة
قال ما عندو
طيب اثبت لينا انها مرتك
قال ليهم
ممكن ...... قدامكم😨😷
|
|