Post: #1 Title: سنتن(سنة) والعيش بالقبضة قلبك شاباي للنبضة(مجاعة سنة6) Author: عبدالعظيم عثمان Date: 01-11-2018, 07:07 AM Parent: #0
06:07 AM January, 11 2018 سودانيز اون لاين عبدالعظيم عثمان- مكتبتى رابط مختصر مع هذا الزمن الصعب ولكل أم صابرة وصامدة في وجه الظروف مع إستحالة العيش في ظل ظروف السودان الحاليه وترك الدولة للمواطنين يواجهون غلا المعايش وشقاء كثير من الأمهات في توفير عيش كريم التحية لكل أم صامدة في وجه هذا الغلا الفاحش والحالة الصعبة الفرج قريب وقريب جدا
Post: #2 Title: Re: حاجة آمنة أتصبري عارف الوجع في الجوف شديد Author: عبدالعظيم عثمان Date: 01-11-2018, 07:19 AM Parent: #1
كلمات عبدالوهاب هلاوي
Quote: حاجه امنه اتصبري
عارف الوجع فى الجوف شديد عارفك كمان ما بتقدرى اصبرى .. اصبرى
جاهلك شكى وجاهلك بكى وفى بيتك المرق اتكى والشيء البحير ومابحير مابيه يا حاجة الزكاة ...
طلع الصباح لو ليك مراد يا حاجة ما تطلع شمس والليلة عندك زى أمس لسه الرويدى مع الصباح من مدة ماجاب ليك خبر كان جوفو زى جوف العيال من مدة داير ليه حجر والله على الزمن الحجر المابى بالصبر اتكرى
سرحتى فى هموم العيال كيفن يعملوا مع الدروس وسرحتى فى حق الفطور باقى الامور البى القروش واحد زمن داير ردا واحد خلاص قلموا اتكسر زى التقول أكلوا الصبر يا حاجة آمنة اصبرى
مشيتى لى برج الحمام برجك صفحتين ما بزيد ومشيتى لى برج الحمام كان تلقى ليك جوزاً جديد يمكن بعد طلع الصباح يغشاكى زولاً يشترى هبشتى جاى فتشتى جاى كان تلقى سكر بس محال باقى الرطيل الفى الكرت يا حاجة سفوهوا العيال يا حليل زمان وسنين زمان يا حاجة لو تذكرى ... يمه
وسمعتى صوت جاك من بعيد وبعد قليل بابك ضرب وسمعتى صوت جاك من بعيد شالك تعب ... ختاك تعب يا حاجة ناس المويه جوك أصلو الشهر روح جرى يا حاجة آمنة اصبرى
بعد صراع وصراع طويل يا حاجة بينك والمحال ما لقيتى فى داك النهار شيتاً ويجو ياكلوا العيال حبة عدس ما بسوى شيئ وينو البصل وينو اللحم حبة عجين ما بسوى شيئ وينو الدقيق وينو الفحم من جاى لجاى هبشتى جاى فتشتى جاى كان تلقى شيئ لازمك كتير شان تقدرى لازمك كتير اتقدرى
Post: #3 Title: Re: حاجة آمنة أتصبري عارف الوجع في الجوف شديد Author: عبدالعظيم عثمان Date: 01-11-2018, 02:04 PM
ما بين حاجة آمنة لعبدالوهاب هلاوي وأمونة لمحمد طه القدال شظف العيش والمجاعة والظلم