بهدوء الميزانية

06:15 AM December, 28 2017

سودانيز اون لاين
عبدالحفيظ ابوسن-no where
مكتبتى
رابط مختصر

انا أشبه ملايين غيري
ما قريت اقتصاد بشكل اكاديمي
وأشبه برضو آلاف غيري من كابس كتب الاقتصاد الميسرة كثقافة عامة
داير ناس الاقتصاد إذا تفضلو وبدون لغة صعبة يشرحو لينا نحن ديل .. نحن الشعب السوداني
الميزانية الحالية هل ستدفع بنا للامام ولا بترجعنا لي وراء كأرباب اسر .. وآباء عندنا مسؤليات تجاه اسرنا

سلام مربع

ود أبوسن

من غير شرح .. أصلاً الميزانية القدامك دي من أولى مشكلاتها تفتقد إلى الشفافية في الإفصاح عن الكثير

عشان كدا لن تجد أركان مناقشة علمية لها

مع تحياتي،،،

عاصم فقيري

مثلا
طمنونا انو الكهرباء ما حتزيد في السكني . وزايدوا عليها انهم لن يسمحو بذلك
لكن زادت لاصحاب المصانع وخاطبو الحقد الطبقي الجوانا والغيرة والحسادة
لكن نسو سيد المصنع ما جمعية خيرية زي الحكومة القالوا هم ما جمعية خيرية !!
المصنع دة بنتج بضايع بنستهلكا نحن كمواطنين . يعني بنشتريها نحن زاتنا
بتاع المصنع بخت تكلفة الانتاج اول وبخت ربحو
بتاع المصنع فاتورة كهربتو زادت زيادة لايمكن تصورها . تلاتة مرات في حد ادني
عندو حلين يقفل او يواصل
واصل معناتو زاد بضاعتو
وبضاعتو دي ما ياها الصابون والزيت والبسكويت والسيخ والكمر وغيرو
يعني ما بخسر بل نحن البنتحمل زيادة فاتورة كهربتو

مرحب عاصم
وتشكر
داير اشوف تأثيرها علي انا كمواطن
ومن ناحية علمية بتذكر حديثين
مرة الترابي قال في تشريع قانون
اسرع ما تيسر !!
كأنو ساكينو عشان يطلعو التقول عملية زايدة
ومرة وزير التعليم العالي بداية الانقاذ قال
الدراسات بتعملها الدول المتمكنة نحن دايرين جامعات نعمل جامعات ولو ظروفنا اتحسنت نعمل الدراسات
تنويه
دون اقتباس من الذاكرة . ذاكرة لامن كنت بسمع تلفزيون

السكر
الناس بقا ماعندها تحلية غير كباية الشاي والجبنة
اليوم جوال السكر ب 750 ج من 625 ج في ظرف يوم بس
ليه الزيادة ؟
كنانة كهربتها ذاتية . بتصنع كهربتها براها من المولاظ
لكن عندها اسبيرات للمصنع وعندها اسبيرات للعربات ودي كلها بتخش في تكلفة الانتاج .. اضف لذلك الحكومة بتشيل رسوم من الشوال يكاد يساوي تكلفته والشوال يمرق اي ولاية عندها رسوم عليهو
اول امس بحكي لي زول قال مواصلات ربك كوستي عملت 10 ج من 4 ج
ليه ؟ عشان الجاز
في ناس بمشو وبجو يوميا .. ميزان صرفهم زاد 12ج في اليوم يعني 300% طق كدة قدر زيادة الدولار الجمركي
ويقول ليك وزير المالية قال لازيادة !!
ماقارين صاح لكن معايشين الحاصل دة بشكل لصيق
والمضحك انو سمية ابوكشوة في جريدة الجريدة قالت هي تحت خط الفقر . ومفكرة انها تلغي الراتب والمخصصات !!
الضحك الباكي لا يكفي ردا علي قولها
يبدو لي السادة الوزراء ما عارفين مصطلح خط الفقر يعني شنو
زي ود الاثرياء الكتب انشاء عن الفقر .وقال سواق عربيتهم فقير والجنايني فقير والشغالة فقيرة

بهمنا كمواطنين عاديين انعكاس الميزانية في قفة ملاحنا وعلاجنا وقراية وليداتنا
اللغة الاقتصادية المعقدة حقت سعر الصرف وميزان المدفوعات ما بنعرفها
الادوية لو مرضت الله يشفيك .. العلاجات ما بتنهبش . نقع القرض واللالوب وام غليغلة والحزا والقطران وهكذا
الكراسات والاقلام والبرايات والاستيكة زاتا
والكتب
تصدقو الطالب بشتري الكتاب والكتاب بنطبع برة السودان يعني دولار جمركي

قال وزير المالية
عدم يقين المواطن هو سبب التضخم

غايتو يا ابسن انا عندي قناعة لا تتزعزع ولها ما يسندها :
نحن ما عندنا ميزانية ولا يحزنون والموضوع البتتكلم عنو ده مجرد روتين سخيف بتقوم بيهو الحكومة كل سنة ، كل سنة نفس الايام دي بنخش الفيلم ده لوج وبنطلع ما فاهمين اي حاجة !
لكن هل مرة واحدة شاهدت تقرير "فيلم" ربع سنوي ، نصف سنوي عن اداء الميزانية او عرض لمؤشرات اداء الميزانية ؟ هل شاهدت تقييم اداء لخطط التنمية الجارية المضمنة في الميزانية ؟ هل قرأت او حضرت مؤتمر صحفي لعرض تقييم مفصل لأهداف الميزانية خلال العام المالي او عند انتهائه ، ما تم انجازه وما تعثر ونسبة الانجاز وبيان المشاكل والظروف التي واكبت سير العام المالي ؟
بجي وزير المالية يجيب ليك ارقام كلية فارغة ومختصرة جدا تدور حول الميزان التجاري ، الحساب الجاري وحاجات عامة بدون تفاصيل وبدون نشر للتفاصيل في اي موقع الكتروني او صحف الخ الخ ؟
الشي التاني التبرعات العجيبة بتاعة المسئولين وعلى رأسهم البشير خلال العام ، ما معنى هذا ؟ هذا لا يحدث من حكومة محترمة لديها ميزانية محددة واهداف محددة ولوائح للصرف ، الرئيس يتبرع وايلا يتبرع وحسبو يتبرع وحتى حميدتي يتبرع ، مع انو مجرد ضابط في الجيش !!
الشيء الثالث هو شركات الدولة او القطاع العام وبالذات شركات الجيش وهي مؤسسة ضخمة جدا ، هذه المؤسسة لا احد يعرف اي شيء عن تقاريرها المالية ولا حتى المراجع العام ولا يعرف اي احد سوى قلة قليلة كيف تدار واين تذهب عوائدها وحتى المؤسسات التي يستطيع المراجع العام دخولها توجد فيها فوضى غير عادية مثل مؤسسة البترول التي كشفت تقارير المراجع العام اختفاء مئات الملايين من الدولارات من حساباتها ،وين ؟ لا احد يدري .. اما التجنيب وما ادارك ماهو ، فهو دليل قاطع على عدم وجود ميزانية ولا رقابة ولا يحزنون ..
توجد ميزانية سرية للجيش والامن والمؤتمر الوطني لا احد يعلم عنها شيئا ، واذا كانت الرقابة المالية على الميزانية المعلنة ضعيفة جدا فلك ان تتخيل نوعية الرقابة على الميزانية السرية ..

صدقت يا عبدالله
روتين زيو و زي تقارير المؤسسات البكتبو بدوهو حافز .
مافي متابعة لأنو اصلا مافي خطة اقتصادية علمية
شوف المطار حقنا دي كم مرة قالوا حيتبني ؟
دى التالتة
مرة الصين ومرة كوريا وهسة تركيا
ولا المدينة الرياضية المن زمن يوسف عبدالفتاح

لايوجد يابوسن فى بنود الايرادات ايراد واضح غير الضرائب اذا استسنينا الجمارك الذى ايرادها نفسه ضرائب بشكل اخر الجاى موت احمر

صحي يا عمر
مافي غير ضرائب ولم تظهر الزكاة

لا أحد يعرف إلى أين تسير الأمور

كل الحسابات أصبحت مستحيلة

إلا برحمة من ربك

تشكر هاني
استيضاح !!!
معليش يا شباب طولو بالكم معاي شوية وخلوني استعرض معاكم بعض بنود ميزانية 2018 عشان تعرفوا انو الكيزان قاعدين يعملو في شنو ( الارقام بالمليار وبالجنيه الجديد ) :-
حجم الموازنة = 173.143
الايرادات المتوقعة لتمويل الموازنة :-
الايردات الضريبية = 75.100
المنح = 8.100
الايرادات الاخرى = 33.700
الاستدانة = 00 55.3
مبيعات اصول مالية = 0.343
مبيعات اصول غير مالية= 0.600
لحدي هنا الارقام منطقية لكن الخوازيق جاية تحت :-
زيادة جمارك الدقيق بنسبة 10%
زيادة جمارك مكونات صناعة الاغذية الى 40%
زيادة جمارك سلع اخرى ( لم يتم تسميتها ) بنسبة 40%
تخفييييييض
تخفيض التبغ الخام بنسبة 10%
تخفيض المونيوم الاواني بنسبة 20%
تخفيض مصنوعات الاحذية 10%
تخفيض جمارك اللساتك والمطاط ب 10%
تخفيض جمارك البكاسي ب 30%
( تاكلو نعلات ولساتك بس تاني يا شباب ، وناس البوكسي اب زيق حظكم )
* نجي للخازوق الاكبر والطاعون المستمر في الدولة :-
- الوزير اعلن الى خروج ايردات البترول من الموازنة تماما ؟؟؟؟؟؟؟؟
نوريكم الوضع :-
انتاج السودان اليومي من البترول = 110000 برميل
سعر البترول = 60 دولار ( خام خفيف )
عدد ايام السنة = 365 يوم
السعر الرسمي للدولار الحالي = 15.8 ( حسب سياسة الحافز )
ايرادات البترول المتوقعة :-
110000×60×365×15.8 = 38.06 مليار جنيه سوداني !!!!!!!!
- لم تأتي الاشارة لسلعة الذهب في الموازنة لا من قريب ولا من بعيد مع العلم ان نصيب حكومة السوداني من الذهب هو 25% اي 33.5 طن ( والباقي قادي السلك ) وسعر لطن عالميا 40 مليون دولار فايرادات الذهب =
33.5 × 40000000×15.8 = 21.172 مليار
- دا غير ايرادات كتيرة تم جملها في بند الايرادات الاخرى وهي ( المعادن غير الذهب والبترول وايرادات الكهرباء والغابات والكثير جدا من الايرادات )
* بند المنح الذي يساوي 8.1 مليار جنيه غير حقيقي البتة لان المنح وحسب وزارة التعاون الدولي تساوي اكثر من مليار ونصف دولار وسعر دولار الدولة الرسمي للواردات هو 15.8 والدولة تحسب لنا هذا البند بسعر 6.7 اي ان هنالك اكثر من 19 مليار جنيه سوداني فرق ، اين يذهب هذا الفرق ؟؟؟؟؟؟؟؟؟
باختصار الذهب والبترول وفرق سعر المنح = 78 مليار دولار وما داخلة في الميزانية ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
يا وزير المالية اذا كان نوام البرلمان غافلين وناس الصحف غافلين نحن ما غافلين
نقول شنو غير حسبنا الله ونعم الوكيل .
منقول
‏

شوفو المغالطات دي
صحف اليوم
تحرير كامل لاسعار القمح ولا زيادة في اسعار الخبز
غايتو الرغيف دة إلا اذا كان ما بصنعو من القمح