النجيضة ... ما بمرقو لو السيسى يحتل كافوري !!

Post: #1
Title: النجيضة ... ما بمرقو لو السيسى يحتل كافوري !!
Author: Arif Nashed
Date: 01-14-2018, 11:49 AM

10:49 AM January, 14 2018
سودانيز اون لاين
Arif Nashed-
مكتبتى
رابط مختصر

قسم بالله ما بنمرق
لو السيسي يحتل كافوري
ما بنمرق
لو جابو خديوي يحكمنا
ويومي إعلامه يمرمطنا
ما بنمرق
عشان المعارضين والوطنيين
زي ماغشو السوريين واليمنيين
يغشونا ونقول تحرير
بكره وطنا يبقى عمار
تبقى العيشة رفاهية وأمان
المارينز في الخرطوم
يجيبو القمح والرغيف بقرشين
نعيش احرار سالمين
نلاقي اخوانا في الجنوب والغرب
يرجعوا كل اخوانا المغتربين
قسم بالله ما بنمرق
لو السيسي يحتل كافوري
ما بنلبس الكاكي
لو البشير يكاكي
بكره بلدنا تفرهد وتزهر
ويزيد جوانا الفرح
نبني قصور وعمائر
نتملك في شقق النخلة
بنوك ماليزيا إرباح وفوائد
شوفو دي دنيتنا الجميلة
بوديانها وصحاريها ونخيلها
بأنهارها وباشجارها الظليلة
ماهى دنيتنا الجميلة

Post: #2
Title: Re: النجيضة ... ما بمرقو لو السيسى يحتل كافوري !
Author: Arif Nashed
Date: 01-14-2018, 11:52 AM
Parent: #1

دعا والي الخرطوم كوادر حزبه للاستعداد العسكري للدفاع عن البلاد وشدد على أن العلاقة مع مصر يجب أن تؤسس على الاحترام المتبادل.
وأكد الوالي عبد الرحيم محمد حسين وهو وزير الدفاع السابق ويرأس أيضا حزب المؤتمر الوطني في ولاية الخرطوم جاهزية القوات المسلحة وقوات الامن والدعم السريع للتصدي لأي عدوان ضد الوطن في مختلف حدوده وارجائه ومنافذه.
وطالب خلال كلمته أمام مجلس شورى الحزب السبت عضوية المؤتمر الوطني بالاستعداد لإخراج (الكاكي) – الزي العسكري - وارتدائه مرة اخرى "والذهاب لأرض المعركة دفاعا عن السودان وعزة كرامة شعبه".

Post: #3
Title: Re: النجيضة ... ما بمرقو لو السيسى يحتل كافوري !
Author: Arif Nashed
Date: 01-14-2018, 11:57 AM
Parent: #2

يلبسوا الكاكي عشان شنو !!
يعني حتحرروا مثلث حلايب مثلا ؟.
قلنا أميين ولا الضالين .
حلايب ليها كم سنة محتلة !
الجديد شنو في الموضوع !!!!

Post: #4
Title: Re: النجيضة ... ما بمرقو لو السيسى يحتل كافوري !
Author: Arif Nashed
Date: 01-14-2018, 12:00 PM
Parent: #3

خلاث السودان ملك لمنسوبين المؤتمر الوطني وباقي الشعب كيف !!

Post: #5
Title: Re: النجيضة ... ما بمرقو لو السيسى يحتل كافوري !
Author: Arif Nashed
Date: 01-14-2018, 12:09 PM
Parent: #4

جزاكم الله خير
كوادركم مؤهلين وجاهزين وعندكم الدعم السريع لا نريد ان نسمع ابواقكم تدعوا ابنائنا لمعسكرات الدفاع الشعبي وغيرها ..
البلد بلدكم ونحن ضيوف عندكم والرغيف زاتو بنخليهو ليكم ..
الجوع بنقدر عليهو بس كلامكم ما يكون جعجعة في الفاضي ...
سيروا فحلايب تناديكم ...

Post: #6
Title: Re: النجيضة ... ما بمرقو لو السيسى يحتل كافوري !
Author: Arif Nashed
Date: 01-14-2018, 12:15 PM
Parent: #5

ده كلام الاذناب والمطبلاتية
قسم بالله ما بنمرق
لو السوق يولع نار
ما بنمرق
ولو العيشة بي دولار
ويومي تزيد مع الاسعار
ما بنمرق

Post: #8
Title: Re: النجيضة ... ما بمرقو لو السيسى يحتل كافوري !
Author: Arif Nashed
Date: 01-14-2018, 12:27 PM
Parent: #6

تمرقوا كاكيكم تلبسوه ما بنفي وما بخفي انو الرغيفة بقت بجنيه والاسعار طايرة والمعيشة بقت قاسية ..
الوهمات البتعملوا فيها شبعنا منها والمواطن اصبح عندو مناعة منها ...

تراجي قالت ليكم الشعب انكمش زي الدمورية الجديدة لامن تبلها في الموية يعني يعني هسع لو 100 بالقديم 50 كمان زاتو مروة مافي للدواس ..
انتو ومنسوبيكم مكتنزين كرشكم كبيرة ومؤخراتكم ضخمة بتتحملوا الدواس ..
سيروا فحلايب تناديكم ..

Post: #7
Title: Re: النجيضة ... ما بمرقو لو السيسى يحتل كافوري !
Author: عمر دفع الله
Date: 01-14-2018, 12:16 PM
Parent: #4

دا كلام دا يا اشرف !
ياخى لو انت ما محتاج في ناس محتاجين
ياخى في ناس في عرض سروال .
واصلا مافي حرب ولا يحزنون
فلو الواحد طلع بقمصين كاكى وبنطلونين كاكى
يكون قد ظفر بصيد عظيم . وبعدين في ناس انت ما عارف ظروفهم
فياخى خلى الناس تشوف مصالحها يرحمك الله ...

Post: #9
Title: Re: النجيضة ... ما بمرقو لو السيسى يحتل كافوري !
Author: Arif Nashed
Date: 01-14-2018, 12:38 PM
Parent: #7

Quote: دا كلام دا يا اشرف !
ياخى لو انت ما محتاج في ناس محتاجين
ياخى في ناس في عرض سروال .
واصلا مافي حرب ولا يحزنون
فلو الواحد طلع بقميصين كاكى وبنطلونين كاكى
يكون قد ظفر بصيد عظيم . وبعدين في ناس انت ما عارف ظروفهم
فياخى خلى الناس تشوف مصالحها يرحمك الله ...

استاذنا عمر دفع الله زارتنا البركة
طبعا هي اصلا وهمة عايزين يلهون بيها المواطنين من ازمة الغلاء الطاحنة التي يعانون منها ..
غايتو العايز يجازف بقميص والا بنطلون بتكون مخاطرة لانو ممكن يمسكوه يكرفسوه في الكومر ويا معسكر جاك زول غايتو يمشي بدون سروال ولا يمشي يخاطر بحياته ..

Post: #10
Title: Re: النجيضة ... ما بمرقو لو السيسى يحتل كافوري !
Author: Arif Nashed
Date: 01-14-2018, 01:49 PM
Parent: #9

كما هو واضح الكاكي دا مارقينو للمواطنين لزوم تهديد وتخويف مما يعكس حالة الذعر والخوف التي تنتاب النظام من حدوث هبة جماهيرية ضدها ..
المدعوا وراق يستشهد بكلام المرحوم الزبير الذي اغتاله نظام الكيزان ..

Quote: رحم الله الشهيد الزبير:
انحنا الموت حنسعى ليهو محل انو يعز البلد ويعز الدين
أصلو ما حنخليهو
والله نفتشو تفتيش
هو حياتنا نوديها وين إذا كانوا دايرين يذلونا فيها

وكت بتسعو ليهو محل انو يعز البلد مثلث حلايب دا في القطب الشمالي !!
حلايب تناديكم يا جبناء ..

Post: #11
Title: Re: النجيضة ... ما بمرقو لو السيسى يحتل كافوري !
Author: Arif Nashed
Date: 01-14-2018, 02:01 PM
Parent: #10

هذا هو ما يقلق منامكم ايها الجبناء

Post: #12
Title: Re: النجيضة ... ما بمرقو لو السيسى يحتل كافوري !
Author: عمر التاج
Date: 01-14-2018, 02:17 PM
Parent: #11

سلامات ياعارف
كافوري دي خط أحمر يازول
البشير زي ما اتنازل عن الجنوب كله ، وحلايب وشلاتين وسواكن وكاودا
ممكن عادي يتخلى عن حلفا وبارا كسلا والجزيرة وكل السودان
بشرط أنو مافي زول يهبش كافوري

Post: #13
Title: Re: النجيضة ... ما بمرقو لو السيسى يحتل كافوري !
Author: Arif Nashed
Date: 01-14-2018, 02:26 PM
Parent: #12

حبيبنا ود التاج تحياتي ..
اهلنا قالوا الارض والعرض واحد ومن يفرط في ارضه عادي ممكن يفرط في عرضه ..
البشير من اجل مصلحته الشخصية مستعد للتفريط في كافوري وما يخصه فيها ..

Post: #14
Title: Re: النجيضة ... ما بمرقو لو السيسى يحتل كافوري !
Author: Arif Nashed
Date: 01-14-2018, 06:25 PM
Parent: #13

Quote: نفت وزارة الخارجية السودانية إعلان سفيرها
لدى القاهرة عبد المحمود عبد الحليم، الحرب على مصر
وأكدت أن الحديث المنسوب إليه عارٍ عن الصحة.

عبد الرحيم حسين يناشد منسوبي المؤتمر الوطني بلبس الكاكي للدفاع عن السودان ..
ووزارة الخارجية تنفي خبر اعلان سفيرها لدي القاهرة وتقول بانه حديث منسوب عار من الصحة !!

بسرعة الكيزان جرو واطي قبل ما السيسي العوير يصدق ويحشد الصعايدة ..
كل كوز يرجع كاكيهو ويرجع يلهط في لهطيهو !!
الكيزان كان بقشروا بالكاكي ويدفروا عيالنا قدام زي ما حصل في حرب الجنوب ..
كان نرجع تاني لاعرس الشهيد والحور العين
احمدك يا رب ..

Post: #15
Title: Re: النجيضة ... ما بمرقو لو السيسى يحتل كافوري !
Author: Arif Nashed
Date: 01-15-2018, 02:03 PM
Parent: #14

مسيرة الشيوعي ستكون بادرة لمسيرات اخري قادمة ..
العديد من الحركات والتنظيمات السياسية تشحذ جماهيرها للمشاركة في هذه المسيرة ما عدا بعض الاحزاب المنبطحة التي لا يعول عليها كثيرا ..
ثورة الجياع قادمة ..