نصائح في دفتر الحجاج اللعين.. طارق الأمين

10:01 PM February, 07 2018

سودانيز اون لاين
Yasir Elsharif-Germany
مكتبتى
رابط مختصر

طارق الأمين : (نصائح في دفتر الحجاج اللعين)
February 7, 2018
(حريات)

(نصائح في دفتر الحجاج اللعين)

طارق اللمين

،،،،،،،،،،،،

بن علي فر قام كايس الرحيل والهجره

وصدام زاتو نام بدل القصور في حفره

القذافي عام في دمو جنب الكفره

وصالح في الظلام بي طلقه فك السكره

،،،،،،،،

شاوشيسكو العنيد سحلوهو في رومانيا

وهتلر بالحديد كان مستلم المانيا

حسني مبارك ال كمل بحور شمبانيا

بالبكا والنواح عرف المظاهر فانيه

،،،،،،،،

كم سالت دموم في رواندا في تنزانيا

وزال حكم الحديد والبندقيه الجانيه

عيدي امين هداك رغم السنين الحانيه

مجندل بالدموع كل حلمو يغمد ثانيه

،،،،،،،،،،

مات نيرون وما ماتت حدايق روما

والحجاج سفح دم امتو المكلومه

ملعون بالقرون إجرامو والحيكومه

والتاريخ كتب كل الطغاة مهزومه

،،،،،،،،،،،

مانديلا العنيد هزم الظلام بي صبرو

وفي الفجر الجديد ٱصبح مخلد قبرو

كل طاغوت بليد لا بقرو لا بعتبرو

من ارزل طباع كم إستبدو وغدرو

،،،،،،،،،،،

ماشفنا الصباح منعت شروقو عصابه

وماشفنا الفجر حظروهو بالدبابه

غصبا يالئيم تقدل حشودنا مهابه

وفي عين الغشيم ح نمدها السبابه

،،،،،،،،،

اهدر ياهدير خلي اللصوص مرتابه

باكر تستدير كل الجموع منسابه

غردون زاتو كان جوه القصر بتغابي

يوم هجمت اسودنا وركبت نشابا

،،،،،،،،،

لو دامت زمان ماكان حكمتو دقيقه

لا ماركوس حكم لا كان رحل نوريقا

وموغابي العجوز يحتل في لجه غريقه

حان زمن الرحيل بقت الاماني حقيقه

ارحل من سكات قبال نسوي حريقه

طارق اللمين 6/فبراير2018.