الليلة الوآطة برّا وآقفة أضان دحش (صور) ...

10:01 AM February, 08 2018

سودانيز اون لاين
معاوية المدير-بكندا محافظة البرتا
مكتبتى
رابط مختصر

رغم إنها ما باردة شديد، فدرجة الحرارة 17 تحت الصفر
ومع الرياح بتعمل 28 تحت الصفر لكن الجليد كندك
الوآطة ؤ ما زال نازل وسيظل طِيلة اليوم وغداً ومن
المتوقع أن يصل إرتفاع التراكُم 50 سنتيميتر في بعض
الأماكن .

قبُلنا وحححدنا وبرانا ...

اوّلاً بالتبادي عشان نمرق من البيت لآزم نفتح
الطريق بغرف الجليد من خشم الباب ...

هسّع دي ينضفوها كيفِن ؟...

المواطن ود المدير
النرسلك محرات
رائك شنو علا البقر عليك
تحياتى

مافي حل غير المكنسة ...

البلد دي حِويلتا أسكتو خلوها ساكت بس ...

Quote: المواطن ود المدير النرسلك محرات رائك شنو علا البقر عليك تحياتى

حياك الله يا قريبي .
المحرات ما بيقضالي غرد
ألحقوني بوآسُوّق .

سلآمي للوِليدات واللهل ...

بختكم

تكسرو سااااكت

أعيذها نظرات منك صادقة أن تحسب الشحم فيمن شلضمه ورم ،أتاريك مكوفر بس بردك دايرلوا كتحة من عصير فرح التمر المسوس المعبأ في قزايز بتاع ودعمك في الباوقة كان ما تقوم تتمر عربات فريقكم جت

رحِم الله السيّدة بِت أُمحُوّمد .
كُنا ؤ نحن سغار نِتفرّجخ حولين الكانون وسط اللوضة ؤ نقعُد نطقطِق في
الودك فوق كعب كرعينا من الشقيق ؤ ضهر إيدينا يكُب دم من فِعل الصقط،
ؤ هبوّب الشِتا تعوي برّا والقِرّة تنفُخ لكن رغم ذلك ما أن نسمع السيّدة بِت أُمحُوّمد
رُب رمت كُليقة قصب عيش الريف لحمار كرار ود أحمد فر نقوم جاريين قبل الحمار
يبدأ يأكُل نقول كدي نفلِّخ القنقر ؤ نجري نطقطقو فوق الجمُر ؤ ناكل حتي بعد دآك
نِتكرفس فوق العتانيب ؤ نجُر فوقنا البطاطين الحُمُر ؤ نروح في أحلي نومة . الصباح
نقعُد في ضرا الشمس ؤ كل وآحد يطُبلو بُرطمانية شاي بلبن يغمِّز في الزلآبيا ؤ ياكل
والعجب لآمِن الشاي يسيّل فوق ضهر إيّدك ؤ تقول كدي تشفُطو بلسانك ؤ يختلط
بطعم الشِقيق الفي إيّدك آآه عاد دا طعماً تاني ويّن نلقاهو ؟...

هسّع دي ما لوحة تشكيلية عديييل كِدا ...

عاد دي حالتا بقدر اتستر معاها
خلاف احاكي الناس واجاري؟
والقدر بي غادي كاتب ليا شيتاً
لاني حاري ولا ني داري ...

في فصل الشتاء يكون النيل، ؤ نحن أصِلنا تالآ السافِل بنقول البحر ما بنقول
النيل ؤ حالنا ترانا يا سادريّن يا مِدليين . عموماً في فصل الشتاء النيل بيكون
في قمّة هُدؤه وصفائه ولا يعكِّر هذا الصفاء غير سمكة صغيرة تقفذ في
الهواء في محاولة لإصطياد ناموسة ثم ترجع للنيل مخلفة دوائر أو مركب
تعبث بمقاديفها مُحدثةً شرخاً سُرعان ما يلتئم من خلفها، حتي الجروف تكون
هادئة ومُدهامة بنبات اللوبيا وعيش الريف ؤ شُدر الصُنُط والنخيل . أها نحن
بنكون راميين نشاشيغنا والطُعُم جنبنا ؤ كل وآحد مسويلو ناموسيّة من
جريد النخل لابِسا فوق راسو تقيهو شر الناموس والكُنتيّب ؤ عينا للشمس
تِحِت في صبغتها الحمراء فوق صفحة النيل وهي تودع اليوم في لحظات
الغروب، لوحة آية من الجمال لم نكن نلقِ لها بال حتي سرقنا الزمن ولم ننتبه
إلا ونحن نكسح في الجليد بالكوريك كي نهيم في طُرقات هذه البلآد البعيدة،
نفسي أغمِّّد وأفتِّح القى نفسي عند أهلي . والله صحي ...

Quote: بختكم تكسرو سااااكت

مِنو، نِحن !،
يحردن كان نكسِّر ...

الشتا زي ماذكرت اجمل فصول سنتنا في السافل
الهواء المصري المنعش والجروف العامرة باللوبيا والطماطم وعيش الريف
ورائحة طين البحر الشارد
كنا نستمتع بوجبة طماطم طازجة مع البصل المقلوع من اقرب حوض بعد غسلها في جدول جدي احمد الشيخ المدريس
واظنو دا سبب لعدم نفاد مخزوننا من الفايتمينات في زمن الرغيفة ام الف.

يحلو السمر داخل التكل (الخس) في الليالي الدامسة حول طقطيق قنقر العيش ريف مع الشاي اللحمر التقول خلوقهن داك الزمن لاثراء ذكريات يومنا هذا.

ياربي البقت علينا شني؟

وین دا؟؟
يعني انتوا وين؟؟
يعني انت في الخرتوم ولا زول ضهاري
زي ود اب سن وعلي دفع الله ؟؟

كل سنة وانت طيب يا ود المدير وصحبه

=

ننصحك يا مدير أن تستدفئ ببطانية غادة السمّان
التي تضامنت معك وولولت قبلك:

(( آه..
يا لهذا الصقيع
...
لتحطم الموازين
ولتكسر الأبواق
...
وليقطع الصراط المستقيم
بما أن القيامة الآن
في موسم الثلج.))

وإن لم تعثر على طائر السمّان، فالحاردلو ينصحك بلحم الفِرة
الذي هو نفس الطائر الذي يسميه أخوال غادة وأهل لبنان بـ(السمّان):

(الشم خوخت بردن ليالي الحرة
والبراق برق في (ألبرتا) جاب القِـرة
شوف عيني المدير بي كراعو لفخ الفِرة
ما الليلة التلوج راجياهو مرقت برة

يا باسط النِعم تنجيهو ألفين مَـرّة
من كتحات منتصر ما يِلقى إي مضرة
وتكتبلو النجاة من القزايز المُـرة)

تحايانا الـ"دافـــــئـــــة" لك
ولضيوفك
...
..
.

يا عووضة
الله مدينا صقط قدر غتانا
لومك علي صقط ود المدير دة كان جانا بي حالتنا دي تلقا علي دفع الله بقا كراع شرموط ناشف
نبرا ونستبرا

ود المدير

امس ما انسترته مع الوهم العنصري سمعه .

تشكر علي الصوه المتلجه ، بس تلج كندا لية شلاضيم ، ما ذي تلج لندن ممسح و ناير و ليه وجنات .

غايتو امس عشان دفسيبه و عيتنوبه .

الزبير

في فصل الشتاء يكون النيل، ؤ نحن أصِلنا تالآ السافِل بنقول البحر ما بنقول
النيل ؤ حالنا ترانا يا سادريّن يا مِدليين

=============
حبيبنا ود المدير .. اصيل يا جميل ..
ونحن في اقصى الشمال يعني أبرد من مناطقكم ..
النيل جميل في الشتاء الهواء صلاح ( من مصر ) المراكب تعدي بكل سهولة ويسر
الريس يكون شراب قرعة نبيذ يطرد البرد .. الحكمة أن النبيذ وبلغتنا ( النبيت ) كان يجهز من قبل الشتاء بشهرين
كان مهم في الشتاء لأنه يقاوم البرد ( تماماً كما الفودكا في موسكو ) والترابلة كذلك .. بليل نجتمع بالقرب من النار وسط
الغرفة بالدنقلاوية ( أوسمون ) الاطفال يأخذوا منهم العراقي عشان القمل كثير في الشتاء .. بليل الغطاء بالفروة
وكان عندنا ناس مخصصين لصناعة الفروة من جلد الخروف ( حوالي ستة جلود تصنع فروة ) وكان اللحاف من مصر ..
البطانية الحمراء بشريط أسود كانت صناعة ( تشيكولوفاكيا ) كانت أخف وزناً من اللحاف والفروة .. لكن في شهور البرد الصعب
مثل شهري ( كهيك وطوبه ) إلا الفروة واللحاف .. وشمس نص النهار ( التشميس ) دائماً للحبوبات لأن باقي الناس مشغولين
الشتاء جميل .. ما فيه مرض .. ولا لدغة العقارب .. وأجمل الخضار في الشتاء .. والفول والقمح في الشتاء .. فصل مهم جداً
كان زمن الاكتفاء الذاتي وبيع الفائض من السواقي فقط لا مدخلات لا جازولين لا قطع غيار ..

الحكاية طويلة يا ود المدير ..

ملحوظة ورجاء خاص (ههههه ) إنت بالاخص لغتك صعبة بالنسبة لينا:
في عبارات بحكم لغتنا لا نفهم المقصود منها مثل :
يا سادريّن يا مِدليين
واقفة أضان دحش

مودتي ياجميل .. رجعتنا أكثر نصف قرن لواقعنا الجميل ..

سلام ياود المدير
عليك بالقراصه بالدمعه والشطه الخدره والبصل ليل ونهار والشاى بالحرجل والحمريب الدقش

Quote: أعيذها نظرات منك صادقة أن تحسب الشحم فيمن شلضمه ورم ، أتاريك مكوفر بس بردك دايرلوا كتحة من عصير فرح التمر المسوس المعبأ في قزايز بتاع ودعمك في الباوقة كان ما تقوم تتمر عربات فريقكم جت

ايّ صدقت مكوفِر والصقط خلالي خشمي زي المحفضة، ياخ خليّت ريالتي
سالت ؤ طريتني القعدة فوق الكردة والواحد فينا طاظي اصبعو في اضانو
ؤ يدوبي والصقط قدُر ما يعوي اللبيض الصافي يرفعلك حرارة جسمك، ؤ
قدُر ما يكبولك رُبع الكباية ترفعو قُصاد القمرا ؤ تمّعِن فيهو النظر حتي
تكتحو بالهنا .
إنت الزول وكِت يكُبولو الكاس بيرفعو قُصاد القمرا ؤ يبحلِق فيهو ليّه ؟...

Quote: وین دا؟؟ يعني انتوا وين؟؟ يعني انت في الخرتوم ولا زول ضهاري زي ود اب سن وعلي دفع الله ؟؟

يا خالو عووضة دا في بلداً طيرا عجم حيث لا شوفتاً تبِل الشوق
لا رداً يطمِّن، ود اب سِن ؤجنا دفع الله فوق مِشهادُن والمُشهاد في البلد
الشالنا فوق الراس صِبِح صعب بالحيل بعد البلد بِقت زرزور في إيد عيال
ؤ نحن ترانا لآن حيين ولآن ميتين إلا نقول مع حِميّد لآمِن سنين الهم تمّر
يا الله لزمني الصبُر نعمنّو الشوق مِتِل شوك الكِتِر طعن الجِسم لآمِن خِدِر ...

يا الله لزمني الصبُر نعمنّو الشوق مِتِل شوك الكِتِر طعن الجِسم لآمِن خِدِر ...
....

أوسكار يا معاوية...
تعرف..
انا بقيت افكر فى انه جهنم دى عبارة عن جليد..
ما نار..
اقلو النار دآفية..