محتاج مساعدة: عايز أسس شركة .. ومغروض مساعدة في الأسم (بحث لما عيوني زغللوا لم أجد)!

09:16 PM March, 17 2018

سودانيز اون لاين
Biraima M Adam-أمريكا الشمالية
مكتبتى
رابط مختصر

هنا واحد من الشركة المسؤولة عن الدومين .. domain names

https://www.godaddy.com/domains/domain-name-search

شروط الأسم:
يحمل أحرف إنجليزية .. ومعني سوداني .. أو مفهوم سودانياً .. أو العكس يحمل معنى سوداني ومفهوم أو مقبول في الغرب ..
والأسم ممكن يكون كلمة واحدة أو عدة كلمات .. وممكن يكون أسم مصدر .. أو مشتق .. المهم أي زول يأخذ راحته .. وجربوا الأسم في الوصلة السابقة حتى تتأكدوا من وجوده ..

جرب أسماء حيوانات في السودان .. جرب أسماء ومشتقات للنيل .. وأسماء أماكن ..


والله الموفق ..

بريمة

الشركة تحمل أسم يدل أنها شركة هندسة برمجة .. كلمات مثل Tech, tek, technology, solutions, software وما شابهها مهمة ..

بريمة

برضو لو هناك أسم لشعوبنا السودانية .. ومن أي مكان في السودان ..

أنا حاولت إسم Soba .. والنيل الأزرق Blue Nile .. والنيل الأبيض White Nile وجبل مرة وجبال الأماتونج .. والتبلدي، القوز .. وغيرها ولم أجد ..

بريمة

الأسم يكون قصير .. وممكن يكون أحرف مقطعة RT أو RTC أو أي شيئ ..


بريمة

أستاذ بريمة المهندس الخبير الاجنبي سلامات .
خليها تكون ( BIRAIMA TEK . CO ) بالعربي بريمة تك كووربوريشن .
أسم سهل النطق علي العرب والاسبان والامريكان . وأسال أخوك من قصص التسويق .
بالتوفيق

AL-ABAR - Al-GOHAINI - WALABA

هههاي .. منتصر
الغريبة godaddy قال كلها محجوزة .. وغير متوفرة .. حتى ول أبا .. محجوزة!

بريمة

تسلم يا عثمان،

Quote: أستاذ بريمة المهندس الخبير الاجنبي سلامات . خليها تكون ( BIRAIMA TEK . CO ) بالعربي بريمة تك كووربوريشن . أسم سهل النطق علي العرب والاسبان والامريكان . وأسال أخوك من قصص التسويق . بالتوفيق

أسم بريمة .. صعب علي الخواجات .. وأنا أتحايل عليهو أقولهم أسمي Bir Adam .. وأسم Bir بكل التشكيلات شالوه ..

وح أجيك للتسويق .. لما الأسم يظبط .. أنا قصدت أسس الشركة لتكون لي أسم .. لي أنا ذاتي عشان أقدر أعمل out sourcing لنفسي .. شفت اللعبة .. بشرحها ليكم لما نلقوا الأسم ..

بريمة

الأخ بريمة

تحياتي

بالتوفيق إن شاء الله... و حظ سعيد لك في عالم البزنس...

مودتي

سلام بريمة
اكتب الاسم واعمل فاصلة (-)
مثلاً
biraima-tech.com
أو
walaba-tek.com
أو
nile-soft.com
وهكذا

بالتوفيق

AL-ABAR TECH.COM

ولو محتاج محاسب قانوني ينجض ليك الملف كلو بي التاكس نمبر بتاعو .
والأسم الاخترتو لي شركتك أو لي أسم العمل بتاعك
قول عوك .
في محاسب ح يعمل ليك الشغل في يومين بس يسلمك الورق وعلي طول تمشي تفتح بزنس اكاونت وتبلش شغل .
بس الشركة خليها ( جنرال تريد نغ ميرشندايس ) و أدفس بعدين شغل التكنلوجي في النص . عشان ما تقيدك بعدين .
يعني ممكن تسوي الدايرو . المهم في آخر السنة تفيل التاكس حق الشركة وأمورك ح تكون باسطة .

ألف شكر يا دكتور محمد عبد الله،

Quote: الأخ بريمة تحياتي بالتوفيق إن شاء الله... و حظ سعيد لك في عالم البزنس... مودتي

البوست دا أنا فتحته عشان يكون فيه بعض التنوير للشباب في أمريكا ..
النظام الضريبي الجديد .. فيه فسحة أن يؤسس الأنسان شركة .. وبدل ما هو يمشي ويشتغل تحت أسمه .. ممكن يدخل في عقد العمل عن طريق شركته .. ما يسمي C2C أو ما يعرفي corp to corp ..
مثلاً الواحد لو دخله السنوي 120 ألف دولار في السنة .. دا بيضع الواحد في tax braket عالي .. وممكن يدفع ضرائب تقيلة .. لو مثل هذا الأنسان أسس شركة .. مثل التي أريد أن أعملها .. المبلغ بأكمله يذهب لحساب الشركة وليس حسابه الشخصي .. وتقوم الشركة (شركته هو) تدفع له أجر مثلاً 60 ألف دولار في السنة .. وتحتفظ الشركة بالنصف الأخر .. والشركة لو رأس مالها أقل من 250 ألف دولار تكون معفية تماماً من الضرائب .. في نفس الوقت شخص دخله أقل أو يساوي 83 ألف دولار بعد ما يسحب ما يسمي بال itemization .. لا يدفع ضرائب كبيرة ..

القصة دي ما أتعملت جزافاً عشان تفتح هذه الثغرة .. المقصود منها تشجيع الشركات الصغيرة .. لأنها تستوعب ما يزيد عن 33% من الأيدي العاملة في الولايات المتحدة .. ومن يعرف ممكن هذه الشركات الصغيرة ما يسمي بال start up تنجح في جذب سوق جديد.

بريمة

أيمن،
سلامات ..

Quote: سلام بريمة اكتب الاسم واعمل فاصلة (-) مثلاً biraima-tech.com أو walaba-tek.com أو nile-soft.com وهكذا بالتوفيق

فكرة جميلة .. لكن أنت عايز الأسم يكون سهل للأستذكار .. مثلاً .. وجدت أسم holytail .. الذنب المقدس .. لو كان holytel .. أو hitech ممكن يكون مظبوط.

بريمة

b]
العبار دينق،

Quote: AL-ABAR TECH.COM

كلمة Bar .. خربت الرصة .. ح تمشي تقدم أسم ذي دا في الخليج .. ح يقولوا دا جايب ليهم بار ..

بريمة

شكراً يا عثمان،

Quote: ولو محتاج محاسب قانوني ينجض ليك الملف كلو بي التاكس نمبر بتاعو . والأسم الاخترتو لي شركتك أو لي أسم العمل بتاعك قول عوك . في محاسب ح يعمل ليك الشغل في يومين بس يسلمك الورق وعلي طول تمشي تفتح بزنس اكاونت وتبلش شغل . بس الشركة خليها ( جنرال تريد نغ ميرشندايس ) و أدفس بعدين شغل التكنلوجي في النص . عشان ما تقيدك بعدين . يعني ممكن تسوي الدايرو . المهم في آخر السنة تفيل التاكس حق الشركة وأمورك ح تكون باسطة .

والله فكرة ممتازة .. بالذات عايز نتاجر مع ناس "علي بابا" .. في أشياء من الصين .. بالله الواحد يضمن الحاجات دي كيف ..؟ .. دوامة نظل حمير شغل دي ما جايبة تمنها ..

فكر معانا يا عثمان ..

بريمة

بحثك يكون في حاجتين
1. الدومين متاح
2. الاسم ما يكون علامة تجارية مسجلة قبل كدا
ما بنصحك بالنقاش العلني ممكن سمسار دومينات يتابع النقاش وويحجز الاسم الانت بتختارو ويعرضو اونلاين ب مبلغ كبير
ربنا يوفقك

kushtec
كوش تيك
مع العلم انك وافد

الأخ هاني
سلام ..

Quote: بحثك يكون في حاجتين 1. الدومين متاح 2. الاسم ما يكون علامة تجارية مسجلة قبل كدا ما بنصحك بالنقاش العلني ممكن سمسار دومينات يتابع النقاش وويحجز الاسم الانت بتختارو ويعرضو اونلاين ب مبلغ كبير ربنا يوفقك

ألف شكر .. وصلت المعلومة ..

الشباب لو أتفقوا علي شيئ .. أستطع تسجيله مباشرة في ثواني ..

بريمة

الكوكلان كلكس حبيبنا عادل أمين،

Quote: kushtec كوش تيك مع العلم انك وافد

والله كوش ما خليت ليها فرقة .. كلها محجوزة ..

بريمة

ول ابا بريمة..حبابك يا صديقي
امنيات بالتوفيق والنجاح..

ياخي كلامك عن الإنفراجة الضريبية ده كلام مفرح خلاص..ونتمنى الشباب ينتبهوا ليهو..

كبر

BMA
بريمة محمد أدم
بقاري من السودان

يا بريمة إنت الزول البيحل المشاكل في مجتمع البقارة بتسموه شنو؟ أها الزول دا هو اسم شركة البرمجيات التي ستوفر الحلول لجمهورها.

تحياتى ول ابا بريمة ..

نسأل الله لك التوفيق و السداد و النجاح ..

"يا بريمة إنت الزول البيحل المشاكل في مجتمع البقارة بتسموه شنو؟ أها الزول دا هو اسم شركة البرمجيات التي ستوفر الحلول لجمهورها."

عليك الله يا بريمة اقيف هنا ..
ده اسم عندو معنى سواء حقيقة او مجاز ، يا ريت المزيكا بتاعتو تكون جميلة او على الاقل مريحة للاذن وساهل

يا بريمة لقيت ليك اسم دومين تحفة ..مفردة تعبر عن مكون اساسي من مكونات الثقافة الغذائية السودانية (مريسة)، نطقه سهل وبسيط ومتوفر حسب مواصفاتك

marissa.solutions

=

(شيكان) يا حبيبنا بريمة اسم سوداني كردفاني متفرد ومميّز وسهل الحفظ ومموسق الجرس
ويحمل دلالة لمعركة حربية امتزجت فيها الجسارة والمهارة والتكتيك والدهاء
ما جعلها الأكثر خلوداً على مدار التاريخ السوداني، والأشد مرارة وعلقماً
في حلق الملكة فكتوريا وحلوق أحفادها المتعاقبين إلي يومنا هذا.

في تلك المعركة يا بريمة تجلّت العبقرية الناصعة لأجدادنا الأفارقة
وانكشف غباء وغفلة جنرالات إنجلترا بقيادة (هِكس) وأتباعه من عرب الشام ومصر
برغم أنهم كانوا الأحسن تدريباً وإعداداً وتجهيزاً، والأكثر عدداً والأحدث عتاداً.
شيكان كانت منعطفاً حاسماً مهّد الطريق لتحرير دارفور
ومن ثم التقدم والانطلاق لحصار الخرطوم وتحرير كل السودان.

كما أن عبارة شيكان She Can الإنجليزية تحمل أيضاً عدداً من الدلالات أهمها القدرة والاستطاعة.

لذا فاقتراحي تسمية الشركة:
- شيكانكو .She-can-co.
- شيكان – تيك .she-can-tec
- شيكان-هكس She-can-Hex
- شيكان- وِن she-can-win
أو أي إضافة تلحقونها بمفردة شيكان..

ونتمنى لشركتكم النهوض والنصر المؤزّر.. وسلسلة الفتوحات في كل القارات.

تحية لك وضيوفك
...
..
.

الأخ/ بريمه

ألحق الإسم ده

sudtec.net

الأخ\ الصادق عبدالله الحسين (ذكرتني الصينيين أسماء الدومين كلها شين وشا ههههههه أي واحد حيفتكر الاسم صيني )

سلامات بريمة
Elnagaa Techno Solutions
Elnagaa Data Solutions
النقعة دي عاجباني
هاك المصدر

b]ماشاء الله أقتراحات سمحة ..
خلوني ندخلها في godaddy ونجيم بالخبر اليقين ..
كلمة she .. دي بعيدة ..
وبرضو مريسة ما لافقة .. دي يسويها العبار دينق .. بركيب أو حليب .. ممكن

تحية لكل الشباب وبجيكم ..

بريمة

لو داير تسجلها في السودان سميها شركة التمساح عشان تمشي ليهم جاهز ولو في دولة تانية خليها Crocodile

ههههاي ول أبا عثمان
دا شنو دا .. جابت ليها تماسيح .. tamaseh.com

بريمة

Quote: مثلاً الواحد لو دخله السنوي 120 ألف دولار في السنة .. دا بيضع الواحد في tax braket عالي .. وممكن يدفع ضرائب تقيلة .. لو مثل هذا الأنسان أسس شركة .. مثل التي أريد أن أعملها .. المبلغ بأكمله يذهب لحساب الشركة وليس حسابه الشخصي .. وتقوم الشركة (شركته هو) تدفع له أجر مثلاً 60 ألف دولار في السنة .. وتحتفظ الشركة بالنصف الأخر .. والشركة لو رأس مالها أقل من 250 ألف دولار تكون معفية تماماً من الضرائب .. في نفس الوقت شخص دخله أقل أو يساوي 83 ألف دولار بعد ما يسحب ما يسمي بال itemization .. لا يدفع ضرائب كبيرة ..

كدي يا بريمة وضح كلامك ده هنا شوية..

لأنو الأنا فاهمو انو X من الناس لو دخله السنوي ( .120.000) فحا يدفع الضرائب عن ( 120.000) كدخل سنوي ...

ولو عندو مصدر دخل تاني فسيتم إضافة الدخل الأول (120.000) + الدخل التاني (60.000) ويصبح دخله السنوي + (180.000) وده حا يدخله في tax brackets أعلى

وبالطبع X ده ممكن يدخل (120.000) دي في شركة أو بزنس لكن بعد ما يكون دفع عليها الضرائب المستحقة حسب الكاتيقوري اللي هو فيهو..

بالإضافة كمان للـ corporate income tax الحا تدفعو الشركة لاحقاً

الهادي،
وين يا زول مختفي ..

نأخذ مثال .. elhadi كشخص .. و elhadi co كشركة .. وأنت مؤسس الشركة .. كده أنت قسمت نفسك لشخص وشركة .. في نفس الوقت .. تمام ..
لما تمشي تقدم للشغل .. ما ح تقدم الهاي كشخص .. تقدم الهادي كشركة ويصير وضعك في العمل C2C .. تمام .. corp to corp

صاحب العمل ينزل كل ماهيتك لشركة الهادي بما فيها الضرائب .. وبما أنك معين نفسك في شركة الهادي .. ممكن شركة الهادي تدفع ليك أي مبلغ بدورها كأجر .. قول دفعت لنفسك 60 الف .. أصبح دخل الشركة 60 ألف
بكده أنت ح تدفع ما يقابلك من الضرائب .. وشركة الهادي ح تدفع ما يقابلها من الضرائب .. وبما أنك كفرد دخلك 60 ألف .. تكون ضرائبك بسيطة جداً lower tax brackets .. وممكن تكون معفي خالص من الضرائب في هذه الحالة .. وبما أن شركة الهادي دخلها 60 ألف .. قروش الضرائب كلها ح ترجع ليها ..


شوف الكلام ووريني لو أنا غلطان ..

بريمة

Firstly provide outstanding services
Secondly good customer service
Thirdly customer friendly contract policy

After these any name can go even Gonglaze

بالمناسبة تسجيل الشركة والحصول على رقم الضرائب الخاص بهالمسمى EIN number ممكن كله اونلاين فى اقل من نص ساعة.. وتطبع الشهادة وتمشى تفتح الحساب فى البنك قول تانى ساعةتسجل الدومين فى networksolutions.com او Domaindiscover.comاقل من نصف ساعة.. تمشى wix.com وتصمم الموقع.. تانى ساعةتفتح حساب فى بيبال PayPal وتربطه مع حساب البنك.. نص ساعةYou are now up and running in less than 3 hoursFee for online LLC company registration is $120Good luck

والله يا باشهمندس أبو الريش
أنت زول خبرة عدييل ..

Quote: Firstly provide outstanding services Secondly good customer service Thirdly customer friendly contract policy After these any name can go even Gonglaze

تسلم ..

بريمة

سلام بريمة
؟γιατί αγνοείτε τις επιλογές μου

😀απλά να γελάσω μαζί σου

اعرف انك كنت بسالونيكي
بالتوفيق

الأخ ناصر
يا سلام .. يا أخى .. أنا وأنت بنعرف بعض .. مش .. ما تقول لي يا ناصر! ..

سلم علي ناس اليونان ..

والله لم أجد الوقت لأرد علي بعض من الناس .. ول أبا كبر ول أبا الطيب .. وأخرون

بريمة

سلام الأخ بريمة
microsol.com
الاسم ده متاح واظنه مناسب اختصارا Micro Solutions ومختصر وخفيف
بالتوفيق

الأخ عبد الله
سلام ..

غير متاح ..

بريمة

الأخ بريمة, بس خلي الأولوية في التوظيف لي أعضاء سودانيز أونلاين, عشان نلاقي معاك فرصة

متاااح يابريمة بنطاقين زى ما فى الصور والصور دى انا عملتها الان الساعة 14:00 الزمن GMT+3

La vache de hafir

بريمة
احسن من الإسم دة ما بتلقى

ول أبا عثمان

Quote: الأخ بريمة, بس خلي الأولوية في التوظيف لي أعضاء سودانيز أونلاين, عشان نلاقي معاك فرصة

ههههاي والله ضحكتني .. يا أخي قالوا دا ببكي وداك بلحس الدموع .. أت عارف يا عثمان أنا همي ألقي لي شغل لروحيتى .. وأتفادي الضرائب الجننونا بها جن ..

لكن بإذن الله لو أخوك كسر حاجس الخوف .. والأمر صار .. في خارج أمريكا أعين السودانيين .. بالذات الذين فقدوا سبل عيشهم في دول الخليج .. وأخليهم يكونوا قاعدين في أماكنهم التي آنسوا العيش فيها .. إلي أن يفتح الله لنا بأستعدال حال وطنا ..

في أمريكا الوضع مختلف .. هنا .. أنا لا أملك الشغل بصورة مباشرة .. ودا بأعتبار ما يكون في المستقبل .. بل الشركات الكبيرة والحكومة هي من تمتلك الشغل ونحن نقدم بإذن الله ناسنا ضمن المنافسة والحشاش يملأ شبكته .. يعنى المسألة ما فيها دا قريبي أو دا سوداني ..


بريمة

AL-ABAR - Al-GOHAINI - WALABA
--------------------------
اوسكاار يا منتصر

احترامي

الأخ عبد الله،
يا أخى غير متاح .. مين يقدر يدفع 18 ألف دولار وزيادة .. دي المشكلة هنا ...

تسلم ..

بريمة

المبالغ دى بالريال السعودى مش بالريال كدا اديها طلة

جهينة ضوت كم
LTD جهينة
LLC جهينة
juhayna .com

الأخ عبد الله،

$9,999.00
+ $14.99*/year
هذا هو المبلغ من عندنا في أمريكا .. 10 ألاف دولار .. زائداً الرسوم السنوية ..

أ
بريمة

كمال عباس
juhayna .com

الأمريكان ح يقروها Ju-heyna .. وبعد ال Heyna هو المرفعين ..
أنت لازم تقرأ نفسيات الناس في الأسم ...

بريمة

SDCT (Sinnar Development Computer Technology )

or
sinnartec

or
Acacia seyal tec

وان استعصت سميها على ( أم خدود )بالإنجليزي ههههههه .

أها يا أخوانا .. عشان تعرفوا أنا جادي ..

سجلت الدومين التالي .. tekmastr.com .. لاحظوا حر e في كلمة master محذوف ..

والملاحظة الأسم غالي .. علي طول قال يقدر سعر بيعة بالدولار 1171$ ..



قدر ما حاولت أسجل tekmaster .. نظام التسجيل رفض .. علماً عن نبحث عن tekmaster.com لا توجد .. وأي شيئ منها ..
طبعاً في مجال البرمجة وتقنية الكمبيوتر tekmaster هو المسؤل عن الأدارة بتاعت الأنظمة .. لا أدري إن كان هذا الأسم محجوز بصورة طبيعية ..

المهم الأن ...عايز منكم ال Logo ..
وأنا ح أسجل الشركة تحت ممسمي US Tek Master ما رأيكم ..؟


يدكم معانا في اللوقو ..

بريمة