بتاع الأمن في سينما عفراء

09:10 PM February, 10 2018

سودانيز اون لاين
بدر التمام-Washington DC
مكتبتى
رابط مختصر

بعد غيبة عن السينما في السودان مشيت سينما عفراء مول. كنت قاعد في أخر صف و المقعد القريب من الباب. أثناء ما الفيلم شغال دخل واحد واضح إنو من الأمن (لابس بدلة كنغولية) و قعد يعاين في الناس بصورة غريبة و فجأة نادى إتنين شباب كانوا في الصف القدامي و معاهم بنات: تعالوا هنا. الناداهم كانوا واحد سوداني و التاني مصري و أنا بحكم إني كنت جمب الباب كنت سامع الكلام و برضو لأنو كان بينهر و بصوت عالي. أول ما جوهو الشباب قال ليهم: نادوا البنات المعاكم. السوداني رجع قعد مع البنت المعاهو و ما اشتغل بالموضوع كتير. المصري مشى نادى البنت المعاهو و الإتضح أنها زوجتو و هي محجبة و لابسة لبس محتشم جداً. كل المشكلة في إنو زوجتو كانت قاعدة قريب منو أو جايز ساندة على كتفو و الناس ديل أنا قدامي و الله ما حصل منهم أي شيء غلط و حتى كان معاهم أسرة تانية. بتاع الأمن شبكوا الكلام الفارغ دا ما بنفع في سودانا دا و إنت و إنت و المصري بقول ليهو و الله دي مراتي و محصلش حاجة و زولنا مواصل ينهر فيهو لحدي ما بس بقى يقول ليهو حاضر حاضر حتى خلاهو رجع هو و زوجتو لمقاعدهم. الفيلم البنحضر فيهو كان كوميدي لكن واضح إنو الأخ المصري و زوجتو ما استمتعوا بباقي الفيلم و لا أنا استمتعت. الأسئلة البتمنى ألقى ليها إجابة من بتاع الأمن أولاً: كيف نفسك تسمح ليك تقهر رجل قدام زوجتو و تهينو بس لأنو عندك سلطة. ثانياً: إذا إنت عامل فيها بتنفذ في القانون أو الإنضباط لشنو خليت الشاب السوداني و رغم إنهم ما كانو بيعملو في حاجة غلط لكن طريقة ردو ليك و رجع فتح ليك كان واضح إنو ما خايف منك و عندو البحميهو فقمت إستقويت على الغريب. ثالثاً: عفراء دا فيهو لبس فاضح بالكوووووم و ناس مشبوهة ظااااهرة تقوم تسيب ديل كلهم و تتجسس على الأسر داخل السينما عشان تشوف القاعدة قريب من زوجها أو ساندة على كتفو. ما كان بيدي شيء أعملو لكن بعد انتهى الفيلم إعتزرت للأخ المصري عن التصرف السخيف دا و بتمنى لو زول يقدر يوصل على الأقل لناس عفراء إنو مسئول الأمن عندكم يتعامل بصورة غير كريمة على الإطلاق و لا تشبهنا كسودانيين

الأخ بدر سلامات

هو دحين السينما مش حرام؟

مرحب الأخ حسن حماد
يا اخوي السينما دخلت السعودية زاااتا

سلام بدرالتمام والجاتك في فلمك سامحتك
حقيقة دا شيء مقزز ومثير للإشمئزاز ولا يعني سوى عقلية متسلطة لم تنال التدريب الكافي حتى يلطف من النزعة التسلطية أذكر أنه حدث قبل عدة سنوات أن أستاذاً جامعياً توقف بسيارته خارج الطريق لسبب طاريء في مكان يخلو من حركة المارة وكانت معه بالسيارة زوجته وما هي إلا برهة حتى أحاطت بهم مجموعة من عساكر النظام العام على أساس إنه على وشك ممارسة ال################ة مع الزوجة الشابة وأشبعوهم إساءات مقززة وتهديد وخلافه رغم محاولته المستميتة لإقناعهم بأنها زوجته ولم يكن في تلك الحظة بحوزتهم ما يثبت أنهما زوجين (قسيمة ) المهم قادوه للحراسة وإنتظر ساعات وسط الإهانات ونظرات الإشمئزاز قبل أن يأتي ضابط عاقل يقبل أن يستمع بعقل مفتوح للدكتور ويساعده في إثبات العلاقة ثم إطلاق سراحه
لكنها في النهاية مشكلة أن تضع السلطة في يد متسلط أو شخص معقد نفسياً.

مرحب الأخ عبدالغني
القصة كما تفضلت بالضبط هي عقدة نفسية و سبحان الله هو نفس التعبير الإستعملتو أنا لما اعتزرت للأخ المصري
و قصتك بتاعت الدكتور و أكيد غيرها الكتير بتثبت إنو الناس دي عندها مشاكل نفسية بتطلعها في الناس
ما ممكن أي زول حايم في البلد دي يشيل معاهو قسيمة الزواج زي رخصة العربية. الله المستعان

واقع مؤلم

والله هذا شئ مؤلم ..وتدخل سافر في حياة الناس الشخصية ...
متى يا ترى سنرى هذا الكابوس الغاشم على صدور الشعب ينتهي
وتعود الحرية والسلام لبلادنا...
مع وافر التقدير

حتي لو بافتراض حصل تصرف خطئ
اظن التوجيه بطريقه محترمه كان هو مفروض
ويكتفي بلفت نظر الرجل فقط لوحده ان السلوك دا ما مقبول
مش يفرد عضلاته ويسئ
غايتو بجد شي يفقع المراره

مرحب الأخ حسن حماد
يا اخوي السينما دخلت السعودية زاااتا
-----------------------
بس ما جاوبت على السؤال. ....... سلام

Quote: هو دحين السينما مش حرام؟

سؤال ليس في مكانه
وبعدين لو حرام قانونا المشاهدون ليسوا مسؤلين
قانونيا المسؤول هو مركز عفراء .

قانونيا المسؤول هو مركز عفراء .
............................................

المسعول سيدو
هو سيدو منو؟؟

تحياتى المواطن بدر

الترصد من النوع دا برضو فى الحدائق والمنتزهات.
حاله مرضيه غريبه عند هؤلاء.

يا اخ بدر التمام
انا شايف سؤال حماد ينطوى على تبرير مبطن
لسلوك عناصر النظام العام في عفراء.
موضوع حرمة السينما صار كلاما خارج التاريخ
فحتى لو افتأ الازهر ورابطة العالم الاسلامى وكل دور الفتوى
في العالم الاسلامى بحرمة السينما فلن تجد فتواهم غير السخرية
والرثاء لحالهم .
كلامك عن قسيمة الزواج فقد حصلت بالفعل وبكثرة
منذ بداية التسعينيات الى عام 1997تقريبا وحتى قبل وبعد اتفاقية نيفاشا
بدرجة اقل .
ان المضايقات التى تبدر من عناصر النظام هنا وهناك من حين لآخر
فهي مقصودة لتذكير الناس من ان عصا الدولة الغليظة موجودة
وما تفتكروا ان مشروع الانقاذ - الدينى - قد انتهى وهي رسالة لمن نسي ذلك .
لقد فشلت الانقاذ في حمل الناس على الاستكانة لذلك تفعل ذلك
بدافع الخيبة التى ضربتها تحت الحزام وبدافع فشلها الذريع في كل مشاريعها التنموية والاخلاقية ...... تحياتى وتشكر على تناول الموضوع ....

شيء مؤلم جداً يا إمتثال و الناس ديل ياها حركاتهم الزمان زاتا ما خلوها و لا حيخلوها. ربنا يستجيب دعاك و لك إحترامي

شكراً للإخوة و الأخوات على التجاوب مع الموضوع و شجب السلوك المتخلف لهذا الشخص و حاولت أرد على مداخلاتكم لكن النت ما مساعدني. تسلمو

بدر التمام انت فاضلابى؟

مرحب الفاضلابي. لا نحن دباسيين من الجزيرة

الاخ / بدر التمام . وضيوفه الكرام . تحيه طيبة .

تتسم في كل العالم تصرفات رجال الامن والشرطة عموما بالعنف والقسوة ، وهذا نابع من طبيعة عملهم ، التي تحتم عليهم في بعض الاوقات . الشده وعدم التعامل باللين .
في النهاية لايبرر ذلك الامر .

عشان تكون عسكري او رجل امن في السودان ، يكفيك ان لايكون لك عمل . وبعض المعرفه ، هنا او هناك .
وهي كاي مهنه لها ظروفها ، وملابساتها.
ولها منسوبيها .
وهولاء ادمنوا حب السلطة .
فتراه يتنقل بين الاقسام المختلفة ، في نفس المجال. لايستطيع المغادرة . والاندماج في عمل اخر .
او يكون في محله لايبرحه حتي التقاعد . ووصلوه سن لاتسمح له بمزاولة المهنة .
فبريق السلطة لايقاوم ، والاستعراض وابراز العضلات ، امام الناس ، غايتهم الكبري .
اغلبهم ادمغتهم مغسولة . ومليئة باوهام غريبة .وهم ابناء هذا العهد التعيس . فمنه نهلوا ، وفيه ترعرعوا .
يزول الامر بعد اعادة التهئية ، وذهاب هولاء ، وعودة الامور الي نصابها .



تحياتي ،،،

مرحب بالأخ هاشم كاروري
زي ما تفضلت هي عقدة السلطة و كنا زمان بنشوفها من بعض منتسبي الشرطة بزيهم الرسمي لكن لمن تجي من واحد لابس لبس مدني و يفتقر لأقل درجات الذوق ناهيك عن الإحترافية و بعدين العيب الكبير إنك تهين رجل قدام زوجته. نأمل معك أن يأتي عهد جديد يكون فيه رجل القانون مدرب و يفهم القانون و يحترم المواطنين و الضيوف. و لك تحياتي