العكلتة في الأغاني السودانية ...

10:18 AM November, 20 2017

سودانيز اون لاين
معاوية المدير-بكندا محافظة البرتا
مكتبتى
رابط مختصر

طبعاً العكلتة في المنبر دا مُبالغة، فيهو ناس عكاليت لدرجة غاز لا يُرى !.
لكن العكلتة دي لم تأتي من فراغ فنحن بطبعنا شعب عِكليّت جداً ؤ كمان
بنحب نكنكِش في الحاجات، هسّع عليكم الله شوفوا ناس البشير ديّل مكنكِشين
كيف، والعجب الصادق المهدي !، ما علينا فالبوست بعيداً عن زقاقات السياسة .
طبعاً مافي زول بينكر الفنون ودورها الفعال في ثقافة الشعوب خاسةً الغُنا،
فإذا نظرنا لي غُنانا بنلقى نحن ناس عكاليت ؤ لوآييق ؤ بتاعين كنكشة لدرجة
إنّك مرات تشعر إنو الشاعر دا دلَمة عديييل كِدا !.
في هذا البوست سوف نحاول إلقاء الضوء علي بعض الأغاني حتي نتوصل من
خلآلها إلي الأسباب التي جعلتنا شعب لآيووووق ؤ عِكليّت .

الدلمة : القرادة الحمرا البتكون مكنكشة في الحيوان المنقاش ما يسلها،
سليتو روحنا بالعكلتة ...

في غنوة قديمة حتي شاعرا ما معروف مِنو الغناي قال،
ما بخليك إن بِقيّت حي
يا قِصيبة السُكر الني !.

حتي في التجكيس تجكيسنا لا يخلو من كنكشة، ؤ دا من زمن بعيد
جداً زي ما ملآحظين !، يعني وافقت ما وافقت الزول دا مِتلآيق فيها
مِتلآيق !.
البوست دا حا يكون مرجعيّة للناس البيستغربوا من العكلتة البتحصل
في البورد دا .

وإلي نماذج أُخرى ...

تعالو نشوف نوع من العكلتة والكنكشة قبل الليلة ما سبقنا
عليهو زول، وهو أكبر دليل علي عكلتتنا التي لا تعرف الحدود
وتجنح جنوح يفوق الخيال زاتو .

الغناي قال،
سايق عليكي هواك
وفي الآخرة بستنّاك
قال ليّ ما بقدر
دنيا وآخرة عايشة معاك

عاد دا كلآم دا !، منتهى العكلتة، عليكم الله عكاليت البورد ديّل خاتيين
كان إتعكلتو ؟، وراثة !.
يعني دي كنكشة ما حصلت ابداً، كنكشة ابديّة ؤ كمان هنا اللتنين
مكنكشين في بعض لِزق يعني، وهذا أكبر دليل علي أن الكنكشة
واللياقة موروثة من الجانبين ...

برضو هنا في نموذج لغنوة قديمة جداً مجهولة الشاعر فيها لياقة ليس
لها نظيّر أو مثيّل إلا في هذا المنبر بتحكي عن وآحد شوك كِتِر بس
تفكو بجاي يشعبّط فيك بجاي ولا يهمو حتي لو كتلوهو .

قال الغناي،
داير انط الحوش دردرب.... يالله هوي
داير اشوف ام عكشا دهب....يالله هوي
العكاكيز فوقي رب رب .....يالله هوي
ما بخاف ان كتلوني تب
وداير اضوق سجنك يا صنب
...يالله هوي ليلي انا الله الليل والليل يالله هوي

هسّع عليكم الله دا الجابرو شنو ؟ بلآ لياقة ؤ عكلتة، الشي نط حيّطة
ؤ لِبيّع عكاكيز ؤ دا كُلو عشان داير يسجنوهو بي سببا ! .
عاد دا كلآم دا !، ؤ كدي الله يقدّر وآحد فيكم ينشبك مع زول في المنبر
دا عشان يقوم عليهو اللِيّل أجدادو يتلّحك ؤ يزازيك من بوست لبوست ...