هل تجدي شعارات الرجولة

06:40 AM January, 14 2018

سودانيز اون لاين
عبدالحفيظ ابوسن-no where
مكتبتى
رابط مختصر

الرجولة بمعناها البدائي المتخلف

دقيتو لامن قام جاري
ولو راجل طالعني الخلا
ولو راجل اقطع الخط دة
وراجل وشو شبر ما بخاف منو
انت ما ارجل مني
سكيتو ليك سكة لامن براطشيو يتخابتن
ذلك المفهوم الذي يحدد الشجاعة بالقوة الجسدية
ويعتبر تخويف الآخرين هي الرجالة
انفخ ولو حملك ريش

ولا الرجولة كفهم هي المسؤولية
المسؤولية التي تحسس الآخر بالامان في وجودك
ما دام فلان دة قاعد تب عوجة مافي
الرجولة هي الشهامة
الاحساس الايجابي بالآخر
لامن يحتاجوك يلقوك
انك مصدرا للامان

اب سن اصطحب معاك النسوءة ( من نسوان)

يجوك هسي ناس الجندر يخلو ريحة كيبوردك دخان دخان.
نحن بقينا نخش الكورة ونشجع وماشين في السكة نمد من مذدوجة لمختلطة وكدى

تحياتي

ههه
يا محمد الشيخ بهذا الفهم البدائي الهمجي تدخل حتي النساء

أفتكر الرجل بالمعنى الذي يقصده أب سن هو الإنسان من رجل أو امرأة

((الرجولة كفهم هي المسؤولية
المسؤولية التي تحسس الآخر بالامان في وجودك))

تحياتي أب سن وود الشيخ

اظن ود اب سن اختلط عليه المعنى
فرق كبير بين الرجالة و الرجولة
او هكذا قال لى فهمى
... جنى و جن زول ياكلنى حنك ....

فعلا ياسر اياها المسؤولية
يا جلال كلنا اختلط علينا ونحن نري البعض يغنو ليهم النسوان والرجال في تراث المشكار السوداني
يغنون وهم قاصدينهم ويتوهمون هم انهم يشبهونهم
يغنو ليهم كسار الجبور وهم يعرضو ويهوشو .. الهوشة في محل الغناء قبلها بس
ولم يكلف الفنان نفسه انو يقيس المعاني دي قدرهم ولا لا
ولا هم تدبروا المعاني ليكونو مثل ما يسمعون
تشبهو بالرجال وكما قال الرسول هي فلاحة
اياها الرجولة والرجالة الغنو ليها زمان
ما هجامين الليل من يستقون علي الضعيف والمرأة

واحد من الشرق
شرق الله البارد
بحكو لينا .. واحد نابذو وهو شغال غفير . زمن الغفير عندولبس مميز .. الزول داوسو . وكان مشهور ب خفة العقل .. قال للزول
انتظرني ألبس رسمي واجيك
تصدقوا بقت اسم للعائلة
يقول ليك

ناس تلبس رسمي

يا حليلك يا ود اب سن
جانا زمن لبس الكاكى
رجالة الكاكى معدومة الرجولة+

الرجولة ولا الرجالة عمرها ما كانت باللبس كاكي ولا عمة بيضا مكوية وملفحة
وبعد يعرضو ويتنقزو في
الناس عروض ما بقيسوها بي تيبانا
ما يغرك لباسا تحتو العروض عريانة
بعرف مرة من كوستي اسمها احسان عبدالكريم وعبر سنوات هجرتها . سنويا بتجي من امريكا قبل شهر شهرين . تشتري بالكتير وتستهدف ما لا يقل عن خمسين اسرة . كافة حاجات رمضان من سكر وزيت ودقيق وعصير وبلح وبصل وغيرو
تختهم لثقتها هنا وترجع
هسة دي ما جبارة كسور
ولابسة توب كمان

القول داك بقول شنو هو
انما الرجال في فعلها لا في الكلام
عشان كدة تجد اسم الكارس مشكار
الكارس او الكارز

كلام ونفخ في الفاضي ..
تاكد ساعة الفعل الصفوف بتتمايز تب ..
وبيتعرف اب حملا ريش ..
لا تتمنوا لقاء العدو وتطلبوه بالشعارات الجوفاء ..
وساعة يجي لازمن تثبتوا ..
ناسنا اديهم النفخة الفارغة ..
هسه حيجروا واطي ..
لامن تبقى الشغلة حرب ..

الرجوله وصف لقيم انسانيه اهمها المسئوليه والتضحيه .
عندنا المراه المتوفره فيها الصفات دى ننسبها و نربطها بالرجوله نقول بت / اخت رجال وكان الصفات حكر على الرجل دون المراه.
نهاركم سعيد ابوسن وضيوفو

هوي ها
Hoay Ha

Quote: Hoay

الإسبلنغ دا ما صاح كدا يا مولانا

صحي يا ود القوز
لا تتمنو الموت بل أطلبو العافية
اطلبو العافية والسلام بالسعي لها
قبيل بقرا في كلام المالية في معظم الجرايد
لا اراجع عن سعر الدولار الجمركي
بلغة اخري ظز فينا ولا هامينا تزعلو ترضو . عاملين رجال نحن ارجل منكم ويقدر راجل يفتح خشمو
الامر يفترض غير ذلك .. يفترض ان تتراجع ان امتلكت الشجاعة . الشجاعة في مسؤولية الراعي والراعية
ولزمو شنو مع الضيق دة احتفال القرآن . القرآن قيم انسانية
عن علي بن أبي طالب رضي الله عنه قال : قال رسول الله صلى الله عليه وسلم :
( يوشك أن يأتي على الناس زمان لا يبقى من الإسلام إلا اسمه ، ولا يبقى من القرآن إلا رسمه ، مساجدهم عامرة وهي خراب من الهدى ، علماؤهم شر مَن تحت أديم السماء ، مِن عندهم تخرج الفتنة وفيهم تعود )

حكي لي مولانا عبدالباقي سعد
قال لي ضيف خش حلة .. وفي اول بيت لاقاهو سيد البيت .. رد السلام بإقتضاب من لايرد احدا .. وسامع صوت مرة من جوة البيت تكورك حباب الضيف ابقا لي داخل .. وتنهر في راجلها .. استحي الضيف ورجع وسامع المرة تشاكل في راجلها وخيابتو .. ومرق لي طرف الحلة لاقا راجل هاشا باشا بيهو . وحلف عليهو يخش .. ومشي يجيب ليهو حق الضيافة . الضيف سمع تذمر المرأة ونهرة راجلها ليها
بعد سيد البيت جاب الضيافة . الضيف ضحك فسأله صاحب الدار عن سر ضحكه
حكي ليهو القصة
فقال صاحب الدار .. تلك اختي وهذه اخت زوجها
ذرية بعضها من بعض
بتشابهو رغم اختلاف المواقع

يا عووضة
ذيل هاهينا مخزن احزان

يا ودو
وهل ابان بالدارجية خلي الانجليزي
ناس عمك ديل تراشيهم مراشة
هسة يقول ليك عندي غضروف وما بقدر ادنقر الكتابة بتتعبني

1st up

البوست ده فيهو حلاة دين انبثاقة
بس يوم التلاتا ده يعدّى كما نتمنّى
ودّو من هسى كلمتك .. ما تجينى بى لازمتك ديك
اها يا بتاع هوى ها
كمان داير تتروجل فوقنا
-----
قال ليك هاج و ماج و ارغى و ازبد
ثم تحوقل و قال بعد جرّة نفس
حبة رجاله ساكت قوّمت نفسى
_____
با اب سن النساء اكثر رجولة من الرجال
اخر مثال نساء ايران .. هزّن عرش الآية الكبير

قال شنو يا جلال في تلك المسرحية المثيرة للجدل
البهدد يا طه ما بضرب الوادي
يجرو علي الرجال ويجري
ومقبل غادي
عاين الكلام السمح
انا جليس الردفولا عقودا
وحد السيف بيقطع عقدتو المعقودا
آي صحي شوف البنات الوقفن ضد قانون النظام . وقفن بصلابة منقطعة النظير
ولابسات اسكيرت وبلوزة
اللبس اصلا ما برجل الزول
بترجلو اخلاقو وسلوكو
ونفاعو للناس
كيف تصير شخصا مفيدا صالحا للمحتاج ولا يتضرر منك البسطاء والفقراء والمحتاجون

فى زماننا هذا والنكبه التى نعيشها .كثيرين يجوز وصفهم بيولوجيا ب (ذكر) ..لكن انسانيا لاتستطيع تصنيفهم ضمن فئه رجل
.الاراده المرتعشه التى تعيش فى المنطقه الرماديه..
كثيرين من هذا النوع ظواهر صوتيه ذكوريه او شماعه تحمل ازياء ذكر رغم مظاهر علو المكانه لمال او لسلطه لم يكن ليحصل عليها ان كانت له مواقف الرجال ... احيانا ارى المتحولين جنسيا (الجنس الثالث )- مهما كان راى فيهم- اكثر شجاعه غى مواقفهم وارائهم وتطبيقها. ولاادرى ماذا نسمى الذكور دون صفه الرجوله جنس رابع ام خامس ...لاادرى......


التعديل لتصحيح اخطاءاملائيه

يعني انت اتاريك قاصد الجماعة اياهم القالو لبسنا الكاكي !!!؟؟؟


طلعت ما عندك موضوع .. ديل كيزان .. عمرك شفتلك كوز راجل ونافع؟؟؟


قوم لف بالله

كان في مرة في سوق كوستي يا عاصم
بتلبس السروال والعراقي ودارعها سكينها في ضراعها
تسف الصعوط ولكن تظهر ملامح انوثتها جيدا
هسة في بت شابة الا قالوا لي دي بت . ما عرفتها
بنطلون وقميص وقاصة شعرها وسجارتها قصبة ومباريا الشفوت
في وجهها وسامة ظاهرة
زي ما بقول صحبي الزمن دة الصاروخ النووي بي زر ممكن يدمر بلد كامل .. ممكن يدوسو طفل صغير ولا انثي

بل كل من يظن ان الرجولة والضكرنة باللبس
وكل من يعتقد ان اللابس الكاكي اكثر وطنية من غيره
وكل من يعتقد ان حكم العسكر اكثر أمنا عشان الكاكي
العسكري حين يقاتل فهو يمارس مهنته التي تشبه جميع المهن الموجودة مع تأكيد خصوصية اي مهنة دون مزايدة وطنية

شوفو رجالة مبارك الفاضل دى
وانسو تناقض حديثه عن مصلحة ملايين الواطنين وبستوردو سلع ويبيعوها بسعرها الاساسي
هيع
راجل رجالة جد
مع التذكير انو احد اعمدة الديمقراطية الاخيرة ومشاركا في الحكم الديمقراطي وهسعتي مشاركا في الحكم اللاديمقراطي
عودو راكب هنا وهناك
دحين دي ما رجالة زاتا

وصت الحكومة الباب نهائياً أمام التراجع او تعديل اي بند من بنود الموازنة، وجزمت بعدم تخفيض قيمة الدولار الجمركي بعدما تم رفعه الى 18 جينهاً.
وقال نائب رئيس مجلس الوزراء ووزير الاستثمار مبارك الفاضل في تصريحات صحفية عقب الاجتماع الطارئ للبرلمان مع وزراء القطاع الاقتصادي، إن الحديث عن تعديل الموازنة او تغير سعر الدولار الجمركي هو محاولة لضرب الاقتصاد وإحداث البلبلة في السوق، لافتا الى ان الميزانية تمت اجازتها من البرلمان. وأضاف: قائلا: "لن نراجع ولا سطر من الميزانية"
وهدد الفاضل التجار باستيراد السلع الاساسية وطرحها في الاسواق بالسعر الاساسي، حال استمرارهم في المضاربات وزيادة الاسعار، منوها الى ان الحكومة ستقوم بمواجهتهم باقصى العقوبات، وقال "لايمكن ان نترك حياة ملايين المواطنين بايدي قلة من المضاربين". واتهم التجار بالدخول في مضاربات مع الدولة لمنع الموارد الخارجية مما ادى الى تشوهات وانعكس بدوره علي الاسعار.
واعلن نائب رئيس الوزراء عن اجراءات جديدة قال إن الحكومة ستتخذها للتحكم في سعر الصرف واعادة الموارد الخارجية، وتوعد باتخاذ اجراءات قوية لاستراداد الموارد المالية بالعملة الاجنبية للبلاد واحكام سياسات بنك السودان لايقاف هذه الممارسات. وقال ان التحركات التي شهدها السوق عقب زيادة الدولار الجمركي احدثت جوانب نفسية وبلبلة في نفوس المواطنين ادت الى الحالة التي نعيشها الان

منقول