Post: #1
Title: ♀الهوية♀
Author: جلالدونا
Date: 03-07-2018, 01:25 AM
Parent: #0
00:25 AM March, 06 2018 سودانيز اون لاين
جلالدونا-
مكتبتى
رابط مختصر كتر الحديث عنها اليومين ديل
عرب .. افارقة .. محلوطنين .. مخلقنين
الاعمى شايل المكسّر
الحقيقة راسى جاط جوطة شديده خلاص
|
Post: #2
Title: Re: ♀الهوية♀
Author: جلالدونا
Date: 03-07-2018, 02:11 AM
Parent: #1
لسان ... لون ,,, دم
وكل زول شايل عصايتو فوق فهم الاخر و واقعين خبت
و الغريبه هم ما عارفين بيتكابعو فوق شنو ذاتو
و اختلط حابلهم بنابلهم
جاطوها و جاطت فوق راسى
و بصراحة راسى جاط لانو ما عرفتهم جايطين فى شنو
اها ورّونى قبل ان ألحق امّات طه
|
Post: #3
Title: Re: ♀الهوية♀
Author: معاوية عبيد الصائم
Date: 03-07-2018, 02:18 AM
Parent: #2
ي زول ات راقد فوق راى
ثم وين DNA بتاعك ؟؟
تحياتى ي مواطن
|
Post: #4
Title: Re: ♀الهوية♀
Author: ABUHUSSEIN
Date: 03-07-2018, 05:35 AM
Parent: #3
| Quote: الحقيقة راسى جاط جوطة شديده خلاص |
إنت عندك راس عشان يجوط ....
واحد من المواضيع الإنصرافية التي تزرع الفتنة .....
يعني شنو هوية ....؟؟؟؟
كل العالم المتحضر ما شغال بي هوية ........ شغالين بيها نحن ناس الفارغة و المقدودة ....
عشان كدا هم بقوا عالم متحضر و نحن عالم يحتضر ....
عارفك برضو ما حا تفهم لكن مكتوب علي أحاول معاك عسى و لعل ...
|
Post: #5
Title: Re: ♀الهوية♀
Author: معاوية الزبير
Date: 03-07-2018, 05:44 AM
Parent: #4
أنا قريتها ( الهــوبة )، خاصة بعد شفت جوطة الراس دي
ابوحسين.. اختشي شوية
|
Post: #6
Title: Re: ♀الهوية♀
Author: ABUHUSSEIN
Date: 03-07-2018, 05:50 AM
Parent: #5
| Quote: ابوحسين.. اختشي شوية |
قـــدُر ما حاولت ما قدرت تصدق ...!!!!!!!!!!!!
و قالو الإختشو ماتو ... عايز تكتلني ول شنو ....؟؟؟؟؟؟
|
Post: #7
Title: Re: ♀الهوية♀
Author: عبدالحفيظ ابوسن
Date: 03-07-2018, 05:55 AM
Parent: #6
الهوية دي من الهواء؟
|
Post: #8
Title: Re: ♀الهوية♀
Author: جلالدونا
Date: 03-07-2018, 08:32 AM
Parent: #7
لالا ما راقد يا معاوية واقف عديل كده
بعدين لو ال دى ان ايه ده بحل مشكلة
كان عملت مركز فحص فى مل مدينة
هسى عاين نتيجة الفحص بتاع اخونا سمعة ابو لمعة
طلع لحم راس
|
Post: #9
Title: Re: ♀الهوية♀
Author: زهير عثمان حمد
Date: 03-07-2018, 09:15 AM
Parent: #8
هوية شنو يا جلجل نحن قاعدين كدا خازوق لا زنوجه عديل ولا عرب نص كم
تعرف أجمل ما قيل في الشعر السوداني المعاصر عن الهوية
كما قال الشاعر الراحل محمد عبد الحي
(أصلي بلسان وأغني بلسان )
قصيدة العودة الي سنار
أمكن دي معقولة جدا أفارقة في الرقيص و عرب في الديانة
لك ودي حضر المعلوم جاي انا
/B]
|
Post: #10
Title: Re: ♀الهوية♀
Author: جلالدونا
Date: 03-07-2018, 09:22 AM
Parent: #8
ابو اللف
تصدق اول مرة يكون عندك فهم
يعنى شنو هوية؟
ده مربط الحمار
و المصطلح ده قام من وين
عندنا الجنسية و بكل الفخر مكتوب فوقا سودانى
سؤال المليون
ما معنى سودانى يا زول ؟
ياخى يا زول دى براها هوية
ثم
بدون ما اقول ليك براك عارف تعمل شنو
|
Post: #11
Title: Re: ♀الهوية♀
Author: الصادق عبدالله الحسن
Date: 03-07-2018, 10:52 AM
Parent: #10
=
الهوية التي أعرفها يا جلال هي قبيلة عريقة في الصومال.
والصومال لا تعاني ذلك الفصل العنصري بين من هو خلاسي
ومن هو خاتف لونين، ومن هو بَيْن بَيْن..
وليس هناك تمييز بين من يرقص من غير أن يغطي دِقْنو،
أو من يُغني بلسان ويُصلي بلسان.
في الصومال لا يوجد صراع هوياتي وإنما صراع القبيلة نفسها (قبيلة الهوية)
التي "انبثقت" مثل هذا البوست.
فالهوية الصومالية "فولة وانقسمت نُصين" إلى عشيرتين رئيسيتين
عشيرة (هوية أبغال) التي يقودها رئيس الوزراء الأسبق (علي مهدي محمد)
وعشيرة (هوية هابر جدر) التي خضعت لسيطرة الجنرال (محمد فارح عيديد).
على مذبح القبيلة الواحدة دّق الصوماليون بينهم عطر منشم
وتصارعوا و"انبثقوا" يفترعون الحروب بسهولة افتراع بوستات الهويات
ومضوا يُقبقبون بعضهم البعض بلا رحمة ولا رأفة
حتى تفتتوا (ولحقوا بأمات طه) وتشتتوا
برغم أن القبيلة الواحدة كانت للمفارقة تسمى (قبيلة الهوية).
تحية لك وكل زوارك أفراد قبيلة الهوية
...
..
.
|
Post: #12
Title: Re: ♀الهوية♀
Author: جلالدونا
Date: 03-07-2018, 11:14 AM
Parent: #11
مرحباب معاوية الزبير
| Quote: أنا قريتها ( الهــوبة ) |
يمين الله قرايتك صاح
هى جنس هوبه هي
ما بين الهويه و الانتماء و الولاء
خطوط و فواصل
جاطوها جنس جوطة
ليك حق تقراها هوبه
هم بتكلمو عن شنو ... !!!؟؟؟
|
Post: #13
Title: Re: ♀الهوية♀
Author: جلالدونا
Date: 03-08-2018, 05:19 PM
Parent: #12
لالا يا سنّو
الهوية ما من الهواء ديك التهوية
و تختلف عن الهوهيه الممارسة عن الهوية هاهنا
شفت كيف
___
اها اجيك براحة و اقول ليك
كلمة الهوية ترميز للسؤال
من هو ؟
الاجابة تكون شنو
فى حد علمى الاجابه مجموعة من الخصائص و المعالم و المظاهر .. عادات و تقاليد .. التى يتميز بها هذا المسئول عنه
و سلوك و اسلوب و طبيعة حياه
يعنى لو سألتنى من هو ابو حسين و العياذ بالله
ح اقول ليك سودانى
تقول لى عرفتو كيف
ح اقول ليك ما شايف عمتو و جلابيتو ديل
ح تقول لى تانى شنو
ح اقول ليك لهجتو
ركّز معاى .. اللهجة و ليس اللغة
شوف .. قوم لف ...
حاجات كتيرة خلقت هذا الكائن الجميل الاسمو سودانى
بالطبع ليس من بينها الدين و اللغة
|
Post: #14
Title: Re: ♀الهوية♀
Author: Asim Ali
Date: 03-08-2018, 06:00 PM
Parent: #13
لو ختينا الرحمن فى قلبنا
المفروض يكون سبب قوتنا هو واحدمن اسباب ضعفنا وصراعاتنا
نحنا نسيج وحدنا
ناسس جامعه الشعوب السودانيه
واى دوله - عربيه او افريقيه او وات ايفير - عندها مكون ثقافى مشتركمعانا تقدم طلبا
وبعد داك ننظر فى الطلبات ......
|
Post: #15
Title: Re: ♀الهوية♀
Author: السيد المسلمي
Date: 03-08-2018, 06:01 PM
Parent: #13
بالله باجلادونا تعال دغري وبطل مجمجة :)
بوست ود المشرف دليل واضح علي إنو مافي حاجة إسمها هوية ..
طلب الإنضمام للجامعة العربية قلب موازين كتيرة وكشف عورات اكتر :)
.....
عندي معاك مضوع بجيك فيهو بالمهلة .
وعبر هذا البوست ابعث بأشواقي وتحياتي للاخوين الظلامي ابوحسين
وللعزيز معاوية المدير
|
Post: #16
Title: Re: ♀الهوية♀
Author: جلالدونا
Date: 03-08-2018, 07:41 PM
Parent: #15
كيف الكلام ده يا زهير
يا زول نحنا الساس و الراس
و هويتنا معروفة و مميزة دون شعوب العالم
تعرف هسى الامريكان عرفو التمباك حقنا ده
و عادى صاحبك الامريكى يقول ليك جيب سفة من صعوتكم السودانى
و ماشى بعيد ليه
و انت جايى جيب معاك كم رطل تمباك
بتاع الجمارك هنا اكيد ح يشوفو
و ح حيرفع حواجبو من الدهشة و يقول ساءووووووت !!!!
آاااااى ود لايك تو فت صم
ياخى حتى الابريه عرفوهو
بس فاضل البتاع داك
اقسم لك بالله يا زهير
شهر خمسة الفات ده جيت من السودان شايل شنطة متروسة ابريه
بتاع الجمار بعد الكشف طوالى هنانى بى رمضان
يا زول هويتنا و سودانيتنا كاسحة
و الاخوان هنا فى غير معترك يعمهون
|
Post: #17
Title: Re: ♀الهوية♀
Author: عماد الدين الطيب عمر
Date: 03-09-2018, 06:36 PM
Parent: #16
تعرف يا جلال
عشان اوريك كلامك صاح
واحد اخونا برضو وقفوه في المطار في امريكا
لقوا عندو ابريه
قال له : ايز إت أبريه ؟
و عرفوا طوالي انو سوداني و رمضان قررررررب
رجل الجمارك الامريكي قال له :
بلّ لي منو
و املا لي " الكوز " دا
بس دي ما عارف قالها له بالانجليزي كيف
|
Post: #18
Title: Re: ♀الهوية♀
Author: جلالدونا
Date: 03-09-2018, 07:25 PM
Parent: #17
مرحب الصادق
يبقى الصراع فى الصومال صراع مصالح
و ليس صراع انت جايى من وين
آفة بلدنا مثقفيها ومن امتلك منهم ناصية القرار فيها
عجز كامل عى ادارة التنوع العرقى و الثقافى
و اختلاق المشاكل فى قضايا انصرافية بالرغم من ان الحل تحت سمعهم و بصرهم
اهلنا النوبة قرروا يكتبو لغتهم و اختاروا الحرف الانجليزى لرسمها
يعنى تجاوزوا مصر و عبرو البحر الابيض و فاتو فوق اوروبا لمن وصلو بحر المانش و قطعوهوا
و جابو لغمة المستعمر
بالنسبة لى مافيها اى حاجة
ده خيار اهلنا النوبة و هم ادرى بما يفيدهم
مافى زول فتح خشمو و قال بغم
لا جابو سيرة استلاب ولّ تلصّق
لكن اول ما اهلنا فى الشرق قالوا يكتبو لغتهم بالرسم العربى
يعنى قول بس قطعوا البحر الاحمر
بصرف النظر اىو الغربية لغة غالب اهل البلد
القيامه قامت
و المثقف جا شايل المتثاقف
و هاك يا لت و عجن
و البوستات و المداخلات على قفا من يشيل
و هاك دى
جون قرنق اس قضيته هيمنة الشمال
المتسلط على السلطة و الثروة
و شمال قرنق ده كان كل الشمال
مع انو مشكلتو مع الخرطوم
اها الجنوب مشى
قامت دارفور و طلعوا لينا بالشمال النيلى
اعادة تدوير للمصطلح مع شوية تخصيص
شفت كيف
|
|