يقولوا ليهو تور يقول احلبوه وجابت ليها كمان أشباح !!

02:25 PM January, 12 2018

سودانيز اون لاين
Arif Nashed-
مكتبتى
رابط مختصر

في الفترة الأخيرة كنت أتابع ممكن نسميها بؤر للصراع الاسفيري في المنبر والتي ما زال بعضها مشتعل تتصاعد أدخنتها وكثير منها طمرتها كراكة سيد الحوش ..
البوست دا للونسة عشان ما يجي واحد يقبقبنا ..
الشيء الفاتني انو ما كبشرت بعض المداخلات من المطمورات ..
والحاجة التانية الكلام كلو كان بالهمز واللمز والزول الما متابع بكون لافي صينية زي ما حصل لينا ..
ونقطة للتوضيح لا لينا في التور ولا في الاشباح ..
مش بقولوها كده ..

ونواصل ..

الايامات الفاتن سيد الحوش كان سادي خدمة اربعة وعشرين ساعة وواقف بكراكتو ديدبان ...
الجماعة يبدأو يحفرو ليهم حفرة قايلين سيد الحوش نايم ..
اتاريهو عمك واقف بعيد بعاين ليهم بعين واحدة ..
بس يخليهم يمرقوا يستريحوا شوية يجي سايق كراكتو ويطمر الحفرة ويساويها مع الواطة ..
حتي البرفع صوتو يكتمو ليهو ..

عمك دا لو ادوهو مناقصة نضافة العاصمة الا يعدمها كيس النايلون الشايلو الهواء ..
شغل نضيف وعجبني لناس الهمز واللمز والمساككة ..

نجي لناس قريعتي راحت مثلي الداقس دا ...
قدر ما حاولنا نفهم الحاصل شنو غلبنا تب لانو الكلام كله بالاشارات ولغة الاشارات ما قريناها ..
والبزيد الطين بلة تجيك ناس داخلة تقول كلام ثمح في حق المقصود وتجيك ناس تردم المقصود ما عرفنا ياتو الصاح وياتو الغلت مع انو ما عارفين منو المقصود !!
حتي حصص العربي كنا بندكها وفاتتنا دروس التورية وشنو كده ما عارف ..

يقولو ليهم يا جماعة هووووي الواقف هوناك دا تور وتعال شوف الغلات البحصل يجوك واحدين يقولوا ده عجل وديع ما بنطح وواحدين يقولو ده ثعلوب مكار ..
والناس البتجي تقول دا بقرة ضاحكة حلوب هسع نصدق منو والا منو !!

مستشرقين ومستنيرين المنبر واقفين بعيد وعاملين شخيط ما عايزين يجيبوا النجيضة ..

نقول باسم الله الرحمن الرحيم لانو كلامنا الجاي في العفاريت والاشباح ..
قالوا الحوش دا فيهو اشباح وعفاريت حايمة يلقوك نايم يهجموك في نومك ويخلوك تهضرب الليل كله ..
ما عرفناهو عفريت واتس والا ماسنجر !!
اها زي العفاريت دي نتلافاها كيف ..
قالوا اسياد الحيشان الكبار الواتس والماسنجر زاتو غلبهم يعملوا حاجة للاشباح الحايمة في حيشانهم ..
ما عرفنا نقرأ ليهم ايات والا نتعوذ والا ندعوا ..

يا حليل شيخ قصي كان بدينا النجيضة في موضوع الاشباح والعفاريت ..

واحد اخونا زولا طيبان وعلي نياتو دخل حفرة من الحفر المولعة دي لحقتو وقلت ليهو يا زول اعمل حسابك هسع تفجغ ليك عفريت يقوم فيك الا يوريك النجوم بالنهار ..
غايتو لململ نعلاتو واتخارج بسرعة وقال المشكلة تعفص مخلفات وتجلبطك وتقعد السنة كلها تحاول تنضفه ما تنضف وتبقي لاصقة فيك زي واحدة من عاهات الالغام البتحصل يد مقطوعة رجل مبتورة عين مقدودة !!

بعرف عطار يمني زول مبروك علي قول اهلنا مشيت اسأله عن مسعلة العفاريت وكيف الواحد يتلافاها المهم شبكني ليك اسعلة بتشوفهم ؛ بتحركوا في البيت ؛ بتشوف ظلال متحركة ؛ بكركبوا في المطبخ ؛ بحركوا الطرابيز اواي حاجة ..
خليتو لامن انتهي من كلامو قلت ليهو يا عمك ديل عفاريت في الكمبيوتر ساكنين في الاسفير ..
غايتو ما عارف عمكم كان فهم انا قاصد شنو قال لي الموضوع بسيط بعطيك "الحلتيت" دا تبخر بيها الكمبيوتر وان شاء الله العفاريت بتتخارج وتهرب ..
هسع انا بنصح كل الاعضاء باستخدام "الحلتيت" لطرد العفاريت والاشباح ..
حتي سيد الحوش بنصحوا باستخدام "الحلتيت" لتحصين الحوش ..

وبسجل برأة الاختراع دا وابيعوا للعتاولة ناس غوقل ومايكرسوفت والباقين ..

الزمن ابن ستين في سبعين ..
منو كان يتخيل الصياد المحنك الماهر يتحول لفريسة وتتحول الفريسة لصياد !!
غايتو الدنيا دي زي ما بقولو دوارة ..
هسع لامن تزر ليك كديسة في زقاق ضيق كان ما عملت حسابك بتخربشك ..

ولا عزاء للمتخربشين ..

برنامج المليون فيهو خيارات وفقوس من ضمنها الاستعانة بصديق وبتحصل عادي شديد عبر البتاعات ..
الداقس بقوم يحذف احدي الاجابتين ...
الناس التفتيحة الشايلين مفاتيحه بشوفو رأي الجمهور ..

الداقسين مثلنا بيجوا يسعلوا سيد اللبن الحاصل شنو ..
سيد اللبن بعمل منك رايح لانو لو حاول يشرح ليك الكراكة بتجي طايرة في البوست جوز ويمكن سيد اللبن زاتو يتعوق والا يروح في حق الله ..
ما تجي تسوي لينا سوات البشير يقولوا ليهو دا تور يقول احلبوه ..