رحلتي مع الأقاشيه

02:59 PM December, 11 2017

سودانيز اون لاين
درديري كباشي-
مكتبتى
رابط مختصر

رحلتي مع الأقاشيه
الاقاشيه أكل شعبية منتشرة في دول وسط وغرب أفريقيا وانتشرت في السودان مع القبائل المهاجرة من تلك المناطق والتي استقرت به. وحتى قريب مطلع التسعينات كان لا يعرفه من باقي السودانيين الا من جاور الاحياء التي يسكنها الهوسا في أحيائهم المميزة. مثلا في كسلا يسكنون حي غرب القاش وجزء منهم في بانت قرب سوق الحيارى. وفي هذين الحيين تحديدا تنتشر أكلة الأقاشيه .. وفي مدني يتواجد الهوسا بحي الدباغة وهو الحي المجاور للمدينة الجامعية لجامعة الجزيرة حيث كان لقاءنا الأول به وعشقنا الأبدي معه .
والأقاشيه هو طريقة فريدة في شواء اللحم. حيث يدق لحم الخروف أو العجل بعد أن يسلب من العظم يبهر بخلطة سرية من البهارات اختلف الناس حول مكوناتها وهي مسحوق بني فاتح الطعم الظاهر فيه هو الفول السوداني والزنجبيل والفلفل الأحمر أي الشطة وحتما لها باقي مكونات يستحيل بائع الأقاشي أن يفصح عنها .( مثل ما تفعل كنتاكي الامريكية ).
ذات عصرية بالنشيشيبة داخلية الطلاب جاءني نفر كريم من الأصدقاء وطلبوا مني الذهاب معه .
- درديري تمشي معانا ؟
- وين ؟
- حي الدباغة ماشين ناكل أقاشيه .
- - واقاشيه دا شنو ؟
- أنت مالك بس أرح ..
- ذهبت معهم دون أدنى معلومات إضافية عن ماهية الأقاشيه حتى لم يقولوا لي هل هو لحم أم بطاطس .
مشينا حتى حي الدباغة بودمدني وشرق شارع الظلط في تجاه النيل توغلنا داخل الحي . وقدام أحد البيوت كانت توجد زحمة كثيرة من الناس وسيارات فارهة واقفة. يوجد عم في الخمسينات من عمره ضخم الجثة يجلس على كرسي قصير قريب من الأرض ( بنبر ) وأمامه الكانون مرصوصة به السيخ مكتظ باللحم وقربه صينية . كل مرة يتناول احدى هذه السيخات ويفرقها بقطعة قماش في يده على الصينية والناس من حوله ينادونه بعم محمد ( عرفت لاحقا من أبناء ودمدني انه قد توفي رحمه الله ). وكل واحد يذكره بدوره. وهو كل مرة يأخذ قطعة من الأوراق الجرائد يعبيها بالأقاشه ويضع معا شرائح البصل وانصاف الليمون ويلفها. وهؤلاء أصحاب الطلبات ( السفرية ) أي الذين يأخذون الطلبات الى بيوتهم .وكذلك له اطباق للطلبات المحلية . أنا بعد ما تفحصت الأمر أصبح عندي نصف فكرة عن الموضوع عرفت ما هو الأقاشيه أصبح النصف الآخر كيف هو طعمه . تنازعت نفسي بين التجريب والرفض . صراحة كشيت في البداية ..بعد ما احضر الزملاء الأقاشيه وجلسنا حول الطبق دعوني للأكل رفضت. ( درديري انت شايف أولاد الراحات اشتروه بعرباتهم أنت عايز تعمل لينا فيها حنكوش ) فعلا رفعت رأسي وجدت عدد كبير من زملاء الجامعة يجلسون في حلقات .وعلى مضض تناولت قطعة وأنا شبه مغمض أدخلتها في فمي .. بعد مضغها وبلعها أدهشني الطعم في حياتي لم أذق طعم لحم بهذه المتعة والروعة ( زحوا كدا أنتو بتلعبوا ولا شنو ؟ ) استلمت الجلسة وطلبنا زيادة .. ومن يومها أصبحت أنا قائد أسطول الرحلة نحو الأقاشيه . بل جندت زملاء جدد.
وبعدها تخرجت من الجامعة وعدت الى مدينتنا كسلا عملت بها وتزوجت وسحبتني الحياة بعيدا عن عالمه ولم التقي بالأقاشيه مرة أخرى .لأنه في كسلا لا يوجد سوى حي غرب القاش ولا توجد مناسبة تأخذنا لهناك الا نادرا .. شبه نسيته .
حتى كان يوم عمنا الزعيم الراحل ونسيبنا محمد أحمد عطا رحمه الله رئيس اتحاد المزارعين عمل دعوة كبيرة لأعيان كسلا بساقية ود عطا الشهيرة. في ذلك اليوم جاورت مدير مكتب الخطوط الجوية السودانية وتعرفنا ببعض وبدأ يحكي لي عن فترة عمله بنيجيريا مديرا لمكتب الخطوط هناك . وعن عادات وتقاليد النيجيريين ووجه الشبة وأكلاتهم وجاءت سيرة الأقاشيه وظل يمدح فيه . حتى جاءت السفرة تحلقنا حولها مليئة بالطيبات واللحوم وإذ بطبق ضخم من الأقاشيه يتوسط السفرة كأسعد مفاجأة بعد سنين طوال من الفرقة .كدت أن أحمل الطبق واقبله قبل الشروع في الأكل . التحق بنا بعض الضيوف. والسيد مدير الخطوط لازال يحكي عن نيجيريا. كل زملاءنا في السفرة لم يقربوا من طبق الأقاشيه نهائيا. وأنا كذلك لم ألمس أي طبق غيره. ومدير الخطوط يطوف ويعود مرة بعد أخرى . عندما لاحظ لرفقاء السفرة لم يقربوا الأقاشيه سألهم .
- أنتو يا جماعة ما أكلتوا الأقاشيه دا مالكم ؟؟.
- والأقاشيه دا جنسه شنو؟ .
( صراحة أنا شفقت من تماديه في الشرح )
- كيف ياخ الأقاشيه دا أفخر أكله في نيجيريا هناك في نيجيريا يقدموه في المناسبات للضيوف مثل الخبيز والحلويات عندنا.
- - يا راجل ؟
- وعينك ما تشوف الا النور. وقعوا بنهم في الطبق بعد ما ذاقوه .
- صراحة أنا اغتظت منه شديد جدا قربت أقول له( ياخ أنت مالك ومالهم).
- وبعدها عرفت أن عمنا محمد احمد رحمه الله كان يحضر بائع الأقاشيه من غرب القاش شخصيا ويسلمه خروف كامل ليعد وجبة الأقاشيه مع باقي الوجبات .
وحتى تلك الفترة أي نهاية التسعينات ظل الأقاشيه أكله خاصة بأصحابها أي اهلنا الهوسا من أرادها سيجدها عندهم هم فقط. قبل أن تنتشر مثل ما هي الآن ويتغول عليها أصحاب المطاعم ويفقدونها رونقها وألقها.
في أواخر التسعينات اغتربت ناحية الرياض. وانقطعت كذلك علاقتي بالأقاشيه مرة أخرى . الا كان يوم ألتقيت بصديقي ودفعتي عز الدين سبقني للغربة . وهو صاحب الدعوة الأولى لي بحي الدباغة مدني .. تخيلوا عرفت منه أنه اكتشف محل الأقاشيه بالرياض في حي اسمه الشميسي وعند مطعم اسمه شواية الهوساوي . ورحنا هناك التقينا مرة أخرى مع الاقاشيه طبعا بصورة أرقى ومطعم مجهز ..
مرت السنين وانتشر الأقاشيه في كل المطاعم السودانية بالسعودية وكذلك بالسودان .
أنتهز فرصة لأقول لكم فيها
هذا ليس هو الاقاشيه الذي نعرفه.
لكن مشي الحال

قررت مقاطعة بوستاتك حتي عودة فكي منزو ..
يعلم الله مشتاقين

كيفك يا درديري
أنا برضو أول أقاشيه أكلتو في الدباغة ومن ديك علقت فيهو

حتى في الرياض كان شبه برنامج الخميس أمشي غبيرة وأجيبو
لحدي ما يوم وقعت لي في واحد بايت ولا حكايتو شنو ما عارف المهم لخبتني وعمل فيني عمايل منها وقفتو نهائي

الأقاشي مهم جدا فيهو نوعية اللحم وخلوها من الشحوم بالإضافة للخلطة الأصلية ودي ما بتتلقي إلا في الدباغة مدني

تحياتى الاستاذ الدرديرى ..

قبل و بعد القاشى .. لى ان اقول لك ان لك قدرة فائقة فى الوصف فلا تحرمنا من قلمك .. و لعل جرابك ملئ بالذكريات الجميلة ..

لا اذكر انى اكلت الاقاشى غير مرة واحدة فقط فى حياتى .. بالرغم من أنى أحب و آكل كل اصناف اللحوم ..

تحياتى ..

الحكااااي ديرديري يا متعة
طبعأ اول مرة أكلتو بالقضارف 2003م بديم بكر ومن ديك وعيييك
خاصة أنا بحب البصل
:
:
:
:
:
:
:
مع التحيات لله الزاكيات

السلام عليكم ورحمة الله وبركاته
سنيرنا الدرديري

رحلتي مع الاقاشي برضوا بدأت من الدباغة (أخوك الدفعة 15 اقتصاد)
وكانت ماشة كوييييييس بس مرة اتسلطت علي واحد من أولاد الدفعة 13 وقال لي :
هسه شايف ليك كلب حايم في الدباغة ؟؟ ما تقول اخوك كان عوااااااف ههههههههه
اها خليت اكل الأقاشي .. حتى كنت في زيارة لمدينة الأبيض (بعد كم سنة ) وربنا يطراه بالخير
اخونا خالد عيسى قال لي نمشي البستان في بتاع اقاشي رهييييييييييب ..
قلت ليه لكن انا ما بأكل اقاشي ! قال لي : بس انت جرب ولو غلبك خليه
ليك علي تاني لي يوم الليلة ما فارقت دربه ههههههههههههه

https://www.0zz0.com

https://www.0zz0.com


https://www.0zz0.com

تحياتي درديري
وضيوفه
الوصفة ما سرية ابدا
البهارات
كسبرة
قرنجال
جنزبيل
كمبة
مرقة ماجي
تسحن مع بعض
وتبهر بيها بعد اضافة الدكوة والليمون والزيت
الاقاشي ما بدقو .. لكن بكون لحم بدون عضم ويتقطع شرائح
عملت الخلطة دي وبناكلو في البيت عادي
ومش كدة وبس وبنعملو للجداد برضو . جداد اقاشي
جرب واشكرني
في حاجة واحدة ما بتلقاها الا تشحد ليك زول من غرب افريقيا
الشطة لو داير اسمها كلوا او داوداوا بالرطانة