هل من تسجيل أو مصدر آخر - محترم - لتصريح أبوقردة عن مرضى السرطان؟

12:41 PM November, 17 2017

سودانيز اون لاين
محمد البشرى الخضر-العين-الإمارات
مكتبتى
رابط مختصر

سألت أكثر من مرة وفي غير مكان ولم اجد إجابة تشفي غليلي!
لا شيئ غير خبر الراكوبة و المنسوب لها هي فقط ثم عشرات التغريدات و المقالات و البوستات الساخرة في الفيس و الواتس آب وكلّها تتناول الموضوع بثقة من سمع بأذنه من فم الوزير

ادناه خبر الراكوبة الذي يرجع إليه الجميع كمصدر وحيد - حتى الآن - للتصريح :

Quote: 11-14-2017 02:50 AM الخرطوم: الراكوبة طالب وزير الصحة السوداني، بحر ابوقردة، يوم الإثنين، الدولة بوقف كافة حزم الدعم التي تقدمها لمرضى السرطان. وقال ابوقردة في فعالية، بالعاصمة الخرطوم: "الحكومة بتصرف قروش على مرضى السرطان كتيرة جدا وفي النهاية يموتوا". وكشفت تقارير صحية عن تردد 3 آلاف زائر يومياً لمستشفى الذرة بالخرطوم، للفحص أو للعلاج من مرض السرطان. ولا يملك غالبية المرضى ثمن جرعات علاج المرض والتي لا يشملها التأمين الصحي عادة. وتفشى السرطان بكثرة في السودان جراء الفساد وإهمال الرقابة على الأسواق. وتتهم إدارة سد مروي شمال السودان، بدفن مئات الأطنان من النفايا المسرطنة تحت جسم السد، الأمر الذي تسبب في ظهور المرض بكثرة في الولاية الشمالية. بينما أدى الجهل في التعامل مع النفايات والأسمدة بجنب غياب الجهات الرقابية في الأسواق إلى ظهور منتجات غير مطابقة للمواصفات.

لاحظ في بداية الخبر اشار للخرطوم - الراكوبة مما يعني ان الخبر ليس منقولا عن وكالة او صحيفة بل مصدره الراكوبة ومراسلها - أو خياله !!
السؤال ماهي الفعالية المعنية و المذكورة في الخبروأين جرت؟
وألا يوجد تسجيل صوتي يتم مجابهة الوزير به حال أنكر, أم ستكون كلمة مراسل الراكوبة ضد كلمة الوزير
طيب ماذا عن الآخرين الحاضرين للفعالية؟ هل خرج أحدهم مؤكدا او نافيا الخبر و التصريح المنسوب للوزير.
وإذا اتضّح أن الموضوع شتلة لا أكثر ماذا سيكون موقف الآلاف الذين صدّقوا و اعادوا نشر الخبر و سخروا منه ؟ ماهو موقف عشرات الكتاب الذين دبجوا المقالات ساخرة او مستنكرة ؟
ما موقف الاستاذ الفاتح جبرة تحديدا
ومن ناحية أخرى لو صح الخبر وفعلا الوزير قال هذا الكلام ! عادي يعني يستمر في موقعه ولن يحاسبه احد؟ وما موقف منسوبي الوزارة و الحقل الطبي عموما ازاء هذه العقلية التي تتحكم في أمر صحة الناس؟
بل ما موقف صحافة الخرطوم وكيف تتجاهل أمر جلل كهذا !!

هل اطمع في احد الزملاء يقطع قول خطيب ويدينا الزيت!

بس ما يجيني واحد يقول لي : بكون قال
بزعل !

وعلييييكم الله ما يجيني من يقول ليه لامن فلاح حكومة قال ما قلت وعلان كوز عمل انت ما عملت و كم ديسبل ومكم بطيخ .. ... إلخ إلخ
موضوع البوست واضح وبيسييييط و لا يحتمل اي فلسفة أو استذة :)

السؤال البطرح نفسو يا بشرى هل مكتب وزير الصحة نفى الكلام دا
وخصوصا الكلام دا اخد راو ونشر كثيف
فما تشتغل بي عقلية التركي ولا المتورك
عارفك اي خبر من الراكوبة بتكضبوا حتى يثبت العكس .
الراكوبة دي عاملة عمايل في الكيزان اصلك ما بتتخيلها انت مالك😂

قبل ما نتناول السؤال البطرح نفسه يا ابوعلوة ماهي دلالة الإجابة عليه؟ لو نفت الوزارة هل يكفي في رأيك لتصديقها
وإذا لم تنف او تهتم حتى هل هذا يكفي لتاكيد الخبر و اضفاء المصداقية عليه؟
كدي اديني رايك في الأول

الشي التاني انا ما بكَذب اي خبر من الراكوبة حتى يثبت العكس لا أنا اكذّب اي خبر غض النظر عن مصدره يكون فيه دخنة و يخالف المنطق السليم و اتبيّن كما امرنا الله قبل ان اصيب الناس بجهالة

Quote: لراكوبة دي عاملة عمايل في الكيزان اصلك ما بتتخيلها

زي شنو كدا؟
أنا لو كوز بالعكس بشوفها بتخدمني من حيث لا تدري بادمانها الكذب

Quote: وقال ابوقردة في فعالية، بالعاصمة الخرطوم: "الحكومة بتصرف قروش على مرضى السرطان كتيرة جدا وفي النهاية يموتوا"

خبر الراكوبة أشار إلى إنو ابوقردة قال في الفعالية و لم يسمي الفعالية و لم يحدد ما إذا كان أبوقردة قال الكلام في مخاطبة رسمية في الفعالية او في نص ونسة دارت على هامش الفعالية.

من الصعب جداً تأكيد الخبر او تكذيبه.

أنا غايتو في مثل هذه الحالات لا أصدق الخبر و لا أكذبه و لا أتقصى عنه و لا أحكم عليه و لا أبني عليه أي أحكام.

شفت فقرتك الاخيرة دي (إدمان الكذب) بتثبت حكمك المسبق لما يأتي في الراكوبة انو اي خبر بتجيبو كضب عليه بوضح انت بي فتحك للبوست دا ما ساكي تجلي الحقيقة بل واصل لي قناعة بتجريم الراكوبة .

حا اجيك تاني

شوف برضو عنوانك (مصدر آخر او تصريح محترم)
ما عندك حيادية كلو لي زول باحث للحقيقة

ما محايد ولا داسيها
هل سيغير هذا من حقيقة الأمر شيئ؟ هل الخبر حقيقي أم تأليف و شتل دا الموضوع الذي لن يؤثر في اجابته من أو كيف اثير السؤال!

ابحث انت هل حقيقي ام شتل
لكن بي طريقتك دي لو جابوه ليك صورة وصوت حا تقول مفبرك

ياهو البوست دا بحث عن الحقيقية مني
ولو جا تسجيل بالتأكيد سأصدقه وما ح اقول مفبرك
خليه التسجيل شهادة اي زول كان حاضر الفعالية تكفي
اخوك واعي برضك وعقله متفتح بس انت روق :)

سمح
او كما قال عووضة رضوان الله عليه

علي دفع الله
كيفك يا حبيب
لو جابوا الخبر صورة وصوت ود البشرى ما حيقول مفبرك
وإنتا عارف كدا.

أما خبر السرطان فهو مفبرك وأبو قردة ما بيحتاج يتكلم
عشان تتم فبركة اي شيء ضده.

انتقاد ابو قردة اسهل من اللفة الطويلة دي
كفاية الناس تتكلم عن حال الصحة في البلد
وتنتقده بدل من شتل الأخبار.

أنا أقرأ الراكوبة بانتظام وهي بتقدم خدمة اخبارية
جيدة بالنسبة لي في أمريكا
هنا واعتقد الحال كذلك بالنسبة لكثير
من السودانيين في دول المهجر
أما من ناحية إنها مرات بتفبرك
وتشتل الأخبار فدا عادي جداً يا حبيب
وبرضه حريات بتعمل نفس الحكاية دي
ومرة جابو خبر عن واحد من انصار السنة
وجايبنو من (تويتير) وعدد الكلمات الفيهو
تفوق المسموح بيه في تويتر، يعني اي زول بيستخدم تويتر
عارف انه الخبر مشتول ومضروب وبطريقة
غبية.

لكن أنا عافي من ود البشرى في تقصيه للاخبار
لأنه دا شغل الكيزان بتاع فبركة الاخبار
وهسع الكتير من الجهات بقت تتبع الاسلوب دا
وترمي ليك الخبر المضروب
وعارفاهو حيمشي الميديا وينتشر.

الزيت:

الراكوبة لو دايرة تجنن الكيزان
خليها تبعد عن اسلوب "SMC" واعلام الكيزان

وخبر الوزير "مضروب ومشتول" حتى يثبت العكس

والوزير فاشل وسبب من اسباب تدهور الصحة ذات نفسها

رغم نفي وزارة الصحة للخبر الا انه منطقيا كده ..
مافي زول عاقل ناهيك عن زول كونه وزير صحة ..
يجي يقول تصريح لا انساني زي ده ..
الخبر مفبرك ..
والراكوبة لا يُستغرب عليها ايراد هكذا أخبار مفبركة ..
تضر أكثر ما تنفع .. العجيبة اصلا ما بيتعظوا ..

يظل الخبر كاذب ومفبرك ..
حتى يأتي أحد بدليل موثّق على صحته ..

الصادق اسماعيل يا بلدياتي سلام ما يغشاك شر
التحيات ليك من المشرف ابو المعالي والله صحي
شوف عنوان البوست وانت حا تصل لي قناعة انو البشرى راسو والف سيف انو الراكوبة غير محترمة
عليك النبي ما شفت المعركة الخضناها ضد ترحيل وليد الحسين الى السودان ويجي البشرى بكل برود يقول انو الراكوبة بتخدم النظام .
ابو قردة او اي شخص منتمي لهذا النظام يفوق سؤ الظن
فما عارف ابو حتوت دايما بكوس ليهم في مراقة لي شنو !!!!!

اكوس ليهم في مراقة كيف يا ابو علوة؟ مراقتهم اداها ليهم من فبرك خبر زي دا و من جاراه في ترويجه و السخرية و ادى فرصة للنظام يشوف في مرمى مصداقيتهم!
بعدين علاقة المعركة مع وليد الحسين شنو ومصداقية الراكوبة؟ مسيلمة نفسه لا يحق للسع ودية اعتقاله دون توجيه تهمة أو بتعليمات من امن اليمامة و اي شخض وقف مع وليد عشان حقه في الحرية او الاعتقال بقانون وتخمة وحق ان لا يرحل ويسلم للسودان
لكن دا موضوع و كوزن الراكوبة تصر على التلفيق و اختلاق الكذبات وهذا امر بالتأكيد يفقدها الإحترام - اعني احترام المصداقية و قراء الموقع.

يا علي ما تعزف كتير على نغفمة الراكوبة و رأيي فيها هذا لن يغير من حقيقة الأمر شيئ!
هل كذبت الراكوبة متعمدة وضللت كثير من الناسوخلقت عاصفة نقد وسخرية من لا شيئ أم كذب مراسلها أم الموضوع حقيقة وعلي مصدر الخبر اثبات ذلك بتسجيل مثلا او شهادة احد الحاضرين!
بالنسبة لنفي الوزارة شايف جمال اشار لهذا النفي - يا ريت يا ود القوز تجيب نسخة او رابط - ودا جواب لسؤالك البطرح نفسه فوق يا ابو علوة, أها الحجة شنو تاني بعد دا :)

كلام على دفع الله معقول ,, مش انه دليل اثبات لكن يكشف
أن هذه الحكومة لو كانت تعير الرأى العام ادنى إهتمام كانت
نفت هذا الكلام على الأقل لتظهر بمظهر أنها حكومة ذات شفافية.
اذ لو حامت أى تهمة من هذا الوزن حول أى مسؤل فى بلد آخر
لقامت قيامة المسئول ولم تقعد الى ان يستقيل أو ينفى التهمة.
والصحافة والاعلام عليها واجب الكشف عن حقيقة تلك التصريحات
واثبات نسبتها الى المسئول من عدمه حتى وإن كان قد تفَوَّه بها فى مجلس
خاص كان يجب أن تطيح به إن ثبتت.

سلامات عزيز نا الأخ محمد البشري .
واجي ناط لي تعلق الأخ الفاضلابي . يا فاضلابي يا اخوي . اكتر ية من الصحافة في بلدنا
بتاخد المعلومة من المنابر . في صحفيين الواحد فيهم ما عندو حق رصيد التلفون
و منقطع عن التواصل بالعالم وحتي بالداخل . أما الوزير ده اكيد ما بكون عارف الفرق
بين آخر كتاب فارمكولجي طالع في العالم وكتاب تعليم اللغة الصينية في سبعة أيام .
عليك ألله يا ود البشري تتذكر وزير الصحة دكتور موريس سدرة ؟ يا حليل الصحة

هو خبر صحيح في الغالب .. وده حكم مهني جدا .. الوزارة تتحلل من مسؤولياتها لعجزها المالي وضعف الميزانية (كل ميزانية وزارة الصحة لا تكفي لادارة مستشفيات للسرطان تعالج هذه الفئة من المرضى في السودان بصورة فعالة) ..

طبيعي جدا ان يبرر ابوقرده هذا العجز .. وطبيعي ان يشتكى من التكلفة العالية لعلاجات السرطان ..

اختلاق الحالة اعلاه مستبعد جدا ..
واحد قعد فكر في الذي سردته اعلاه وقام قال يتخيل اسوأ تبرير لوزير الصحة عشان يطلعو اشاعة !!

في تصوري ابوقردة قال الكلام ده ..
وما قالو بصورة رسمية ..
الا انو الواقع يؤكد انو ده هو الواقع الذي يدير به ابوقردة الوزارة .. وده التبرير بتاعو ..



تكذيب ذلك يا ود البشرى بسيط جدا ... فقط الميزانية المعتمدة لعلاج مرضى السرطان... لو انا ابوقردة حاطلع واقول للناس انا اعتمدت مبالغ كذا للايفاء بكل احتياجات هذه الفئة من المرضى .. فكيف اقول كلام مخالف لانجازاتي؟!

الصراع مع الراكوبة واثبات وجهات النظر الذاتية تجاهها وتجاه المعارضة غير مهمة وتحرف الناس عن جوهر الموضوع .. مسؤولية الحكومة في علاج مرضى السرطان

صباح الخير شباب
بحثت عن نفي وزارة الضحة لقيت التالي في موقع سونا

Quote: الخرطوم في 15-11-2017 (سونا) نفت وزارة الصحة الاتحادية قي بيان لها اليوم ما تناقلته وسائل التواصل الاجتماعي من تصريحات نسبتها لوزير الصحة الاتحادي بحر ادريس ابو قردة حول مرضى السرطان ، وقالت انها عارية تماما من الصحة ولا اساس لها . واضافت ان ما نسب للوزير بحر ادريس ابو قردة من تصريحات مفادها ان الدولة " تصرف قروش كثيرة جدا لعلاج مرضى السرطان وفي النهاية بموتو "... عار تماما من الصحة ولا اساس له واعربت عن اسفها لهذا التصريح الكاذب والذي لا يتناسب وواقع المسئولية الكبرى التي يتصدى إليها الوزير. واكدت ان هذه التصريحات لم ترد على الاطلاق في أي صحيفة أو قناة فضائية أو إذاعية ، محلية أو .عالمية . واشارت انه بالرغم من ذلك أخذت بعض الأسماء المستعارة في مواقع التواصل تتناقل هذا التصريح الكاذب .بشئ من السخرية في الاسافير وأكدت الوزارة انها ستتخذ الإجراءات القانونية ضد الجهة أو الجهات التي روجت لذلك من خلال نيابة جرائم المعلوماتية . وهذا هو نص البيان : "في الوقت الذي تقوم به وزارة الصحة الاتحادية من مجهودات داخل وخارج السودان من أجل أن ينعم المواطن السوداني بوافر صحة وتمام عافية،وآخرها ترؤس السودان للشبكة العالمية للصحة في جميع السياسات والتي تضم في عضويتها أكثر من 60 دولة ، بجانب منظمات الأمم المتحدة كمنظمة الصحة العالمية ، مقرونا بنشاط داخلي في توفير العلاج المجاني وتقوية النظام الصحي المحلي وتطبيق مشروع التغطية الشاملة بخدمات الرعاية الصحية وإعلانها الأخير عن مجانية عمليات جراحة القلب لكل المرضى بالسودان وحرصها الدؤوب في إبعاد شبهة الإتجار بالبشر من خلال القرار التاريخي ، بمنع السفارات من التدخل في إجراء عمليات زراعة الكلي للسودانيين بالخارج ، وربطها بضوابط من الداخل للجهات المختصة متمثلة في المجلس الاستشاري لأمراض وجراحة الكلى والقمسيون الطبي القومي ، وغيرها من مهام يعبر بها عن حرص وزارة الصحة الاتحادية ورعايتها وإشرافها على كافة الأنشطة المتعلقة بالصحة ، بواقع مسؤوليتها الأخلاقية والأدبية في هذا الشأن وانها لم تتقاعس عن دورها المنوط بها ، وستظل الوزارة على العهد بها تنفذ سياسة العلاج المجاني لعدد من الأمراض المفقرة والتي من ضمنها علاج مرضي السرطان . في ظل كل هذا العطاء. واضاف البيان: انه على الرغم من ان الوزارة ومن خلال إدارة الإعلام والعلاقات العامة لم تبخل بأي معلومة للجهات الإعلامية المختلفة المحلية والعالمية ، باعتبار ان الحصول على المعلومة للاجهزة الإعلامية حق كفله الدستور ، خرجت شائعة لا تخلوا من غرض ، بوسائل التواصل الاجتماعي على لسان الوزير مفادها " وزير الصحة الاتحادي بحر ابوقردة : الدولة تصرف قروش كثيرة جدا لعلاج مرضى السرطان وفي النهاية بموتوا " وهذا التصريح الكاذب ، لا يتناسب وواقع المسؤولية التي يتصدى إليها معالي الوزير ، وما يؤكد ذلك ، أنها لم ترد في أي صحيفة أو قناة فضائية أو إذاعية ، محلية أو عالمية ، وبالرغم من ذلك أخذت بعض الأسماء المستعارة تتناقل هذا التصريح الكاذب بشئ من السخرية في الاسافير. ونؤكد نحن في إدارة الإعلام والعلاقات العامة بوزارة الصحة الاتحادية بأن الوزير لم يدل بأي تصريح يفيد بذلك ، وهذا أمر مجافٍ للحقيقة والواقع ، وعليه ستتخذ الوزارة الإجراء القانوني ضد الجهة أو الجهات التي .روجت لذلك من خلال نيابة جرائم المعلوماتية . ج/ط

الملاحظ انه الخبر انتشر انتشار النار في الهشيم لو فتحت الماسورة بجيك ينقط زي اغنية ديمة في العشاق ايّامها! لكن النفي و بيان الوزارة الّا تكوسو كواسة!!
الناس يبدو تتناقل الأخبار حسب رضاها أو عدمه عنها ولا قدسية للحقيقة في رقبتها

مرحب الأخوان علي , حافظ, ود القوز, الصادق, الفاضلابي, عثمان و ود المشرف
ومعذرة وشكرا على المرور و التعليق

لاحظت في بيان الوزارة قولهم ان التصريحات المنسوبة للوزير لا اساس لها, وكنت قد تصورت ان الامر ربما كان زيادة موية لحديث الوزير او تفسير خاطئ لكن قول الوزارة ان الموضوع لا اساس له يضع الراكوبة في محك صعب جدا اذ أنها متهمة باختلاق التصريحات من الفراغ كدا بدون اي سند او اساس
و إن كانت الراكوبة و القائمين عليها تعنيهم مصداقيتهم و يحترمون عقول قرائهم عليهم الرد على البيان و اثبات ان التصريحات حقيقية بايراد تفاصيل عن الفعالية و الموضوع الذي نوقش فيها وتحدث عنه الوزير و ريما ايراد تسجيل بصوت الوزير لو توفّر و أخيرا العثور على شاهد عيان حضر الفعالية و سمع بأذنه الحديث و إيراد شهادته .

الشي الثاني و للمرة المليون الناس تمر بمثل هذا الموقف! خبر قبل التأكّد منه طوالي يتنبّاه الناس و يحكموا على اساسه و تظهر المقالات و النكات و المواقف وحين يخرج النفي او يبين ضعف أو الشكوك في مصداقية الخبر لا أحد ممن انبروا مصدقين و مفترعين و ساخرين على الاقل يعتذر لنفسه او قرائه, اغلبهم بعمل رايح

اقرب مثال في اليومين الفاتن خبر نفي الدعاة السعوديين المعتقلين للسودان ومن\قة الجزيرة تحديدا وخبر السعودية تقود حلف عربي للقضاء على حزب الله والسودان مشارك!!

انت عارف !
الناس ديل يفوقوا سوء الظن العريض و بكون قالوه وكان ما قالو قالو
أها ...

ود البشري صباح الخير عليك وضيوفك الكرام .


يا ود البشري عشان ما تكتر لينا في لواكة الكلام والقيل
والقال والدليل والمدلول لو سمحت سيب الكلام دا !!!!!
هل من تسجيل أو مصدر آخر - محترم - لتصريح أبوقردة عن مرضى السرطان؟
كدي اتكلم لينا عن الافعال الكلام هين والكلام الانت
بتلوك فيه دا خلاص شالوا الهواء كدي اتكلم عن التدهور
المريع في الصحة وخدماتها في كل المرافق بدون استثناء !

دا هنا لب الموضوع . خلينا من قلنا وقالوا !

ولكم الشكر ,,

كيفك يا محمد

السودانيين يا محمد ما بقولوك كلام ما قلتو

لكن أي كلمة تطلع منك (لو كنت في دائرة الضوء) بتتقال زي ما هي لو كانت كافية وبتموها وبشرحوها من عندهم لو كانت ما بتقضي الغرض

شوف ابوقردة الكلام طلع منو لو جادي فيهو أو في شكل نكتة أو قالو لمرتو والشمار حرقها قالتو لجارتها أو قالو في ونسة عامة المهم طلع منو

لو دقشت بوست سيف النصر ممكن يكون أبوقردة قال في الدول المتقدمة الكانسر لما يصل مرحلة معينة الخ

المهم قالو يعني قالو

فعلآ الخبر ما صاح . والمواطنين هم الكضابين
والحكومة هي الصادقة دائمآ !!!

الصور لاتكذب ولا داير دليل اكتر ؟ لما تخلص من التشكيك في
الاقوال اتكلم لينا عن الاكيدة بالافعال !

منى .. لو سمحتي بطلي العوارة البتعملي فيها دي و حاولي اقري البوست بعيونك وعقلك عشان تعرفي لب الموضوع شنو

يا حمدنا .. يعني "بكون" قالو هههههه

يا ود البشري يا انصرافي يا الماعندك موضوع
سيب لواكة الكلام والجري وراء القيل والقال واتكلم
لينا عن المفيد والافعال وليست الاقوال .

منى .. لو سمحتي بطلي العوارة
في ذمتك اسه العوير فينا منو البلوك الكلام وسايب
المواضيع الاهمة ولا البطلب منك العكس !

غايتو خلاص دابك وقعت لي انت ما ضبابي انت عوير ولايوق .
هههههههههههههههههههههههههههه

طيب يا منى خليني انا في انصرافيتي وامشي انتي اكتبي ليك حاجة مفيدة مرة في حياتك
بدل لافحة توبك تنططي من بوست لي بوست بعوارتك دي و تكرري في محفوظات انتي زاتك ما مستوعباها هسي لو فتشناك وسألناك منها يبين جهلك أكثر مما هو باين

ود البشري سيب المهاترات لاني انا ما عندي زمن ليك .


حلفتك بالله تعمل البقول ليك عليه .
تمشي بوست دكتور سيف اقرا الموضوع
كويس وركز فيه عشان هناك موجودة اجابة .

ومشكور ,,,

وشوشة :
لو سمحت ما تتكلم معاي بالمهاترات دي
لانها ما بتشبه الناس الكبار وعاقلين .

سبحان الله ما عندك زمن وجاية تتنططي و تقلي في أدبك طيب امش اكسبي زمنك في الحتة البتريحك ! كنت متوقعة شنو يعني رد على لغتك السخيفة دي ناس يا مناضلة ويا كلسة و يا كنداكة!!
دي امش كوسيها عند البشبهوك ما عندي هنا يا ظريفة هنا ما عندي ليك غير مراية بس تشوفي فيها رقبتك على حقيقتها

هههههههههههههههههههههههههههههههههههههههههههههههه
و تقلي في أدبك
هذا هو ود البشري الحقيقي خلاص خليني في قلة
ادبي بس بتمني منك تكون رجل شوية موضوعي
وتواكب الاحداث الاهم وتسيب القيل والقال !!!!!
لانها ما بتفيدنا بي حاجة . وبالمناسبة لة اسئت لي
مليون ما حا ارد ليك الاساءة لانه ما محتاج بس
كل الدايرة اقوله ليك سيب الحماقات والتهور خليك
رجل كول .

وبكرر ليك انا ما فاضية ارد علي المهاترات من
حماقة وتهور لانها بتنحسب علي يا كيشة هههههه

كمان نضيف لي صفاتك : حماقة وتهور والباقي فوق !
خخخخخخخخخخخخخخخخخخخخخ

النطيط دا كله و الحالة ما فاضية!!
الله لا ورّانا فضاك أكان كدي :)

ايوا خليك كدا رد بهدؤ الحماقات والتهور
والكلام الكتير بخليك تغلط ولو لاحظت لي
انا بي قلة ادبي دي ما برد علي الاساءات
لانه محسوبة علي وما مستعدة عشان واحد
زيك متهور واحمق وما عنده موضوع اخسر
الناس العظماء . دي كل الفكرة .

نرد علي سؤالك الوجيه :
النطيط دا كله و الحالة ما فاضية!!
الله لا ورّانا فضاك أكان كدي :)
والله ما فاضية يا ود البشري وما بجيبني
الا المواضيع الساخنة البجي عشان اشارك
فيها . زي ما تقول كدا انا ما النوع البضيع
زمنه في البسوي والما بسوي .

اها اي سؤال تاني ؟ حاضرين .

بي قلة ادبك ما بتردي على الاساءات!! ما شايفى التناقض في العبارة دي؟ طيب لزومها شنو قبة الادب من الأول وخليك محترمة وما تبادري بقلة الأدب و الاساءات عشان ما يترد ليك عليها اساسا
و شوفي المصيبة التانية
ما بتردي على الاساءات عشان ما تخسري العظماء!! يا النبي نوح! انت جادة في كلامك دا ولا استهبال كالعادة؟ مصيبة لو كنتس جادة ياتهم ديل العظاماء الخايفة تخسريهم ديل؟ نعلّهم ناس يا مناضلة يا كلسة يا شفيفة!
ثم شنو النفاق دا, ما عايزة تردي عشان ما تخسري زول يعني لو في مكان تاني ما بشوفوك فيه العظماء ديل عادي مكن تردحي وكدا مش هههههه

بعدين فكينا من قصة ما فاضية دي يا مني يا اختي انت فاااااضية بل افضى من الفراغ اتسلف
وفاضية جوة وبرة كمان و ابلغ دليل على فضاك علو الضجيج البتصدري كحال الأواني الفارغة دائما
فا شنو .. روقي و احلي و كفاية تنفخي روحك مهما فعلت لن تملي الفضا الجواك

ما قلت ليك مراية :)

لو وعدتك حا اسمع كلامك حا تسمع كلامي ؟
روقي و احلي و كفاية تنفخي روحك مهما فعلت لن تملي الفضا الجواك

اسمع نصيحتي :
الكلام البتوجهو لي دا كلوووو ما بحلك ولا حا يعالج حالتك
كلامي ليك واضح خليك رجل كووول ورد بطريقة لائقة ..
وخليك رجل موضوعي وابعد من القيل والقال والردحي ولوك
الكلام ! يا ود البشري انت عارف بلدك قاعدة تنهار اقتصاديآ؟
انت عارف البلد في حافة الهاوية ؟ والسبب كلوووو ديل الانت
اسه داير دليل قالوا كلام ولا ما قالوا !!

اللهم اجرنا في مصيبتنا .

انتي ما مؤهلة لنصحي بل لست مؤهلة لنصح ايّا كان, وجهي النصح لنفسك و اعملي على معالجة مشاكلك واسلوبك و ارفعي من مستواك حتى بعد كدا لو فضل وقت وجهد حاولي انصحي الآخرين :)

عمومآ دي آخر مداخلة .


لانه حالتك مئيوس منها !

Quote: عمومآ دي آخر مداخلة .

ما اظن, عادي بتقوليها كم مرة و عادي برضو ترجعي في كلامك
مصداقيتك زي مصداقية الراكوبة واحد

يا ود المشرف المداخلة دي نزلتها في بوست دكتور سيف لكن لقيت الانسب ايرادها هنا فا الموضوع هناك مختلف :

قلت:

Quote: وجايي يبرر الكلام ده بي انهم بموتوا في نهاية الامر .. ده ياهو الكلام الما مقبول .. مافي وزير في دولة محترمة ممكن يقول الكلام ده ..

تعليقي كان: متأكّد يا دوك انو قال كدا ؟

الراكوبه اوردت نفي وزارة الصحة ولا عملت نايمه ؟

سلامات يا ود البشرى
والله اتلومت مع بت عمسيب وما عارف ليه الكلام وصل المواصيل دي.
عهدنا بك دائما ترد على لُب الكلام وتتجاوز التفسيرات الملتبسة وسوء الفهم.
انا شخصيا احترم حرصك على المصداقية لكن كمان منى كل القالتو هو انو
الكلام لو الزول ده قالو او ما قالو دي ما المسألة المهمة حسب رايها.
ما عارف ليه ما رضيت منها تحديدا التعبير عن رايها ده؟
ولمنى برضو اقول انو كان ممكن صياغة رأيك بطريقة لا تتيح فرصة لإساءة فهمه
او ان يكون سبب في ضيق من توجهين له الكلام.
أرجو مخلصا ان يدوم الود بين الجميع.

يا ابو السيوف الرأي مهما اختلف مع طرحي يجد عندي كل الإحترام, لكن الوصابة و الاستذة و تحديد الأولويات وتحديد أكتب وما تكتب في شنو هذا ليس طرح رأي مختلف
لكن رغم كدا ممكن ابلع وافوّته بمزاجي أحيانا و أحيانا لا
دي واحدة و التانية تعابير زي لواكة كلام و قلنا وقالو دي قلة أدب لا أكثر تجاهلها مرّة و اتنين و ثلاثة على أمل ان تفهم ان هذا ليس الأسلوب المناسب للمخاطبة لم ينجح للأسف فكان لابد من مقابلة هذه للجلافة و التجاوز بما يناسبها و إيقافها عند حدّها

في تعليق يا دوك على موضوع البوست - وهو هل قال قردة هذا التصريح ام الموضوع شتلة!
انا سحبت تساؤل مشابه من بوستك لأنه يتناول الموضوع من زاوية مختلفة تماما

Quote: الراكوبه اوردت نفي وزارة الصحة ولا عملت نايمه ؟

ما بقدر اجزم يا معاوية غايتو قوقل ما جاب لي حاجة
ممكن واحد من روّاد الراكوبة يفيدنا

تحياتي ياشباب...
اتمني ان تجد مداخلتي منكم القبول حتي لوكانت خارج عنوان البوست وساكتفي بعبارة ياهو دا السودان...مصدر الفديو الراكوبة ايضا...
الفديو مهداة اولا لوزيرالداخلية ورئيس جهاز الشرطة ولكل لمن تبقي له حس او ضمئر انساني...

هلا حسين و الهدية مقبولة
مصدر الفيديو ليس الراكوبة بل احد افراد القوة التي مارست هذا الافتراء و التجبر ربما صوره توثيقا لإنتصارهم الباهر على السيدة المسكينة التي لا حول لها ولا قوّة و ليستمتع به بقية افراد القوّة الغائبين عن "غزوة" ست العرقي !!
و الفضل اهداؤه لوزير الدفاع و القائد العام للقوات المسلّحة و لمدير الأمن و لقائد قوات الدعم السريع لأن اليونيفورم الذي يرتديه"المجاهدون" لا يخص الشرطة بل احدى القوّات أو المليشيات العسكرية التابعة لأحد المذكورين أعلاه وليس الداخلية و الشرطة كما كتب من رفع الفيديو ودا عادي ممكن يكون محرر الراكوبة - عندهم سوابق :)

كامل الاستنكار لما جاء في الفيديو ..
وفعلا الناس ديل دعم سريع ..
عيب عليهم هذا الاعتداء الغاشم على هذه الوليه المسكينة ...
شنو يعني تشرب العرقي العاملاهو ...
هل ده عقاب يعني !! ..
أعجز القانون عن تقديم العقوبة المناسبة لها ..
مع حفظ انسانيتها .. بلد هملة وكل زول بيطبق قانونه الشخصي ..
بلا أي خوف من رادع او عقاب ..

آسفين للرد خارج اطار موضوع البوست ..
لكن الامر مستفز واغضبني جدا ..

الموجود في الفيدو يعتبر بلطجة
ولو البلد فيها قانون أو أدنى فهم للشرع
وللدين والإنسانية ..لما كان هذا سلوك الشرطة
الله المستعان...
عشان كدي قال صلى الله عليه وسلم:
صنفان من أهل النار لم أرهما بعد : رجال معهم سياط
كأذناب البقر يضربون بها الناس ، ونساء كاسيات عاريات
مائلات مميلات على رؤوسهن كأسنمة البخت المائلة.
رواه الإمامين أحمد و مسلم
فهؤلاء عشمهم في الجنة عشم ابليس
إلا إذا تابو وأقلعوا

السوط الذي بشبه أذناب البقر هو السوط
السوداني تحديدا والسوط في البلاد الأخرى
يختلف والسوط السوداني اشد السياط إيلام
وهو مطابق للوصف ...مما يدل أن الحديث
جاء فيما يسمى بشرطة النظام العام تحديدا
التي تزامنت مع تخلى كثير من النساء
عن الزي المحتشم ...فجاء الوعيد لكلاهما
مما يدل على أن الشارع
الحكيم يذم هذا السلوك من الشرطة
في مواجهتها لكل مخالف للشرع...
لأن المنكر لا يحارب بمنكر
فهذه المرأة ربما الحاجة او الجهل دعاها لما
اغترفت

لا عليك يا ود القوز بالعكس التعليق على هذه الجريمة هنا او في اي مكان وتسليط الضوء عليها قد - اقول قد - يحرّك بعضا من ضمير لم يمت بعد أو يدفن تحت ارتال السحت و الفساد لدى قلب مسؤول ما فيأمر بإجراء تحقيق وإنصاف هذه المسكينة ومعاقبة الـ "المجاهدين" السعداء بغزوتهم
و ايضا رفع البوست برضو كويس عسى ولعّل يراه أحد مسؤولي الراكوبة فيعلّق عليه أو يأتينا بما يفيد دعم الخبر الذي نشرته الراكوبة و نفته الوزارة أو بالعدم يعتذر عن التسرع في نشر شتلة كاملة الدسم من خيال مراسلها أو غيره و على اساسها نُشرت عشرات المقالات و التغريدات و الكاريكاتيرات

أنا ما عارف الناس ليه دايرة تخت نفسها
في موضع من أخذته العزة بالاثم
الراكوبة أو أي وسيلة أو شخص معارض أو حكومة
أو رمادي (زي ود البشرى دا هههه)، ما منزه من ارتكاب
الأخطاء.
ارتكب خطأ ننبه وننتقده، وأحسن نقول ليه أحسنت

الراكوبة شتلت الخبر وعارفاهو بيلقى رواج

والبينة على من أنكر
وهسع الراكوبة تجيب التسجيل وتحسم الموضوع
ما جابته تبقى كضابة وما بتحترم القاريء بتاعها.

الموضوع بسيط لا داير ليه قومة ولا قعدة.

قبل كدا في تصريح للشرق الاوسط قاله
مصطفى عثمان ونكره الجريدة جابت التسجيل

هسع خبر الراكوبة منجور لحين تورد الدليل
ودا ما بيمنع انها بتجيب اخبار كتيرة
جادة وفاتحة نافذة مهمة لينا كناس عايشين
برة السودان ومشكورة على الخدمة دي

غريبة يا الصادق كون الواحد ينجر ليه خبر قدر الليلة وبكرة من فراغ كدا بس ولا قادر اتصوّر المسالة دي
لابد من تيراب ما للخبر - المنطق بقول كدا
تيراب ما تمّت سواطته و اضافة موية ثم ترك ليخمر و من ثم اضيفت البهارات و المحسّنات قبل ادخاله الفرن ليخرج وجبة هراء شهية تسر الشامتين وناس : بكون قال
وقدّمت مع احلى سيرفيس مكوّن من سلطة نضال على حمّص هتافات و تبّولة كرّاهية
ليتلقّفها الكتّاب و المعلّين و تشتعل الأسافير - وربّما الصحف - بالمقالات الساخرة و النكات و النقد و ينام الجميع مرتاح الضمير أن أدّينا نضال يومنا وليلتنا
السؤال الذي يتبادر لذهني زي ناس السراج و الفاتح جبرة و جماعة المقالات موقفهم بكون شنو لمّا يتبيّن لهم أنهم شيدّوا قصورا من رمال على أساس هراء خلّاب لا أكثر؟
ناس الأسافير ما بتفرق معاهم كتير ياها النكتة و الضحكة و البوست تراهو كلّو الهوا شايلو وبكرة يتنسي أو يتراجع لأسفل الصفحة لكن ناس المقالات ديل القاعدة في ارشيف الصحف دبارتهم كيف مع هلهلة مصداقيتهم لدى القرّاء؟
امّا الراكوبة فأظنها لا يهمّها المصداقية كثيرا بقدر ما يهتموا بالأثر و الكليكات للخبر المنجور أو المتموم موية

جاني مزاج ارفعه ساي كدا